Reitinako n Riki Bwa Ana Reirei
Ti kona ni kunea te onimaki n te maiu n tamnei ao te rau ngkai ti ribanai katei aika a tabu ao mwakuri ae taneiai ni karaoaki aika raoiroi are a kateimatoa ni kakorakora aia onimaki aomata.
N te motirawa ae nako aei, e riaon 200,000 ara kairake ni kabuta te aonaaba aika a rikirake n te onimaki n tain teuana mai buakon tetere aika mwaiti ae teuana wiikina Ibukin Kakorakoraia Kairake, ke maungatabu n te, FSY. Otinako man te kainiin n te butinaoraki, irouia aika a mwaiti bon te mwakuri n onimaki iroun te Uea ngkai a roko n iria. Angiina kairake ake a roko a taraa waekoa n rikirake ao n rairaki n te aro ae moan korakora. Ni banen aia wiiki, I titirakiniia, “Ngaia e uara te maungatabu?”
N tabetai a taetae n aron ae kangai: “Eng, n te Moanibong, e kai nanou iroun tinau bwa e teboakinai bwa N na roko ni karaoa te bwai aei. Ao bon akea temanna ae I kinaa. Ao I taku n au iango bwa bon tiaki ibukiu aei Ao ana bon akea raoraou. … Ma ngkai bon te Kanimabong, ao I tangiria n tiku ikai. I tii tangiria ni kan namakina te Tamnei inanon maiu. I kan maiu n aron aei.”
Iai aia karaki ae a kan taekinna ibukin taai aika reke iai mataataia ao bwaintutuaraoi n tamnei ake a namakin are e karikirakea maiuia n tamnei ma te rairaki ae korakora. Ngai naba I bon bitaki n te motirawa aei n tain ana maungatabu te FSY ngkai I a tia noora Tamnein te Atua ni kaeka nakon nanoia ae itiaki kurubu ni kairake aika moan te mwaiti ake a karekea n tatabemaniia te ninikoria n Onimakinna n wiikin Ana tai n tararua.
N aron rabwatan kaibuke aika biiti ake a mena i marawa, ti maeka n te tabo ae na kona n urui maiun tamneira ike e na riai ni kateimatoaaki korakoran rairakira n ara onimaki mwiina e na kona ni kekerikaaki, e na rootaki, ao ni bua.
Tera Aekakin Bwaai Ake ti Kona ni Karaoi ni Kateimatoa ni Kakorakora Rairakira n Ara Onimaki?
Baika ti rinanona n aia maungatabu Ibukin Kakorakoraia Kairake, kaembing, bootaki n toa, ao mition a kona ni kakorakora ara koaua, ni uootira rinanon rikirakera n tamnei ao kunean te maiu n tamnei nakon taabo aika a rau. Ma tera te bwai ae ti riai ni karaoia n tiku ikekei ao n teimatoa n “waaki nako man teimatoa i nanon Kristo”2 Nibwaai 31:20) nakon ae a na mamaara ara koaua? Ti na teimatoa ni karaoi baike iai mwiia ni kakorakoraa te maiu n tamnei are ti ataia n te moantai, n aron te tataro n tainako, ni kabanei nanora iaon booki aika tabu, ao ni beku ma nanora ni koaua.
Ibukiia tabeman i buakora, e na kainnanoa kamwakuran onimakinan te Uea n iriira te bootaki n toa. Ma ngkana ti a mena ikekei, uaan ana kamaiu te Uea n te bootaki n toa, karinan reirein te euangkerio, ao te mwamwannano irouia kaain te ekaretia a na kaokiira nakon mweengara ni kaungaaki n te tamnei ao ni kakorakoraaki.
E Roko Mai Iaa te Korakora n te Uaia n Ikotaki n Itaramata?
N te Maungatabu Ibukin FSY (Ibukin Kakorakoraia Kairake), te mwaiti ae tebubua tengaa tabun ara kairake a karekea atakin te Tia Kamaiu man kabonganan te kainibaire ae bebete n te bane n roko ike uoman ke e mwaiti riki a bootaki n Arana (taraa Mataio 18:20), ni kamatebwaia te euangkerio ao booki aika tabu, ni bootaki n anene, ni bootaki n tataro, ao ni kunean te rau inanon Kristo. Aio te kaetieti ae moan te korakora ibukin kammwakuran n te maiu n tamnei.
