Kokoaua nakon te Atua ao Ana Mwakuri

Iroun Unimwaane Quentin L. Cook

Man te Kooram n Abotoro n te Tengaun ma Uoman

Ti riai ngaira ni kabane ni ukora oin ara kakoaua iroun Iesu Kristo, taua tian nanora ma ara namakin, rairannano man ara bure, ao ni kokoaua nakon te Atua ao Ana Mwakuri.

N Okitobwa ae nako, I anganaki katabeau, ma Beretitenti M. Russell Ballard ao Unimwaane Jeffrey R. Holland, ni kawara te United Kingdom, te tabo are ngaira aika teniman ti mwakuri ngkoa iai bwa mitinare ngke ti kairake. E reke ara tai n reirei ao n tataekina te koaua, ao ai arona naba ma manga kauringan rongorongon te Ekaretia rimoa n te British Isles, are tibutoru ae Heber C. Kimball ao raona bon moan mitinare iai ngkoa.¹

E manikangare nakoira, Beretitenti Russell M. Nelson iaon te katabeaki aei, ni kaotia bwa e bon aki ririki ae a kanakoaki teniman Abotoro ni kawara te aono are a beku iai bwa mitinare ngke a kairake. E ataia bwa ngaiia ni kabane a bane n tangiria bwa a na kanakoaki nakon te mition are a moan nako iai. Ma moangarena ae korakora, kabwarabwara raoi te bwai ae na riki bwa ngkana iai teniman riki Abotoro aika a tia ni beku n te mition ae titebo n 60 te ririki n nako, ngkanne a na bon kona naba ni karekea te katabeaki ae aekan anne.

Heber C. Kimball

N te katauraoi ibukin te katabeaki anne, I a manga wareka aron Maiun Heber C. Kimball, ae koreaki iroun tibuna te mwaane, Orson F. Whitney, ae e weteaki imwiina nakon te nakoa n abotoro. I anganaki te boki n rongorongo aei iroun tinau ae tangiraki ngke e a kaan koro itiua au ririki. Ti katauraoi bwa ti na kaea katabuan te kauring n This Is the Place Monument n 24 Turai, 1947, iroun Beretitenti George Albert Smith.² E tangirai bwa n a ata riki taekan au bakatibu ae Heber C. Kimball.

Iai inanon te boki aei te mwakoro n taeka ae e taekinaki iaon Beretitenti Kimball ae iai mwiina ae tamaroa nakon are bong. Imwaain tibwaan te mwakoro n taeka, n a taekina kabwarabwaraana ae uarereke.

Inanon te tai are e kamatawarikaki iai te Burabeti Iotebwa Timiti n te Liberty Jail, te Abotoro Brigham Young ao Heber C. Kimball iai katabeaia, iaan kaitarakiia ae korakora ni baike a rinanoi, n taraia bwa a na bairea aron kaotinakoaia Aika Itiaki mai Missouri. Kaotinakoaia e bon kainanoaki bwa e riki mai imwiin te kaetieti are a na kamaunaaki ae nako mai irou te Kowana ae Liburn W. Boggs.³

E a kaniia 30 te ririki imwiina ngke Heber C. Kimball, n te tai anne kaain te Moan Beretitentii, e ururing iaon te rongorongo aei ma te roro ae boou, ao e reirei, “N na taekinna nakoimi, bwa a mwaiti mai ibuakomi a na nora te tai ae kam na rinanon te kangaanga, kataaki ao bwainikirinaki ake kam kona ni kaaitarai, ao e mwaiti te tai ni kaotia bwa ko kokoaua nakon te Atua ao Ana mwakuri.”⁴

E reitia Heber: “Ni kaitarai kangaanga ake a na roko, e na tamaroa ibukimii ni karekea te atatai ni koauan te mwakuri aei ibon iroumii. Te kangaanga e na bon rangi ni matoatoa n te aro are te mwaane ke te aine are e aki reke irouna te atatai aei ibon irouna ke te kakoaua e na bwaka. Ngkana e tuai reke iroum te kakoaua, maiuakina ae raoiroi ao wetea te Uea ao tai toki [ni karokoa] ko [karekea]. Ngkana akea am kakoaua ko na bon aki kona ni kaitaraa. … E na roko te tai are akea te mwaane ke te aine ae na kona n teimatoa ngkana ko katan iaon aia kakoaua tabeman. Ngaiia n tatabemaniia nako a na bon kairaki man aia koaua are e bon karekea i bon irouna. … Ngkana akea iroum ko na aki tei; ngaia are ukora te kakoaua iaon Iesu ao niim ma ngaia, bwa ngkana e roko te tai ni kataaki ko na aki bebei ao ni bwaka.”⁵

