Vakataudeitaki Ira Na Wekamu
Sa dodonu mo cakava na ka e dau cakava na iVakabula kei ira na Nona parofita … veiqaravi, vaqaqacotaka na vakabauta, ka maroroi ira era gadreva na nomu loloma kei na veivakalougatataki.
Ena kena saumi na taro, “Vakavuvuli a cava na ivakaro levu ena vunau” e a sauma o Jisu: “Mo lomani Jiova na nomu Kalou ena lomamu taucoko kei na yalomu taucoko kei na nomu nanuma kecega. Ai matai ni vunau oqo ka levu. A sa tautauvata na kena ikarua, Mo lomana na kainomu me vaka ko sa lomani iko. Sa vuni vunau taucoko kei ira na parofita na vunau oqo.”1
Vei ira na Isireli ena gauna makawa ka kauta sobu kina veitabatamata ni veigauna, era sa dau vakaliuca na Nona Parofita mai liu kei na gauna oqo na dina vakalou oqo, ni gadrevi me taukeni na bula tawamudu sa dodonu me tiko e yaloda na loloma: lomana na Kalou na Tamada Tawamudu kei na noda lomani ira na wekada.
Ena iotioti ni vica na aua ni Nona veivakalotutaki e vuravura, e a kaya kina o Jisu vei Pita, “Ia kau sa masulaki iko me kakua ni malumalumu na nomu vakabauta: ia ni ko sa saumaki tale, mo vakataudeitaki ira na wekamu.”2
E tiko vei Pita na ivakadinadina ni cecere ni bula vakalou i Jisu Karisito ka vure mai na Yalotabu. E kila o Pita, kei na nona kila-ka e vure mai na ivakatakila. Ia na nona saumaki, na veisau ni ivakarau ni nona bula, kei na ituvaki ni bula e tu kina, e sa qai matata sara ga ena siga ni Penitiko, ni sa ciqoma na isolisoli ka dau veisautaka na yalo ka vakadinadinataka na Yalo Tabu.
Io kemuni na taciqu kei na ganequ, me vakataki Pita mai liu, sa tiko vei keda na ivakadinadina, ia e ka li ni bula taucoko na veisau? E sega li ni o keda yadua sa dua na ibulibuli ka se bera ni oti e ligana na noda Dauveibuli? E vakalougatataka tiko li e so na tamata na Kalou ena vukumu? O sa dau masu li ka kerea se o cei ena gadreva na Turaga mo vakalougatataka me mamada na nona icolacola? O dau lomani ira li na tani me vaka na nomu lomani iko vakataki iko?
Ena gauna sa tukuna kina o Jisu vua na loya ni kevaka me na laki taukena na bulatawamudu sa dodonu me lomana na wekana me vakataki koya, sa qai kaya na loya vei Jisu, “Ko cei na kainoqu?” Sa qai sauma lesu o Jisu ena nona vosa vakatautauvata ni kai Samaria dauloloma ka qai taroga, “Mo lewa mai se o cei vei iratou na lewe tolu oqo sa kainona ka sikabotei ira na daubutako? A sa kaya ko koya, O koya ga sa lomana.”3 E vakavulica ena vosa vakatautauvata oqo ko Jisu ni o keda kece sara meda dau vakaraitaka na ivakaraitaki dina sara ni loloma kei na yalovinaka vei ira yadua na luvena na Tamana.
Na Tui o Penijamini e vakavulici ira na Yalododonu ena nona gauna: “Me rawa ni bokoci na nomuni ivalavala ca ena veisiga, … mo ni vakacegui ira sa dravudravua, … ena veika ko ni sa rawata mo ni vakani ira sa via kana, … sikovi ira sa tauvimate ka vukea na nodra leqa vakayalo ka vakayago talega.”4 O dau veivuke li vakayayalo se vakayago vei ira era gadreva? O dau dodoliga beka vei ira era lako mai veikeda meda vaqaqacotaka na nodra vakabauta, me vaka na ka e sa kerea oti vei keda na parofita nikua?
