Vakaraitaka ni o Kila
E dau basika ena veisiga yadua na gauna vinaka me da vakaraitaka kina ni da kila na sala me da vakataki Jisu kina ka muri Koya yani ena vakabauta.
Kemuni na gone lomani ena Lalai, eda na marautaka tiko ena yabaki oqo na i ka 125 ni yabaki ni kena tauyavu na isoqosoqo ni Lalai. A tauyavutaka e dua na parofita ni Kalou me ra vukei kina na gone ena nodra vulica ka bulataka na kosipeli i Jisu Karisito ena reki. Sa rui ka bibi na Lalai ka sa na dua na yabaki vakasakiti na yabaki oqo me da marautaka. E bibi duadua ga, ni keimami rokovi kemuni oi keimami, na nomuni itubutubu, iliuliu, kei ira na nomuni qasenivuli—na gonelalai. Keimami lomani kemuni. Keimami marautaki kemuni ena gauna oqo ka keimami marautaka talega na vanua o ni rawa ni yaco kina.
O ni luvena na Kalou. E tiko e dua na Tamamuni Vakalomalagi ka dau rogoca ka sauma talega na nomuni masu. E vinakata tu mo ni bula kilikili me rawa kina ni o ni lesu tale yani ka bula vata kei Koya ena dua na siga. Na nomuni kila oqo ena rawa ni vukei kemuni ena nomuni tuvalaka na nomuni veigauna mai muri e vuravura ka vakakina ena tawamudu ena vakanuinui taucoko sara. Ni o ni raica yani na veigauna sa bera mai, raica sara yani na taudaku ni veisiga ni mataka. Era na rawa ni vukei kemuni na ivolanikalou, na nodra ivakavuvuli na parofita ni gauna oqo, se na sere sara mada ga ni Lalai, mo ni rawata na vanua o ni rawa ni yacova me tawamudu. Sa vakotora o Jisu Karisito na ivakaraitaki se na sala me rawa kina ni da kiikili tiko me rawa ni da lesu tale vei Tamada Vakalomalagi. Ena rawa vei kemuni yadua mo ni vulica kina na veika me baleti Jisu Karisito ka qai muri Koya ena vakabauta.
Eda vakaraitaka na noda kila me da muri Koya ena noda cakava ka maroroya na veiyalayalati ni papitaiso ka vakakina na noda ciqoma kei na noda vakarorogo ki na Yalo Tabu. Eda vakaraitaka na noda kila na ivakarau ni muri Koya ena noda vakayagataka na sakaramede ena bula kilikili ka dau nanumi Jisu. Au vinakata meu vosa ena dua tale na sala eda dau vakaraitaka kina ni da kila—ena noda muria na ivunau.
E kaya na Turaga: “Au sa kaya vakaidina vei kemudou, oqo na noqu ivakavuvuli; ia dou sa kila na ka sa dodonu mo dou kitaka ena noqu lotu; ia na ka kecega dou sa raica niu sa kitaka, mo dou kitaka tale ga; ia mo dou kitaka na ka kecega dou sa raica niu sa kitaka.”1 Au dau taleitaka na sere ni Lalai oqo “I’m Trying to Be Like Jesus,”2 kau dau taleitaka na noqu vakila e yaloqu ena veigauna au dau lagata kina. E dau basika ena veisiga yadua na gauna vinaka me da vakaraitaka kina ni da kila na sala me da vakataki Jisu kina ka muri Koya yani ena vakabauta.
Ena gauna e lewena kina o Jone ka sa yabaki tini na timi ni veitau qalo, a tukuna kina vua na nona dauniveituberi ni rawa ni vakaitavi ena veisisivi ka na vakayacori ena Vakarauwai ia ena sega ni rawa ni vakaitavi ena Sigatabu. Ena iotioti ni veisisivi ena yabaki oya, sa mani tuvai me qai vakayacori na veisisivi qalovaki kau ka na vakaitavi kina o Jone ena Sigatabu. E nanuma lesu na lesoni ena dua na lotu vakamatavuvale me baleta na kena vakatauci taumada na lewa, me rawarawa kina na kena caka na veika dodonu ni sa yaco mai na kena gauna. E kaya kina o Jone, “Au a sa vakatulewa oti meu kakua ni dau qalo ena Sigatabu ni se bera niu mai lewena na timi. Oqori na vuna a rawarawa kina na noqu tukuna vua na dauniveituberi niu na sega ni rawa ni vakaitavi ena veisisivi qalovaki kau. Au nanuma ni na cudruvi au kina na dauniveituberi. Ia ena mua ni yabaki, … e qai tukuna vei ira na timi na nona dokai au ena noqu dina tiko ena noqu bula mai na noqu ivakatagedegede.”3 E vakaraitaka o Jone ni kila na kena vakarokorokotaki na Siga ni Vakacecegu, ka ivakaraitaki ni dua e vakamuria na ivakavuvuli nei Jisu. Ena veigauna kece o vakarokorokotaka kina na Siga ni Vakacecegu o sa vakaraitaka ni o kila.
De so beka vei kemuni era sa sotava na veika au a sotava niu se qai yabaki tinikadua. E dua na noqu itokani au dau taleitaka vakalevu baleta ni vaka me dau levu sara na ka e kila tu. Ena dua na siga a qai solia vei au e dua na tavako. E tukuna vei au ni na vakavulici au ena vakatavako, ka qai cikevaka tiko ena veivosa me vaka na “Ena sega ni mosi—vakadua ga.” Au a sega ni vinakata meu vakacudrui koya, ia au a sa lewa rawa niu se gonelailai sara niu na sega vakadua ni vakatavako. Na lewa oqori a rawarawa kina meu kaya na sega. Vakaraitaka ni o kila ena nomu muria na Vosa ni Vuku.
