Vakalougatataki mai na Wai Bula
E veivakabulai na wai ni bula. E veivakamamautaki ka veitokoni. E kauta mai na vakacegu kei na marau.
Ni se qai tekivu na Nona kaulotu na Karisito, e a lako mai Jerusalemi ki na Nona koro ni gonetagane ko Nasareci, e Kalili. E lako siviti Samaria, ka oca mai na Nona ilakolako, e a mai cegu ena ikeli-wai nei Jekope. Ena Nona wawa tiko ko Jisu ka ratou laki vaqara kakana na Nona tisaipeli ki na dua na koro voleka, e a lako mai e dua na yalewa ni Samaria ki na ikeli-wai. Ko ni kila na italanoa oqo. Ni kere gunu ko Jisu, e a kurabui ni dua na Jiu e kerea e dua na ka vakaoqo vua. Ena vica vata na senitiuri era a kila tu na Jiu kei na kai Samaria ni ra veimecaki. Ia na Karisito e tukuna vua ni kevaka me kila se ko cei erau sa veivosaki kaya, ena kerea Vua na wai:na wai bula—na wai ka na vakavuna me sega tale ni viagunu ka tawamudu. E sega ni kila na kena ibalebale, ka mani vakamacalataka:
“O koya yadua sa gunuva na wai oqo ena viagunu tale:
“Ia ko koya sa gunuva na wai kau na solia vua, ena sega sara ni viagunu tale; ia na wai kau na solia vua ena tu e lomana me mata-ni-wai sa tovure ki na bula tawamudu” (Joni 4:13–14).
E taleitaka na yalewa ni Samaria na vakasama me sega tale ni gunu. E dina sara ga ena sega ni calata ko koya na cakacaka levu ni kau saqa ni wai bibi mai na ikeli ni wai ki nona vale. Ia ena Nona vakadinadinataka vua na Karisito ni sa iKoya na Mesaia, ka vakadeitaka vua na Yalo Tabu ni dina, sa qai vaka me kila ni vosataka tiko na dina lelevu ko Jisu. E a biuta tu mai na wai ni ikeli ka vakusakusa yani me qarai ira ka ra na via lako mai me ra rogoca. Au sega ni vakabauta ni ena gauna ko ya, ni sa kila vakavinaka sara—se eda kila vakavinaka—na cava e kena ibalebale me tiko vei keda na ivurevure ni wai bula.
E veivakabulai na wai bula. E veivakamamautaki ka veitokoni. E kauta mai na vakacegu kei na marau.
E dua na marama au kila e a sasagataka tiko me kau tani na cudru me baleta e dua ka vakararawataki koya kei na nona vuvale. E dina ga ni a tukuna vei iratou na luvena me ratou kua ni dau cudrucudru se veisevaki, e sasagataka tiko na veika vata oqori ko koya. Ni oti e vica na macawa nona vakamamasu tiko vua na Tamana mai Lomalagi, e a qai vakila e dua na veisau. E a kaya: “Ena dua na siga, ena loma ni noqu masumasu vakawasoma, e a yaco mai na veivakabulai. Au a vakila e dua na yavala vakayago ni drodrova kece na yagoqu. Ni oti, au sa vakila na ivakaraitaki ni veitaqomaki kei na vakacegu. Au kila ni veitalia ga na ka e yaco, keitou sa na daumaka vakavuvale. E yali vei au na cudru, ka vakakina na noqu gagadre meu sauma lesu.”
Na wai bula sa ikoya na kosipeli i Jisu Karisito; na Yalo Tabu e vukei keda me da kila na dina ni kosipeli. E kila na veika dina na noqu itokani. E tukuna na veivosa veiganiti vei iratou na nona vuvale. Ia ena gauna ga e vakayalomalumalumutaki koya kina me gunuva na wai—me vakila na Yalo Tabu—sa qai tekivu me bula.
