Tamaroan Ana Taeka te Atua
Ma ti reiakinna bwa iai koauan aia taeka burabeti ake rimoa ao ae ngkai bon ibukina bwa aia taeka bon ana taeka te Uea.
N ana Boki Moomon, ti wareka te babaire ae kakaawaki are e karaoia te burabeti ae Aramwa inanon kibu ni koroboki aika a tabu. Imwain rinanoan taeka akanne ake ti taneiai iai, raonai n iangoi kangaanga are a mena inanona inanon karaoan te babaire anne.
Te botannaomata, ae arania bwa Tioramwaite, ake a tia ni kamaenakoia mai irouia Nibwaite1 ao n ikotaki n tian te aba n uakaan ma Remwanaite.2 Nibwaite a tibwa tia ni konaia Remwanaite inanon te buaka ae reitinako are a mate iai Tebwina te ngaa,3 ao “maakakiia Tioromwaite mwiina a na reitaki ma Remwanaite are e na kona ni karekea te mwaiti riki ae korakora aika a na bua n aia itera Nibwaite.”4 A raraoma riki n te buaka, Aramwa e a tia n ataia bwa Tioromwaite “a bon tia ni kabwarabwaraki nakoia ana taeka te Atua,”5 ma a manga rairaki n taraomauriia bouananti “ni kabwaouai ana kawai te Uea.”6 E taonaki n te rawawata iai Aramwa n te “nanokawaki ae bati.”7
Ngkai e a mena inanon kangaanga aikai,e iangoia Aramwa bwa tera ae e na riai ni karoaia. N ana babaire, ti wareki taeka ake a kawakinaki ake a kaungai nanora man kairiira ngkai ti rinanon aro aika a mwaiti aika a kangaanga ni boong aikai.8
“Ao ngkai, ibukina bwa te taeka ae kabwarabwaraki iai ana konabwai ni kairia aomata bwa a na karaoa ae e eti — eng, bon iai korakoran riki korakorana iaon aia iango aomata nakon te kabaang, ke te bwai riki teuana, are e a tia n riki nakoia—ngaia are Aramwa e iangoia bwa e riai bwa a na kata tamaroan ana taeka te Atua.”9
Ibuakon katokan aia kangaanga aika a mwaiti, ana onimaki Aramwa e kairiia bwa a na onimakina mwaakan te taeka. E bon aki burenibwai bwa tabeua kabwarabwara aika a korakora ake a kuneaki ni koroboki aika a tabu a taekinaki n te tai ae waekoa imwiin te babaire anne. Ni mwakoro 32 ao 33 n Aramwa, ti wareka ana maroro iaon onimakinan te Uea Iesu Kristo, ao inanon mwakoro 34 kunea ana maroro ae kakaawaki Amureka n reirei iaon ana Mwakuri ni Kamaiu Iesu Kristo.
Kabwarabwaraan Tamaroan Ana Taeka te Atua
Ni koauana, rinanon koroboki aika a tabu ake ti wareki iaon kakabwaia aika kamimi ake a bwaro nako aoia ake a tia n rineia bwa ana kataa tamaroan ana taeka te Atua inanon maiuia.10 I kaoi ngkami bwa kam na iangoi katooto aika teniua ni kabotoi ara iango iaon Ana Boki Moomon—te boki are e kabwarabwara Beretitenti Russell M. Nelson bwa “kairan maiura ni boong aika kaitira.”11
Te moan, e kauringiia ana aomata aron te Uea ni kainaomataia aia ikawai: e reirei Aramwa “Nooria, e bita nanoia; eng, e kautia man te matuunako, ao a uti nakon te Atua. Nooria, a mena i nukan te roo, ma e ngae n anne, tamneia a bon kaotaaki n ootan te taeka ae akea tokina.”12 Tao ko namakinna ae kanga ko mena i buakon te roo. E maraki tamneim ni kainnanoa te ota? Ngkana eng, taiaoka kataa tamaroan ana taeka te Atua.
Te kauoua, kauringa rairakiia Remwanaite nakon te Uea, are e kakoaua ngke e mitinare, e taku Ammon, “Nooria, irangaa mai i buakoia tarira are e a tia ni kabwaraia man marakin moone; ao a kairaki nakon anenean kunan ana tangira ni kabomwi, ao ibukin mwaakan anataeka are e mena iroura.13 Tariu ao mwaneu, a mwaiti ibuakora aika a tangira temanna bwa e na anenea kunan ana tangira ni kabomwi. N ara mwakuri ni kabane, tina ururingnga ni kataa tamaroan ana taeka te Atua, are inanora.
Te kateniua, n ana boki Ereman ti warekia, “Eng, ti nooria bwa ane e na taua ana taeka te Atua, are e bon tawe ma ni mwaaka,are e na bwenaua ni kabane ana mwakuri ni mwaamwanaa te aba ma ana bwai ni kamwane, ma ana babaire ni kamwamwane te riaboro, ma ni kairiia ana aomata Kristo n te kawai ae eti ma ni wariki n riaon te marawa ni kananokawaki … ni karokoi tamneia … i angaatain te Atua n ueana i karawa.”14 Ko kona ni kinai ao ni kanakoi ana bwai ni kamwane te riaboro ake a kaotiotaki n aia wanawana aomata ni boong aikai? Iai nanom ni kan inaomata man kamangaongaon rongorongo aika a mwaiti bwa ko aonga ni kona ni kabotoa am iango iaon kawain te berita? Taiaoka kata tamaroan ana taeka te Atua.
