1 Ongora, O ngkami kaain au ^aekaretia, ake kam a tia n anganaki te ^babanuea; ongora ngkami ao anga taningami nakon teuare e kawenea aan te aonaba, are e ^ckaraoa karawa ao kaaina ni kabane, ao a karaoaki mai irouna bwaai ni kabane aika maiu, ao ni kakammwakuri, ao ni iai rabwataia.

2 Ao I a manga taku, ongora ni bwanaau, bwa e kaawa n roko i aomi te ^amate; n te ^baoa are kam taku inanomi bwa e na aki nako tain te kabuebue, ao e toki ^ctain te tai, ao a aki kamaiuaki tamneimi.

3 Kakauongo nakon teuare ngaia te ^atia tei iroun te Tama, are e bubuti i matana ibukimi.

4 Ae kangai: te Tama, noora ^amarakin ao maten teuare akea ana ^bbure, are ko kakatonga irouna; noora raraan Natim are e waanako, raraan teuare e anga bwa ko aonga ni ^cmimitong;

5 Mangaia are, Tamau, tai katuaaia tariu ake a ^akakoaua arau, bwa aonga n nakoiu ao ni karekea te ^bmaiu ae aki tootoki.

6 Ongora, O ngkami kaain au ekaretia, ao ongora ngkami unimwaane ni kabane, ao kakauongo nakon bwanaau n te tai ae aranaki bwa te ^abong aei, ao tai kamatoai nanomi;

7 Bwa e koaua ae I tuangkami bwa Ngai te ^aArebwa ao te Omeka, te moan ao te kabane, te oota ao maiun te aonaba—te ^boota are e oota n te roo ao te roo e aki kinaa.

8 I roko nakoia ake oin au aomata, ao ake oin au aomata aki butimwaeai; ma nakoia ni kabane ake a butimwaeai I anga te ^amwaaka ni karaoi ^bkakai aika mwaiti, ao n riki bwa ^cnatin te Atua; ao nakoia ake a ^dkakoaua arau I anga te mwaaka ni karekea te ^emaiu ae akea tokina.

9 Ao I a tia ni kanakoa au ^aberita ae ^baki tootoki nakon te aonaba, bwa e na riki bwa te oota nakon te aonaba, ao te ^cbanna ni katooto ibukiia au aomata, ao ibukiia ^dTientaire bwa a na ukoukoria, ao e na riki bwa te ^etia uarongorongo i matau ni katauraoa te kawai imwaaiu.

10 Mangaia are, nakomai nako iai, ao ma teuare e roko N na kabwarabwaraa n aiaroia aomata n taai ake ngkoa, ao N na kaota nakoimi bukina ae ^akorakora mai irou.

11 Ngaia are, ongora ngkami ni kabane ao kariaiai bwa N na kaota nakoimi wanawanau—wanawananan teuare kam taekinna bwa Atuan ^aEnoka, ma tarina,

12 Ake a ^aanaaki man te aonaba, ao a butimwaeaki irou—te ^bkaawa are e kawakinaki ni karokoa e roko bongin te raoiroi—te bong are e ukoukoraki irouia mwaane ni kabane aika tabu, ao a aki kunea ibukin te buakaka ao mwakuri aika bati n ribaki;

13 Ao a kaotia bwa a ^airuwa ao aomata aika a na aki maan n te aonaba;

14 Ma a karekea te ^aberita bwa a na kunea ao n nooria n te rabwata.

15 Mangaia are, ongora ao N na kabwarabwara nakoimi, ao N na taetae nakoimi ao n taetae ni burabeti, n aron ae nakoia aomata ni boong ake ngkoa.

16 Ao N na kaotia ni kamataata n aron ae I ^akaotia nakoia au taan reirei ngke I tei i mataia n te rabwata, ao n taetae nakoia, ni kangai: Ibukina bwa kam a tia ni butiai ibukin ^bkanikinaean rokou, n te bong are N na roko ni mimitongiu n nangin karawa, ni kakoroi bukin berita ake I a tia ni karaoi nakoia ami bakatibu,

17 Ibukina bwa kam a tia n tara maanin ^amaenakon ^btamneimi man rabwatami bwa te tautoronaki, N na kaotia nakoimi bwa e kanga aron rokon bongin te kaboaki, ao ^cmanga kaokan naba Iteraera ae a ^dmaenako.

