Noda iVakatakilakila Cecere Duadua
Na matabete ni Kalou … sa dodonu me tiko ena Lotu dina ni Kalou ka ni sa ka cecere kina.
E volekata ni 70 na yabaki sa oti ena gauna a se daunivakasala tiko kina o Peresitedi David O. McKay ena Mataveilutaki Taumada ni Lotu a taroga na ka oqo ki na ivavakoso era a soqoni tiko ena koniferedi raraba: “Kevaka o ni tarogi [oi kemuni] yadua ena gauna oqo me kaya ena dua ga na iyatuvosa … na ivakatakilakila cecere duadua ni Lotu i Jisu Karisito ni Yalododonu edaidai, na cava beka ko ni na kaya?”
“Au na kaya,” a sauma mai , “o ya na … kaukauwa vakalou ka vakatakilai sara ga mai vakadodonu.”1
Na kaukauwa vakalou o ya, sai koya, na matabete tabu.
A semata o Peresitedi Hinckley na nona ivakadinadina ena nona kaya, “[Na matabete] sa ilesilesi ni kaukauwa vakalou, ka duidui sara mai na kaukauwa kei na lewa e vuravura oqo… . Oqo walega na kaukauwa e vuravura e basikata yani na ilati ni mate… . Ni sega na ka oqo sa tu na lotu ena yacana walega, [e dua na lotu] e sega vua na kaukauwa me qarava na cakacaka ni Kalou.”2
Ena va walega na macawa sa oti a vosa o Peresitedi Faust ki na dua na nodra lotu na gonevuli e BYU, “Na [matabete] e lewa ka cicivaka na gacagaca kece ni Lotu. Kevaka e sega na idola ni matabete kei na kaukauwa, ena sega ni rawa ni dua na Lotu.”3
Meu tekivu ena bogi nikua ena tolu na vakasama leleka (ka na sema kina e vuqa tale) me vakamatatataki vakavinaka kina e dua na vakasama : ni matabete oqo sa mai vua na Kalou, kei na kena idola, na kena cakacaka tabu, na kena yavu vakalou kei na sala ni veika “sa vauci mai lomalagi na veika sa vauci e vuravura” ka sa dodonu me tiko ena Lotu dina ni Kalou ka ni sa ka cecere kina, ni kevaka e sega oqo e sa na sega na Lotu i Jisu Karisito ni Yalododonu Edaidai.
Ena yabaki ni ivakananumi oqo ka marautaki tiko kina na ika 200 ni yabaki ni nona sucu na parofita o Josefa Simici kei na ika 175 ni yabaki ni kena sa mai tauyavutaki na Lotu, au gadreva meu semata na noqu ivakadinadina—kei na noqu vakavinavinaka tawamudu ni kena—vakalesui mai na matabete tabu oqo, na itavi tabu, na isolisoli cecere oqo, kei na kena ilesilesi ena noda bula ena yasa ruarua ni ilati.
Na cakacaka bibi ni matabete ena kena semati na gauna kei na tawamudu sa mai vakaraitaka na iVakabula ena gauna a tauyavutaka na Nona Lotu ena Nona cakacaka e vuravura. A kaya vei Pita na iliuliu ni Nona iapositolo, “Au na solia talega vei iko na idola ni matanitu vakalomalagi; ia na ka kecega ko sa vauca e vuravura ena vauci mai lomalagi; ia na ka kecega ko sa sereka e vuravura ena sereki mai lomalagi.”4 Ni oti e ono na siga a kauti iratou o Pita, Jemesa kei Joni ki na dua na delana e a laki vakamataliataki ena lagilagi e matadratou. Era a qai rairai talega mai ena lagilagi o ira na parofita mai na itabagauna taucoko, ka okati kina o Mosese, Ilaija kei Ilaisa,5 ka ratou vakatikora vakakina na idola kece kei na kaukauwa e tu vei iratou.
E ka ni rarawa ni ra a vakamataei na iapositolo oqori se kau tani mai vuravura ka vakakina na nodra idola ni matabete, ka yaco kina e 1,400 na yabaki ni yali ni matabete kei na yali ni kaukauwa vakalou mai vei ira na luve ni tamata. Ia e tiki ni cakamana ni gauna oqo kei na itukutuku makawa vakasakiti eda marautaka ena bogi nikua sai koya na nodra lesu mai ena noda gauna oqo na italai vakalomalagi vata ga oqori kei na kena vakalesui tale mai na kaukauwa vata ga oqori era taura tu me ra vakalougatataki kina na itabatamata kece sara.
