Iira Iesu Kristo ma Mwanekan te Onimaki
Kristo e kona n tabekiira n te bong aei inanon taai ni kanganga. E karaoia ibukiia bwaeoniia n rimoa, ao E karaoia ngkai ibukiira n tatabemaniira.
Kam rabwa, kuaea, ibukin aneneakin “Faith in Every Footstep.” Katangtangin ao taekan te anene anne e bon koreaki n 1996 iroun te Tari Newell Dayley1 inanon te katauraoi ibukin te 150 n ririki imwiin rokoia bwaeoniia rimoa n Maruan Salt Lake n 1847.
E ngae ngke te anene aio e koreaki ibukin te katauraoi nakon te bukamaru anne, te rongorongo are iai e kaeineti nakon te aonnaba ni kabutaa.
I rangi n tatangira te koorati:
Ma te onimaki ni katoan mwanekara, ti iira Kristo, te Uea;
Ao ni kaonaki nte kaantaningaa rinanon ana tangira ae e itiaki, ti anene n katiiteuanaaki.2
Tariu ao mwaaneu, I kakoauaa bwa ngkai ti iira Iesu Kristo ma te onimaki ni mwanekan waera, bon iai te kaantaninga. Iai te kaantaninga iroun te Uea Iesu Kristo. Iai te kaantaninga ibukiia aomata ni bane n te maiu aio. Iai te kaantaninga bwa ti kona n tokanikai iaon ara kaairua, rawawatara, ao korakaira, ao kataakira ma ara kanganga. Iai te kaantaninga n te rairannano ao reken bwaran am bure ao kabwaraan aia bure tabemwaang. I kakoauaa bwa iai te kaantaninga ao te rau inanon Kristo. E kona n tabekiira n te bong aei inanon taai ni kanganga. E karaoia ibukiia bwaeoniia n rimoa, ao E na karaoia ngkai ibukiira n tatabemaniira.
Te ririki aio e mwaakena kauringaan 175 te ririki imwiin rokoia bwaeoniia rimoa n Maruan Salt Lake, are ea karikai bwa nna ururing rikaaki nakoia au bakatibu, tabeman mai buakoia ake a rianna mai Nauvoo nakon Maruan Salt Lake. Iai tibutoruu aika a rianna naba n te kawai anne inanon kairakeia. Henry Ballard bon 20 ana ririki;3 Margaret McNeil bon 13;4 ao Joseph F. Smith, are e riki bwa ana ka-onoman n Beretitenti te Ekaretia, bon tibwa 9 ana ririki ngke e tibwa roko n Maruan Salt Lake.5
A rinanon kanganga n ake a kaitaraaki iai inanon kawaia, n aron kamaririn te winta, aoraki, akean oneaia ao kanaia. N aron aei, ngke e roko Henry Ballard i Salt Lake Valley, e kukurei n nora te “Aba ni Berita” ma e rangi ni maaku bwa mwiina iai ae e noria ibukina bwa kunikaina are e iaona a bon raemengamenga are e a bon oti rabwatana n ae bwanin. E karaba ibuakon taia buakoako n te ngaina ni karokoa e a roo. Imwiina e a nakon te auti teuana ao ni bubuti te kunikai bwa e aonga n reitanakoa mwanangana ni kakaeiia ana karo. E kakaitau nakon te Atua bwa e roko n te mweenga ae e na mano iai.6
Tibu ake taman tibu a iriira Iesu Kristo ni mwanekan te onimaki rinanon nako kataakiia. I kakaitau nakoia ngkai aaki bwara n nano. Ma te onimaki ni mwanekaia ea tia n rangi ni kakabwaiaai ma kaain ara roro nako aike imwinaa, n aron naba ami onimaki n mwanekamii e na konaa n kakabwaiaia kanoamii.