Ngaira n tatabemaniira ti kainanoa oin ara kakoaua iaon ana mwakuri te Atua⁶ ao oin raoi taben Iesu Kristo. N te mwakoro 76 n Reirei ao Berita aika Tabu e kaineti nakon mimitong aika tenua ao e kabotaua te mimitong n te tiretio nakon taai. E kabotauaki ngkanne te abanuea are te teretirio nakon namwakaina.⁷

E kakan ongora bwa taai bon iai oin otana, ma namwakaina e kanakoa te ota are e karekea ke “te ota are e tangoia.” Ngkai ti taetae iaon te abanuea are te teretirio, kibu 79 e taku, “Aikai naake aki kakaonimaki n te koaua ibukin Iesu.” Ti aki kona ni karekea te abanuea ae tiretio ao ni maeka ma te Atua te Tama iaon i aon aia koaua tabeman; ti kainanoa ae bon oin ara kakoaua iroun Iesu ao Ana euangkerio.

Ti maeka n te aonaaba ae e onrake n te buakaka⁸ ao naano a tanako mai iroun te Atua ibukin aia reirei aomata.⁹ Teuana te katooto ae anai nano inanon koroboki aika tabu ae e raraoma iai Heber C. Kimball iaon kakaean te kakoaua ana mwakuri te Atua ao Iesu Kristo e taekinaki n ana taeka n reirei Aramwa nakon natina ake teniman—Ereman, Tiburon, ao Korianton.¹⁰ Uoman ibuakoia natina mwaane a tia ni kokoaua nakon te Atua ao Ana mwakuri. Ma temanna natina te mwaane e a karaoa te rinerine ae buakaka. Irou korakoran kakawakin ana reirei Aramwa bwa e anga n ae ai aron te tama ibukin kabwaiaia oin natina.

Ana moan raraoma Aramwa, n aron Heber C. Kimball, bwa n tatabemaniia iai aia koaua iaon Iesu Kristo ao riai ni kokoaua nakon te Atua ao Ana mwakuri.

N ana reirei Aramwa ae moan te rianako nakon natina te mwaane ae Ereman, e anga te berita ae moan te kororaoi bwa naake a “onimakina te Atua ao a na bon boutokaaki n rawawataia, ma aia kaangaanga, ma karawawatakiia, ao a na uotaki rake n te kabanea ni bong,”¹¹

Ngke Aramwa e a tia ni karekea te kanikinaa are e nora te anera, aio e rangi ni kangaanga n ririki. Namakin ake a reke mairoun te Tamnei ae Raoiroi bon namakin aika a rereke. Taian namakin aikai a kona n titebo kakawakiia ma rokoia ni kaotiia anera. E reirei Beretitenti Joseph Fielding Smith: “Namakin iaon te nano ake a roko mairoun te Tamnei ae Raoiroi a bon rangi ni kakawaki riki nakon te mii ni burabeti. Ngkana e taetae te Tamnei ae Raoiroi nakon tamneiia aomata, te bwai ae e tiku n te nano e kangaanga riki kamaunaana.”¹²

Aio ae e kairiira nakon ana reirei Aramwa nakon natina are te kauoman, Tiburon. E raoiroi maiun Tiburon, n aron tarina ae Ereman. Te reirei ae I tangiria ni katuruturua bon Aramwa 38:12, ae mwakorona e kangai, “Taraia bwa ko taotaona angin am namakin, bwa ko na kaonaki n te tangira.”

Bridle bon te taeka ae e kamiimii nanona. Ngkana ti toka iaon te aoti, ti kabongana te roo are e kabaeaki iai ni kairia. Te taeka ae titebo nanon ma ngaia tao kairia, baireia, ke taua arona. Ti tuangaki n Te O Tetemanti bwa ti takaarua ni kimwareirei ngke ti reiakinna bwa ti na karekea rabwatara ae mamate.¹³ Te rabwata e bon aki buakaka—e tamaroa—ma tabeua namakin, ngkana aki kabonganaaki n aroia raoi ao ni baireki n ae raoiroi, e kona ni kamaenakoira ma te Atua ao Ana mwakuri ao te kakaitara e na korakora mwiina iaon ara koaua.