Ena gauna sa yabaki ono kina o Caitlin, a kerea vua na nona qasenivuli ni danisi kevaka e rawa ni daramaka edua na isulu maqosa cake ena vakatovotovo ni danisi. Ni kaya na nona qasenivuli sega, sa kila sara o Caitlin na veika me na vakayacora. E kaya vei nona qasenivuli ni sa na sega ni danisi baleta ni vinakata me cakava na veika e vinakata vua ko Jisu. E mani kaya kina o Caitlin, “Sa dua dina na vakatulewa dredre, ia au a qai vakila niu logaloga vinaka kina.”4 Ena nona digia me maqosa cake na ivinivo e dara, sa vakaraitaka kina o Caitlin ni kila na sala me talairawarawa kina ki na ivunau ka muria na iVakabula.
Eda vakaraitaka ni da kila ena noda bulataka na ivunau me da dau veilomani. E kaya kina na noda parofita o Peresitedi Gordon B. Hinckley, “E dua na kaukauwa levu e vure mai na noda kila ni da luvena yalewa ka luvena tagane na Kalou… . Ni dua e tu vua na kila oqori ka vakatara me liutaka na nona bula, ena sega ni rawa ni cakava eso na veika ca ka… . lolovira.”5 Sa vakaroti keda o Jisu me da dau lomani ira na wekada me vakataki keda. E vakaraitaka na ivakavuvuli cecere oqo mai na italanoa ni kai Samaria dauloloma, ka vakaraitaka na ivalavala ni loloma kei na loloma vakalou ni sa sega tale ni dua e rawa ni veivuke. E qai kaya kina na iVakabula, “Mo lako ko iko, ka kitaka vakakina.”6 E vakavuvulitaka vei keda na iVakabula me da dau veilomani—vei ira sara mada ga e duidui na nodra ivakatagedegede. E sega ni rawa ni ulubale ni noda sega ni veimaliwai vinaka se noda sega ni veilomani na duidui oqori.
E kaya e dua na nona itokani o Chelsea yabaki walu, ni sega ni taleitaka e dua na gonetagane baleta ni sega ni lewena na noda Lotu. Na cava o nanuma ni a cakava o Chelsea? Na cava o na cakava o iko? E kaya kina o Chelsea vei nona itokani e sega ni dua na ka kevaka e sega ni lewena na lotu; e se gone vinaka tikoga.7 Eda vakaraitaka ni da kila na muria na iVakabula ena noda lomani ira ka rokovi ira na tani.
Vakacava na yalovinaka eda dau vakaraitaka vei ira na noda lewe ni matavuvale? Na vanua bibi duadua ka dau yaco ena so na gauna me vanua dredre duadua me da vakaraitaka kina na noda yalovinaka sai koya na noda dui matavuvale, vei ira na noda itubutubu kei ira na tacida kei na ganeda. Ena gauna e yabaki tini kina na luvei keirau tagane o Mitch, a vinakata me vukea na neitou matavuvale, vakabibi kevaka me dau ka ni lasa. Ni sega ni dua e raici koya tu ena biuta e dua na lali vakawa e domona, ka me vaka tu e dua na dauqiri lali ni veivuke tiko ena cakacaka ni vale. Ni ra raica mai na lewe ni matavuvale ni sa caka oti tu na cakacaka, ena dau kaya ga, “Oqori beka o koya na dauqiri lali.” Sa dua na dau veivuke levu vei keitou o Mitch ka dau vakatubu marau kei na vakacegu ki na neitou matavuvale.
Era vakaraitaka na gonetagane kei na goneyalewa au tukuni ira tiko ni ra kila ena nodra vakarokorokotaka na Siga ni Vakacecegu, muria na Vosa ni Vuku, maqosa ena nodra isulusulu, kei na nodra vinaka vei ira na nodra itokani kei na nodra matavuvale. O iko talega e rawa ni o vakaraitaka ni o kila ena nomu muria na veiivunau oqo kei na ivunau tale eso.
Na noda lewena na Lotu i Jisu Karisito ni Yalododonu Edaidai sa kena ibalebale ni sa soli vei keda na gauna donu me rawa ni da ciqoma kina na veivakalougatataki kece sara ni kosipeli. Ena rawa ni o tukuna ena yalodina e veisiga yadua:
“Au luve ni Kalou.
“Au kila ni lomani au na Tamada Vakalomalagi kau lomani Koya.
“Au rawa ni masuta na Tamada Vakalomalagi ena gauna ga e rawa, kei na vanua ga e rawa.
“Au tovolea tiko meu nanuma tikoga ka muri Jisu Karisito.”
Vakatulewa nikua mo vakaraitaka ni o kila, ena nomu muri Jisu Karisito ena vakabauta. Ena sega ni rawarawa na sala lesu vei Tamada Vakalomalagi. O na gadreva na yaloqaqa mo toso tiko kina e veisiga ena nomu muria na iVakabula. Au wasea na noqu ivakadinadina ni ena gauna o lewa kina mo vakaraitaka ni o kila, ena nomu muri Jisu Karisito ena vakabauta, o na vakila na vakacegu kei na marau ena gauna oqo ka yacova na tawamudu. Ena yacai Jisu Karisito, emeni.