Te taeka ae bwaeoniia bon te nauna ao te weabe. Ngkana te nauna ao nanona bon te aomata ae kaain te moan koraki n neweabaa ke n tekateka n te aba ae boou. Ngkana te weabe, e kona n nanonaki iai bwa kaukan ke katauraoan te kawai nakoia ake ana rimwii.7
Ngkana I iangoiia bwaeoniia ake a katauraoa te kawai ibukiia tabemwaang, I moan iangoa te Burabeti Iotebwa Timiti. Iotebwa bon te bwaeoniia ibukina bwa mwanekan ana onimaki e kairia nakon aroka n te buakonikai ike e a katorobubua n tataro ao n kauka te kawai ibukira bwa tina kona ni karekea bwaninin Ana euangkerio Iesu Kristo. Ana onimaki Iotebwa n “butiia te Atua”8 ni moaningabongin te tiburing n 1820 e kauka te kawai ibukin Kaokan Bwaai n Ana euangkerio Iesu Kristo are inanona bon burabeti ao abotoro are a weteaki bwa a na manga beku naba iaon te aba.9 I ataia bwa Iotebwa Timiti bon ana burabeti te Atua. I ataia bwa ana onimaki e kairia bwa e na katorobubua i matan te Atua te Tama ao Natina ae Tangiraki, Iesu Kristo.
Mwanekan ana onimaki te Burabeti Iotebwa e kairia bwa e na kona n riki bwa bain te Uea n kaokan Ana Boki Moomon, are bon te kakoaua teuana ibukin Iesu Kristo ao ana tangira ni kamaiu.
Rinanon ana onimaki ao taotaonannano Iotebwa Timiti ni kaitaraa te kanganga ao te kaaitara ae korakora, e a konaa n riki bwa te bwai ni mwakuri inanon bain te Uea ni manga katea ana Ekaretia Iesu Kristo iaon te aba.
N tain te maungatabu ni kabuta ae nako, I taetae iaon te mwakuri ni mitinare ao e kanga ni kakabwaiaai. I kakabwaiaaki ngke I reirei iaon Tamara are i Karawa ma ana babaire ni kamaiu ae mimitong, Ana moan Mii ni burabeti Iotebwa Timiti, ao ana rairairi n Ana Boki Moomon. Reirei ao tuua aika kaokaki aikai a kaira mwanekan au onimaki n reireiniia ake a kan ongora nakon rongorongon Kaokan te euangkerio.
Ara mitinare nte bong aei bon bwaeoniia n boong aikai ibukina bwa a tibwauaa te rongorongo ae mimitong aio ma aomata ni kabutaa te aonnaba, ao ni kauka te kawai ibukiia natin Tamara are i Karawa bwa ana Kinaa ao Natina, Iesu Kristo. Butimwaean ana euangkerio Iesu Kristo e kauka te kawai ibukiia aomata ni kabane bwa ana katauraoi ao ni karekei otenanti ao kakabwaia man te Ekaretia ao te tembora.
N te maungatabu ni kabuta ae nako, Beretitenti Russell M. Nelson e kamatoaa “ae te Uea e tuangiia ni kabane kairake ni mwaane aika a tau, bwa ana katauraoiia ni beku n te mwakuri ni mitinare” ao “te mition bon te tai ae korakora” ibukiia “kairake n aine aika tau.”10
Nakoia ataeinimwaane ao ataeinnaine aika tangiraki, mwanekamii n onimaki e na kona n buokiko n iira ana kakao te Uea bwa kam na beku ni mwakuri ni mitinare—n riki bwa bwaeoniia ni boong aikai—man kaukan te kawai ibukiia Natin te Atua ni kakaea ao n tiku iaon kawain te berita are e na kairiia n oki nakon Mimitongina.