Na saumaki mai e kenai balebale na nomu solia na nomu bula mo veqaravi vei ira era gadreva na nomu veivuke, ka wasea vei ira na nomu isolisoli kei na veivakalougatataki. Na Turaga e sega ni tukuna, “vakatawa na noqu sipi ena gauna ni bula vinaka; vakaraica tiko na noqu sipi ena gauna ko sa galala kina.” E tukuna o koya, “Vakania na noqu sipi kei na noqu lami; vukei ira mera bula ena vuravura oqo, maroroi ira vakavoleka mai vei kemuni. Liutaki ira yani kina vanua mera maroroi kina—na vanua mera maroroya kina na nodra digidigi vakamatau me na vakarautaki ira kina bula tawamudu.”5
Na veiqaravi kei na veika vinaka kece edau qaravi ena tosoya cake na nomuni ivakatagedegede ni bula vakayalo. Ena vakayagataki iko na Kalou mera vakalougatataki kina na tani. Na nomu tubucake vakayalo kei na itosotoso ni bulatawamudu erau veiwekani voleka—kei na nomu vukei ira na tani. O lomani ira li na tani ka sa ka ni veivakalougtataki vei ira? E sega li ni vakatagedegede ni nomu vukei ira na tani e vakatauvatani kei na nomu saumaki mai? Na tamata ka cakava walega na ka oqo ena lotu me baleti koya ga ena sega ni rawata na ivakatagedegede ni bula e vinaka cake sara. Na veiqaravi vei ira na tani sa ikoya sara ga na taucoko ni kosipeli kei na bula tawamudu.
Ena nomu ilakolako ena bula oqo sa dodonu mo dodoliga yani ka vakalougatataka na nodra bula na nomu ilawalawa, mo soli iko yani vei ira era na gadrevi iko. “Ia ko koya yadua sa via maroroya na nona bula,” sa kaya na iVakavuvuli, “ena vakayalia, ia ko koya yadua ena vakayalia na nona bula ena vukuqu, ena maroroya.”6
E vagolea o Jemesa na nona ivola vei ira na Isireli ena gauna oqo, “vei ira na yavusa e tinikarua era sa veiseyaki.”7 Na nona ivakavuvuli e vagolei tiko mai vei keda, na tamata ni Kalou ka da na ciqoma na kosipeli vakalesumai. E vakavulica na ivakavuvuli ka na vukea na nomu bula veimaliwai kei ira na lewe ni Lotu tale e so. E nanuma o koya ni ivakaro ni noda lomani ira na kainoda me vakataki keda e dodonu me vakatokai me “lawa vakaturaga.”8 Vei Jemesa, na ivakadinadina walega ena sega soti ni yaga. Na kosipeli sa dodonu me sa ivakaraitaki dina ni nomu bula. “Ia kau na vakaraitaka vei iko na noqu vakabauta ena noqu cakacaka.”9 “Ia mo dou muria na vosa ka kakua ni rogoca walega,”10 Na ivakamacala ni saumaki tale nei Jemesa e vakaoqo: “Na lotu savasava ka sega ni cala e mata ni Kalou ko Tamada sa vakaoqo. Me sa dau raici ira na luveniyali kei ira na yada, ni ra sa rarawa, me sa qarauni koya talega me kakua ni tauvi koya na duka ni ka vakavuravura.”11 E mai tinia na nona ivola lekaleka ka vaka oqo, “Oi kemudou na veiwekani, kevaka e dua vei kemudou sa lako sese mai na ivakavuvuli dina a sa vakalesui koya tale mai e dua; me kila ko koya oqo, o koya sa vakalesuya tale mai na tamata caka cala mai na nona ivalavala e cala kina sa vakabula na yalo … a sa buluta talega na ivalavala ca e vuqa.”12 Ni da vakabula e dua na tamata sa cakacala, o sa vakabulai koya kei iko talega. Sa na bokoci na nomu ivalavala ca baleta ni o sa vukea na nona vakabulai e dua tani tale.