Te kurubu n ataeinimwane ao ataeinnaine a okiri ngkai mweengaia ao ni iangoia bwa tera nanon te teimatoa n “onimakina te Uea” (Taeka n Rabakau 3:5; 2022 aia botoniango kairake) ngkana ko kamamaraaki ni bwaikorakin te aonaaba. Te bwai teuana ko na “ongo Irouna” (Ioteba Timiti—Rongorongo 1:17) inanon te tabo n iango ae akea te karongoa iai ma booki aika tabu aika uki. Ma bon te bwai teuana naba kaotan arora bwa taan iriira Iesu ngke ti a katobibiaki n ana kairoro te aonaaba, ike ti riai ni kataia n “ongo Irouna” e ngae ngke oin tabeaiangam ao kabwakam ni bon onimakiniko. A na akea te nanououa iai: bon bannan te ninikoria are e kaotaki irouia ara kairake ngke a katiaa mai inanoia ao n aia iango n tei n aki kamwaingaki ni kaitarai bibitakin aroaro n te aonaaba inanon ara bong.
Tera Ae a Kona ni Karaoia Utu n te Mweenga n Reitanakoa te Waaki Are e a Tia ni Kateaki n Ana Waaki ni Kakukurei Nako te Ekaretia?
N te taina ao I beku ae te buumwaane nakon te beretitenti ibukiia Ataeinnaine n te titeiki. Te tairiki teuana ao I katabeaki bwa n na bairei kuuki n te tabo n tataninga ngke e tabe kainnabau ni kaira te fireside n te umwantabu ibukiia kaaro ao natiia aine ake a katauraoi bwa a na ira te kaembing ibukin te Bootaki n Ataeinnaine n te wiiki ae na roko. Imwiin kabwarabwaraana bwa a na mena iaa ao tera ae na uotaki, e taku, “Ngaia, ni moaningabongin te Kauabong ngkana ko nikiriia natim n te kainibwati, ko rabwatiia ni kooniia. Ao ko kaboria mangaia ni kabo—ibukin ngkai a nang aki oki.”
I ongo ana ikerake temanna, I a ataia bwa boni ngai. “Kam nang aki oki?”
Ma imwiina e manga reitia: “Ngkana ko nikiriia ataeinnaine ake kaain moaningabongin te Kauabong, a na tiku imwiia bwaai ake a karako kakawakiia ao ni kabanea te wiiki ni bootaki n reiakinaki ao n rikirake ao n onimakina te Uea. Ti na bootaki n tataro ao n anene ao ni kuuka ao ni karaoi bwaai are a na konaa iai n namakina Tamnein Tamara are i Karawa, n te wiiki ae bwanin, ni karokoa a bon namakinna ma n rootaki riira. Ao n te Kaonobong, ataeinnaine akanne aika ko nooria n ruo man te bwati a riki bwa kanga ai aron are tiaki ngaiia ake ko nikiriia n te Kauabong. Bon aomata aika a boou. Ao ngkana ko buokiia n reitinako n rikirake n tamneia man are a karekea n tain te kaembing, ko na kubanako irouia. A na teimatoa ni bitaki ao n rikirake. Ao ai aroia naba am utu.
N te Kaonobong anne, e bon riki raoi are e taekinna. Ngke I katokai umwa n rianna nako aon te kaa, I ongo bwanaan kainnabau man te auti ni kamataku are a bootaki iai ataeinnaine imwaain okiran mweengaia. I ongo bwanaana n taku, “Oo, bon ngkoe anne. Ti a kaman tataningaiko inanon nako te wiiki. Ara ataeinnaine n te Kaonobong.”
Kairake mai Tion aika a nanomatoa a boborau rinanon taai aika a kamiimi. Kunean te kimwareirei n te aonaaba aei e tatae ni burabetiia te mangaongao n aki riki bwa mwakoron te aonaaba anne, ma mabubun te nonori nakon te bwai ae tabu, bon mwiokoaia ae onoti. Tao tebubua te ririki n nako, ao e taetae G. K Chesterton n ae kanga e noora te bwai ae ukeraki aei ae boboto n te mweenga ao ni boutokaaki n te Ekaretia ngke e taku, “Ti riai n namakina te aonaaba n te taina bwa ai aron ana auti ae bubura te aomata ae buakaka, ae e na niniaki, ma ngaia kanga bon oin ara auti, are ti kona n okiria n te tairiki” (Orthodoxy [1909], 130).
