Era a Vosa Vei Keda
Ripote baleti ira na Lalai ni Lotu mai na ika 173 ni Koniferedi Raraba , 5–6 Epereli 2003
Peresitedi Gordon B. Hinckley: Na kosipeli i Jisu Karisito sa ikoya na sala ni vakacegu. Kevaka eda sa vakamuria eda na bula eda na qai vakalougatataki ka vutuniyau kina. Sa dua na ka totoka ni da vakaitavitaki ena cakacaka cecere oqo. Me da marautaka na isolisoli e soli vei keda. Me da sa veiqaravi ena marau
Peresitedi Thomas S. Monson, iMatai ni Daunivakasala ena Mataveiliutaki Taumada: Ena sega ni vakaisosomitaki rawa na vakavakarau vakavinaka ena kena sotavi na veivakatovolei ni bula. E ka dredre toka na vakavakarau ia e sa rui yaga sara ga vakalevu ena toso ki liu.
Na ilakolako ki na veigauna sa bera mai ena sega ni gaunisala rawarawa me na dodo yani mai ke ki na bula tawamudu. Ia ena tu na basoga ni sala kei na iwavoki ka sega mada ni wili kina na qara eda sega ni dau namaka. Sa dodonu kina me da dau masu e veisiga vei Tamada Vakalomalagi ni gadreva tu o Koya me da qaqa taucoko ena noda bula.
Peresitedi James E. Faust, iKarua ni Daunivakasala ena Mataveiliutaki Taumada: E vuqa sara tu na ivakatagedegede ni dodonu kei na cala ka mo ni vakatulewa sara ga ena vanua mo ni sa yaco ga kina. Au sa vakamasuti kemuni ni kevaka ko ni lomatarotarotaka e dua na ka mo ni vakayacora se sega, kakua ni cakava. Sa tiko vei keda yadudua na yalo ni digidigi kei na isolisoli ni Yalo Tabu me na vakamakaretaka vei keda na veika e dodonu se cala, dina se lasu.
Elder Russell M. Nelson ena Kuoramu ni iApositolo Le Tinikarua: Mai na noda masu e rawa ni da vakaraitaka na noda lomana na Kalou. E sa vakarawarawataka sara ga o Koya. E rawa ni da masuti Koya ena dua ga na gauna. E sega ni gadrevi e dua na iyaya kilai tani. E sega mada ga ni gadrevi me jajitaki na batiri se saumi e dua na isau vakavula yadua ni veiqaravi… .
Na masumasu e rawa ni vakayacori ena vakanomodi. E rawa me vakasamataki ga e dua na masu, vakabibi ena gauna era na takoso mai kina na vosa… .
Eda tinia na noda masu “ena yaca i Jisu Karisito emeni.” Ni da vakarorogo vua e dua e masu, eda cavuta-i-cake me rogolevu na noda “emeni,” kena ibalebale, “Oqori talega na noqu masu.”
Elder Dallin H. Oaks ena Kuoramu ni iApositolo Le Tinikarua: Me vakataki ira na painia e dodonu me da vakavinavinakataka na Kalou ena vuku ni noda vakararawataki ka kerea na veidusimaki me ra vorati kina. Mai na noda vakatulewa, na noda vakabauta kei na talairawarawa, eda na qai raica rawa kina na yalayala sa solia vei keda na Kalou. Era sa umani kece sara ki na ituvatuva.
Elder Joseph B. Wirthlin ena Kuoramu ni iApositolo Le Tinikarua: Na Yalo Tabu e ivatuka vakatamata ena yalo, e dua na Le Tolu Vakalou. E ivakadinadina ni kaukauwa ni Kalou, na vakalou i Karisito, kei na dina ni kosipeli vakalesui mai… .
… Ni da sa vakadeitaki, sa soli kina vei keda na dodonu ki na veitokani ni Yalo Tabu, ia na dodonu oqo eda na rawata ga mai na talairawarawa kei na bula kilikili e veigauna. Ena sega ni rawa ni da vakadeitaka me tiko vakadua vata kei keda na isolisoli oqo.
Elder Dennis B. Neuenschwander ena Mataveiliutaki ni Vitusagavulu: Era bibi cake sara na veisoqoni ni sakaramede mai na veisoqoni tale e so. Era gauna bibi ena veivanua tabu. Ena gauna bibi ni veimacawa oqo, eda dau vakananuma kina na ivalavala cecere duadua ni loloma ena solibula me bau vakila ko vuravura. Eda vakananuma kina na Nona loloma na Kalou ka solia kina na Luvena e Duabau Ga me da rawata na bula tawamudu. Ni da vakaivotavota ena sakaramede, eda sa nanumi Koya kina ka vakaraitaka na noda lomasoli me da taura na yacana ka muria na Nona ivunau.