Ti Konai Bwaai ni Kabane ni Karaoi Iroun Teuare Kakorakoraira
Ti rikirake n riki bwa ana reirei ngkana ti kamwakura ara onimaki iroun te Uea inanon taai ni kangaanga.
N ana tai ni mwakuri te Tia Kamaiu iaon te aba, E noora te mwaane ae mataki. A titiraki ana reirei Iesu, “Rabi, antai ae bure teuaei ke ana karo, ngkae e bungiaki ni mataki?”
Ana kaeka te Tia Kamaiu ae nene, ae tangira ao ana kaeka e kakoaua nakoira bwa E tabe ma karawawatakira: “E aki bure teuaei ao e aki naba ana karo: ma e aonga ni kaotaki ana mwakuri te Atua irouna”1
Ngkai tabeua kakaewenako a roko ibukin te aki ongeaba, ti ataia bwa angiin kakaewenako n te maiu a roko bwa iai bukina riki tabeua. Bwaai ake a karikii ara kangaanga, a kona n riki bwa katamaroa nakon rikirakera.
A aki mano ara utu man kangaangan te maiu. N au tai n ikawairake, I mataiakina te utu ae bubura. Utu akanne a kakukurei irou, riki ngke I kunea te Ekaretia n tebwi tabun au ririki rinanon ai tamau man ana itera tinau, Sarfo, ao kainnabana i Takoradi, Ghana.
Ngke ti mare ngai ma Hannaha, ti tangiria ni kakoroi bukin ara kakabwaia n tamanuea, are e kaotia bwa ti na kakabwaiaki ma natira aika a mwaiti. E ngae n anne, imwaain bungiakin natira te mwaane ae ara kateniman, e kamataata te tabo ni kuakua bwa e na aki kona Hannah ni manga kariki. Ma te kakaitau, e ngae ngke e bungiaki Kenneth n te aro ae kurimaraa nakoina ma tinana, e otinako man mano raoi, ao e marurung tinana. E moanna n iriira waakin ara utu—n ikotaki ma te nanako n taromauri , tataro n utu ni katoa bong, kamatebwai ni koroboki aika tabu n te utu, bootaki n utu n te tairiki, ao waaki ni kakibotu aika a uaana.
E ngae ngke ti na kataneiaira nakon baike ti kantaningai ibukiia ara utu ae bubura, e bon kakukurei kamwakuran reirei man “Te Utu: Te Katanoata nakon te Aonaaba” ma natira aika tangiraki aika teniman. Irakin nanon angareirei akanne a kamateraoa karikirakean riki au onimaki.
N aron ae taekinaki n te katanoata: “Te mare imarenan te mwaane ao te aine e kakawaki ibukin Ana babaire ae akea tokina. A bon riai ni bungiaki ataei nakoia kaaro ao tiina ake a tia ni mareaki raoi, ao ni kaikawaki iroun te karo ao te tiina ake a kawakin aia berita ni mare ma te kakaonimaki ae kororaoi.”2 Ngkai ti karaoi nanon reirei aikai, ti bon kakabwaiaaki.
E ngae n anne, n teuana te wiikente ngke I beretitenti n te titeiki, ti rinanon tao te kabanea n nakobuaka ni kataaki ae a kona utu ni kaitara. A oki ara utu man ana waaki ni kakukurei te Ekaretia ao n ikotaki ibukin te katawanou. Ngkanne natira ake teniman a nako n takakaro bon inanon ara kambwaaun.
Iai te kanamakin ae e okioki nakon kainnabau bwa iai te bwai ae nakobuaka ae riki. E tuangai bwa N na nako n tuoiia natira ngke ti tabe n irebwainamwarake. I namakina bwa a mano ngkai ti kona n ongo bwanaaia ni kukurei n aia takakaro.
Ngke ti a nako n tuoia natira n te kabane, ni maakura, ti a kunea Kenneth ae 18-ana namwakaina- n akea korakorana n te bwaketi n ran, n aki nooraki irouia tarina. Ti waekoa n uotia nakon te onaoraki, ma te kakatai ibukin iangoan okin maiuna e matebuaka.
Ti karawawataki bwa e aki reke ara tai ni kaikawarake natira ae onoti n te maiu ae mamate aei. E ngae ngke ti ataia bwa Kenneth e na riki bwa mwakoron ara utu n akea tokina, I kuneai ni bon titirakinai bukin tera te Atua e kariaia bwa e na riki te kabuanibwai aei nakoiu ngke I karaoa au kabanea ni kona ni karaoa nakoau. I a bon tibwa okira mweengau man kakoroan nanon teuana au beku ni buokiia Aika Itiaki. Bukin tera ngkai te Atua e aki noora au ibuobuoki ao ni kamaiua natira ao ara utu man te kabuanibwai aei? Ni kabatiaakin iangoana, e a karokoa riki uniu.
E bon aki kabukintaekaai kainnabau n akean au kaeka ni baike e kanamakinii, ma I reireiaki te reirei ae bita aron te maiu ao ni karaoi tuua aika uoua, n aki kona n urui:
Te Tua 1 Kakauongo ao mutiakin ana kanamakin buum.
Te Tua 2 Ngkana ko aki koaua raoi bwa tera bukina, taraa te tua nambwa 1.
