Ko Teimatoa naba ni Kukurei?
Tatauraoira n iriira Iesu Kristo e kaineti raoi mwaitina nakon mwaitin te tai are ti motinnanoia n tiku n taabo aika tabu.
N te Tabati teuana, inanon katauraoakiu n anaa te toa tabeua te wiiki imwiin te maungatabu n te titeiki, e roko te iango ae e kakaongora ao e korakora n au iango.
Ngke ea kakabwaiaa te kariki te ibonga, taeka ake I teimatoa n ongoongo mai imwaina a tiku n ninia au iango ao nanou. Ma ni kakoaua nakoim, O te Atua, te Tama ae Akea Tokina, bwa a bon kukurei ni katoka i aoia aran Natim, ma n aki toki n ururingnga ma ni kaawakin ana tua nako ake e a tia n anganiia, bwa e aonga ni memena Tamneina irouia n taai nako.”1 Iraua te tai ae ti a tia ni kaotia nakon te Atua ae ti kukurei?
Ngkai I iangoa kakawakin taeka aika tabu aknne, te taeka ae kukurei e rota nanou n aron ae tuai mai imwaina. Taneiai aika a tamaroa ao n tabu a kaona au iango ao nanou n te tangira ao te kakaitau ibukin ana mwakuri ni kamaiu te Tia Kamaiu, ao ai Nakoana ae kakaawaki inanon ana babaire ni kamaiu te Atua ibukiu ao au utu. Imwiina I ongo ao I namakina niniakiu n taekan tataron te ran: “bwa aonga ni kakoaua nakoim … bwa a na aki toki n ururingnga.”2 I bon ataia raoi n te tai anne bwa kawakinakin au berita aika a tabu e riai riki nakon kakaraoan aika a tamaroa.
Tauakin te toa tiaki ana waaki te aro n ti kaotan ara kariaia. Bon te kauring ae korakora ni koauan ao kabotoan ana Mwakuri ni Kamaiu Kristo ae akea tokina ao kateimatoaan ururingnga n taai nako ao ni kawakin Ana tua. Kukureim ni kabotoa am taratara iaon te Tia Kamaiu e bon rangin kakawaki bwa ngaia bon boton te rongorongo n kiibu aika uoua n te Ekaretia – tataron te toa. Mataatam n te koaua ni bwaai ake e tatauraoi iai Tamara are i Karawa n anganiira iroun Natin ae te Rikitemanna e karekea iroura te nano ni keiaki ni karaoa nanona ni baike e tuangiira.
Aan maiura n tamnei e kateaki ni matoatoa iaon Iesu Kristo?
Ngkana aan maiura n tamnei aki matoatoa, ti na bon bae ni katinea ngkana te mwakuri are ti karaoai e tamaroa ibukira ke e aki ke teraa mwiina nakoira. Ao ngkana ti kakoauai rongorongo bwa te Ekareita e aanaki n waaki aika a bane taiia ke tuua aika a karua, n tianiia aomata man karaoa nanoia, ao ni kabaeaki n te tai, ngkanneara kantaninga ibukin kukureira e kabwaka. Ti riai n aki kataninga te reirei iaon kukureira bwa ena nako mai iroun te tia kakaongora n te intanete ke te tia TikTok. Te koaua mai irouia aomata e aki boraoi ma koaua aika a mimitong.
Te Ekaretia bon te tabo ni bootaki ibukia aika aki kororaoi ma a tangira te Atua ao a kukurei n irira te Uea Iesu Kristo. Te kukurei anne e boboto n atakin Iesu bwa te Kristo, Natin te Atua ae Maiu. Te koaua ae akea tokina aio mai eta e kona n tii ataaki man mwakan te Tamnei ae Raoiroi. Ngaia are, kukureira e na bon booraoi ma mwaitin ara tai are ti a tia n motikia bwa ti mena n taabo aika taabu are e korakora iai mwaakan te Tamnei ae Raoiroi.
E na nakoraoi kabanean ara tai ni maroroakini tabeaiangara ma Tamara are i Karawa ae tatangira ao ni kauarerekea ukoran iangoan bwana ake tabeua. Ti kona naba n rineia ni bita ara rongorongo ni katoabong nakon ana taeka Kristo ni koroboki aika a tabu ao n aia taetae ni burabeti Ana burabeti aika a maiu.
