E Dua na Cakacaka Meu Qarava
E a vakatala mai na Turaga e dua na agilosi vei Josefa Simici me tukuna vua ni tiko e dua na cakacaka me qarava. Sa tomani tiko na cakacaka oqori vei keda.
Au nanuma e dua na lotu ni bogi ni matavuvale ena noqu se goneyalewa lailai ka vakavulica kina vei au ko tamaqu na veisiko mai nei Moronai na agilosi vei Josefa Simici na Parofita. E a kaya kina ni oti nona masu ena yalodina, e a laurai kina ena yasa ni nona imocemoce o Josefa e dua na agilosi. Na agilosi oqo e italai mai vua na Kalou, e yacana ko Moronai, ka mai tukuna vei Josefa ni tiko vua na Kalou e dua na itavi ka gadrevi vua me qarava (raica Josefa Simici—Ai Tukutuku 1:33.) Au nanuma ni dau vakavulica vakaoqo ko tamaqu: “E sega ni kaya o Josefa, ‘O segai, Agilosi, Au a via kila ga se lotu cava e dina. Au sega ni a kila ni dodonu vei au meu vakayacora e dua na ka!’” Ia, sa vakadina kina, e gadrevi sara vei Josefa me vakayacora e dua na ka. E sa yaco vua e dua na veikacivi mai vua na Turaga.
E vakasakiti na ka e vakayacora o Josefa Simici e a bula me vaka ga e dua na dauteitei gone, ia ena vukuna e a lamata mai ka vakadewataki, na iVola i Momani, sa vakalesui mai vuravura na matabete kei na kena idola, sa tauyavu na Lotu i Jisu Karisito ni Yalododonu Edaidai, ka vakatekivu me ra tara na veivale tabu vakalou. Ena vukui Josefa Simici sa tu kina e vuravura e na gauna oqo na veicakacaka vakalotu kece sara ka rawa kina vua e dua na luvei Tamada Vakalomalagi me vakayacora me rawata kina na bula tawamudu. Oqo na siga ni cakacaka mana ka tukuni tiko ena Moronai (raica Moronai 7:35–37) kei na cakacaka levu ka veivakurabuitaki ka tukuni taumada mai vei Nifai ena veitabayabaki sa oti yani (raica 1 Nifai 14:7.)
Na cakacaka ka tekivutaka oqo ko Josefa e a tomani tiko mai vei ira na lewenilotu taumada ka ra vakabauti Jisu Karisito kei na Nona kosipeli vakalesui mai. Mai na nona igu oqo, sa yaco kina me tetevi vuravura taucoko na kosipeli i Jisu Karisito ka yaco me tauyavutaki na Nona Lotu. Sa dua dina na itavi vakasakiti era a qarava.
Ia na siga ni cakamana e se sega ni cava, ka se tomani tikoga na cakacaka vakasakiti oqo. Ena gauna eda a papitaiso kina, eda a yaco yadua me da lewe ni cakacaka oqo.
Ena yabaki sa oti me vaka niu sikova tiko e so na lewe ni Lotu, au sa raica na vakabauta kei na cakacaka ni tamata wale e sa tauyavutaki kina ena vuravura na veiyalayalati ni Turaga (raica V&V 1:17–23).
E tiko e dua na goneyalewa ni Korea ka sa yaco me imatai ni lewenilotu ena nodratou matavuvale. E a taura matua toka e ligana na nona ivola ni Torocake Yadudua ka kaya ni nona tadra me ratou yavutaki ena kosipeli na nona matavuvale. E dua na Peresitedi ni Goneyalewa e Armenia sai koya ka vakayacora tiko na parokaramu ena yalodina e dina ga ni sega tiko na nona iVola Dusidusi ni Lotu ka ni se bera ni vakadewataki ena nona vosa.
Era dau lako wasoma ki na valetabu na lewenilotu e Rusia. Era maroroya na nodra ilavo ka vodo basi, sitimanivanua kei na waqa e veisiga me ra yaco yani ki na valetabu voleka duadua e Suwiteni.
Na vugoqu yabaki ciwa o Kimberly e dau talanoataka na Lotu ena yalo e mamarau vei nona itokani ka qai kaya o nona itokani, “Au sa via lewena na nomudou lotu. E rawa vakacava vei au meu lewena?”