Ena yabaki sa oti au a sota kei na vuqa na marama—kei ira na nodra iliuliu vakamatabete—au a rogoca e vuqa na itukutuku ni kaukauwa ni veivakabulai nei Karisito. E vuqa sara na vutugu ena bula vakayago, e vuqa na ka e vakavuna na mosi. Au kilai ira na tamata era sa vakauti ira tiko na nodra daulomani ki na vanua ni leqa, ka ra daumasu e veisiga me ra taqomaki ena ivalu. Au veivosaki kei ira na tamata ka ra taqaya me baleti ira na luvedra, ka ra vakila tu na veitemaki era sotava tiko. Era tu na noqu itokani vinaka sara ka ra vakaleqai tu ena vakacaca levu ni kimocerapi. Au kila e so na itubutubu le dua, ka sa biuti ira na watidra, ka ra sa veisusu taudua voli ga. Au a sa sotava talega na malumalumu ni we ni lomaocaoca. Ia au a vuli mai na veika e a yaco vei au, kau vulica mai vei ira keimami sota, ni sega ni rawa ni da na biu tu ga ka sega ni vukei ena noda leqa. E sega ni rawa ni da biu laivi tu. Na ivurevure ni vinaka, ni kaukauwa kei na nuidei e tu e lomada, na noda vakarorogo ena veivakadinati, eda vakaturi cake. Eda sa vakabulai. E sega walega ni da bula, ia eda marautaka na bula. Eda dredre; eda reki; eda toso ki liu ena vakabauta.
Na wai bula e veivakamamautaki talega. Au vakadinadinataka me vaka na Nona yalayala, na Karisito e lako mai vei ira vakayaduaga sa oca ka colata na icolacola bibi; ena vakacegui ira ko Koya (Raica Maciu 11:28). E tokoni keda ko Koya ni da sa oca. Na ivurevure sa ikoya e dua na ikeli vuabale ena wai, ka solia tu ga na ivakalomavinaka—kevaka eda gunuva. E rawa ni vakacacana na kena yaga na dokadoka, me vaka ni sega ni kauwai. Ia ko ira era tugana vakaidina e sega walega ni ra vinaka sara vakaiira, ia era yaco me ra waivure vei ira tale e so, me vaka e dua na yalo e susuga ka vakania tale e dua.
Ena yabaki sa oti a takali yani kina e dua na itokani vinaka ni matavuvale. Sa yabaki 89 o Lucille ka sa yada voli me sivia e ruasagavulu na yabaki. E sega ni marama vutuniyau, sega ni rogo, ka vuqa ena vuravura era sega ni kila na nona yali. Ia e kilai koya na nona vuvale. Era kilai koya ko ira na tu volekati koya. Era kilai koya ko ira na lewe ni nona tabanalevu. Na nona mate, e kauta tani e dua na ka vinaka mai na vuravura vei ira kece ka ra a vakila na nona loloma. E vuqa na veika dredre e a sotava ena nona gauna vakayada, e dua vei ira na nona mate e dua na makubuna tagane lomani, kei na malumalumu ni tabayabaki sa yaco mai. Ia ko Lucille e tomana tikoga me vakamamautaki ira kece e kila ena yalona, ena kakana e vavia, na nona lacadrau kei na iubi, na nona veiwali kei na yalovinaka. E dau taleitaka vakalevu na cakacaka ena valetabu. Ena dua na siga ena vula itubutubu ni 1981 e a vola ena nona ivolaniveisiga: “Ena 3.30 ena mataka edaidai, ena noqu lako cake tiko ki na valetabu, au vakasarava tiko na kuila ka cecebuya vakamalua tu ena cagi ka raica na lomalagi totoka kau vakasamataka na noqu marau niu tu ekea. Au via rarawa ena vukudra na tamata [ka ra] moce tu ka sega ni raica na cadra mai ni dua na siga vou.”
E vuqa vei keda e sega ni nanuma ni sa “yadra” ko vuravura ena 3.30 ena mataka, ka da marautaka vakaidina me da se veiqiqiyaki ena loga ena gauna ko ya ka vakavuna kina me lomani keda o Lucille. E tu vua e dua na ivakarau vinaka. Ena rawa walega me vakamacalataki oqori ke tu e lomada na vinaka dina. E a taukena li na savasava ni yalo oqo ni yabaki tinikalima, ruasagavulu kalima, se ena limasagavulu kalima? Au sega ni kila. Ena vuqa na gauna, e rawa me na taura na bula taucoko na noda vakarorogo ki na Yalo Tabu ni bera ni da kila vakavinaka na domo ni Kalou, ni bera ni da vakadinata na wai bula me rawa ni da vakila tu ena siga taucoko—vakabibi na siga ka tekivutaki ena 3.30 ena mataka. Au kila ni wai bula e tokoni Lucille ena veiyabaki balavu ko ya ka yaco beka me a dau vakalomalomani koya vakaikoya, na nona bula, na yalona, me rawa kina me vakani ira kece ka kilai ira.
