Kena iSau na Vakabauta
Nanuma ni vakabauta kei na talairawarawa era sa isau ni veika kece—kevaka sara mada ga e yaco na leqa; vakabibi ni sa yaco na leqa.
E na itekivu ni yabaki 1950 vakacaca e a vala voli kina o Amerika ena iyarabale mai Korea. Me vaka ni sa tu na lawatu ni matanittu ena gauna o ya, e sega kina ni rawa ni ra laki kaulotu na cauravou, ia me ra laki curu mada ki na mataivalu. Me vaka niu sa kila rawa tiko oqo, au sa vola yaca sara meu curu ena Army Reserves Officers Corp ena gauna au curu kina ki na koliji. Na noqu lalawa meu na laki turaganivalu me vakataki tuakaqu. Ia ena noqu a gade mai ki vale ena vakacagicagi ni Siganisucu e mani kacivi au kina ki na nona valenivolavola na neitou bisopi, o Vern Freeman. E vakasalataki au ka kaya ni sa veivosakitaka e dua na veiyalayalati kei na matanitu o Amerika, e dua na iliuliu ni lotu gone sara o Baraca Gordon B. Hinckley me vakatara e yadua na tabanalevu ni Lotu mai Amerika, me kaciva e dua na cauravou me laki kaulotu. Na cauravou oqo ena vakadonui vakalawa me toso na nona gauna ni curu ki na mataivalu ena gauna ni nona kaulotu.
E tukuna o Bisopi Freeman ni sa masulaka tiko mai ka sa vakila ni sa dodonu me vakatura cake na yacaqu meu sa na laki kaulotu ka matataka na neitou tabanalevu. Au vakamacalataka vua niu sa vakadavora oti tu na noqu lalawa—au sa volayaca oti ena ROTC ka namaka tiko meu sa na dua na turaganivalu! Sa qai vakamacalataka sara vakamalua vei au na noqu bisopi ni sa vakauqeti me vakatura meu sa na laki kaulotu ena gauna sara ga o ya. E tukuna, “Lako ki vale ka laki veitalanoa vata kei rau na nomu itubutubu qai lesu tale mai vei au mo mai tukuna na kena macala ena yakavi nikua.”
Au gole ki vale ka laki wasea sara vei rau o tamaqu kei tinaqu na ka sa yaco. Erau kaya ni sa vakauqeti na bisopi ka sa dodonu meu ciqoma na veikacivi ni Turaga meu laki kaulotu. Sa raica rawa sara tu ga o tinaqu na noqu rarawataka niu kila ni sa na sega ni rawa meu na laki dua na turaganivalu ena gauna sara ga o ya. Sa qai kaya:
“Mo vakararavi vei Jiova ena vu ni yalomu; ka mo kakua ni vakararavi ki na nomu yalomatua.
“Mo vakarorogotaka vua na nomu sala kecega, ia ena vakadodonutaka na nomu ilakolako ko koya.”1
Au lesu tale ena bogi ko ya ki na valenivolavola nei bisopi ka laki vakadonuya na nona veisureti. Sa qai kaya meu lako ki na Selective Service Office ka laki tukuna vei iratou na ka au sa digitaka.
Ena gauna au cakava kina na ka o ya, au kurabui ni kaya mai vei au na marama ka jeameni tiko ni Selective Service Office, “Kevaka mo sa vakadonuya na kaci ni kaulotu sa na soli vei iko na notisi ni veikacivi mo veiqaravi ena mataivalu, ni bera ni ko na mai curu tale ena ROTC ni mataivalu. Ko na veiqaravi me vaka ga e dua na sotia ka sega ni vaka e dua na turaganivalu.”
E dina ni mai yaco na veisau sega ni namaki oqo, ia e totoka ga na ilakolako ni noqu laki kaulotu. E veisautaka sara ga na itosotoso ni noqu bula me vakataki ira talega era kaulotu. Ia e dei tu na nona ituvatuva na matanitu ka ni se vo tu e dua na vula me oti na noqu kaulotu sa lako yani na ivola ni vanua kei na gauna meu laki ripote kina, meu sa na curu ki na mataivalu.
Ni oti na vuli sotia, kei na vuli turaganivalu, au sa laki veiqaravi sara ena dua na keba ni mataivalu meu laki cakacaka vaka ovisa ni mataivalu. Ena dua na bogi e a soli vei au e dua na itavi meu taqomaka na ilakolako ni nodra kau e so na kaivesu ni mataivalu mai na dua na keba ki na dua tale ena loma taucoko ni dua na bogi.