Au kalougata niu laki bula ena vanua o Amerika vaka-Latini ka raica e mataqu na vakavatukana ni parofisai kei na yalayala mai vei ira na Parofita kei na Turaga sara talega.
“Au na vakasoqoni ira vata mai na noqu tamata na Isireli era sa veiseyaki tu meu tauyavutaka tale na noqu Saioni ena kedra maliwa …
“… Au na tauyavutaka na noqu lotu ena kedra maliwa, ia era na okati ena veiyalayalati ka wili vata kei ira na vo ni kawa i Jekope ko ira au solia vei ira na vanua oqo me ra taukena.”13
E kena irairai ni rauta ni drau vaka udolu era sa vakasoqoni vata mai na veivanua e Amerika vaka-Latini. Ena vakadeitaka vei keda na parofisai ni toso oqo ena sega ni cegu. Na tubucake sa ikoya na bolebole levu ka bolei keda tiko, ia sa ka talega me na vukei keda.
E tukuna o Paula na iApositolo vei ira ena nona guna, “o koya oqo dou sa qai sega tiko ni vulagi kina se kai tani dou sa koro vata ga kei ira era sa lotu ka dou sa lewe ni vale ni Kalou.”14
Sa vaka me laurai tiko ni vanua e tubu totolo tiko kina na lotu, e lewe levu e vaka era vakila ni ra vulagi se kaitani ka ra sa biu tu ga ena tutu ni sala. Kevaka meda na raica ni vakavatukana na yalayala, sa dodonu meda cakava na ka e vakamacalataka o Moronai, “Ia ni ra sa papitaisotaki oti … era sa wili me lewe ni lotu i Karisito, a sa volai na yacadra era sa dau sikovi ka vakavulici, … era sa tubreri ena sala dodonu.”15
E lewe levu na lewenilotu era se qaqaco tu era nanuma ni o ira era sa mai luluqa kei ira na curuvou ka ra sa lutu ena tutu ni sala era sa mai veisau baleta ni ra sa sega vakabauta na ivakavuvuli ni Lotu. Na vakadidike e caka e sega ni tokona na nanuma oqo. E vakaraitaki ni o ira na luluqa era vakatarogi, era vakabauta ni Kalou e bula tiko ni o Jisu na Karisito, ni o Josefa Simici e parofita kei na Lotu e dina.
Ena levu sara na tabanalevu kei na tabana, era tu kina na turaga kei na marama vinaka ka dina ka ra sega ni kila se mera lesu vakacava tale mai kina Lotu. Era tu kina na tama ka tina vinaka. Era se qai biubiu ga ka sega tale ni dua me lesu tale yani me laki raici iratou ka ni ratou nanuma ni sa sega tale e dua e tiko me kauwaitaki iratou. Ni ra sikovi ira yani na turaga kei na marama vakabauta ka ra vakaitokanitaki ira, vaqaqacotaki ira, masu vata kei ira, ka vakavulici ira ena kosipeli, era na lesu vata tale mai kei ira na nodra matavuvale. “Ni kemuni a cakava vua edua sa lalai vei ira na wekaqu oqo, ni a cakava vei au.”16 O cei sara mada o ira na lalai oqo? Ena rairai vosa tiko beka na Turaga baleti ira na curuvou mai kina lomanibai se o ira na sasaga voli ena veivanua rugurugua ni luluqa ka ra na lesu mai kevaka me dodo yani vei ira na liga ni loloma.
E na ivalu oqo me baleta na yalo ni tamata, na ituvatuva ni cakacaka vakadaukaulotu sa vakamatatataki sara tu ga me baleti keda yadudua. O ira na lewenilotu era na tokoni ira yani na daukaulotu tudei ena nodra vakavulica na lesoni ka na vakaitavi ena veivakabulabulataki vei ira na tani. O ira na daukaulotu era na “vunautaka na noqu kosipeli ena kaukauwa ni Yalo Tabu”17 kei na kena vosa mai yalodra, na vosa ni veika e dina ka sa kadre tu e lomadra ena kena dau vulici ka masulaki. Na nodra vakaitavitaki ira na daukaulotu ena nodra itosotoso na curuvou e sega ni laki yala ena papitaiso, o ira mera tosoya tiko na nodra vakavulici ira na lewenilotu vou kei ira era gadreva na veivakani vakayalo.
