Vakavakarau ki na Veiqaravi Vakadaukaulotu
Sa dua na ka bibi me ra cakacaka vata na tama kei na luvedra tagane ena ivakavuvuli taumada ni vakavakarau ena kaulotu.
Ena dua na koniferedi ni iteki ka se qai oti wale toka oqo, a vosa kina e dua ka se qai lesu mai ena kaulotu ena ulutaga ni vakavakarau ki na kaulotu. E a vakayagataka e dua na ivakatautauvata ni dua na tama ka tukuna tiko vua na luvena tagane: “Au na marautaka na nomu sa na qito ena imatai ni nomu qito basketball mo rawa ni kila kina na vakau polo kei na vakacuruma.” E vakatautauvatataka na ivakaraitaki o ya kei na dua na tama ni gone ka kaya vua na luvena tagane: “Au na marau ena gauna o sa na lako kina ena nomu kaulotu mo rawa ni vulica kina mo tamata vinaka cake ka vakavuvulitaka na kosipeli.” Na ivakatautauvata oqo e tarai au sara ga vakaukauwa niu vakananuma lesu na noqu bula.
Niu se gonetagane lailai, na noqu gagadre levu duadua meu dau qito basketball. Au kalougata vakalevu ni o tamaqu e dau vinakata tu ga me raica ni sotavi na gagadre ni luvena. Keirau dau vakatovotovotaka kei tamaqu e veisiga na iwalewale ni veipasi kei na vakau polo me vica vata na auwa ena loma ni neitou valenikuro lailai. Au dau vakarorogo ki na qito ni veiunivesiti ka dau kaburaki ena walesi ka tatadrataka tu me na dua na siga meu na qito kina ena dua na timi ni univesiti. E yawakalia sara tu mai na noqu vakasama ena gauna o ya na kaulotu; oqori na vuna, au sega soti ni kawaitaka sara kina vakalevu na vakavakarau ki na kaulotu. Ena nona sasaga me vakadeitaka ni tiko na duidui ena veika au vakaitavitaki au kina, a ciqoma kina o tamaqu na ilesilesi me noqu iliuliu ena sikauti, e dina ga ni sa oti e dua na gauna balavu sara sa sega tu kina ni dua na nona itavi ena Lotu. E a vakamuria sara vakamatailalai na veika e tu ena ivola ni sikauti, ka keimami mani yaco kina o au kei na so tale na noqu itokani me lewena na Eagle Sikauti. Au sa qai kila ena guna oqo ni sa dua na vakavakarau vinaka ki na kaulotu na sikauti.
E a qai vakavotukana na noqu tatadra ena gauna ni gone ena noqu sa lewena na timi ni basketball ni Utah State University. Ena ikarua ni noqu yabaki ena Utah State, keirau a veitokani kina kei na dua e se qai lesu mai na kaulotu. Ena vuku ni nona ivakaraitaki sa tekivu meu vakaraici ira na noqu itokani e koronivuli, ka okati kina o ira ena timi ni basketball, kau qai kila ni o ira na tamata au dau vinakata vakalevu duadua meu vakataki ira sai ira era sa lesu mai ena kaulotu. Mai na nona veidusimaki loloma na noqu itokani vinaka—ka vakakina, au kila, na vua ni nona masu kei na ivakaraitaki na tinaqu lomani—sa veisau na noqu gagadre. Ni oti na ikarua ni noqu yabaki ena Utah State, au sa kacivi meu veiqaravi ena Western Canadian Mission.
Ni oti e tolu na vula na noqu kaulotu sa lesi e dua na daukaulotu vou mai Idaho me noqu itokani. E se qai vica ga na siga na neirau tiko vata au sa raica e dua na ka bibi: e kila o noqu itokani na kosipeli, au kila walega o au na lesoni ni veituberi. Sa dua na ka na noqu laki diva meu a vakavakarau vakavinaka ki na kaulotu me vaka ga na noqu a vakavakarautaki au ki na qito basketball. Na noqu itokani e a vakarautaki koya ki na kaulotu ena gauna taucoko ni nona bula ka yaco kina me dua na lewe ni timi nuitaki. Sa dua na ka bibi me ra cakacaka vata na tama kei na luvedra tagane ena ivakavuvuli taumada ni vakavakarau ena kaulotu.
