Karika Karaoan ae Raoiroi bwa Anuara

Iroun Unimwaane Rafael E. Pino

Man te Itingaun

Ngkana ti nanomatoa man aki kamwaeieaki ni karaoan ae raoiroi, kateira e na buokiira ni kateimatoaira iaon kawain te berita ae tabu.

N na bon kakaitau n taainako ibukin tibwangau n te Ekaretia ake a tia ni karokoai n aaba aika kakaokoro. Ti kunea bwa n aaba aikai ao e korakora mwaitiia reeti n aomata aika kamimi ma tein nako kateia ao anuaia aika kakaokoro.

Ti bane n tatannako ma kateira ao anuaara, man ara utu, ke man te komiunite are ti maeka iai, ao ara kaantaninga bwa ti na kawakin ni kabane ake a booraoi ma ana reirei te euangkerio. Katamaroaan kateira ma anuan maiura e kakawaki nakon ara kakamwakuri bwa ti na teimatoa iaon kawain te berita ae tabu, ao ake a kaitaraa anne, ti riai n katinanikui.

Te katei e nako man kataneiakiira ke kakaraoan ao anuara n iango ibukiia aomata, reirei, ke anua ni maiu. Angiin te tai, bwaai aika ti iangoi man karaoi ni katoa tai ti taraia bwa ai te taneiai.

Anganai au tai bwa n na katamneia aio: Patricia, buu ae moan te tangiraki, e tatangiria n mooi moimoto ao ni kana maraina. N moan kawaran Puebla, Mexico iroura, ti nakon te tabo teuana ni kabooa iai te moimoto. Imwiin nimakin ranin te moimoto aio, buu e a manga butiia bwa a na katabwenaa te moimoto ao n anganna bwa e na kana maraina. Ngke a nikiria, ao e a noria bwa e a kana uraura. A tia ni kabiria n te tena! Te marai ma te tena! E nang boou anne iroura. Ma imwina ao ti reiakinna bwa ngaia bon ngai ma buu ae a boou arora irouia, ngke tiaki kana te marai are katenaaki. I Mexico, anne, bon tiaki te mwaan ae boou; bon te bwai ae kakaraoaki.

N teuana te bootaki, ao ti amwarake ma raoraora i Brazil, ao ti anganaki te avocado. Ao ngke ti nang kataoroa, ao a taku naba raoraora nakoira,“Tera ae kam karaoia!? Ti a tia n tiokana ami avocado!” Te Avocado ae Tiokanaki! E rangi ni boou man kamimi anne iroura. Ma ti reiakinna bwa ngaia bon ngai ma buu aika kamimi arora, ngke tiaki kana te avocado ae tiokanaki. Ma i Brazil, tiokana te avocado bon te bwai ae kakaraoaki.

Are a taneiai iai tabeman e kona ni kamimi irouia tabeman, e tatannako nakon kateia ma anuan maiuia.

Tera katei ma anuan maiura aika ti tataneiai ma ngaai inanon maiura?

Beretitenti Russell M. Nelson e taekinna bwa: “Ni boong aikai ti aki toki n ongongo taekan ‘te bitaki ae boou.’ Ngkana ko bon tangiria ni kan butimwaea te bitaki ae boou, I kaoko bwa ko na bita nanom, am iango ao tamneim ni karikirakea nakon Tamara are i Karawa ao Natina, Iesu Kristo. Karika anne bwa am bitaki ae boou” (“Te Bitaki ae Boou,” Riaona, Nobembwa 2020, 118).

Te kakao aio bon ibukira ni kabane. E aoria ngkana ko kainnano ke kaubwai, ko reirei ke ko aki, te kara ke te ataei, ake a aoraki ke a marurung. E kaoira bwa ti na karaoi ara taneiai inanon maiura bwa kateimatoakira iaon kawain te berita ae tabu.

Akea te aba ae bwanin raoi iai ataakin ae e raoiroi ke ae tamaroa. Ngaia are, ngke Tauro ao te Burabeti Iotebwa Timiti a reirei:

“Ngkana iai te bwai ae raoiroi, ae kakateke, ke ae tamaroa rongorongona, ke e kamoamoaaki, ti na ukoukori bwaai aikai.”(Taekan te Onimaki 1:13).

“Ao ngkana iai te bwai ae e kamoamoaki te aba iai, ao kam na ururingi baikai n iangoi” (I-Biribi 4:8).

Taraia raoi bwa aio te kaunganano, ma tiaki ti te taetae.

I tangirira bwa ngaira ni kabane ti na anaa ara tai teutana n iangoi raoi kateira ae e korakora kairoroia iaoia ara utu.