E laki dua na cegu ni ilakolako oqo ena veimama ni vanua e lakovi. Na turaganivalu ka veiliutaki tiko e vakasalataki keimami me keimami lako ki na valenikana ka laki gunu kofi kina me rawa ni keimami na yadra tiko ena bogi taucoko. Sa raica sara o koya niu sega ni lako. Sa qai kaya, “Sotia, ena gadrevi mo laki gunu kofi me rawa ni ko na yadra tiko ena bogi taucoko. Au sega ni vinakata me dua na kaivesu e dro se me vakatubu mauwe ena gauna au yadra tiko kina.”
Au kaya yani, “I’saka, ena yalovakarokoroko au na sega ni lako. Au a Momani, kau sega ni dau gunu kofi.”
E sega ni via kila na ka au tukuna yani, ka baci tukuna tale mai meu lako ki gunu kofi.
Au se baci vakasuka tale na ka e tukuna. Au laki dabe ena idabedabe e muri ni basi ka qumia toka e ligaqu na noqu iyaragi ni vala, ka mai masu lo toka yani meu na yadra tiko ka me kakua niu na vakayagataka. Sega sara ga ni dua na ka e yaco ena ilakolako o ya.
Ena vica na siga ni oti ko ya e a sureti au na turaganivalu vata tikoga o ya ki na nona valenivolavola me keirau laki veivakatarogi. Sa qai kaya vei au ni dina ga ni a leqataki au niu na sega ni rawa ni yadra tiko ena ilakolako ena bogi taucoko o ya, ia e vakavinavinakataka niu a dei ena ka au vakabauta. Sa qai vakurabuitaki au ni kaya, ni o nona ivukevuke sa lesi ki na dua tale na vanua, ka sa vakatura cake meu sa nona ivukevuke vou!
Ena levu sara na gauna ena rua na yabaki ka tarava, e soli vei au na gauna meu laki veiliutaki kei na so na itutu vakamanidia. Na ka ga e qai yaco, ni levu sara na ka au sega ni tadra meu sotava au a qai mani sotava.
Mai na italanoa oqo—kei na levu sara ka tautauvata ena noqu bula taucoko—au sa vulica kina ni vakabauta sa isau ni ka eda dau vakananuma, na ka eda kauwai kina, kei na bula rarawa. Na vakabauti Jisu Karisito, na Turaga, sa ikoya na kaukauwa ka na rawa ni veisautaka na noda bula ka na kauti keda yani ki na veivakabulai.
E rawa vakacava me da tara cake na vakabauta? Ena ka sara ga eda cakava. E dodonu, me da “lako ka kitaka na ka sa vakarota na Turaga,”2 me vaka na ka e tukuna o Nifai. Sa dodonu meda vakararavi vei Jiova ena vu ni yaloda, me vaka ga e a vakavulica vei au ena yalololoma o tinaqu. Sa vakavinavinakataki, ni levu sara na gauna ni da dau vakaraitaka na noda vakabauta ena qaravi ni cakacaka ni Turaga, eda na kunea ni da na vakalougatataki sara vakalevu ena noda dau talairawarawa.
Ena so na gauna, eda dau raica ni dina ga ni da sa cakava tiko na noda vinaka taucoko ena qaravi ni Turaga, eda se rarawa voli ga. Ko ni na kila tiko beka e dua ka sotava tiko na mataqali bolebole lelevu vakaoqo: vakasamataka na itubutubu e tauvimate na luvena, o koya era masulaka ka lolovaka ena yalodra taucoko kei na lomadra kecega na lewevuqa, ia oti o ya ga sa mai mate yani. Vakasamataka talega na daukaulotu ka solibula me laki kaulotu, sa qai tekivu tauvi koya e dua na mate bibi ka vakavuna me sa paralasi mai ka mosi tu ga ena veigauna. Na marama ka bulataka tiko na nona vakabauta ka talairawarawa, ia, e sega ga ni rawa ni vakaluveni me vaka na gagadre ni lomana. Se na marama ka tovolea tiko ena nona igu taucoko me qarava na nona itavi vakatina vakaradinivale, ia e qai biuti koya na turaga watina. Na ivolanikalou e bini tu kina na kedra italanoa na tamata era vakaraitaka na nodra vakabauta ka ra sa qai vakabulai, me vakataki Setareki, Mesaki kei Apeti-niko ena lovo bukawaqa. Ia, e tiko talega ena ivolanikalou na ivakaraitaki ni tamata vakabauta ka ra sega ni taqomaki mai lagi ena gauna era sotava kina na leqa, O Apinatai e a kama bulabula, o Joni na Dauveipapitaiso e musu na domona, o ira na vakamuri rau o Alama kei Amaleki era kama bulabula. Ni da caka vinaka tiko e sega ni kena ibalebale ni na toso vinaka na ka kece. Na kena ki ga me da dau nanuma ni vakabauta ga na isau ni veika kece—kevaka sara mada ga e yaco na leqa; vakabibi ni sa yaco na leqa.