Tia marooro iaon uoua namakin—te moan, te un, ao te kauoua, te kaibabaru.¹⁴ E kakaongora bwa ngkana a uaia n aki babaireaki ke n tauaki aroia e kona ni karika te aki rau n nano, kauarerekea namakinan te Tamnei, ao ni kamaenakoira mairoun te Atua ao Ana mwakuri. Te tia kakaitara e anaa mwaitin te tai ni kaonii maiura ma tamnein te iowawa ao te iango ae kamaira.

Inanon tabeua utu, tiaki te bwai ae e riiriki ngkana e un te bumwaane ke buaine ao n orea kainabana ke te ataei. Inanon Turai, I ira Boowin te United Kingdom All Party Parliamentary i London.¹⁵ Te iowawa nakoia aine ao te roronrikirake e katuruturaki bwa te kangaanga n te aonaaba ni kabutaa. Irarikin te iowawa, tabeman a rinanon te bwainikirinaki n taetae raeaki. Te katanoata nakon te aonaaba iaon te utu e tuangiira bwa “naake a iowaawa nakoia buia ke natiia a na bon bukintaeka ao a na tei n te tai teuana i matan te Atua.”¹⁶

Beretitenti Nelson e kamatoaa ao ni katuruturua aio ngkoananoa.¹⁷ Taiaoka katiaa am iango bwa e ngae ngke tao am karo a karaoa ke aki karaoa ae a bainikiriniko, ko na bon aki bwainikiriniia n rabwataia ke n taetae raaia are e na roota aia namakin kainabam ke natim.

N ara bong aikai te kangaanga ae moan te korakora bon te itabaraaraa ao te taetae raeaki ni kaineti nakon baika a riki n ara tabo. N angiin taian te un ao te taetae ni iowaawa a tia n onea mwiin te kaai ni iango, te marooro, ao karaoan ae raoiroi nakon temanna. A mwaiti aika a tia n kitana ana taeka ni kauring ana mataniwi n Abotoro te Tia Kamaiu, Betero, ni karekea anuan Kristo n aron te taubang, taotaonakin nano, te aro n Atua, te akoi imarenami, ao te tangira ae kororaoi.¹⁸ A tia naba ni kitana anuan Kristo ae tamaroa ni karinanoia.

Irarikin tauan bangin te un ao tauan aron namakin ake tabeua, ti kainanoia ni maiuakina te maiu ae e itiaki man tauan aron ara iango, taetae, ao mwakuri. Ti kainanoia ni kararoa matakuakinan tamnei aika a tangako, karieta aron anaakin baika a tau ni kaotaki ni mweengara, ao kararoa aekan nako te aroaro ae bure.

Aio ae e kairiira nakon ana reirei Aramwa are e anga nakon natina ae Korianton. N okoro ma tarina, Ereman ao Tiburon, Korianton e irekereke ma uruan te tua ae bwainaki n ataan te raoiroi ao te buakaka.

Ibukina bwa Korianton e a tia ni irekereke ma te wenenibure ae aki riai, e bon riai iroun Aramwa n reireinna iaon te rairannano. E riai n reireinna rawawatan te bure ao imwiina e na kanga n raira nanona.¹⁹

Ngaia are, ana reirei n totoko Aramwa bon taotaonan angin te namakin, ma ana reirei ibukiia naake a tia n riaoa te tua, ana raira nanoia. Beretitenti Nelson e anganiia membwa te reirei ae tamaroa iaon te rairannano n te maungatabu ni kabuta n Eberi 2019. E kamataata raoi bwa te rairannano ni katoa tai bon mwakoron maiura ae kakawaki. “Te rairannano bon tiaki te bwai ae riki n te taina; te bwai ae e na mwmwakuriaki. Boni kiingin te kukurei ao te rau n te iango,” e taku. “Te rairannano ni katoabong bon te kawai nakon te itiaki, ao te itiaki e uota te mwaaka.”²⁰ Ngke Korianton e karaoa nanon te bwai are e reirei iaona Beretitenti Nelson, e na kaman tia n raira nanona n te tai naba are e iangoi iango aika bubuaka. Uruan te tua aika bubura e na bon aki riki.