N aron temanna ae e a tia ni bitaki man mwaakan te taeka, I kakoaua koauan te koaua aei are e a tia n reiakinaki iroun ara burabeti ae tangiraki, Beretitenti Russell M. Nelson: “Irou, mwaakan ana Boki Moomon bon kakoauan te bitaki ae korakora n te nano are e roko ni maiuia ake a warekia ‘ma te nano ae koaua, ma nanomi raoi, n onimakina Kristo.’ A mwaiti aika a rairaki ake a katinanikua ake a tia ngkoa n tangiri ni karekei man reirein te boki anne. … E na riki bwa te bwai ni mwakuri ae nakoraoi ni uotakiia aomata nakon Iesu te Kristo.”15
E Nako Mai Iai te Tamaroa
Inanon aikai ao kabwarabwara riki tabeua, ti kakoaua tamaroan ana taeka te Atua ni maiuia Natina. Ti kona n titiraki, tera ae korakora te tamaroa anne ke mwaakana?
Ngkai ti iangoa te titiraki aei, e kakaawaki bwa tina uringnga bwa te mwakoro n teka ae “te taeka,” n aron are e kabonganaki n koroboki aika a tabu, iai uoua nanona. Are e taekinna Unimwaane David A. Bednar bwa “teuana aran Iesu Kristo bon ‘te Rokou,’”ao bon “ana reirei Kristo, n aron are e koreaki ni koroboki aika a tabu, ‘ana taeka.’”16
Te burabeti Nibwaai e kabwarabwarai reitakin nanon taeka aikai ngke e koroboki: “ongeaba nakon taian taeka aikai ao kakoaua Kristo; ao ngkana kam aki kakoauai taeka aikai ti kakoaua Kristo. Ao ngkana kam kakoaua Kristo ao e na reke kakoauan taeka aikai iroumi, bwa bon ana taeka Kristo, ao e a tia n anganai.”17 Ma ti reiakinna bwa iai koauan aia taeka burabeti ake rimoa ao ae ngkai bon ibukina bwa aia taeka bon ana taeka te Uea .19 Raou aika kam tangiraki, butimwaean te koaua ae akea tokina aei e kakaawaki nakon maiura n rabwata ni boong aika kaitira19 ngke, taekinaki n te berita, e na “iai te rongo nako aon te aba, ae tiaki te rongo n te amwarake, ao tiaki te taka n te ran, ma te rongo n te kan ongo ana taeka nako Iehova.”20
N tokina, tamaroan ana taeka te Atua e mena iroun te Uea Iesu Kristo.21 Ngkai ti iangoia n ae bwanin, ti kona ni karekea te reitaki ae kakaawaki imarenan tibwangaia Ana burabeti ao bon te Tia Kabooira. Ara tangira Nakoina, nanora ni kan kaniira Nakoina ni maeka n Tangirana,22 e na kabaeira bwa tina kataa tamaroan ana taeka inanon maiura—man te tamaroa are e roko mairouna ae ara Tia kamaiu ao te Tia Kabooira23 ao te tamaroa are mai Irouna rinanon taeka “ake a rineaki iroun te Uea.”24 Ti na kona ni kina bwa, n aron aia ibuobuoki booki tabeua ni kamatebwaian te Uea ao aia taeka Ana burabeti, a riai n aki riki bwa onean mwiina. Iangoia ao reiakin ni kabane ake ko kona,25 man ana boki Moormon.26
I kaota au tangira nakoimi n tatabemani ngkami, tariu ao mwaneu. Inanon te tangira anne, , I bubuti ngkami bwa kam na namakina tamaroan ana taeka te Atua, riki rinanon ana Boki Moomon, ni katoabong inanon maiumi. Ngkai ko karaoi, kona karekea te berita n ana taetae ni burabeti Beretitenti Russell M. Nelson: “I berita bwa ngkai ko tataromwaaka ni kamatebwaia Ana Boki Moomon ni katoabong, ko na kona ni karaoi babaire aika tamaroa riki—ni katoabong. I berita bwa ngkai kam iangoa te bwai ae kam kamatebwaia, a na uki wintoon karawa, ao kam na karekea kaekaan ami titiraki ao kairan maiumi. I berita bwa ngkae kam kamatebwaia ana Boki Moomon n te bong koraki, kam na kamanoaki man buakakan kanoan te bong.”27
I kakoaua bwa Tamara are I Karawa e a tia n anganiira te taeka ibukina bwa e tangiriira n tatabemaniira bwa tina okira mweengara ni maeka ma Ngaia n aki toki. I kakoaua “te Taeka … e riki n iriko,”28 riki Iesu Kristo, ao Mwaakana ni kamaiu ao ni kamaiuiira. I ataia bwa tamaroana e kaoti rinanon aia taeka Ana burabeti, ake ngkoa ao ngkai.
Au tataro mai inanou bwa tina kona ni karekea te wanawana ao te nimamannei n teimatoa29 n ana taeka te Atua n tiku iaon kawain te berita are e kairiira nakon te karietataaki n te maiu ae akea tokina.30 Ti bia reitinako n namakina te bitaki n nano ae korakora are e tauraoi ibukira n tatabemaniira rinanon tamaroan te taeka.31 N aran Iesu Kristo, amen.