COVID-19 ao Tembora
Kawakin ami berita ao kakabwaia n te tembora bwa moanibwai n am iango ao n nanom. Teimatoa ni koaua nakon berita ake ko a tia ni karaoi.
Tariu ao mwaneu aika kam tangiraki, ti a tia ni kamwarakeaki n te amwarake n tamnei. I rangi ni kakaitau ibukin taian tataro, rongorongo, ao katangitang inanon nako te maungatabu. Kam rabwa n tatabemanii ngkami nako ibukin raonakira, man taabo are kam mena iai.
Ni moan te ririki ae nako, ibukin te buti n aoraki n te COVID-19 ao nanora n riki bwa aomata aika raraoi n te aonaaba, ti karaoi babaire aika matoatoa ni kainii ni kabane tembora ibukin te tai ae uarereke. Inanon namwakaina ake imwiina, ti a tia n namakina ana kairi te tamnei ni manga kaukii tembora n te kawai ae karauaki raoi arona. A uki ngkai tembora inanon aua mwakorokorona, ni ira raoi tuan te tautaeka n te tabo iaon kaetieti ao waaki aika mano.
Ibukin tembora ni mwakoro 1, taanga ake a tau are a kaman karekei oin aia entaumente a kona ni kabaeaki bwa buumwaane ao buuaine.
Ibukin tembora ni mwakoro 2, ni kabane otenanti ibukiia ake a maiu a karaoaki, n raonaki ma karekean oin am entaumente, te kabaeaki bwa te buumwaane ao te buuaine, ao kabaeakia ataei nakoia aia karo. Ti a tibwa tia ni karaoa te bitaki ni baika a karaoaki ni mwakoro 2 ao a konaa kairake, membwa aika boou, ao tabeman ake iai irouia te beeba ni kariaia nakon te tembora ae tianaki taina n ira buakon te bwabetito n tei ibukiia aia bakatibu.
Ibukin tembora ni mwakoro 3, naake a tia ni kabaea aia tai a kona ni ira buakon te waaki tiaki ti n otenanti ibukiia aika maiu ma ibukin naba taian otenanti n tei ibukiia aia bakatibu ake a tia ni mate.
Mwakoro 4 ai bon okiran karaoan mwakuri, ni kabane n te tembora.
Ti kakaitau ibukin ami taotaonakinnano ao ami kakaonimaki ni beku inanon taian bitaki ao taai ni kakaewenako. I tataro bwa nanomi n nebonebo ao ni beku n te tembora e na ura ni korakora ao n otaamwaka riki nakon are mai imwaaina.
Ko na bon titiraki bwa nningai ae ko na manga nakon te tembora iai. Kaekaana: Am tembora e na uki ngkana e anga ana kaetieti ma ana kariaia am tautaeka. Ngkana e keriaaki aron okin te COVID-19 n am tabo, am tembora ngkanne e na manga kaukaki. Karaoa am kabanea ni konaa ni buoka kauarerekean te COVID n am tabo bwa e aonga n rikirake kabwaiam n am tai inanon te tembora.
Ngkai moa, karika am berita ao kakabwaia n te tembora bwa moanibwai n am iango ao inanom. Teimatoa ni koaua nakon berita ake ko karaoi.
Ti kateitei ngkai ibukin taai aika a na roko! Abwi ma teuana tembora ae a kateaki ke n onobwaiaki ngkai. N te ririki ae nako, e ngae ngke iai te buti n aoraki, a katabwenaaki aontano ibukin 21 tembora aika a boou!
Ti tangiria ni karokoa ana auti te Uea ni kaaniia riki nakoia ara membwa, bwa e na reke aia tai ae tabu n nakon te tembora ni katoa tai ngkana a konaa.
Ngkai I katanoatai ara babaire ni katean 20 riki tembora, I iangoia ao n neboiia bwaeoniia—ngkoa ao ngkai—ake a katabui maiuiia n tia n ibuobuoki ni karakoroa nanon te rongorongo n te bong aei. E na kateaki te tembora ae boou n taabo aikai: Oslo, Norway; Brussels, Belgium; Vienna, Austria; Kumasi, Ghana; