Tudei Ena Noda Veiyalayalati

Susan W. Tanner

Peresitedi Raraba ni Goneyalewa

Ni da tudei vei Karisito eda sa bula voli ena kena rokovi na veiyalayalati… . Ena gauna eda vakayacora kina na veika oqo, … eda na laveti cake vakayalo ka cokonaki na lomada ena loloma.

Mai na gauna au a kacivi kina ena ono na vula sa oti, e tuburi au e dua na loloma levu vakalou me baleti kemuni na taciqu talei. Sa noqu gagadre bibi baleti kemuni na goneyalewa mai na veiyasana mo ni kila ni ko ni sa lomani—sega ni mai vei au duadua ga sa vakatalega kina mai vei ira na nomuni itubutubu kei na iliuliu, ka vakauasivi sara mai vua na Tamamuni Vakalomalagi.

Ena so na gauna e dredre me da vakila na loloma oqo. Au kila e dua na goneyalewa sa vaka me vinaka taucoko sara na nona bula. E a se qai digitaki oti ga o koya me mata ni gonevuli, a vakatovotovotaki ka digitaki me lewena e dua na matasere cecere, ka qai digitaki walega oqo me ranadi ni koronivuli. Ena nona a lesu mai koronivuli ena dua na siga a lako yani ka davoca tagitagi na nona loga. E a tarogi koya yani na marama tinana se cava na leqa, a karalaka mai “Au tamata druka; e sega ni dua e taleitaki au; au sega ni vakayacora vakavinaka na noqu cakacaka ni vuli; oti au qai rairai ca talega.” E sega ni dua me na siqema rawa ni veilecayaki tu na nona bula, galili ka sega ni taucoko;ia sa vaka tu oqo na itovo ni nodra vakasama na itabagone ena veigauna e so.

E so talega na itabagone era sotava na veika dredre vakaoqo ena vuqa sara na gauna. E dua na kena ivakaraitaki o ya mai vei ira na goneyalewa au kila, e dua vei ira, sa wawa mate tiko ena kenisa o tinana. E dua erau sa sere na nona itubutubu. E dua tale e dau galili tu ga e vale ena mua ni macawa ka ra gole yani ki na marau na nona icaba. E dua na goneyalewa e mavoa bibi mai na dua na coqa. E dua na goneyalewa e sa curu o tamana ki na itikotiko vakaivalu. E dua talega na tacida vinaka e lomaleqataka tiko na ganena ka bula vakatani tiko.

Na cava e rawa me vukei ira na itabagone era kabiti ira tu na leqa kilai levu oqo? Na vu ni vunau ni yabaki oqo, ka sa itakele tiko ni soqo oqo, sa na sauma vei keda. E kaya, “Mo dou toso ki liu ka tudei vei Karisito ena nomudou vakanuinui taucoko sara, mo dou lomana na Kalou kei na tamata kecega” (2 Nifai 31:20). Au taleitaka dina na ivolanikalou oqo. E vakamatatataka na gaunisala me da walia rawa kina na bolebole e sotavi ena bula oqo. Niu toso ga ki liu ena vakanuinui kei na loloma, au vakila ni yaco ruarua vei au na ka oqo.

Ni da tudei vei Karisito eda sa bula voli ena kena rokovi na veiyalayalati. Eda vakavouya ena veimacawa na noda veiyalayalati ni papitaiso “me da taura na yacana” ka “daunanumi koya” ka “muria na nona vunau.” Eda sa tudei vei Karisito ena gauna eda vakayacora kina na veika oqo ka laveti cake vakayalo ka cokonaki na lomada ena loloma. A kena ivakalekaleka oqo, niu maroroya na noqu veiyalayalati, au sa nuidei kau sa lomani.

E dua na noqu itokani goneyalewa kau sa na kacivi koya me ko Lindsey e gadreva tiko e dua na inuinui. E bula voli o koya ena dua na vuvale e sega kina na Kalou kei na veilomani. O ira na nona itokani era gadreva ga na lasa vakavuravura ka vuqa vei ira na iliuliu ni Goneyalewa era vakawaleni koya tu ga. Ia mai na vu ni lomana dina e vakila tu ni lomani koya tiko na Turaga e dina ga ni vaka tu ko ya na ituvaki ni nona bula. E dau vakananuma tu ga na Turaga o koya, ka vukea me kakua kina ni vakamuri ira na nona ilawalawa era ivalavala vakatani. E dau saga me masuta na Tamada Vakalomalagi ena nona rumu ni moce, ni gadreva me sobuti koya na Nona Yalo Tabu. E gadreva vakaidina o koya me tamata vinaka ka maororoya na Nona ivunau. E dina ni sega ni kila ka vakalevu ka sega ni tokoni mai vei ira na nona itokani se vuvale ia a saga tikoga me maroroya na nona veiyalayalati ni papitaiso. Sa nuidei tikoga o koya me tomana tiko, ka sa vakila ni lomani tiko mai vua na Tamada Vakalomalagi.