Beretitenti Nelson e riki bwa te bwaeoniia n te Ekaretia. Ngke e Abotoro e a tia n mwananga nakon aaba aika bati n kaukia nakon taetaekinan te euangkerio. Teutana te tai mwiin rikina ni burabeti ao Beretitenti n te Ekaretia, e butiira bwa tina “karikirakea [ara] konabwai n tamnei ni karekei kaotioti.”11 E reitinako n reireiniira arora ni kamatoatoai ara koaua. N tain te botaki ibukiia kairake, e taku:
“I bubutiko bwa ko na tabeakina am koaua. Mwakuriia. Bwaibwai iaona. Tararuaia. Nabeakinna bwa e aonga n rikirake. …
“[Imwiina] taratarai kakai bwa a na riki inanon maium.”12
E reireiniia bwa tina kanga n riki bwaati n tei iaon waera n bwain te tamnei. E a tia taekinna, “Ma inanon boong aika imwaira, e na bon aki kona ni kamaiuaki te tamnei n akean te kairi, te kaetieti, ao ana kairoro ni karaunano reitinako te Tamnei ae Raoiroi.”He has said that “in coming days, it will not be possible to survive spiritually without the guiding, directing, comforting, and constant influence of the Holy Ghost.”13
I kakoauaa bwa Beretitenti Russell M. Nelson bon ana burabeti te Atua ngkai iaon te aba.
Ara Tia Kamaiu, Iesu Kristo, bon te bwaeoniia ni koaua n katauraoan te kawai. Ni koauana, Ngaia bon “te kawai”14 ibukin kakoraoan nanon te babaire ni kamaiu bwa ti aonga n rairannano ao, rinanon ara onimakin Irouna, tina okira Tamara are i Karawa.
E taku Iesu, “Boni Ngai te kawai, ao te koaua, ao te maiu: akea ane nako n te Tama, ba ti i Rou.”15 E a tia ni berita nakoira bwa e na aki kiitaniira; E na roko nakoira n ara tai n kanganga.16 E a tia ni kaoira bwa tina “Kawa[ria], ma nanora ni kabane, ao [E] na katoka aoraki[ra].”17
I kakoaua bwa Iesu Kristo bon ara Tia Kamaiu ao te Tia Kabooira, te tia Tei ibukira nakon te Tama. Tamara are i Karawa e a tia kauka te kawai ibukira bwa ti aonga n okiria man iriiran Natina ae Tangiraki, Iesu Kristo, ma te onimaki n mwanekan waera nako.
Tibutoruu ma tabeman riki bwaeoniia a kaitarai kanganga aika bati kioina ngke a roko n aia aenikaa ao a rianna nakon Maruan Salt Lake. Ngaira naba tina kaitarai kanganga n kawaira inanon maiura aika a kakaokoro. Ti aki butui aenikaa ke n kabutii wagons aika a rabunaki riaon maunga aika ririeta ao rinanon tinoo aika nano; ti kataia n aiaroia n tokanikai n te kariirii n bwain te tamnei ao kataaki n ara bong. Iai kawai aika tina rianna iai; iai tabuki—n tabetai maunga—aika tina tamwarakei. E ngae n kaokoro kanganga n boong aikai n kabootauaki ma ake a kaitarai bwaeoniia n rimoa, tiaki n ae aaki kanganga ibukira.
E kakawaki bwa tina iira te burabeti ao n kamatoai waera iaon kawain te berita n kakaonimaki, n aroia naba bwaeoniia n rimoa.
Ti a iira Iesu Kristo ma te onimaki n mwanekan waera nako. Ti riai n beku ibukin te Uea ao ni beku naba ibukiia tabeman. Ti riai n kakorakoraira n bwain te tamnei man kawakinan ao karinean ara berita aika tabu. Ti riai n aki mwanuokina te waetoka n kawakinan tuua. Tatan e kataia n kauarerekea ara kakaonimaki ao ara tangira ibukin te aua ao te Uea Iesu Kristo. Taiaoka uringa ngkana iai ae e bua kawaina, ti riai n aki bua nakon ara Tia Kamaiu. Ibukin te kakabwaia ae te rairannano, ti kona n tan Nakoina. E na kona n buokiira n reiakiniira, rikirake, ao n bitaki ngkai ti kataia n tiku iaon te kawai ni berita.
Ti bia teimatoa n iira mwanekan Iesu Kristo ao, ma te onimaki n mwanekan waera, katuruturua Iaona, n kateimatoa waera bwa e na unikaki iaon kawain te berita, bon au tataro ma te nanorinano n aran Iesu Kristo, amen.