Te kabanea n reirei are e anga Aramwa nakon natina mwaane bon tabeua reirei aika moan te kakawaki inanon ni kabane koroboki aika tabu. E irekereke ma te Mwakuri ni Kamaiu are e karaoaki iroun Iesu Kristo.

Aramwa e kakoauaa bwa E na uoti nako ara bure Kristo.²¹ N akean Ana Mwakuri ni Kamaiu te Tia Kamaiu, te reirei iaon te momotiraoi ae akea tokina e na kainanoa te katuaeaki.²² Ibukin Ana Mwakuri ni Kamaiu te Tia Kamaiu, te nanoanga e na kona n reke ibukiia naake a rairii nanoia, ao e kona ni kariaia bwa a na okira matan te Atua. E na nakoraoi iroura ni karaua ni iangoa raoi te reirei ae tamaroa aei.

Akea temanna ae kona n okira te Atua ni bon oin ana mwakuri aika tamaroa n ti ngaia; ti bane ni kainanoa kamaiuakira man ana anga karea te Tia Kamaiu. A bane ni bure aomata nako, ao bon tii rinanon Ana Mwakuri ni Kamaiu Iesu Kristo are ti kona iai ni karekea ana nanoanga ao ni maeka ma te Atua.²³

E anga naba Aramwa te reirei ae tamaroa nako Korianton ibukira ni kabane ngaira ake tia tia n rinanona ke ti na rinanon waakin te rairannano, n aki taraaki bwa tao e uarereke te bure ke e rangi ni kakaiaki n aron are e karaoi Korianton. Kibu 29 n Aramwa te mwakoro 42 e kangai, “Ao ngkanne, natiu ae te mwaane, I tangiria bwa a na aki manga katabetabeko bwaai aikai, ma ko na ti tabetabe n am bure, n te katabetabe are e na uotiko nakon te rairannano.”

Korianton e ongo nakon ana reirei Aramwa ao e raira nanona ao ni kabwanina ana beku. Ibukin ana Mwakuri ni Kamaiu te Tia Kamaiu, te kamaiu e tauraoi nakoia aomata ni kabane.

N ana bong Aramwa, n ana bong Heber, ao ni bon ara bong, ti bane ni kainanoa karekean oin ara kakoaua iaon Iesu Kristo, taotaona angin ara namakin, raira nanora man ara bure, ao ni kakaea te rau rinanon Ana Mwakuri ni Kamaiu Iesu Kristo ao ni kokoaua nakon te Atua ao Ana mwakuri.

N te marooro ae ai tibwa ngkai ao ni manga bon te ingabong aei, Beretitenti Russell M. Nelson e taekinna n te kawai aei: “I butii ngkami bwa kam na bairea aron ami kakoaua iaon Iesu Kristo. Mwakuriia. Bwaibwai iaona. Tararuaia. Nabeakinna bwa e aonga n rikirake. Imwiina taratari kakai bwa a na riki inanon maium.”²⁴

I rangi ni kakaitau ngkai ti nang ongoraa mai iroun Beretitenti Russell M. Nelson. I kakoauaa bwa Beretitenti Russell M. Nelson bon ana burabeti te Atua n ara bong. I tangira ao ni kawakin namakin aika a tamaroa ao kairakira ake ti karekei mai irouna.

Ngkai ngai ana Abotoro te Uea Iesu Kristo, I kaota au kakoaua bwa te Tia Kamaiu ao koauan Ana Mwakuri ni Kamaiu bon mai iroun te Atua n aran Iesu Kristo, amen.

Bwaai aika a na taraaki

1. Taraa Ronald K. Esplin, “A Great Work Done in That Land,” Ensign, July 1987, 20: “On June 13, Elder Kimball, Orson Hyde, Joseph Fielding, and Heber’s friend Willard Richards left Kirtland for England. I New York, n Tuun 22, kaain Kanata aika Isaac Russell, John Goodson, ao John Snyder a mwananga ma ngaiia. Mitinare aika itiman aikai a karekea tokaia n nako Liverpool iaon te Garrick.” (Taraa beeban Heber C. Kimball, 1837–1866; ana tieno ao beeba Willard Richards, 1821–1854, Church History Library, Salt Lake City.)

2. Te tabo ae This is the Place Monument, ae mena i mainikun Salt Lake City, Utah, n te kawai nako Emigration Canyon e karaoa kauringan te ka 100 n ririki n rokoia Aika Itiaki n te Salt Lake Valley n Turai 24, 1847. Te kanikinaa ae kateaki e kaota bannan Brigham Young, Heber C. Kimball, ao Wilford Woodruff.

