Na Vua ni iMatai ni Raivotu
Au okati Josefa Simici vata kei ira na noqu itokani ka ra a vukei au ena nodra ivakadinadina meu vakatubura na noqu ivakadinadina vakataki au me baleti koya na iVakabula.
E se qai oti walega oqo e ono na vula mai na gauna o ni a tokoni au kina na lewenilotu yalodina ni Lotu i Jisu Karisito meu lewe ni Kuoramu ni iApositolo Le Tinikarua. E vuqa sara era a kurabui ena veikacivi oqo, vakabibi o iratou na makubui keirau, ka ra kaya, “Ia, o koya e neitou Tutu! E tamata walega. E dau qito vata kei keitou, ka dau kotiva na ului keitou!”
Ni mai cava na koniferedi ni Okotova, o au kei na marama watiqu keirau a veitalanoa vata kei ira na luvei keirau ena talevoni, ka kaya mai e dua na makubui keirau, “Me vaka ni keimami sa rui yawa mai vei iko ka sega ni rawa ni laki tiko mai kei iko e Salt Lake Siti, vakacava mo a bau yaloyalo mai vei keimami ena gauna ni nomu vosa ena koniferedi.” Keirau se sega tikoga ni sota vata kei ira na luvei keirau kei ira na makubui keirau me yacova mai na gauna ni koniferedi raraba oqo, o koya gona au sa yaloyalo tiko yani kina oqo nikua, ena vakanuinui ni na vakamarautaka e dua na makubuqu. Au yaloyalo talega yani vei kemuni na lewenilotu totoka ka sa rui bibi ka vakavinavinakataki vakalevu na nomuni dau veimasulaki ka lomani keirau vakaveiwatini.
Ena gauna ni noqu tubu cake e Jamani, au a lotu ena vuqa na veisala kei na veivanua—ena so na veirumu lokumi e muri, ena veivila, kei na veivalenilotu vakasakiti ni gauna oqo. O ira kece na veivale oqo e tu vata kaya e dua na ka bibi me baleti ira: e tiko kina na Yalo ni Kalou ka dau vakilai kina na nona loloma na iVakabula ni keimami dau soqoni vata vakatikina se matavuvale ena tabanalevu.
E tiko na kena oqani cagi makawa na valenilotu e Zwickau. Ena vei-Sigatabu e dau lesi tu e dua na gonetagane me veibiliyaka tiko na iuli ka vakavuna me rorogo rawa kina na oqani. Ni se bera mada ga niu dua na lewe ni Matabete i Eroni, au sa dau marautaka ena so na gauna meu veivuke ena itavi bibi oqo.
Ni ra dau lagata tiko na lewenilotu na veisere talei ni Veivakalesui mai, au sa dau bili ena noqu igu taucoko me kua kina ni leqa na cagi ni oqani. Na matai daunioqani e dau tukuna vakamatata tu mai vei au seu sa cakacaka vakavinaka tiko se gadrevi meu vakatotolo cake tale vakalailai. Au dau rokova na bibi ni itavi oqo kei na nona veivakabauti vei au o daunioqani. E sa dua dina na yalo ni veivakacegui na veiqaravi ka lewe ni cakacaka levu oqo.
E dua na ka vinaka e dau salavata tiko mai na itavi oqo: o ya ni o koya na dau bili uli oqo e dabe ena dua na idabedabe ka veiqaravi vinaka sara tokaga kei na katubaleka iloilo boroi vakamaqosa ka dau vakarairai totokataka tu na mata ni valenilotu. Na iloilo boroi oqo e droinitaki tu kina na iMatai ni Raivotu, ka tekiduru tiko kina o Josefa Simici ena Veikau Tabu ka qara cake tu ki na rarama ramase mai lomalagi.