18 Ao ngkai kam noora te tembora aei ae i Ierutarem, are kam aranna bwa ana auti te Atua, ao a taku ami kairiribai bwa te auti aei e aki kona ni bwaka.

19 Ma, e koaua ae I tuangkami, bwa e na roko te kananoanga i aon te roro aei n aron te tia iraa n te bong, ao a na kamaunaaki aomata aikai ao ni kamaenakoaki i buakoia botanaomata ni kabane.

20 Ao te tembora aei are kam nooria ngkai e na kabwakaaki n te aro are e na aki tiku te atibu teuana i aon te atibu teuana.

21 Ao e na koro bukina, bwa te roro aei irouia Iutaia a na bon aki mauna nako ni karokoa e koro bukin taian karawawata nako ake I a tia n tuangkami ibukiia.

22 Kam taekinna bwa kam ataia bwa e na roko ^atokin te aonaba; kam taekinna naba bwa kam ataia bwa karawa ma aonaba a na bon mauna nako;

23 Ao n aio kam taekinna ma te koaua, bwa boni ngaia; ma bwaai aikai ake I a tia tuangkami a na bon aki mauna nako ni karokoa a bane ni koro bukiia.

24 Ao aio ae I tuangkami ni kaineti ma Ierutarem; ao ngkana e roko te bong anne, nikiraia a na bon ^akamaenakoaki i buakoia botanaomata ni kabane;

25 Ma a na manga ^aikotaki; ma a riai n tiku ni karokoa e koro bukin aia tai ^bTientaire.

26 Ao n te ^abong anne e na ongo te aba taekan taian ^bbuaka ao rongorongon buaka, ao te aonaba ni kabane e na mangaongao, ao e na ^cbwara nanoia aomata, ao a na taekinna bwa e ^dkawaeremwea rokona Kristo ni karokoa tokin te aonaba.

27 Ao aia tangira aomata e na tabe ni mauna, ao e na korakora te buakaka.

28 Ao ngkana e roko aia tai ^aTientaire, e na roko te ^boota i buakoia naake a tekateka i nanon te roo, ao anne bon bwaninin au euangkerio;

29 Ma a bon aki ^abutimwaia; bwa aki ataa te oota, ao a katannakoi ^bnanoia mai irou ibukin aia ^creirei aomata.

30 Ao n te roro anne e na koro bukin aia tai Tientaire.

31 Ao a na iai aomata n tei n te roro anne, ake a na aki bua ni karokoa a noora te ^akarawaawataaki ae taonako; bwa e na rabunaki te aonaba n te aoraki ae tiritiri.

32 Ma au taan reirei a na ^atei n taabo aika tabu, ao n aki kona ni kamawaingaki; ma i buakoia naake a buakaka, aomata a na tabekarake bwanaaia ao n ^btaetaebuaka te Atua ao ni mate.

33 Ao e na iai taian ^amwaeiei n taabo aika a kakaokoro, ao urubwai aika mwaiti; ma aomata a na bon kamatoai nanoia ni kaaitaraai, ao a na tabekirake aia ^bkabaang, temanna ni kaitara temanna, ao a na tiringiia imarenaia.

34 Ao ngkai, Ngai te Uea I a tia n taekini taeka aikai nakoia au taan reirei, a bon tabeaianga.

35 Ao I taku nakoia: Tai ^atabeaianga, bwa, ngkana a koro bukin bwaai ni kabane aikai, kam na ataia bwa berita ake a tia ni karaoaki ma ngkami a na bon koro bukiia.