Ena Me ni 1829 ena gauna a vakadewataka tiko kina o Josefa Simici na iVola i Momani a raica e dua na ka me baleta na papitaiso. Erau a veivosaki sara kei nona vunivola o Oliver Cowdery, ka rau mani masulaka vakabibi vua na Turaga na ka oqo. A mani vola kina vaqo ko Oliver: “Keirau sa masulaka vakaukauwa ena vu ni yalo i keirau—me keirau kila na sala me rawati kina na veivakalougatataki ni papitaiso kei na Yalo Tabu… . Keirau a masulaka vagumatua … na lewa ni matabete tabu, kei na kaukauwa ni kena vakayacori vakakina.”6
Ena kena saumi mai na “masumasu vagumatua” o ya, a rairai mai kina o Joni na Dauveipapitaisotaki, ka vakatikora na idola kei na kaukauwa ni Matabete i Eroni, ka sa soli tu vei ira na cauravou era tiko ena ivavakoso oqo ena bogi nikua. Ni oti e vica na macawa eratou a lesu mai o Pita, Jemesa kei Joni me ratou vakatikora na idola kei na kaukauwa ni Matabete i Melikiseteki, ka vakakina na idola ni cakacaka vakaiapositolo. Ni sa mai tara e dua na valetabu me ra na tadu mai kina o ira na italai vakalomalagi, a qai yaco me vakakina ena ika 3 ni Epereli 1836, e dua na ivakaraitaki ni gauna oqo ni Ulunivanua ni Veivakamataliataki, ka tiki ni dua na ka a vakatoka o Peresitedi Hinckley na “sovaraki e Kirtland” ni vakatakila ka a rairai mai kina ena lagilagi na iVakabula, vata kei Mosese, Ilaija kei Ilaisa vua na Parofita o Josefa Simici kei Oliver Cowdery ka vakatikora vei rau na turaga oqo na idola kei na kaukauwa ni nodra dui itabagauna. E a mai tini na ilakolako o ya ena vakuru ni vosa oqo: “Ia sa soli ki ligamudrau na idola ni cakacaka me vakayacori ena gauna oqo.”7
E sega ni kurabuitaki kina na nona mai okata na Parofita o Josefa ena Yavu ni [noda] Vakabauta lekaleka ka matata ni “keimami vakabauta ni sa kilikili me lesia na tamata na Kalou ena parofisai, kei na veitabaki ni liga, me soli kina vua na kaukauwa me vunautaka na itukutuku vinaka ka vakayacora na veicakacaka tabu vakalotu.”8 E matata vakavinaka, ni veiqaravi ena veivakadonui vakalou e levu cake sara na ka ena gadrevi kina mai na dua na veidinadinati walega vakatamata. Ena sega ni vakayavutaki mai na vuli ka vakalotu se na nodra veivuke na ivavakoso. E sega, ena cakacaka e v akadonuya na Kalou sa dodonu me tiko kina e dua na kaukauwa e cecere cake sara mai na veika era sa rawata rawa tu o ira na lewe ni ivavakoso, se o ira e tautuba, se o ira era vuli semineri tiko—oqo e dua na ka dina ka vuqa vei ira na dau vakasaqaqara dina vakayalo era a kila ka vakaraitaka makawa tu mai ka yacova yani na gauna ni Veivakalesui mai.
Sa dina sara ni so, ena gauna o ya, era sega ni vinakata me ra kaya na nodra italatala ni tu vei ira na dodonu ni qaravi ni sakaramede” ia e vuqa era gadreva na matabete mai vua na Kalou ka ra veilecayaki se evei na vanua me ra kunea kina.9 Ena yalo o ya sa dodonu me ra kune vakacegu kina o ira era a veilecayaki tu ena vuku ni ka a tukuna ena yaloqaqa o Charles Wesley, ena kena sa vakalesui mai na matabete ena ivakatakila vei Josefa Simici. Ka rau veitawasei kina vakayalo kei na tacina kilai levu cake o John ena vuku ni nona lewa o John me veitabaki ni sega tu vua na kena dodonu, a vola kina vaqo ena matadredredre o Charles:
“E rawarawa nodra vakatikori na bisopi
Me ra marautaka na tagane kei na yalewa:
Na ligai Wesley e tabaki Coke
Ia o cei a tabaki koya?”10
Ena kena saumi na taro veibolei o ya, oi keda ena Lotu i Jisu Karisito sa vakalesui mai e rawa ni da sema lesu na dodonu vakabete e vakayagataka tiko o koya na dikoni vou duadua ena tabanalevu, o koya na nona bisopi ka liutaki koya, kei na parofita ka liutaki keda kece tiko. Na isema e lesu tale ena kena veitarataravi sega ni cavuka vei ira na agilosi dauveiqaravi ka ra lako mai vua na Luve ni Kalou o ya e yaco sara vei ira na italatala vakalou mai vua na Luve ni Kalou Vakataki Koya, ka kauta mai na isolisoli cecere oqo mai lomalagi.
Eda gadreva na kena kalougata— ena Lotu, vakatamata yadua kei na matavuvale ena loma ni Lotu. Oqo na kena ivakaraitaki.
Au a tukuna taumada na gauna mai Kirtland ena itukutuku makawa ni Lotu. Na yabaki 1836 kei na 1837 a gauna dredre sara me vaka ga a sotava na Lotu ni se qai tauyavu—ena bula vakailavo, vakapolitiki kei na kena cicivaki. Ena lomaocaoca oqo a vakatauca o Josefa Simici e dua na lewa vakaparofita me talai ira yani e so na nona tamata nuitaki (o ira sara ga na Kuoramu ni iApositolo Le Tinikarua) ena kaulotu ki vanua tani. Oqo e dua na vakatulewa qaqa ka vakalou, ka na yaco e muri me vakabula na Lotu mai na veivakaleqai e dau yaco, ia ena gauna o ya sa dua dina na icolacola bibi vei ira era lako yani ka mosi vakalevu cake beka vei ira era vakatawa tiko mai vale.