Ena gauna ni nodra lagasere na lewenilotu kei na gauna era dau vosa ka soli ivakadinadinakina kina, au dau raica tu na ivakatakarakara ni gauna vakalou uasivi duadua oqo ni itukutuku makawa kei vuravura. Ena mata ni noqu vakasama au raici Josefa ena nona ciqoma tiko na kilaka, ivakadinadina kei na veidusimaki vakalou ka yaco tiko me dua na iyaragi ni veivakalougatataki ena ligai Tamada Vakalomalagi.
E dua na yalo duatani e tarai au niu raica tu yani na iloilo boroi totoka oqo ni gonetagane vakasinaiti ena vakabauta ena veikau tabu ka a masuta ena yalodina na Tamada Vakalomalagi, ka qai rogoci koya ka sauma mai ena yalololoma.
Oqo koi au, e dua na gonetagane ni Jamani ena iKarua ni Valu Levu, kau bula voli ena dua na ivovo ni siti, ena udolu na maile mai Palmyra ena Vualiku kei Amerika ka sivia e dua na drau na yabaki mai na gauna ka yaco kina na ka oqo. Ena Yalo Tabu vata ka dau vakilai e vuravura raraba, au vakila e yaloqu ka vakakina ena noqu vakasama ni a raici rau ka rogoca dina na Domodrau na Kalou kei Jisu Karisito o Josefa Simici. E dau vakaceguya na yaloqu na Yalo ni Kalou ena yabaki ni bula lailai sara oqo ena veivakadeitaki ni dina ni gauna vakalou oqo ka sa isoqoni ni dua na itekitekivu ni cakacaka levu e delaivuravura “ena qiqi yani, io ena roboti vuravura” (V&V 65:2). Au vakabauta na ivakadinadina nei Josefa Simici me baleta na lagilagi ni ka e a yaco ena Veikau Tabu ena gauna oya, kau kila vakakina ena gauna oqo. Sa vosa tale tiko ki na kawatamata na Kalou!
Niu railesuva, au vakavinavinaka vei ira e levu na noqu itau era a vukei au ena noqu se gone meu rawata e dua na ivakadinadina me baleta na Lotu i Jisu Karisito ka sa vakalesui mai. Taumada au dau vakabauta vakarawarawa na nodra ivakadinadina, ka qai dau ciqoma na ivakadinadina vakalou ni Yalotabu ena noqu vakasama kei na yaloqu. Au okati Josefa Simici vata kei ira na noqu itokani ka ra a vukei au ena nodra ivakadinadina meu vakatubura na noqu ivakadinadina vakataki au me baleta na iVakabula. Ni se bera niu vakila na nona vakavulica tiko vei au na Yalotabu ni parofita ni Kalou o Josefa, sa vakila na yaloqu gone ni dua na itokani ni Kalou o koya, ka sa dodonu vakakina me noqu itokani talega. Kau kila ni sa rawa meu vakadinati Josefa Simici.
E vakavulica vei keda na ivolanikalou ni solisoli ni yalotabu e soli vei ira era kerea vua na Kalou, o ira era lomani Koya, ka ra muria na Nona ivunau (raica V&V 46:9). “Raica sa sega ni rawata na i solisoli kece ga na tamata yadua; ia sa vuqa na isolisoli, ka sa soli vei ira na tamata yadua me vaka sa lewa na Yalo ni Kalou.
“Sa soli e dua vei ira e so, ka dua tale vei ira e so tani; io me dui yaga vei ira” (V&V 46:11–12).
Ena gauna oqo au kila ni sa tokoni sara vakalevu na noqu ivakadinadina gone ena ivakadinadina ni Parofita o Josefa Simici kei na vuqa tale na itokani ena Lotu ka ra kila ni “ena cakacaka ni Yalo Tabu … ni sa i Jisu Karisito na Luve ni Kalou; o koya sa vakoti ki na kauveilatai ena vuku ni nodra i valavala ca na kai vuravura” (V&V 46:13). Na nodra ivakaraitaki vinaka, loloma veinanumi, liga dauveivukei, e vakalougatataki au meu ciqoma e dua tale na isolisoli talei ni Yalotabu ka tukuni ena iVolanikalou ena noqu a vakasaqara tiko e levu tale na rarama kei na dina: “Sa soli vei ira e so tale, me ra vakabauta na nodra vunau; raica era na rawata na bula tawamudu kevaka era sa [yalodina] tiko ga”(V&V 46:14). Sa dua na isolisoli totoka ka talei oqo!
