Lomaocaoca ga ena Bula ni Yalomudou
O ira na tisaipeli era sa veisau dina, e dina ga ni ra se bera tu ni taucoko sara, era na vakasaqara na “bula ni yalo” ena veisiga kecega ena itabayabaki kecega ena maliwa ni ivalavala vakasisila se na rusa.
Ena loma ni veika e yaco tu e na vuravura ka dau kauta mai na leqa se veisau—veika edau tara na noda bula—veika e yaco ki na bula vakatamata ka sa dau bolei tu ga kina: ni tiko vata kei na ogaoga ni vuravura, eda digia se sega, na vosa ni Turaga, o ya me da “lomaocaoca ga … ena bula ni yalomudou” (V&V 101:37). Veitalia sara na veika eda vakaogai keda kina, na lomaocaoca ena yaco tiko ena gauna maravu se na gauna voravora. Kevaka e kilai se laurai ga, qo e sa ituvatuva ni bula qo ka na dredre ni veisau mai na kawatamata ki na kawatamata.
Ena veigauna eda saga kina me da maroroya na ivakaro ni Kalou, “sa na vakavoui na tamata e loma ena veisiga kecega.” (2 Korinica 4:16). Kevaka sara mada ga e siga ca, eda na “maroroya na yaloda” veitalia sara na duidui ni draki e taudaku (raica Vakabalebale 19:16). Au vakadinata ni so na vakatulewa e loma me da “lomaocaoca … ena” kei na “maroroi” ni yaloda e yaco ena gauna e tu kina e ra na bula me vaka na gone cidroi. E vakana vuaka ena veisiga taucoko sara ka qai kila ni sa dua na gauna vinaka vua ni sa “kila yalona tale” (Luke 15:17). Na cava soti e yaco mai na “vanua vakayawa o ya” (Luke 15:13), na gone cidroi e “vakanananu ki na [nona] ivalavala” (Same 119:59) ka vakadeitaka “au na ia ka lako vei tamaqu” (Luke 15:18). Na veisau ena muria mai na nomu vakasamataki iko vakataki iko. E vaka kina, e dua na dau susu vuaka ka gole tiko ki vale ena dredre me kilai mai vei ira na lako siviti koya, e dina ga ni sa yaco vua na veika tawamudu e so.
Ena so tale na gauna, na veisau ni veika e taudaku kei na veika e loma e laurai e matana votu. O Pailato a sotava tiko e dua na leqa ena nona vanua o ya me baleta e dua na Jisu ni Nasareci. Na nodrau veivinakati tale kei Eroti—o koya erau a “veicati eliu” (Luke 23:12)—e sega ni vakabekataki ni irogo bibi vei ira ka ra dau via kila na veimaliwai vaka o ya. E dina ga ni veidre na yalo e loma, e soli koya ki na vakatulewa ni lewevuqa, me vosoti o Parapa ka sega ni o Jisu. E na liga sa vuluvulu ka se duka tikoga, e a lesu tale ki Sisaria o Pailato. Na Karisito e a lako sara ki Kecisemani kei Kalivari, me vakayacora na veisorovaki mosimosi ia e veivagalalataki ka rawa kina ki na bilioni vakabilioni me ra na vakatucaketaki tale.
Nikua na o ni veivaluvaluti e na yaco mai vei ira na yalododonu se tawayalododonu me vaka na uca vei ira na tamata kecega, ia na isolisoli soli wale cecere i Karisito me baleta na Tucaketale e sa baleti keda kece sara ga! Me vaka ga na vuso ni ua ena dela ni wai ka na sega ni vakadeitaka na veika e yaco tiko ena loma ni sauloa, ena vakakina na veisorovaki, na veika e yaco wavolivoliti keda tu, ka tawamudu na kena ilakolako e a yaco ena loma ni dua na i teitei ka vakakina e na dua na ulunivanua tabogo.
Na kena dau tadolavi na cakacaka ni Kalou e dau yaco vakamalua. E dua na ivakaraitaki oqo, na inaki cava beka ni bula vakailavo ni matavuvale i Joseph Smith Sr. ka ratou biu vanua kina mai New England ki na mua-i- cake kei New York, eratou sega ni kila—ni ratou sa vakayarayarataki—ki na peleti tabu, ka buluti tu mai na delana o Kumora, ka na yaco me “dua tale na ivakadinadina kei Karisito,” e “delai vuravura” (2 Nifai 25:22).