Sa yalataka oti tu na Turaga ni na sega ni guilecavi keda baleta ni a “ceuti [keda] ena qeteqete ni [ligana]” (Aisea 49:16). Ka sa mai noda iyalayala Vua o ya ni da na sega ni guilecavi Koya ni da sa ceuti Koya e lomada.

Era a vakavulici ena ivakavuvuli oqo o ira na Yalododonu ni donumaka na nodra vakararawataki mai Missiouri. E a vakasalataki ira na Turaga me ra “waraka na Turaga ena yalo vosota; raica sa rogoca na Turaga ni Lewevuqa na nomudou masu… . A sa yalataka vei kemudou ko Koya e na veiyalayalati sa tudei sara, ni na vakayacora; ia na veika rarawa kecega dou sa sota kaya dou na vinaka kina” (V&V 98:2–3). Na veiyalayalati oqo e sega ni kauta laivi na veivakatovolei, ia e solia vei ira na vakacegu, kei na inuinui ki na veisiga ni mataka.

Sa vakatalega kina o Eparaama ni a toso tikoga ki liu ka tudei ka vakabauta tikoga na yalayala ni Kalou vua. Ena veigauna au dau wilika kina na nona ilakolako o Eparaama ki na vanua o Moraia me laki vakacabora kina na luvena o Aisake me isoro, au kila vinaka sara ga na ituvaki ni nona vakasama. E sega ni kila o koya na ka ena vure mai na veivakatovolei o ya me vaka na noda mai kila vakaitukutuku. E a sega sara tu ga ni kila o koya na cava ena yaco. Ia e a tudei tu ga. E a bulataka voli o koya na yalayala ni Turaga ni na vakalougatataki koya. E a sega ni tarovi koya na veitubuyaki ni vakasama ka rairai a yacovi koya ia a toso ga ki liu ka tudei vua na Karisito.

Me vakataki ira na Yalododonu mai Missouri, e kila tu o Lindsey ni se sega ni biuti koya na Tamada Vakalomalagi e dina ga ni sega ni taucoko tu na nona bula. Na Nona loloma e tudei. E a solegi koya ena “veiyalayalati tudei” ni nona loloma—ni “na veika rarawa kecega dou sa sota kaya, dou na vinaka kina.” Me vakataki Eparaama, e a drakidrakita na nona ilakolako na goneyalewa oqo, ia a toso tikoga ki liu. Ni mai vakayacora vakakina, sa yaco vua na veivuke. E a tuberi koya e dua na iliuliu ni Lotu ka lomani koya vakakina. E a toro volekata sara o koya na Tamada Vakalomalagi ka yaco me kunea e dua na cauravou ka lomani koya, a tuberi koya ena kosipeli ka vakamautaki koya sara.

Sa ra qai yaco mai na veivakalougatataki a dau diva voli tu e liu. Sa qai raica o koya ni sa solegi na nona vuvale ena Yalo ni Turaga ka susuga cake na luvena bula dodonu. E dua na gauna e a galili ka vakawalena, ia oqo sa solegi koya tu na loloma. Oqo e a vakavotukanataki mai na toso tikoga ki liu ka waraka na Turaga ena yalo vosota. Na tudei tu vei Karisito e sa inuinui nei Lindsey ka sa na vakakina vei keda ni da sokota yani na veibolebole kei vuravura. Na qaqa ni sere ena lagata vei keda na matasere edaidai ena vakauqeta me da lako yani Vua.

“It matters not what befall, What threat’ning hand hangs over me;

He is my rampart through it all, My refuge from mine enemy.

Come unto him all ye depressed, Ye erring souls whose eyes are dim,

Ye weary ones who long for rest.

Come unto him! Come unto him! (“Come unto Him,” Sere, no. 114).

Ni da maroroya na veiyalayalati e dulaki mai na inuinui me da toso tikoga ki liu, ka veisautaka talega na lomada. E a vakavulica na Turaga ena Jeremaia, “Ia sa vakaoqo na veiyalayalati kau na cakava… . Kau na tugana na noqu vunau ki na lomadra, kau na vola talega ki na yalodra” (Jeremaia 31:33). Na veiyalayalati e vakarabailevutaka na lomada ka yaco me da vakila “na loloma ni Kalou kei na tamata kecega.” Nanuma tiko, ni da maroroya na noda veiyalayalati, eda vakila na inuinui kei na loloma.

E a vunautaka o Jisu mai na ulunivanua o ya na savasava ni lomada me vaka na loloma, veivosoti kei na yalovinaka. E a vakavulici keda sa Nona tisaipeli me da taura na yacana ka vakatotomuri Koya. Oqo ena veisautaka na lomada ka vakalougatataka na noda bula veiwekani. E kaya o Elder Marvin J. Ashton, “Ni da sa saumaki dina vua na Turaga o Jisu Karisito, solia nomu bula Vua, e dau yaco e dua na ka veivakurabuitaki : sa vagolei na noda rai ki na nodra bula raraba na tamata, kei na noda veiqaravi sa vakayacori ena vosota, na yalovinaka, kei na veikauwaitaki” (“The Tongue Can Be a Sharp Sword,” Ensign, Me 1992, p. 20).