Ibuakon anua ni maiu aika tamaroa aika a riai n riki bwa anuaia membwa n te Ekaretia bon aika aua aikai:

1. Kamatebwaian koroboki aika tabu n ara utu ao n tatabemaniira nako. Te rairaki nakon te Uea Iesu Kristo, ti katabeaki n tatabemaniira nako bwa ti na reiakina te euangkerio. Bon tabeia kaaro reiakinaia natiia taekan te euangkerio (taraa Reirei ao Berita aika Tabu 68:25; 93:40).

2. Te tataro n te utu ao i bon iroum. E tua te Tia Kamaiu nakoira bwa ti na tataro n taainako (taraa Reirei ao Berita aika Tabu 19:38). Te tataro e reitiira ma Tamara are i Karawa n aran Natina, Iesu Kristo.

3. Kaean te bootaki n toa ni katoa wiiki (taraa 3 Nibwaai 18:1–12; Moronaai 6:5–6). Ti karaoa aio bwa ti na uringa Iesu Kristo rinanon anaakin te toa. N te otenati aio, membwa n te Ekaretia a kabooua aia berita man katokaan aran te Tia Kamaiu iaoia, ao n Ururingnga n tainako, ao ni kawakin Ana tua (taraa Reirei ao Berita aika Tabu 20:77, 79).

4. Kakawaran te tembora ao mwakuri n rongorongon te utu. Te mwakuri aio bon ibukin katiteuanakiia ao kabaeakiia utu n akea tokina. (taraa Reirei ao Berita aika Tabu 128: 15).

Tera ara namakin ngkai ti ongo bwaai aika aua aikai? Aikai bon mwakoron naba maiura ni bitaki?

E mwaiti riki anuan maiu aika a kona naba n riki bwa mwakoron bwaai aika ti na maiuakini, ao man kabotoa te Atua inanon maiura.

Ti na kanga n ataia raoi bwa tera aika riai n riki bwa anuan maiura n tatabemaniira nako ao n ara utu? N koroboki aika tabu, ti kona n karekea te banna ae tamaroa; ni Motiaea 5:15 e kangai: “Mangaia ae I tangiringkami bwa kam na nanomatoa ao n aki kamwaeieaki, n tei n taainako ni mwakuri aika raoiroi.”

I rang tatangirii taeka aikai, ibukina bwa ti ataia bwa taneiaira n anuan maiura bon bwaai ake ti kaokioki man kaokioki. Ngkana ti nanomatoa man aki kamwaeieaki ni karaoan ae raoiroi, e na booraoi kateira ma ana reirei te euangkerio, ao a na buokiira ni kateimatoaira iaon kawain te berita ae tabu.

E reireiniira naba Beretitenti Nelson: “Mwanokai am bitaki aika boou man rairan nanom ni katoabong. Ukoukoria bwa kona rikirake inanon te iango, te taetae, ao te mwakuri ae itiaki. Ibuobuoki nakoia tabeman. Kawakina te taratara ae akea tokina. Kakororaoa nakoam. Ao tao tera nako ami kangaanga, tariu ao mwaneu aika tangiraki, maiu ni katoa bong bwa ko aonga ngkoe n tauraoi riki ni kaitibo ma te Atua” (“Te Bitaki ae Boou,” 118).

Ngkai ao e aki boou iroun buu te aine ae, Patricia, ke irou kanakin te marai ae katenaaki—ma ni koauana, ti tangiria. Ma e ngae n anne, te karietataaki bon te bwai ae e kamimi riki nakon katoongan bwaai; bon te reirei ae irekereke ma ae akea tokiia.

I tataro bwa anuan maiura e na uota te taneiai nakoira ae te “kukurei ae aki-totoki” (Motiaea 2:41) bwa anne ae beritanaki nakoia ake a kawakin ana tua te Atua ao n anne, ti na kona n taekina ae kangai, “Ao e koro bukina bwa ti maiuakina te kukurei” (2 Nibwaai 5:27).

Tariu ao mwaneu, I kakoaua bwa mwaane aika 15 ake ti kamatoaia bwa burabeti, taan mamata, ao taan kaotioti, n raonaki ma Beretitenti Russell M. Nelson. I kakoauaa bwa Ana Ekaretia Iesu Kristo Ibukiia Aika Itiaki ni Boong Aika Kaitira e bon koaua. I kakoaua riki Iesu Kristo, bwa ara Tia Kamaiu, ao te Tia Kabooi Maiura, n aran Iesu Kristo, amen.