Ma te kakaitau, a na aki mwananga nako ni buaka n tii ngaiia. A tabeakiniia i bon imarenaia. Ao iai ngke i rarikiia. Ao a iriira te burabeti ae maiu, Beretitenti Russell M. Nelson, are e kairiiri ma ataakin ana kantaninga te tia mamata n taetaekinna bwa te konabwai ae moan te korakora ibukin taai aikai—bobotan Iteraera—e na korakora man kamiimi (taraa “Hope of Israel” [worldwide youth devotional, Tuun 3, 2018], HopeofIsrael.ChurchofJesusChrist.org).
N te motirawa aio, Ngai, ma kainnabau, Kalleen ti taningaa kibara i Amsterdam are, n ririki aika a bwakanako, I mwakuri bwa te mitinare ae boou iai. Imwiin are I a tia ni kabanei namwakaina ni korakai n reiakinan te taetae n Dutch, ti nang ruorikaaki iaon baora ae te KLM, ao e a katanoata te kaaben ma ti aikoa oota n ana taeka. Imwiin te kainabwaabu teutana, e ngurengure toau, “I taku bwa anne te taetae n Dutch.” Ti waekoa n tararake, ni kataia n ataia bwa tera are n ara iango: E bon rangi ni kangaanga.
Ma aki bua ni kabane. Ngke Imiiakinan baike ti karaoi are a kaota aron te onimaki n nakonakora rinanon te marae ni wanikiba ni kawaira nakon kakai ake a bwaka ni karau iaora ngaira aika mitinare, I waekoa ni kaokaki rikaaki nakon ae ngkai, iroun te mitinare ae e toka n te wanikiba bwa e nang okira mweengana. E kabwarabwara ao n titiraki, “Beretitenti Lund, tera ae N na karaoia ngkai? Tera ae n na karaoia bwa iaonga ni korakora?”
Eng, bon ti te arona naba te titiraki aei ma ane n aia iango ara kairake ngkana a oki man te maungatabu Ibukin Kakorakoraia Kairake, aia kaembing kairake, ao mwamwananga nakon te tembora, ao te tai are a namakina iai mwaakan karawa: “E kanga tangiran te Atua ni bitaki n riki bwa ana reirei Iesu ae teimatoa?”
I namakina rikiraken au tangira ibukin te mitinare ae itiaki ana taratara aei ni kabanean ana tai ni beku n ana mition, ao n te tai anne n namakin raun te Tamnei I ongo bwanaau ae rootaki ngke I kangai, “Ko aki n ae ko na kabongana am taeki n aram bwa ko na katoka Arana iaom.”
I kan katokai baiu iaon angana ao ni kangai, “Aei te bwai ae ko na karaoia. Okira mweengam, ao ko na riki n aekan aei. Ko rangi n tamaroa n te aro ae moam e otanako ibuakon te roo. Arom n ongeaba n am mition ma am anganano e karikiko bwa natin te Atua ae moan rangi n tamaroa. Kateimatoa karaoana n te mweenga te bwai are e mwakuri raoi ibukim ikai. Ko a tia n reiakiniko n tataro ao antai ae ko tataro nakoina ao taekan te tataro. Ko a tia ni kamatebwaia Ana taeka ao n tangira te Tia Kamaiu ni keiaki n riki n ai Arona. Ko tangira Tamara are i Karawa n aron are E tangira Tamana, ni beku ibukiia tabeman n aron are E beku ibukiia, ao ni maiuakin tuua n aron are E maiuakin—ao ngkana ko aki, ko a tia n raira nanom. Arom n riki bwa ana reirei tiaki tii te kanikina iaon am Karinano—e na riki bwa iteran maium ae maiuakinna ibukiia tabeman. Ngaia are okira mweengam, ao ko karaoa anne. Ko na riki n aekan anne. Uota korakoran te tamnei aei ni kabanea maium.”
I ataia bwa rinanon onimakinan te Uea Iesu Kristo ao kawain Ana berita, ti kona ni kunea te onimaki n te maiu n tamnei ao te rau ngkai ti ribanai katei aika a tabu ao mwakuri ae taneiai ni karaoaki aika raoiroi are a kateimatoa ni kakorakora aia onimaki aomata. Ti bia ngaira n tatabemaniira n rikirake ni kaniira ma bwaai ake a na kakorakora ara onimaki. N aran Iesu Kristo, amen.