E so na ivola mai na Mataveiliutaki Taumada e tukuni vei ira na vakaitutu ena matabete baleta na nodra itavi mera dau vaqaqacotaki ka tokoni ira vakalevu na curuvou. “Na veilakovi e dodonu me vakayacora kece na lewe ni tabanalevu … E rawa ni ra qarava e dua na itavi bibi sara na dauveituberi vakavuvale kei ira na dauveisiko.” E dodonu me soli vei ira na lewe ni lotu vou “na dodonu … mera vakaitavi ka vakacolati ena tabanalevu”18
Kemuni na taciqu kei na ganequ, kevaka me na tomani tiko vei keda na veisau kina lotu kei na bula veisau vei keda yadua na lewenilotu vou kei ira na ka makawa, e dodonu meda veilomani, veiqaravi ka veivakani vakayalo vei ira na kainoda. E dodonu meda vukei ira me ra ciqoma na kalougata ni veivakalesui vaka kina na kalougata ni Valetabu.
Na Parofita o Josefa Simici e a vola e dua na ivola vei ira na Yalododonu ena gauna o ya “Kemuni na taciqu:— Na itavi ka me qarava walega na Yalodododnu vua e dua na tacina— me daulomani koya ka tokoni koya. Meda vakadonui vua na Kalou sa dodonu meda veilomani; meda lomani ira na kainoda; meda lomani ira na wekada me vakataki keda ka yalodina ena gauna ni veivakatovolei.”19
Na noda parofita, o Peresitedi Gordon B. Hinckley e kaya vakaoqo,: “Au sa nuitaka, au sa masulaka, ni o keda yadua … eda na vaqarai ira era gadreva tu na veivuke … ka tuberi ira ena yalo dina ni loloma ki na veiciqomi ni Lotu, na vanua era na tuberi kina ena liga ni veivakaukauwataki kei na yalo ni veikauwaitaki me na vakadeitaki ira, lomani ira, tokoni ira, ka tuberi ira ena sala ni marau kei na rawa ka.”20
Na vosa na loloma e sega walega ni dua na vosa se dua na bubului, ia sa imatai ka ivunau levu, na ivunau ka vakarota na cakacaka—“Kevaka dou sa lomani au dou talairawarawa kina noqu vunau,”21 ia kevaka dou sa lomani au, “Vakania na noqu sipi.”22
E dodonu mo cakava na ka e dau vakavulica na iVakabula kei ira na Nona parofita, mai liu kei na gauna oqo; veiqaravi, vaqaqacotaka na vakabauta,ka vukei ira era gadreva tiko na nomu veivuke kei na veivakalougatataki. Sa tiko vei iko na yalayala ni Turaga, “Ia ko koya sa vakacegui kemudou sa vakacegui au talega, niu sa lako vata tiko kei kemudou … na noqu Yalo Tabu ena tiko e yalomudou, …”23
Kemuni na taciqu kei na ganequ ni o sa dodoliga yani ena yalololoma meda vakalougatataka e dua tani tale, e daru na vakalougatataki ruarua mai vua na Nona yalotabu. E vakavulica na Turaga ni da sa “veikilai yalo, io erau sa veivakavulici ka marau vata.”24
Sa noqu masu ni Tamada Vakalomalagi ena vakalougatataki keda vakayadua meda na lomani ira na tani, “ni sa solia vei ira era sa muria dina na Luvena.”25 Au vakadinadinataka ni bula tiko na luvena o Jisu Karisito, ni Nona kosipeli e kosipeli ni veilomani. Ena yaca i Jisu Karisito, emeni.