Ni da yalomalumalumu vakaidina, eda na vakalougatataki ena isolisoli ni vakabauta kei na vakanuinuitaki ni ka dina e sega ni rairai; ia e ka dina (raica Alama 32:21). Ni da bulataki ira tiko na veivosa ka tukuna vei keda na ivolanikalou kei na noda parofita bula—kevaka sara mada ga e tiko na noda gagadre me da vakabauta—ka sega ni vakanadakuya na Yalo ni Turaga, ena vakamarautaka na yaloda ka da na taleitaka sara (raica Alama 32:26–28).
Ena Nona masu levu ni veisorovaki e a vakavulica kina vakamatata na nona ivakavuvuli ni loloma levu o Koya na iVakabula Vakataki Koya, sega ni vei iratou walega na Nona iApositolo ia vei ira kece na Yalododonu, vakatalega kina vei keda nikua ena vanua cava ga eda tiko kina. E a kaya:
“Ia kau sa sega ni masu ena vukudra walega oqo, ia ena vukudra talega era na vakabauti au ena vuku ni nodra vosa;
“Me ra dua bau kecega; me vaka edaru sa dua bau, Tamaqu, me ra dua bau kei kedaru: me vakadinata ko vuravura ni kemuni sa talai au mai” (Joni 17:20–21 vakuri ena matanivola kala).
Sa ikoya oqo na sala e vakalougatataka kina vakayadua na noda bula na iMatai ni Raivotu nei Josefa Simici, na nodra bula na noda matavuvale, ka vakatalega kina na kawa tamata kece—e sa rawa me da vakabauti Jisu Karisito mai na ivakadinadina ni Parofita o Josefa Simici. Era a sa raica talega e so na veivakamataliataki ka tautauvata kei na nei Josefa o ira na parofita kei na iapositolo ena itukutuku makawa ni kawa tamata. O Mosese e a raica na Kalou e matanavotu ka kila kina ni sa luve ni Kalou,” “raica ko sa vakataki koya na [Nona] Le Duabau ga” (raica Mosese 1:1–6). Na iapositolo o Paula e a vakadinadinataka ni a rairai vua ko Jisu Karisito ka sa vakaturi cake tale ena gaunisala ki Tamasiko ka lesi Paula me dua na Nona iTalatala levu (raica Cakacaka 26:9–23). Ena nona rogoca tiko na nona ivakadinadina ni raivotu mai lagi o Paula, ena gauna ni nona veilewai e Sisaria e a kaya kina na Tui qaqa ko Akariva, “Sa vo e lailai mo rawai au meu lotu va-Karisito” (Cakacaka 26:28).
Ka ra lewe levu sara tale na iapositolo ni gauna makawa era a solia talega na nodra ivakadinadina me baleti Karisito ena yaloqaqa. Sai ira na veivakamataliataki, e liu ka vakakina ena gauna oqo, ka ra dusimaki ira tiko era sa vakabauta, ki na ivurevure vakalou taucoko ni veika dina kei na inuinui—kivua na Kalou, na Tamada Vakalomalagi, kei na Luvena, o Jisu Karisito.
E a vosa mai vei Josefa Simici na Kalou me baleta na nona vakalougatataki keda kece na luve ni Kalou ena Nona loloma kei na veivosoti, ena gauna ni lomatarotaro kei na veilecayaki, veivaluvaluti kei na irogorogo ni ivalu, ni veileqa yadua ka vakatamata. Sa kaya na iVakabula. “Raica, sa dodo tu yani na ligaqu dauloloma; ia ko koya yadua sa lako mai vei au, au na vakabula” (3 Nifai 9:14). O ira kece era sa ciqoma na veisureti oqo “a sa ovici ira e na nona loloma sa sega ni mudu” (Alama 26:15).