Nanuma ni Turaga e sa yalataka ni Na veivuke ni da sotava na leqa. O Koya e dau raici ira sara ga o ira era dau vakararawataki. O koya ga e a kaya, “Sa kalougata ko ira sa dautagi: ni ra na vakacegui.”3
Me tiki tiko ni Veisorovaki, e a sotava na veivakararawataki na iVakabula. E kila na mosi vakayago kei na mosi ni yalo: O Koya e kila na rarawa ni dua na ka e yali kei na veretaki. Ia, o Koya e vakaraitaka vei keda ni loloma cecere, dauvosota, yalomalumalumu kei na talairawarawa sa ikoya na sala ki na vakacegu kei na marau. E tukuna o Jisu, “Au sa laiva vei kemudou na vakacegu, au sa solia vei kemudou na noqu vakacegu.” Ia ena nona vakasalataki keda me da kakua walega ni raica na yasana vakayago, qai kaya tale o Jisu, “Au sa sega ni solia vei kemudou me vaka sa solia ko vuravura.”4 Na vuravura e raica na vakacegu me vaka ni yali na veisaqasaqa se mosi, ia o Jisu e solia na vakacegu se mani vakacava sara na rarawa. Na Nona bula e a sega ni galala mai na veisaqasaqa kei na mosi, ia e galala mai na lomaleqa ka vakaibalebale dina sara. E vola o Pita na iApositolo: “Ia, kevaka dou sa caka vinaka, ka sa vakararawataki kina ka dou vosota ga, oqo sa ka vinaka vua na Kalou.
“Ni dou sa kacivi me vaka kina: ni sa vosota talega na Karisito na rarawa ena vukumudou, a sa laiva vei kemudou na ivakarau, mo dou muria na we ni yavana: …
“Ni sa vakasewasewani ko koya, sa sega tale ni ia na veivakasewasewani; ni sa vakararawataki tiko, sa sega ni vosa vakacudrucudru; sa laivi koya ga vua sa lewa vakadodonu.”5
Ko ikeda kece eda sa vakadonui Jisu Karisito me sa noda iVakabula sa dodonu me da sa vakararavi sara ga vakatabakidua vua na Karisito o Koya ena vakabulai keda ni da sa cakava oti na ka eda rawa ni cakava. Ni da sa vakaraitaka ena doudou na noda vakabauta, ka da toso yani ki liu ena kaukauwa ni loloma i Karisito o Koya ena vakalougatataki keda ka na tuberi keda tiko. O Koya ena vakaukauawataki keda ka na vakacegui keda ena gauna ni veivakatovolei. “Keitou sa lako voli ena vakabauta, ka sega ga ena raica”6 Au masulaka ni o keda yadua me da na vulica me da dau vakararavi vua na Turaga ka vakalevutaka na noda vakabauti Koya.
Oqo, kemuni na tuakaqu kei na ganequ, niu sa mai vakarau tinia, au gadreva meu tukuna e dua tale na iulutaga. Ena loma ni veiyabaki sa oti au sa vakalougatataki ena noqu dau vakaraici Peresitedi Hinckley vakavoleka sara, kau gadreva meu tukuna vei kemuni ni o Peresitedi Hinckley e sega walega ni parofita bula, ia e daurairai bula sara talega. E raica na ka era sega ni raica na lewevuqa. E tiko vei koya na isolisoli ni kila na ka e dau raica na ka vinaka kei na ka e dina. Au via vakaraitaka vua na Turaga na noqu vakavinavinaka ena nona taqomaka tiko na bula nei Peresitedi Hinckley kei rau na nona daunivakasala me rawa kina me ratou liutaka tiko mai na Lotu ena loma ni tini na yabaki sa oti. Ena ruku ni veiliutaki vakalou nei Peresitedi Hinckley, sa mai vakalougatataki kina na Lotu, e levu e sega sara tu ni laurai. Au vakauqeti kemuni sara vakabibi mo ni vakamuria na nona ivakasala kei na veituberi ka ni sa dina sara, “Raica sa vakatubura na Turaga e dua na parofita vei ira na nona tamata.”7
O Jisu na Karisito. O Josefa na parofita ni Veivakalesui mai. O Peresitedi Gordon B. Hinckley sai koya na noda parofita bula. Ena yaca i Jisu Karisito, emeni.