Arora ni kawakina te bong ae te Tabati, kabwakan te kabwiianibwai ma nanora, karekean te kariaia nakon te tembora, kawaran te tembora, ao kawakinakin ara berita ae tabu n te tembora a bon kaota korakoran kukureira ao kakoauaan ara motinnano. Ti kukurei ni karaoa riki are iaona nakon ae ti te kekeiaki ae kewe ni kakorakoraa ara onimaki iroun Kristo?
Tamara are i Karawa e itiaki ana tangiriira ibukira, ma te tangira anne e airi ma te kantaninga ae a korakora. E kantaningaira bwa tina kukurei ni karika te Tia Kamaiu bwa boton maiura. Te Tia Kamaiu bon te banna ni katoto n te kukukurei n anga ngaia nakon te Tama ni bwaai nako. Ngaia “te kawai, te koaua, ao te maiu.”3 E anga nanona ni koaua ni mate ibukin ara bure. E anga nanona ni kabebetei uotara, katokii maakura, anganiira te korakorara, ao n uota te rau ao te oota nakon nanora n taai n maraki ao n rawawata.
Ma onimakinan Iesu Kristo bon te bwai ae e na rineaki. “E ngae ngke akea te bwai ae [ko] tangiria bwa ti te kan kakoaua”4 n ana taeka, iai te tabo ae ti na moana mai iai ke ni manga moana te waaki inanon te onimaki. Ana taeka, ngkana a unikaki inanora n ai aron te koraa ao n tararuaki raoi, e na wakaa ao ara onimaki e na rikirake nakon te atatai ao n riki bwa te tua n te mwakuri ao te korakora. Ana Boki Momoon bon ara boki ae korakora ibukin karikirakean ao kaokan ara onimaki. Tatauraoira n ongeaba iroun te Atua e buokiira ni karikirakea te onimaki.
Te maiu ae mamate, n aron baireana mai i karawa, e bon aki bebete ao n taai tabetai e a kakua. E ngae n anne,”[ti] riiki, bwa [ti] aonga ni karekea te kukurei”!5 Teimatoam iroun te Tia Kamaiu ao ara berita aika tabu a uotii kimwareirei aika akea tokiia! Oin raoi bukin te Maiu aio bon kakoauaan kukureira. “Te tibwanga ae te kabanea ni kakawaki n te maiu [ao te riki bwa ana reirei] bon reiakinan ana kantaninga te Uea ao karaoana.”6 Te riki bwa Ana reirei ni koaua e kairira nakon te kukurei ae bwanin. Ti tauraoi ni butimwaai tibwangara n riki bwa ana reirei?
Kawain te berita tiaki te bwai ae e na ti katiaaki; bon waakinan karikirakean maiura n tamnei ao kakorakoraan ara motinnano ma Iesu Kristo. Kakawakin tua ni kabane, reirei, berita, ao otenanti bon karikirakean ara onimaki ao n onimakina Kristo. Nanomwaakara ni kabotoa maiura iroun Kristo, e, riai n aki bibitaki—e naki aroaro, e naaki kairaki man baika a riki iroum, ke naaki kabwarabae. Ti aki kona n anai ara motirawa ke n tatautaua nanora man kukureira n “tei bwa taan kakoaua iroun te Atua n taai nako ao ni bwaai nako, ao n taabo nako.”7 E aki bebete te riki bwa te tia iriira Iesu,, ibukina bwa raonakim iroun te Tamnei ae Raoiroi e rang kakaawaki.
