Masu ni Suka
Au sa mai vakatakekere kina me da segata me da voleka cake vua na Turaga, ka me da dau veitaratara vata kei Koya vakawasoma ena vakabauta levu cake.
Kemuni na taciqu kei na ganequ daulomani, sa dodonu me da vakavinavinaka kece me baleta na koniferedi vakasakiti oqo. Eda sota tiko ena vakacegu ka sega ni dua na veivakasosataki ena kena mataqali cava ga e yaco. Eda sa vakasama ka veivosaki vakalevu ena veivakalougatataki vakasakiti ni Turaga. Sa vaqaqacotaki vakalevu sara na noda taleitaka na veivakalougatataki vakaitamera e noda ena vuku ni kosipeli. Me vaka ni da sa rogoca na nodra ivakadinadina na sa vosa oti, sa vakawaqari vakalevu cake tale na noda ivakadinadina me baleta na dina. Au nuitaka ni o keda kece sara eda vakaitavi ena koniferedi cecere oqo eda sa vakauqeti me da vinaka cake, me da tagane ka yalewa vinaka cake mai na veika eda sa sotava vata ena rua na siga sa oti oqo. Au vosa tiko me baleti au ena noqu kaya niu vakila na noqu voleka cake vua na Turaga. Au nuitaka ni vakakina na veika o ni sotava. Sa vaqaqacotaki cake na noqu gagadre meu talairawarawa ki na Nona ivunau, meu bulataka na Nona ivakavuvuli, ka veitaratara vata kei koya ena masu, ka maroroya kina e dua na veiwekani vata kei Koya na Tamaqu ka noqu Kalou.
Ia ni da mai vakacavara na soqoni cecere oqo ni Yalododonu Edaidai, au sa mai vakatakekere kina me da segata me da voleka cake vua na Turaga, ka me da dau veitaratara vata kei Koya vakawasoma ena vakabauta levu cake.
Kemuni na tama kei na tina, ni masulaki ira na luvemuni. Masulaka me ra taqomaki mai na ca ni vuravura. Masulaka me ra tubu cake ena vakabauta kei na kila ka . Masulaka me ra dusimaki ki na bula ena yaga ka vinaka vei ira kei ira tale na so. Kemuni na tama ni masulaki ira na watimuni. Vakaraitaka vua na Turaga na nomu vakavinavinaka me baleti ira ka vakatakekere Vua ena vukudra. Kemuni na marama ni masulaki ira na watimuni. E vuqa vei ira sa dua na ka na dredre ni nodra bula, ka levu tu na leqa kei na veika dredre. Vakatakekere vei Koya sa Cecere Sara me rawa ni ra dusimaki, vakalougatataki, taqomaki, vakauqeti ena nodra gagadre savasava.
Masulaka me tu na sautu e vuravura me rawa kina vei Koya sa Cecere Sara o Koya e lewa na veivuravura kecega me dodoka yani na Ligana ka laiva na yalona me vakauqeti ira na nona tamata me ra kakua kina ni veivaluvaluti na veimatanitu. Masulaka na draki. E ualuvu tu e so na vanua ka dausiga ena so tale. Au vakabauta ni kevaka e cabori cake ki lomalagi e vuqa na masu me vakasuasuataki na qele, ena sauma na masu oqori na Turaga ena vukudra na buladodonu.
Ena yabaki 1969, au a tiko voli mai Sauca Amerika. Au a vuka mai Argentina ki Santiago, Chile. E mamaca sara tu ga na Veiulunivanua na Andes. E sega na ucacevata. Sa kama na co. E donumaka tu o Chile e dua na dausiga veivakarusai.
Era vakatakekere na tamata me vakasuasuataki na qele.
Keitou a vakatabuya e rua na vale ena veisiko o ya. Ena lotu ruarua ni vakatatabu oqori keimami a vakatakekere kina Vua na Turaga me vakatauca na uca ena dela ni vanua. Au qai rogoca na nodra ivakadinadina e vuqa era a tiko ena soqoni oya ni a dolavi na lomalagi ka tau na uca vakalevu sara me yacova ni ra sa kerekere tale na tamata Vua na Turaga me sa rauta.
Masulaka na yalomatua kei na kila ka ni o lakova na sala dredre ni nomu bula. Kevaka o nanuma mo cakava na veika lialia ka yalowai, au vakabauta ni na sega ni taqomaki iko na Turaga. Ia kevaka o vakasaqara na Nona yalomatua ka muria na ivakasala ni veivakatakila ka na yaco mai vei iko, au vakadeitaka ni o na vakalougatataki.
Me da tamata dau masu cake. Me da vakavulici ira na luveda ena ivunau kei na ivakavuvuli ni Turaga. Me lutuki kemuni na veivakalougatataki vakalomalagi. Ena iVakarua e tukuni kina, “Ia oqo kemuni na Isireli a cava na ka sa taroga vei kemuni ko Jiova na nomuni Kalou, mo ni rerevaki Jiova ga na nomuni Kalou, ka mo ni lako ena nona sala kecega ka lomani Koya, ka qaravi Jiova na nomuni Kalou ena lomamuni taucoko kei na yalomuni taucoko” (iVakarua: 10:12).
Me vakadeitaki, kemuni na taciqu kei na ganequ, ni “vakaraici Isireli tiko o Koya, kakua ni sosovu se moce” (Felix Mendelssohn, Elijah).
Au masuta na veika oqo ena noqu laiva vei kemuni na noqu veivakalougatataki ka vakaraitaka na noqu lomani kemuni vakayadudua. Vinaka vakalevu na levu ni nomuni yalololoma vei au kei na nomuni veivakabauti levu kei na kaukauwa ni toso ki liu ena cakacaka ni Kalou Cecere, ena yaca ni Turaga o Jisu Karisito, emeni.