Ena vuku ni noda vakabauta na ivakadinadina nei Parofita Josefa kei na dina ni iMatai ni Raivotu, ena vuli kei na masumasu, kaukauwa ena yalodina, eda na vakalougatataki talega ena ivakadinadina dei me baleta na iVakabula kei vuravura, ka a vosa vei Josefa “ena mataka ni dua na siga vinaka sara ena itekivu ni vula itubutubu, ena yabaki e dua na udolu walu na drau ruasagavulu. (Josefa Simici—Ai Tukutuku 1:14).
Na vakabauti Jisu Karisito kei na ivakadinadina me baleti Koya kei na Nona Veisorovaki e vuravura raraba e sega ni dua walega na ivunau yaga ka uasivi vakacioloji Na vakabauta vakaoqori sai koya e dua na isolisoli raraba, lagilagi me baleta na veikawa tamata taucoko e delai vuravura oqo, veitalia na vosa, kaivei, roka, wililewe ni vanua e vei, se draki ni bula vakailavo cava ga. Na kaukauwa ni vei isau ni taro ena tovolei me vakayagataki me kilai kina na isolisoli oqo, ia ko ira ga era na vakila vakatitobu sara sa i ira ka ra sa tu vakarau me ra ciqoma na kena veivakalougatataki, ka salamuria mai e dua na bula e sa makare ka savasava mai na veivutuni dina kei na bulataki ni ivunau ni Kalou.
Ni da mai vakananuma ka rokova tiko na Parofita o Josefa Simici, e dolele yani vua na yaloqu ena vakavinavinaka levu. E a dua o koya na cauravou vinaka, yalododonu, lokumi, vuku, yaloqaqa ka dau yalololoma ka dredre me vakayavalati na nona vakabauta na Kalou. E a tu vua na yalo ni dau sasaga. O koya gona me isau ni nona masu ena yalo e lokumi, sa dolavi tale kina na lomalagi. E a raica dina e dua na raivotu o Josefa Simici. E a kila vakaidina, ka kila ni kila talega na Kalou, ka sa sega ni rawa vua me cakitaka (raica Josefa Simici—Ai Tukutuku 1:25).
Mai na nona cakacaka kei na solibula, sa tu vei au ena gauna oqo e dua na kila vakaidina ni Tamada Vakalomalagi, kei na Luvena, na noda Dauveivueti ka iVakabula, ka sa rawa meu vakila na kaukauwa ni Yalo Tabu ka kila na ituvatuva ni Tamada Vakalomalagi me baleti keda, na luvena. Vei au, sa ikoya dina oqo na vua ni iMatai ni Raivotu.
Au vakavinavinakataka na noqu bula ka niu a se gone au a vakalougatataki ena vakabauta ni parofita ni Kalou o Josefa Simici, ni a raica na Kalou kei na Luvena o Jisu Karisito ena dua na raivotu. E a vakadewataka na iVola i Momani ena isolisoli kei na kaukauwa ni Kalou. Sa vakadeitaki vakavicavata vei au na ivakadinadina o ya.
Me vaka beka e dua e lailai sara mai vei kemuni, ia me vaka na noqu itavi vaka dua na iApositolo i Jisu Karisito, au vakadinadinataka ni bula tiko o Koya, ni o Koya na Mesaia. E tiko e dua na noqu ivakadinadina vakaiau me baleti Jisu Karisito, na iVakabula ka Dauveivueti ni kawa tamata kecega. Au a ciqoma na kila ka oqo mai na vakacegu tawatukuni rawa kei na kaukauwa ni Yalo ni Kalou. Sa gagadre ni yaloqu kei na noqu vakanananu sa ikoya meu kilikili ka yalodina ena noqu qaravi Koya ena gauna oqo ka tawamudu.
Au vakadinadinataka ena yaca i Jisu Karisito, emeni.