O ira na cauravou kei na goneyalewa ena neitou tabanalevu era sa vakarabailevutaka tiko na kila kei na taledi ni veiliutaki. Era tu vakarau me ra lagasere, qiria na ivakatagi, ka vosa, veiqaravi raraba, ka vakayacora na veitavi tale e so me rawa kina ni ra lewe ni cakacaka veivakurabuitaki oqo.
E dua na cauravou e Bogota e kaya, “Au vosa tiko ena vukudra na gonetagane e Colombia. Keimami sa kilikili ka sa vakavakarau tiko me keimami veiqaravi!”
Au sa lesuva mai na vanua e lailai kina na lewe ni Lotu ka vakakina na vanua ni ra lewe vuqa, na vanua e vou ka tauyavu kina, ia na noda itavi yadua e tautauvata kece: eda lewe ni kosipeli dina nei Jisu Karisito ka sa vakalesui mai. Eda veiqaravi ena veisala rawarawa, e tubu na noda ivakadinadina, ka da sa lewe ni gauna ni cakamana oqo.
Ena noqu bula vakaiau, o au e dua na ivakadinadina ni cakacaka mana ni kosipeli vakalesui mai. Niu a se goneyalewa lailai, keitou a toki vakamatavuvale ki Sao Paulo, Brazil, na vanua ka kacivi kina o tamaqu me veiliutaki ena Tabana ni Kaulotu. E a gauna marautaki sara vei au ka vanua vinaka me dua e susugi cake kina. E dau qito taleitaki sara vei au kei rau na ganequ na neitou dau vakaisulu ka vakatotomuri ira na daukaulotu. E dau vakaauwa na neitou tosia tu na neitou ivola ni kaulotu ka dau “vunau” ka “veitokiyaki” voli ena neitou lomanibai. Ena loma ni lima na yabaki na veitalanoa vakabogi ena neitou dela ni teveli ni kana e dau kena ilutua tu na nodra italanoa ni vakabauta na daukaulotu. Mai na yabaki ni bula sara mada ga o ya, au a sa kila tiko kina niu lewe ni dua na cakacaka levu.
Era via lewe 3,000 wale tikoga na lewe ni Lotu e Brazil ni keitou a yaco yani kina. E vuqa sara na sala e a tautauvata kina kei ira na ivuvu ni lotu na veika e a yaco vei keitou. E a sega ni vakau mai na valenivolavola liu ni Lotu vei keitou e so na ivola ni sere se iyaloyalo se ivoladusidusi talega ni lesoni. Au nanuma na noqu a tiko ena Lalai lewe lailai sara kei na so tale na gone ka keimami dau lagatavata tiko ga e lima na sere ena veimacawa, ka ni sa iratou saraga o ya sa vakadewataki tu vaka Potukali. E rua vei rau na noqu sere taleitaki sa irau na “A Luz Divina” se “The Light Divine” (Hymns, naba 305), kei na dua na ka e baleta e dua na rapete e tiko ena lomadonu ni veikau (raica “The Little Rabbit,” Children’s Friend, June 1955, 257).
Na veika kece ka gadrevi me vakavulici kina na kosipeli ena vosa vaka Potukali era a volai ka tabaki e na itikotiko ni kaulotu. Sa ka e lavaki vei keitou kece kei ira talega na gone na vakaitavi e na kedra tuvai na ivola kei na veilesoni ni kaulotu. E sega ni bau vakau mai vei keitou e dua na ivola ni Lotu. E sega ni vakau peresitedi ni iteki se bisopi mai vei keitou na parofita. E sega ni vakauti ira mai na peresitedi ni Soqosoqo ni Veivukei se parokaramu ni cauravou kei na goneyalewa. Na Lotu e Brazil e tauyavu ena veika vata sara ga ka tekivu kina o ira na ivuvu ni lotu. Na veika me tara kina na Lotu e tu vei ira na tamata.
Ena veiyabaki ni neitou tu mai Brazil, keitou a raica na tubu vakaiyanaqa ni Lotu. E udolu era yaco me ra Yalododonu, e wasewasei na veitabana ni kaulotu , era a tarai cake na veitikina, ka ra tara na veivalenilotu vou. Era tubu ena vakabauta na lewenilotu vou ka ra kila vinaka mai na veiqaravi vakalotu.