Au vakabauta ni ganita me da vakatautauvatataka na qito basketball ki na cakacaka ni kaulotu. Na qito basketball e sega ni o koya walega na nomu sota vata kei na dua tale na timi e rara, ia e oka talega kina na gauna ni vakaukauwa yago kei na vakatovotovo. Na cakacaka cecere ni vakabula yalo e sega ni yalani walega ki na rua na yabaki ni nomu kaulotu, ia, e gadrevi sara talega kina na vica vata na yabaki ni bula dodonu kei na vakavakarau mo rawa ni sotava kina na ivakatagedegede e gadrevi ena daukaulotu.
Ena 11 ni Janueri, 2003 me tiki ni veituberi kaburaki ni matabete ki vuravura raraba, a vakasalataki ira kina na veiliutaki ni matabete o Peresitedi Gordon B. Hinckley me baleta na cakacaka ni kaulotu. Na nona vosa e vakavuna me da raica lesu tale na noda itavi yadua me da wasea na kosipeli. E kaya kina o Peresitedi Hinckley, “Sa yaco mai na gauna me da tosoya cake kina na noda ivakatagedegede me baleti ira era kacivi me ra veiqaravi me ra matataka na Turaga o Jisu Karisito ki vuravura” (“Missionary Service,” First Worldwide Leadership Training Meeting, Janueri, 2003, 17).
E rua na ivalavala ni kena laveti cake na ivakatagedegede ni veiqaravi vakaulotu ena vinaka me da vakasamataka. Taumada na nodra tekivu vakarautaki ena nodra tubucake mai na gonetagane kei na goneyalewa. Ena nodratou ivola ka ratou vakaraitaka mai kina e so na veisau ki na parokaramu ni Cauravou kei na Goneyalewa, eratou kaya kina na Mataveiliutaki Taumada, “Ni ra cakacaka tiko na itabagone me baleta na veitakete oqo, era na vakatorocaketaka kina na maqosa kei na ivakarau ni bula ka na kauti ira yani ki na valetabu ka vakarautaki ira ki na bula ni veiqaravi vei ira na nodra matavuvale kei na Turaga” (Na iVola ni Mataveiliutaki Taumada, Sepiteba 28, 2001). Vakarorogo vakavinaka ki na nodra vosa: “vakatorocaketaka na maqosa kei na ivakarau ni bula.” Me vaka ni o ni itubutubu ka iliuliu ni itabagone, eda na gadreva me da vukei ira na noda itabagone me ra raica na maqosa oqo kei na ivakarau ni bula.
Na ikarua ni valavala e yavutaki koto ena bula kilikili, ka na yaco mai na kena maroroi na ivakaro ni Kalou. Eso na cauravou era dau nanuma tu ni rawa ni ra voroka na ivakaro, laki vakatusai koya vua na nona bisopi ni vo e dua na yabaki me lako ki na kaulotu, oti oya me sa na kilikili me lako ki veiqaravi ena kaulotu. Na ivalavla ni veivutuni e levu cake sara mai na vakatutusa ga kei na gauna ni wawa e tarava mai. Eda dau rogoca vakawasoma na nodra taro o ira era ivalavala ca: “Me na vica beka na gauna na balavu ni noqu wawa ni bera niu rawa ni qai laki kaulotu?” Me da dau nanuma vinaka tiko ni veivutuni e sega ni o koya walega na noda wawa tiko. E kaya na iVakabula: “Ia mo dou cabora ga vei au na yalo sa raramusumusu kei na yalo sa bibivoro. Ia ko koya yadua sa lako mai vei au ena yalo raramusumusu kei na yalo bibivoro, au na papitaisotaki koya ena bukawaqa kei na Yalo Tabu… .” (3 Nifai 9:20).