36 Ao ngkana e a moanna n roko te oota, e na mena irouia n ai aron te taetae ni kaikonaki are N na kaotia nakoimii—

37 Kam taraia ao kam noora te ^aaroka are te biiku, ao kam nooria ni matamii, ao kam kangai ngke e a moanna ni bwebwerake, ao baana a boni maraurau, bwa e a kaan roko tain te kabuebue;

38 Eng bon te bong naba anne are a na noori bwaai ni kabane aikai, ngkanne a na ataia bwa e a kaan roko te aoa.

39 Ao e na koro bukina bwa ane e ^amaakai e na ^btarataraa rokon ana ^cbong ae kakannato te Uea, ao ibukin naba ^dkanikinaean rokon ^eNatin te Aomata.

40 Ao a na norii kanikina ma kamiimi, bwa a na kaotaki mai eta i karawa ao n te aonaba i nano.

41 Ao a na noora te rara, ao te ^aai, ao buanen te bubu.

42 Ao i mwaain rokon ana bong te Uea, e na roo ^ataai, ao e na bitaki namwakaina nakon te raraa, ao a na bwaka itoi mai karawa.

43 Ao a na ikotaki nikiraia kaain te bata are Iteraera nakon te tabo aei;

44 Ao ngkanne a na kakaeai, ao, nooria, N na roko; ao a na noorai n nangini karawa, ni kunnikaiaki n te mwaaka ao te ^amimitong ae korakora; ma anera aika tabu ni kabane; ao ane e aki ^bkakaeai e na bon kamaunaaki.

45 Ma i mwaain bwakan bain te Uea, e na katanga ana ^abuu te anera, ao aomata aika itiaki ake a matu a na ^broko ni kaitibo ma ngai n te ^cnang.

46 Mangaia are, ngkana kam matu n te ^arau kam a kakabwaiaaki; bwa n aron ngkai kam noorai ao n ataai, eng kam na ^broko nakoiu ao e na ^cmaiu tamneimi, ni kakororaoaki kaboakimi; ao a na roko aomata aika itiaki man mwakoron te aonaba ake aua.

47 Ngkanne e na bwaka ^abain te Uea i aoia botanaomata.

48 Ao ngkanne e na katei waena te Uea i aon te ^amaunga aei, ao e na bwenauaaki nakon uoua, ao e na ^bruru te aonaba, ao ni bebeii, ao ^ce na ruru naba karawa.

49 Ao e na kaota bwanaana te Uea, ao a na ongo ni kabane tabon te aonaba; ao a na ^atang botanaomata n te aonaba, ao naake a ngare a na noora nanobabaia.

50 Ao e na roko te karawawata ae korakora i aoia taan bwainingare, ao a na tiringaki taan kaenaena; ao naake a ukoukora karaoan ae buakaka a na koreaki ao n teweaki nako nanon te ai.

51 Ao ngkanne a na ^ataraai ^bIutaia ao a na taku: Tera taian ikoaki aika i aoni baim ao ni waem?

52 Ngkanne a na ataia bwa bon Ngai te Uea; bwa N na kangai nakoia: Ikoaki aikai bon te ikoaki are I ^akaikoakaki iai n ana auti raou. Ngai are I tabekaki rake. Ngai Iesu are I ^btauraki. Ngai Natin te Atua.

53 Ao ngkanne a na ^atang bukin buakakaia; ngkanne a na tangniwenei ibukina bwa a bwainikiriina aia ^buea.

54 Ao ngkanne a na kabooaki botanaomata ake a ^abeekan, ao naake aki ataa te tua a na iai nneia n te moan ^bmangauti; ao e na ^cbeebete ibukiia.

55 Ao e na ^akabaeaki ^bTaatan, bwa a na akea nnena i nanoia natiia aomata.

56 Ao n te ^abong anne, ngkana I roko ni mimitongiu, e na kakoroaki bukin te taetae ni kaikonaki are I taekinna ibukiia ^bkiibono ake tengaun.

57 Bwa naake a wanawana ao n tia ni karekea te ^akoaua, ao n tia n anaa te Tamnei ae Tabu ibukin ^bkairaia, ao n tuai ni ^cmwamwanaaki—e koaua ae I tuangkami, a na bon aki koreaki ao n teweaki nako nanon te ^dai, ma a na maiu n te bong anne.