Ena yabaki sara ga sa oti ni mai cava yani e vica vata na yabaki au a lesu tale ki Brazil meu tiko ena vakatabui ni Valetabu na Sao Paulo. Au a qai mai kila ni sa 187 na iteki e Brazil. Sa 26 na tabana ni kaulotu, va na valetabu, ka voleka ni dua na milioni na lewenilotu. Vakasamataka mada na noqu kidacala niu tayabetaka yani na valenisarasara levu ka ra vakasinaita tu mai na 65,000 na lewenilotu ka ra soqoni vata mai me ra mai rogoci Peresitedi Hinckley ka marautaka na vakatabui ni valetabu. Vei au e cakacaka mana na noqu raici ira na udolu na itabagone ena nodra danisi ka lagasere vata tiko. Ena noqu sarava toka na soqoni marautaki vakalevu oqo, au tukuna voli ga e yaloqu, “E veivakurabuitaki oqo! E cakacaka mana oqo! E yaco vakacava na cakacaka mana oqo?”
Au a kurabuitaka tiko ena bogi taucoko na ka au raica. Ia ena mataka ka tarava ena vakatabui ni valetabu au a laki sotavi koya tale na noqu qasenivuli ni Lalai, o Sisita Gloria Silveira, ena gauna vata oqori au qai kila kina se yaco vakacava na cakacaka mana oqo. Ena nona se qai lewenilotu vou ka sega tu na kila Vakalotu, e a lako mai o Sisita Silveira ki na Soqosoqo ni Lalai ena vakavakarau me wasea na nona ivakadinadina rawarawa ka vakavulica vei au na Yavu ni Vakabauta ena vosa vaka Potukali. O koya kei watina o Humberto erau yalodina tikoga. Ka rau sa veiqaravi oti ena vuqa sara na veikacivi ni Lotu ena veiyabaki sa oti ka se veiqaravi tikoga oqo. Ena noqu raici Sisita Silveira, au kila mai kina ni a rawa me tubu na lotu e Brazil baleti koya kei na vuqa tale vakataki koya. Erau matataki ira mai na veivanua kece ka ra vakabauta na Turaga o Jisu Karisito kei na Nona kosipeli o koya kei Baraca Silveira. Erau sa tubu ena kilaka kei na kila vakacakacaka ka veiqaravi ena Lotu (raica V&V 88:80.) Erau a wasea na kosipeli vei ira nodrau itokani (raica V&V 30:5). Erau a sa veiqaravi ena valetabu (raica V&V 138:48) Eratou vakavulica vei ira na lewe lima na luvedrau na veivakavuvuli dina (raica V&V 68:28) Mai na 43 na nodrau kawa, e 15 era sa kaulotu oti. Era sa vakamau tiko ena valetabu na makubudrau, ka ra sa yaco na makubudrau vakadua me ra ikava ni kawa ni Silveiras ka ra lewe ni cakacaka veivakurabuitaki ka tauyavutaki mai vei Josefa Simici. Ena vukudra sa yaco me tubu na vakabauta e vuravura. Era sa ivakaraitaki ni cakacaka mana e a tukuna na Turaga ena Nona a kaya, era na vunautaka yani na uto ni Nona ivakavuvuli dina ko ira na malumalumu kei ira na tamata wale (raica V&V 1:23) me qisia na veika lalai me yaco kina na veika lelevu (raica 1 Nifai 16:29).
E a vakatala mai na Turaga e dua na agilosi vei Josefa Simici me tukuna vua ni tiko e dua na cakacaka me qarava. Sa tomani tiko na cakacaka oqori vei keda ena veiliutaki nei Gordon B. Hinckley, e dua na parofita bula ka kaya, “Sa Lagilagi na cakacaka oqo. Ena vakalougatataka na bula ni turaga, marama, gonetagane, kei na goneyalewa e ciqoma ena marau (“Cakacaka ni Kalou,” Soqoni ena Vuli ni Veiliutaki ena Vuravura Raraba, 11 ni Janu., 2003, 21). “Me vakavinavinakataki na Kalou ena Nona veivakalougatataki veivakakurabuitaki ni ivakadinadina, lewa kei na ivakavuvuli ni vakalesui mai ni Lotu i Jisu Karisito.” (“The Marvelous Foundation of Our Faith,” Liaona, Nov. 2002, 81). Ena yaca i Jisu Karisito, emeni.