E ngae ngke e kauruaki nano baika ti rinanona, ao ti reitinako n nanokawaki, ao rawawatara ae riao n tokin te tai a bon beebete.3 Ngai ma kainnabau ti reireiaki reirei aika a onoti man baike ti kabuai. Ti a namakina te katiteuanaaki ao te kabaeaki man ara berita n te tembora, ao ti ataia bwa natira Kenneth n te maiu are imwiina ngkai e bungiaki inanon te berita. Ti karekei naba taneiai aika a riai ni buokiia tabeman ao n atai marakiia. I kakoaua bwa baike a kararaomaea tamneira a bon toki ngkai ti kamwakura ara onimaki iroun te Uea. A reitinako ni matoatoa baike ti rinanona, ma ti reireiaki ma te Abotoro are Bauro bwa ti “konai bwai ni kabane ni karaoi iroun Kristo are e [kakorakoraira]” ngkana ti kabotoi ara iango Irouna.4
E reirei Beretitenti Russell M. Nelson: “Ngkana e kaineti maiura iaon ana babaire ni kamaiu te Atua … ao Iesu Kristo ao Ana Euangkerio, ti kona n namakina te kimwareirei n aki tabe ma te bwai ae riki—ke a tuai n riki—inanon maiura.” E reitia n taekinna, “E roko te kimwareirei mairouna ao Ibukina.”5
Ti na kabebetei nanora ao ni kaonaki n te rau n ara tai ni kataaki. Te tangira are ti namakinna ibukin te Tia Kamaiu ao Ana Mwakuri ni Kamaiu e riki bwa te buoka ae korakora nakoira n ara tai ni kataaki. Bwaai ni kabane aike a katanginano [ao ni kangaanga] ibukin te maiu a kona ni kaetaki rinanon Ana Mwakuri ni Kamaiu Iesu Kristo.”6 E anga te tua, “Ami b’ai i aon te aba te rawawata: ma kam na kabebetei nanomi; I a tia ni kataea ana kai te aba.”7 E kona ni buokiira n teimatoa ni keiakin aekakin nako maraki, aoraki, ao kataaki ae ti rinanona n te maiu ae mamate.
Ti kunei karaki aika a mwaiti ni koroboki aika tabu ni karakinaia taan kairiiri aika korakora man karineaki, n aron Ieremia, Iobi, Iotebwa Timiti, ao Nibwaai, ake aki mano ni kamarakin ao kangaangan te maiu ae mamate. Bon rabwata aika mamate ake a reireiaki bwa a na ongeaba iroun te Uea e ngae inanon kataaki aika korakora.8
N nakobuakan boong n te Karabuti ae Liberty, e tang Iotebwa Timiti: “O te Atua, ko mena iaa? Ao e ngaa te umwa ae rabuna te tabo ae ko karabako iai?”9 Te Uea e reireina Iotebwa Timiti bwa e na teimatoa ni “keiakinna”10 ao e berita bwa ngkana e karaoia, bwaai ni kabane aikai a na anganna te kataneiai ao bon ibukin kabwaiana.11
N iangoi au taneiai, I nooria bwa I reireiaki tabeua reirei aika a tamaroa n taai ni kangaanga, taai are e kairainako man au tabo ae kamweengaraoi. Kangaanga ake I aitara ma ngaai inanon ataeiu, n reiakinan te Ekaretia rinanon te tieminari, n aron te aomata ae tibwa rairaki, ao n aron te mitinare ae bwanin ana tai ao kakaewenako ake I aitara ma ngaai n au reirei, n au kekeiaki ni karaoa nakoau ao ni karikirakean au utu e katauraoai ibukin taai aika a na roko. Ni mwaitin au kaeka ma te kukurei nakon baika a kangaanga ma onimakinan te Uea, I a karikirakeaki n riki bwa ana reirei.
Bwaai aika a kangaanga inanon maiura a na roko n akea te kubanako n te tai are ti rin n te kawai ae eti man irariki.12 E reiakina te ongeaba Iesu Kristo man bwaai ake e rinanona ao n rootaki iai.”13 Ngkana ti Iriiria, riki inanon ara tai ni kangaanga, ti kona n rikirake ni katotongnga.
Teuana mai ibuakon berita aika tabu aika ti a tibwa karaoia ma te Uea n te tembora bon maiuakinan tuan te anga karea. Te anga karea e riki n tainako bwa mwakoron ana euangkerio Iesu Kristo. Bon kauringaakin ana mwakuri ni kamaiu Iesu Kristo ibukiia ake a maiu ke ake a manga roko iaon te aba.
I ataia bwa te Uea e kakabwaiaira ni baika a raraoi ake ti tangiri. I uringiia mwaitiia ataei are I beritanaki n au kakabwaia n tamanuea? E a korobukin te kakabwaia anne. Ngai ma kainnabau ti beku ma mitinare aika tebubua mwaitiia, man aaba ae riaon 25 mwaitiia, i Ghana Cape Coast Mition. A rangi ni kakawaki nakoira kanga bon oin raoi natira.
I kakoaua bwa ti rikirake n riki bwa ana reirei ngkana ti kamwakura ara onimaki iroun te Uea inanon taai ni kangaanga. Ngkai ti karaoia, E na nanoangaira ni kakorakoraira ao e na buoka kabebetean uotara. N aran Iesu Kristo, amen.