58 Ao a na anganaki te ^aaonaba bwa a na ^bbwaibwai iai; ao a na kariki ma ni korakora, ao a na ^cikawai rake natiia n akea aia bure ibukin te ^dkamaiuaki.

59 Bwa e na mena ^ai buakoia te Uea, ao e na mena mimitongina i aoia, ao e na riki bwa aia uea ao aia ^btia anga tua.

60 Ao ngkai, nooria, I tuangko, e na aki anganaki nakoim bwa ko na atai bwaai riki ni kaineti ma te mwakoro aei, ni karokoa e rairaki te ^aNu Tetemanti, ao a na kaotaki mai iai bwaai ni kabane aikai;

61 Mangaia are I anganiko bwa ko aonga n rairia ngkai, bwa ko aonga n tauraoi nakon bwaai aika a na roko.

62 Bwa e koaua ae I tuangkami, bwa a tataningaiko bwaai aika korakora;

63 Kam ongo taekan taian ^abuaka n aaba aika ianena; ma, nooria, I tuangkami, a kaan roko, n ami mataroa naba, ao e na aki mwaiti ririki ma ngkai ao kam na ongo taekan taian buaka n oin abami.

64 Mangaia are Ngai, te Uea, I a tia n taku, ikotingkami man aaba ake i ^amainiku, ikotii ngkami ni kabane ngkami unimwaanen au ekaretia; naako ngkami nakon aaba ake i maeao, weweete nakoia kaaina bwa a na raira nanoia, ao ngkana a raira nanoia, karikirakea mwangan au ekaretia.

65 Ao ma te nano ae tii teuana ao te kantaninga ae tii teuana, ikotii kaubwaimi bwa kam aonga ni ^akabooa te bwaibwai are e na baireaki nakoimi i mwina.

66 Ao e na aranaki bwa ^aIerutarem ae Boou, te ^baba n ^crau, te kaawa ni ^dkatantan, te tabo ae mano ibukiia ana aomata aika itiaki te Atua ae Moan te Rietata;

67 Ao ^amimitongin te Uea e na mena ikekei, ao kakamakun te Uea e na mena naba ikekei, n te aro are a na aki kona n roko naake a buakaka nako iai, ao e na aranaki bwa Tion.

68 Ao e na koro bukina i buakoia naake a buakaka, bwa aomata ni kabane aika a na aki anai aia kabaang ni kaitaraia kaain rarikiia a riai ni birinako nakon Tion ibukin kamanoakiia.

69 Ao a na ^aikotaki ni kabane botanaoamata nako i aan karawa nako iai; ao e na tii ngaia aomata aika a na aki bubuaka imarenaia.

70 Ao e na taekinaki i buakoia ake a buakaka: Ti riai n aki nako ni buaka ma Tion, bwa a kakamaaku kaain Tion; mangaia are ti aki kona ni kaaitaraia.

71 Ao e na koro bukina bwa a na ikotaki naake a raoiroi mai buakoia botanaomata ni kabane, ao n nako nakon Tion, n anenea anenen te kimwareirei ae akea tokina.

72 Ao ngkai I tuangkami, kawakini bwaai aikai man butanakona nakon te aonaba ni karokoa e riai irou, bwa kam aonga ni kakoroa bukin te mwakuri aei i mataia aomata, ao ni mataia ami kairiribai, bwa a aonga n aki ataa ami mwakuri ni karokoa kam tia ni kakoroa bukin te bwai are I tuangkami;

73 Bwa ngkana a na ataia, a na iangoi bwaai aikai.

74 Bwa ngkana e kaoti te Uea e na ^akakamaaku irouia, bwa e aonga n rotiia te maaku i aoia, ao a na tei ni kararoaia ao n ruru.

75 Ao a na maaku botanaomata ni kabane ibukin kakamaakun te Uea, ao mwaakan korakorana. Eng. Amen.