Na wai bula e rawa ni kauta mai na vakacegu kei na marau kevaka mada ga e sa vaka me mamaca na ivurevure ka tu e lomada. Au a qai rogoca walega e dua na marama ka sega ni namaka na mate nei luvena tagane, ni a tauvi koya e dua na mate ni leqa ni yalo. E duatani na nodratou yaluma na matavuvale. Na tinana e sega ni vakasamataka rawa ni na kune marau tale ena dua na gauna. Ia e a vakalougatataki mai na veiqaravi ni dua na gone yalewa, e dua na nona lewe ni iSakisaki, ka sa lewe tiko ni iSoqosoqo ni Veivukei ka nona dauniveisiko, ka kaya vua, “Ko a vukei au; ia oqo au na vukei iko—daru na lako sivita vata na ka oqo.” Sa tekivu me lesu mai ki na nona bula, na vakacegu, kei na marau.
E rawa ni taura na gauna kece ni bula—ka balavu—me vakasavasavataki vakadua na yaloda, ia na wai bula sa vakarawarawataki tu vei keda kece, okati kina ko ira na itabagone. Au dau vakauqeti niu raici ira na itabagone yalewa ena Lotu, ni oti na nodra vakavulici vakayalo mai ena gauna ni gone, curu ki na iSoqosoqo ni Veivukei ka ra solia sara na ikuri ni kaukauwa vei ira na marama kila ka. Au vuabale ena marau niu raici ira na itabagone yalewa vata ga ko ya ni ra vakila na levu ni ka e rawa ni ra vulica mai vei ira na marama ka ra qase cake. Na vakacegu e lako mai Vua na turaga kivei keda, ia e rawa ni da veivukei me da vakila kece na vakacegu ko ya ena noda wasea na noda icolacola kei na noda marau.
Na yalayala ni Karisito e rawarawa ka cecere duadua: “Au sa laiva vei kemudou na vakacegu, au sa solia vei kemudou na noqu vakacegu, au sa sega ni solia vei kemudou, me vaka sa solia ko vuravura. Me kakua ni rarawa na yalomudou, se rere” (Joni 14:27). Kemuni na taciqu kei na ganequ, na leqa kei na dredre e wavokiti keda tu. Na veika vakailavo e sa vakaloloma; era sasagataka tiko na bula vakavuvale; eda bula ena, me vaka e kaya ko Peresitedi Hinckley, ena “gauna vakarerevaki” (“Na Gauna Eda Bula Tiko Kina,” Liaona, Jan. 2002, 83). Ia na wai bula e solia tikoga na vakacegu kei na marau. Ni dodonu tiko na noda bula, ni da sa vakayacora na veika kece eda rawata, e dua na isolisoli eda taura sa ikoya na yalodei. E tukuna vei keda na Turaga, “Dou tiko lo, mo dou kila niu sa Kalou” (V&V 101:16). Ena loma ni veilecayaki, e dodonu me da tu vakadua. E dodonu me da vakarorogo ki na yalo ka na tukuna vei keda “sa vinaka na veika kece!” (“Dou Gole Mai,” Sere, naba 30) me vaka ga era dau vakayacora na Yalododonu e liu. Era tu na vuni noda taqaya, ia e uasivi na vuni noda vakacegu.
E a rai ki na mata i Karisito na yalewa ni Samaria, vakarorogo ki na domona, ka vakabauti Koya ena gauna era vakanadakuya kina na veika kece e vakavulica e lewe vuqa. Eda kilai Koya talega, se eda rawa, kevaka eda vakatara na kaukauwa ni Nona veivakabulai, na kaukauwa ni Nona dau veivakamamautaki, Nona vakacegu kei na reki, “me tovure cake ki na bula tawamudu.” Me da na kitaka vakakina, sa noqu masu ena yaca i Jisu Karisito, emeni.