Oqo na gauna me da cakacakataka kina na noda veivutuni kei na noda vosoti. Sa kaya kina o Peresitedi Hinckley: “Ena sega ni rawa ni da vakadonui ira e sega tu ni kilikili na nodra bula me ra lako yani ki vuravura ka vakateteya na itukutuku vinaka ni kosipeli” (First Worldwide Leadership Training Meeting, Janueri 2003, 17). Eda sa kila me vaka na nodratou vosa na Mataveiliutaki Taumada ena cakacaka ni kaulotu ni ra tu eso na ivalavala ca ka na sega kina ni vakatarai ira na cauravou kei na goneyalewa me ra kaulotu (“iTukutuku ena Cakacaka ni Kaulotu mai na Mataveiliutaki Taumada kei na Kuoramu ni iApositolo Le Tinikarua,” 11 ni Tiseba, 2002).
E kaya o Peresitedi James E. Faust: “Sa dodonu me tu eso na ka me taucoko tu ena noda bula. E so na ka e dodonu me kua sara ga ni vakayacori, e so na laini me a kakua sara ga ni takosovi, eso na yalayala me kua ni voroki, e so na vosa me kakua sara ga ni tukuni, kei na so na vakasama me a kakua sara ga ni vakalasai” (“Integrity, The Mother of Many Virtues,” Ensign, Me 1982, 48).
Sa vakabibitaki cake na veika e gadrevi vua e dua me qai lako rawa kina ki na kaulotu. “O ira era sega ni sotava na veika e gadrevi me baleta na ituvaki ni yago, vakasama, kei na yalo ka gadrevi ena cakacaka vakadaukaulotu era sa na vakacegui ena vakarokoroko. E rawa me ra na kacivi ki na veilesilesi tale e so me ra na vakalougatataki kina” (iTukutuku ena Cakacaka ni Kaulotu mai na Mataveiliutaki Taumada kei na Kuoramu ni iApositolo Le Tinikarua, 11 ni Tiseba, 2002). Eda nuitaka ni ena noda muria na idusidusi oqo mai na Mataveiliutaki Taumada ena tubu cake kina na kedra iwiliwili o ira na bula kilikili ka ra sa vakarau tu me ra veiqaravi.
Ena qito e dau tu e so na dauqito eda dau taleitaka, ka da dau segata me da vakatorocaketaka na noda maqosa me rawa ni da yaco me vakataki ira. Ena noda bula vakayalo e tu tale ga eso na kena ivakaraitaki me da muria, na kena ka cecere duadua sai Koya na noda Turaga ka iVakabula o Jisu Karisito, ka a sauma na taro nei Tomasi, “Keitou na kila rawa vakaevei na kena sala?”(Joni 14:5).
E tukuna na ivolanikalou: “Sa kaya vua ko Jisu, Koi au na sala” (Joni 14:6). Ena 2 Nifai eda wilika kina: “Dou muri au. Ia oi kemudou na wekaqu lomani, sa rawa li me da muri Jisu kevaka eda sa sega ni muria na nona ivunau na Tamada?” (2 Nifai 31:10).
Oi kemuni na noqu itokani itabagone, e vuqa era sa muria tiko na nona “sala” na iVakabula, o koya ka rawa ni da segata me da muria ni da vakavakarau ki na kaulotu. E rawa ni ko ni raici ira ena nomuni veimatavuvale, vei ira na nomuni itokani, kei ira na nomuni iliuliu ena Lotu. Nikua sara mada ga au dau wilika tu me vaka e dua vei ira na noqu veivakalougatataki levu duadua o ira na noqu itokani era dau vakaraitaka na ivakaraitaki dodonu ena nodra muria na iVakabula.
Sa noqu masu mo ni gugumatua na cauravou ena nomuni gagadre dodonu, mo ni qaqa ena veika kece sara o ni vakayacora, ka mo ni, me vaka na veika sa tukuna oti o Elder M. Russell Ballard, “na itabatamata daukaulotu cecere duadua ena itukutuku ni Lotu” (“Na iTabatamata Daukaulotu Cecere Duadua,” Liaona, November 2002, 47).
Au vakadinadinataka, me vaka sa kaya oti o Peresitedi Hinckley me baleta na cakacaka ni kaulotu, ni “sega tale ni dua na cakacaka me cecere cake. E sega tale ni dua na cakacaka me bibi cake” (First Worldwide Leadership Training Meeting, Janueri 2003, 21). Ena yaca i Jisu Karisito, emeni.