Ni koauana te Uea e bon iangoi ara bong ngke E reirei iaon te kaikonaki iaoia kibono ake tengaun. Ibukiia ake niman ake a wanawana E taku: “ao n tia n anaa te Tamnei ae Tabu ibukin kairaia, ao n tuai ni mwamwanaaki,”8 ngkai aia taura uaake a nano baba “a bane ni mate” bwa ai akea bwaaia.9 Tao ana taeka Nibwaai e na kona ni kabwaranakoa aroia ngkoa membwa n te Ekaretia aika a kakaonimaki aikai: “Ao e na kamaraui nanoia tabemwaang, ao e na karaurau ni keweia bwa aongkoa a mano ni maiuakinan te aonaba, ao a na kangai: E raoi Tion.”10
Maiuakinan bwain te aonaaba bon ukoran ao onimakina bwaikorakin te maiu aio ao tiaki iroun Kristo – n taekana teuana, te taratara n aonnaba ao tiaki te taratara n tamnei. Te Tamnei ae Raoiroi e na angaanira te konabwai n “taekin bwaai ngkai, ma … aika a na roko.”11 Tii “man mwakaan te Tamnei ae Raoiroi [ti kona] n atai koauan bwaai ni kabane”12 ao n aki mwamwanaki. Ti karika Kristo bwa boton maiura ao ni motinanoa kukureira n ongeaba nakon Ana tua tiaki ibukina bwa ti matakii ma bukina bwa ti kona n nooria.13
Tera aroia kibono ake a nanobaba? Tera bukina ngkai a rawa n uotii nnen te oera n tamnei? Tao a taotaoni aia katauraoi? Tao a, rangin, n aki nanonna raoi kioina bwa e aki reke taina ke e taraa n akea manenana. Tao tera bukina, a bon mwamwanaaki ni kakaawakin taben Kristo. Aio oin ana waaki ni kamwamwane Tatan man te moan waaki, ao bukin maten tauran aia koaua bwa e a bane te oera ni maiun tamneia. Te kaikonaki aio bon kabotauan ara tai. A bati aika a kitana te Tia Kamaiu ao aia berita imwaain ae a kitana Ana Ekaretia.
Ti maiu n taai aika aki ataaki kanoaia are ea Kaman taekinaki irouia burabeti ngkoa, te tai are Tatan e na ka “un inanoia natiia aomata, ao e na kakorakorai marakin nanoia ni kaaitarai bwaai aika a raoiroi.”14 A mwaiti mai ibuakora, aika a maeka n te aonnaba ni kaombiuta ae e onrake ni bwaai ni kakukurei ao n rongorongo aika aki iraorao ma atakin ao kakoauan Kristo mai karawa.
Te kabanea ni korakora ni kairiiri n te maiu n tamnei ni maiun te ataei bon man bannaia aia kaaro ma tiibu aika a kakaonimaki ni kawakin aia berita aika a tabu. Kaaro ake a nanona raoi a reiakinaia aia ataei te onimaki iroun te Uea Iesu Kristo, bwa aonga naba “natira a na ataia bwa antai ae a na kawaria ibukin kamaunan aia bure”15 Aki mutiakinan ao tararuaan berita e na bon kairira nakon te kangaanga n te maiu n tamnei. Rotakin maiun te tamnei e bon rootia riki natira ma tibura. Kaaro ao tiibu, kam teimatoa ni kukurei?
Beretitenti Russell M. Nelson e kauringiira bwa, “ inanon boong aika imwaira, e na bon aki kona ni kamaiuaki te tamnei n akean te kairi, te kaetieti, ao ana karaunano ae reitinako te Tamnei ae Raoiroi.”16 E maetaata ao n aki burebureaki te kauring bwa ti katauraoi ara taura ao ni kamwaita ara oera n tamnei n ara ookai. Ko bon teimatoa ni kukurei n iriiria burabeti ni boong aikai? Abwakira oeran am taura n te maiu n tamnei? Tera bitakin maium ae e na kona ni karekea nakom ana wirikiriki te Tamnei ae Raoiroi ae teimatoa riki?
N te bong aio, n airon ana tai Iesu ngkoa, a na iai ake a na bonako, n aki tangiria ni butimwaai tibwanga n riki bwa ana reirei. Ngkai a rikirake kabuakaka ao kaitara nakon ana Ekaretia Kristo ao nakoia naake a Iriria, tabera ngkai taan iriria e na kainanoa kakorakorakin nanora ni iriira Iesu ao n aki mutiakinia17
Ngkana aan maiun tamneira a kateaki ni matoa iaon Iesu Kristo, tina aki kona ni bwaka, ao tina aki kona n maaku.
“Nooria, te Uea e kainanoa te nano ao te iango ae tatauraoi, ao naake a tauraoi ao aongeaba a na kana raoiroin aban Tion ni boong aika kaitira aikai.”18
Ti bia teimatoa n kukurei n tainako. N aran te Uea ae tabu Iesu Kristo , amen.