Ena rawa mo ni tudei tikoga vua na Karisito ena nomuni vuvale, kei ira na lewe ni nomuni matavuvale? Ni ko ni sa yalataka mo ni taura na yacana ka vakatotomuri Koya, sa kena ibalebale mo ni na dau vosa vakamalua, mo ni yalovinaka vakalevu cake, lomani ira vakalevu na tacimuni, ka vakavinavinakataka ka dau vukei rau vakawasoma na nomuni itubutubu.

Oqo e dua na ka a vakayacora na neirau cauravou lailai ena dua na ilakolako vakagade e liu sara. Keitou a lakova yani e dua na vanua yawa me keitou laki sarava e dua na kasela rairai totoka. Ni keitou sa yaco yani, sa wawale sara vakalevu e dua vei iratou na neirau goneyalewa lailai ka sa vakacudrucudru tu. Sa sega ni via sobu mai ena motoka me keitou taubale yani vakalekaleka ga ka laki raica na kasela keitou a lakova mai vakayawa. E lewe levu vei keitou sa tekivu me ra cudruvi koya. Ia na neirau cauravou lailai yabaki tinikava a vavai ganena ga vakamalua e dakuna ka kauti koya yani ki na kasela. E a mai seyavu yani na yalo ni veicudruvi o ya. Na ivakaraitaki ni nona loloma o ya a tiko voli vakalevu cake ena neitou dui vakanananu mai na neitou a raica na kasela o ya.

Ena so na gauna e dau dredre me da vinaka tu ga ena loma ni noda vuvale. Sa gadrevi kina na gugumatua tiko kei na “toso tikoga ki liu.” Ia ni ko maroroya na nomu veiyalayalati, ko na vulica mo na lomani ira era sa vauci tawamudu vei iko. Sa qai rawa kina mo vakarabailevutaka ki na tamata taucoko na nomu loloma.

Keitou a tiko vakavuvale mai Brazil ena vica na yabaki sa oti. Ni vo e rua na macawa me keitou sa lesu tale ki neitou vanua, keitou a coqa e gaunisala. Ni oti mai na soqo ni sakaramede ka keitou sa gole tiko yani ena motoka ka mua yani ki na dua na gaunisala veilatai. E qai ucu mai ki loma ni gaunisala e dua na motoka ka coqa na baba ni neitou motoka. E a sega ni dua e mavoa vei ira era vodo tiko ena motoka ruarua, ia era a kabibi ga na motoka. Ena gauna a sobu kina o John na turaga watiqu me laki vakamacala vua na draiva tale ka dua, au a tukuna tikoga vua ni a sega ni neitou cala. Oti ga vakalailai sa lesu mai ka draivataki keitou yani ki na neitou itikotiko ni teitei ka keitou vakavale tiko kina, ka sa tatamelamela na taya ena kaukamea ni gole na motoka. E a muri keitou mai na motoka o ya. Na ka ga e cavuta rawa o John o ya, “Au na qai vakamacala vakamalua.”

Ni keitou sa yaco rawa yani e vale, a taura mai o John na ilavo ni leqa tubukoso ka solia ki na vuvale o ya me vakavinakataki na nodratou motoka. Eratou a lesu ena marau. Au a kurabui sara ga. E a qai vakasoqoni keitou vata vakamatavuvale. A vaka me kere veivosoti o koya ni vakamacalataka na ka a vakayacora. “Au kila ni tou a sega ni vakavuna na vakacalaka oqo, ia ni keitou a veivosaki tiko kei na vuvale o ya, e dua ga na ka sa votu tiko mai ki na noqu vakasama o ya ni se qai oti ga oqo e dua na auwa na noqu veiyalayalati kei na Tamada Vakalomalagi meu muria na Nona ivakarau. Au kila kevaka e a yaco Vua na ka oqo, ena lomana ga o Koya na matavuvale o ya ka vukei iratou.” Sa qai dua oqo na turaga vakawati ka tama ivakaraitaki! vinaka! E nanuma tiko o koya na nona veiyalayalati. Na nona bulataka na loloma Vakarisito, sa vakaceguya kina na lomadra na tamata.

Au sa vakadinadinataka vei kemuni, niu dau nanuma na noqu veiyalayalati ena veisiga yadua, sa tu vei au na inuinui kei na loloma. Au kila ni gauna au tudei tu kina vua na Karisito e kauta mai e dua na rarama dina ni inuinui kivei au ka sa lomaqu meu lomana na Kalou kei na tamata kecega.

“Na cava sa kerea tiko vei keda na Tamada? Na cava sa voqataka tiko mai na ivolanikalou? Me tiko vei iko na vakabauta, na inuinui, bula vakataka na Luvena, vukea na nodra ilakolako na tamata” (“He Sent His Son,” Children’s Songbook, 34–35). Sa noqu masu ni o keda yadudua eda na lako yani Vua ena vuku ni inuinui ka vakamuria na Nona ivakaraitaki ni loloma ena yaca i Jisu Karisito, emeni.