Meu cavuta mada na vosa oqo nei Elder Robert B. Thompson.
“Sa yaco mai na siga me ra sa biubiu kina na iTalatala Qase ena ilakolako ki Igiladi, au lako ki na vale nei Baraca [Heber C.] Kimball meu taroga na gauna cava e [sa na biubiu kina], me vaka niu namaka tiko me keirau na sala vata ena rua se tolu na drau na maile, niu nakita meu na veiqaravi e Kenada ena gauna oya.
“A tadola toka na katuba, kau curu sara ka kidroa ena ka au raica. Au a vinakata meu lesu, niu nanuma niu sa curu vakailoa, ia au vakila niu sa vesuki. Na turaga tama oqo a tagi tiko vua… . na Kalou [ena vakamamasu], me, o Koya oqo sa dau kauwaitaki ira na separo, ka vakani ira na reveni ni ra tagi me vakarautaka na gagadre nei watina kei ira na lalai ena gauna e lako tu kina. Ni oti, me vakataki ira na peteriaki kei na kaukauwa ni nona ilesilesi, e qai tabaka yadudua na buredeladra ka solia vei ira na veivakalougatataki vakatama, … ka soli ira yani ki na veikauwaitaki kei na veitaqomaki ni Kalou, ena gauna ena gauna ena vunautaka tiko kina na Kosipeli ena dua na vanua tani. Ena nona vakayacora na veivakalougatataki oqori sa vaka e voqa lailai na domona mai na nodra mamakeukeu o ira era wavoliti [koya] ka [ra saga ena yalo vakagone me ra kaukauwa ia era a sega ni rawata]… . A tomana tale, ia sa tarai vakalevu sara na yalona me na vakayacora… . Sa dodonu me na cegu mada, ena gauna … e tuturu kina na wai ni matana, ka sa ivakaraitaki ni veika sa tu e lomana. E sega niu kaukauwa sara meu vakasuka,” a kaya o Baraca Thompson. “Ia au a qai tagi vata kei ira ena vukudra. Ena gauna vata o ya au a vakavinavinaka niu donuya e dua na madigi meu raica kina e dua na ka vaka o ya.”11
Na ivakaraitaki o ya sa dau vakayacori tikoga ena veigauna kece sara ka sega ni wili rawa ena Lotu i Jisu Karisito ni Yalododonu Edaidai—o ya ena rere, gagadre, veikacivi, veivakarerei, tauvimate, vakacala ka kei na mate. Au dau vakaitavi ena veigauna vakaoqo. Au sa raica na cakacaka ni kaukauwa ni Kalou ena noqu vuvale kei na noqu ilesilesi. Au sa raica na kena vakatalai na veika butobuto, ka vunauci na draki. Au sa kila na ibalebale ni kena toosoi na ulunivanua ni veika dredre kei na tawasei ni Wasa Damudamu ni veika rerevaki. Au sa kila na ibalebale ni “lako siviti ira” na agilosi dauveivakarusai.12 Ni sa ciqomi na lewa ka vakayagataki na kaukauwa ni Matabete Tabu, me vaka na iLesilesi ni Luve ni Kalou13 sa dua dina na kalougata cecere vei au kei na noqu vuvale kau sa nuitaka tu ena vuravura oqo. Sa ikoya o ya, me itinitini, sa ibalebale ni matabete ena veigauna—e sega ni vakatautauvatataki rawa, e sega ni mudu, ka tu vakarau me veivakalougatataki.
Ena kena vakavinavinakataki na kalougata vakaoqo au duavata kina kei kemuni kei na nodra matasere na bula kei na mate ena lagasere ena yabaki ni vakananumi oqo, “Praise to the Man who Communed with Jehovah.”14 Ka veivosaki vata kei Atama, Keverieli, Mosese kei Moronai, Ilaisa, Ilaija, Pita, Jemesa, kei Joni, Joni na Dauveipapitaisotaki kei na vuqa tale.15 Sa dina “Jesus anointed the Prophet and Seer.”16 Oi keda na gone kei na qase, cauravou kei na turaga tama kei na luvena me da lomana na matabete ka a vakatikori mai vua na idola ni matabete kei na cakacaka tabu ka sa kena sala duadua ga ena vakavotukanataki kina na kaukauwa ni bula vakalou ni kevaka e sega kina ena sega ni rawa ni vakavotukanataki.17 Au sa vakadinadinataka na vakalesui mai ni matabete kei na ivakatakilakila cecere qaqa ni Lotu dina ni Kalou ka sa tuvanaki tu mai, ena yaca i Koya e nona na matabete oqo, na Turaga o Jisu Karisito, emeni.