3. Imarenan 8,000 ao 10,000 Aika Itiaki ni Boong aika Kaitira a birinako mai Missouri ni moan 1839 ni kamwawaia man aia mwakuri n aki ako aomata ake a taua te tua inanon baia ao taan ioawa. Iaan ana kaetieti Brigham Young ao Heber C. Kimball, e kateaki te komete ae e na bootii bwaai aika a kainanoaki, tarai kainano, ao katei kawai ibukin te mwananga ae kakua are 200 te maire (320 te km) te otinako nako Illinois. Kaain te kawa ae Quincy aika a nanoanga a katauraoi taabo ni katantan n te tai ae uarereke ibukia Aika Itiaki ibukin katanakiia ao te amwarake. (Taraa Saints: The Story of the Church of Jesus Christ in the Latter Daysvol. 1, The Standard of Truth, 1815–1846 [2018], 375–77; William G. Hartley, “The Saints’ Forced Exodus from Missouri,” n Richard Neitzel Holzapfel ao Kent P. Jackson, eds., Joseph Smith: The Prophet and Seer [2010], 347–89.)

4. Orson F. Whitney, Life of Heber C. Kimball: An Apostle, the Father and Founder of the British Mission (1945), 449.

5. N Orson F. Whitney, Life of Heber C. Kimball,, 450.

6. Taraa Mote 1:39; taraa naba “Te Mwakuri ibukin te Kamaiuaki ao te Karietaataaki,” mwakoro 1.2 n Aeniboki ni Kabuta: Te Beku n Ana Ekaretia Iesu, ChurchofJesusChrist.org. Ti roko nakon Kristo ao ni buoka Ana mwakuri te Atua man maiuakinan ana euangkerio Iesu Kristo, buokia ake a kainnano, kaoakiia aomata ni kabane bwa ana karekea te euangkerio, ao ni bootiia utu ibukin te maiu ae akea tokina. Taraa naba Reirei ao Berita aika Tabu 110, are e taekaina rongorongon kiing ake a kaokaki ibukin te mwakuri ni kamaiu.

7. Taraa naba 1 I-Korinto 15:40–41.

8. Taraa Reirei ao Berita aika Tabu 45:27.

9. Taraa Reirei ao Berita aika Tabu 45:29.

10. Aramwa bon natin Aramwa are te burabeti. Bon te tia moti ae rietata n te aba ao te ibonga ae rietaata ao te burabeti. E rinanon te rairaki ae kamiimii ngke te rairaki ni mwaane.

11. Aramwa 36:3.

12. Joseph Fielding Smith, “The First Presidency and the Council of the Twelve,” Improvement Era, Nov. 1966, 979.

13. Taraa Iobi 38:7.

14. Taraa Aramwa 39:9. Aramwa e tuanga Korianton, “Man aki manga ririmwin ana kaibwabwaru am taratara.”

15. All-Party Parliamentary Group, Parliamentary sessions, Tuesday, July 5, 2022, “Preventing Violence and Promoting Freedom of Belief.”

16. “Te Utu: Te Katanoata nakon te Aonnaba,” ChurchofJesusChrist.org; taraa naba Patrick Kearon, “He Is Risen with Healing in His Wings: We Can Be More Than Conquerors,” Riaona, Meei 2022, 37–39.

17. Taraa Russell M. Nelson, “What Is True?,” Riaona, Nobembwa 2022, 29.

18. Taraa 2 Betero 1:5–10.

19. Taraa Aramwa 39:9.

20. Russell M. Nelson, “Ti Kona ni Karaoa ae Tamaroa ao ni Katamaroaki Riki,” Riaona, Meei 2019, 67, 68.

21. Taraa Aramwa 39:15.

22. Taraa Aramwa 42:16.

23. Taraa 2 Nibwaai 25:23.

24. Russell M. Nelson, Facebook, Aug. 1, 2022, facebook.com/russell.m.nelson; Twitter, Aok. 1, 2022, twitter.com/nelsonrussellm; Instagram, Aok. 1, 2022, instagram.com/russellmnelson; taraa naba “Choices for Eternity” (te bootaki n taromauri ni kabutaa te aonnaba ibukiia kairake n ikawai, Meei 15, 2022), broadcasts.ChurchofJesusChrist.org.