O koya gona ni noda gauna e kune kina na veisaqasaqa, na kauwaitaki vakamalua ni “bula ni tamata” sa ka bibi. E dina ni yavavala e so e vakatura cake na veigauna vinaka, e vakauqeta na ivalavala savasava, na veileti vakayago ena sega ni mai ulubale me mai vakaleqai kina e dua na veivakadeitaki vakayalo, e dina ni so e vaka me sega ni wali vakarawarawa. Kevaka me na lomalomarua na vanua, e sega ni dodonu me da voroka na noda veiyalayalati. E dua na kena ivakaraitaki, e sega ni rawa me vakadonui na veibutakoci me baleta walega ni sa yaco e dua na ivalu, ka ra sa veibiu na veiwatini. E sega ni dua na ivakamacala e ra ki na ikavitu ni vunau, “Mo kakua ni ia na veibutakoci vakavo ena gauna ni valu” (raica Lako Yani 20:14).
Ena duatale na ivalu, o Peresitedi David O. McKay e a vakasalataki ira na lewenilotu ena mataivalu o ya “maroroi iko mo bula savasava” ena loma ni “veika rerevaki ni ivalu” (Conference Report, Epe. 1969, 153).
E dina ga ni na yaco na veivaluvaluti ni veimatanitu, na veilecayaki oqo ena sega ni solia na dodonu vei ira na veitokani vakabisinisi me ra veicacati se cati ira na nodra dauniyau, butako se beitaka vakailasu na kai nodra ka sa voroki kina na ikawalu kei na ikaciwa ni vunau-ka sega eke na ulubale ni vakamacala e ra (raica Lako Yani 20:15–16).
Na veilecayaki ni veika vakavuravura ena sega ni vakadonuya na veilecayaki vakayalo kei na veivakacudruvi ena sega ni solega na noda ivalavala ca se vakatabogotaka na mata ni Kalou. Kena ikuri, na qaqa vakaivalu ena sega ni sosomitaka na noda qaqa mai na noda ivalu ni noda yalodei. E sega ni vakakina na cudru katakata ni tamata me vakamalumalumutaka na loloma uasivi ka veivakabulai ni Kalou me baleti ira na luvena. Sa vakakina na kabukabuwa ni veigauna e so ena sega ni veisautaka na dina ni Karisito sa Rarama kei Vuravura!
Me da vakataka na cauravou a tomani Ilaisa voli ena ulunivanua. Taumada a rerevaka vakalevu o koya na qiqi ni valu ni meca sa vakavolivoliti rau, e a tadola vinaka tu na matana na cauravou, a qai raica na “ose kei na qiqi bukawaqa,” ka sa vakadeitaka “ni ra sa lewevuqa era sa tiko kei kedaru ka lewe lailai era sa tiko kei ira” (2 Tui 6:16, 17). Kemuni na ganequ kei na taciqu, na veika vakafika vakayalo e sega ni veisau!
Na noda dau mai lutu koso kei na noda lomaleqa ena sega ni veisautaka na dina ni Nona kila ka taumada na Kalou, ka sa umani kina na noda digidigi eda sa nuitaki kina. Ni dau rogovaki mai na veitukutuku lalai kei na kena e buta katakata ni tiko yavavala vakamatatamata, na Kalou e bula tiko ka sa kila tu o Koya na veika nikua, e nanona kei na veisiga ni mataka (V&V 130:7). Na Nona inaki tudei vakalou sa vakataudeitaki tu, o koya gona ni veika cava ga e sa lomana me cakava ena vakayacora vakakina (raica Eparaama 3:17). E kila o Koya na kena icavacava mai na kena ivakatekivu! (raica Eparaama 2:8). Na Kalou e rawa ni “kitaka ga na [Nona] … cakacaka” ka na yaco kece na Nona lewa, e dua na ka lasu ni ituvatuva cecere vakatamata ni da dau vakayagataka cala na noda digidigi! (raica 2 Nifai 27:20).
Sa vakadeitaka vei keda na Kalou:
“Niu sa tuberi kemudou tiko” (V&V 78:18).
“Au na tiko ena kemudou maliwa” (V&V 49:27).
Ena tiko “vata kei [keda],” kemuni na taciqu kei na ganequ, “ena gauna kecega ni noda leqa”(V&V 3:8), oka kina na veidusimaki ni Nona parofita bula, o Peresitedi Gordon B. Hinckley.
Ia na veigauna talei ni “bula ni yalo” ena toso tikoga ni da vakayaco ka vakarawarawa se ena vakatitiqa, ena noda vakatulewa yadua e veisiga ena maliwa ni yalovinaka kei na cudru, loloma uasivi kei na lewa cala, lomasoli kei na yalo ca.
Na ivalu ena sega ni rawa ni bokoci kina na ikarua ni vunau. E sega ni vakaiyalayala o koya. O ira era salavata e sega vei ira na ivakatakilakila ni dua na matanitu, ka sega ni dua wale ga na roka ni kulidra.
Eda na dau viakana beka, ia e se rawa ga ni da vakaitavi me vaka a vakayacora o koya na yada ka a vakayagataka na iotioti ni kena kakana me vakani Ilaisa kina (raica 1 Tui 17:8–16). Na veidovi me vakaoqo ena dela ni dravudravua kei na vakaloloma sa dau veivakayavalati sara. Ena veiyabaki taumada ni nona bula, a segata vakavica o M. Thirl Marsh me cakacaka ena qara ni vatu talei ena gauna ni leqa ni bula vakailavo. E se tamata gone, ia e tubu levu, a cikecike tikoga ka mani tauri kina, ia eratou lewe vica na nona itokani a sega. E dau kune votu, ena vica na gauna ni oti mai na cakacaka kaukauwa ni dua na siga, sa dau wasea vakatautauvata na gone yalovinaka oqo o Thirl na ilavo vei ira na nona itokani me yacova, ni ra sa cakacaka talega.
Ni da vakasamataka na “bula ni yalo,” ena veivuke me da segata mada e liu me da veisau taucoko ia na sore ni kosipeli e taumada na kena e lutu ena “qele vinaka,” ka kaya o Jisu ni oqo o ira na “yalodina ka vinaka” (Luke 8:15.) Na tamata vaqori ena yaco vua me vakaoqo “rogoca na voca” ena “reki,” “kila na kena ibalebale,” “a sa vua,” ka “vosota,” vulica se cava na “viakania ka viagunuva na ivalavala dodonu.” (Maciu 13:20, 23; Maciu JST. 13:21; Maciu 5:6). Sa dua na “veisau levu”(Mosaia 5:2.). Na saumaki e matataki kina na veisau mai na “tamata vakavuravura” me yaco me “tamata i Karisito”(Mosaia 3:19; Ilamani 3:29; raica talega 2 Korinica 5:17). Sa ikoya na cakacaka e taura e dua na yakavi taucoko.
Na vua ni ivalavala ka na sega ni oti rawa oqo e okati kina na “via kitaka tikoga na ivalavala dodonu” (Mosaia 5:2). Sa rauta ni ivalavala oqo e rawa kina vei ira era saumaki mai ki na Lotu me ra “vaqaqacotaki ira na wekadra” (Luke 22:32) ka laveti ira na tani ena nomuni “vakarau tiko mo dou tukuna vua na tamata yadua sa tarogi kemudou, na vu ni nuinui sa tu ena lomamudou”(1 Pita 3:15). O ira na tamata bula dodonu vakaoqo era dau vakayacora e dua na veiqaravi bibi ka vuni ki na kawatamata: Era sa yaco me ra tiki ni wiliwili ka na rawa ni vakauta mai na nona loloma na Kalou ki na kawatamata.
O ira na tisaipeli era sa veisau dina, e dina ga ni ra se bera tu ni taucoko sara, era na vakasaqara na “bula ni yalo” ena veisiga kecega, ena itabayabaki kecega ena maliwa ni ivalavala vakasisila se na rusa. E okati ena ivalavala oqo na noda cakava tiko na “loma i Tamada” (Luke 2:49; raica talega Mosese 1:39).
Me vaka ni ka e dodonu me yaco tiko na taucoko ni veisau, na veika ca ka rerevaki e rawa talega ni veivuke ena kena vakavuna me da tekivutaka tale na noda ilakolako se me da vakatotolotaka cake.
Kemuni na taciqu kei na ganequ, ena maliwa ni veika dau veiveisau ni vuravura oqo, me da tovolea me vaka eda sa vakasalataki kina, me da kauwaitaka na “bula ni tamata.” Vinaka vakalevu ki na Nona veisorovaki lagilagi o Jisu, na bula ni yago tawamate rawa o ya ena sivia na yabaki ni kalokalo bula balavu duadua, ka na sivia talega na bula lekaleka ni veika vakavuravura, kevaka sara mada ga e kaukauwa!
Au vakadinadinataka, ena yaca tabu i Jisu Karisito, emeni!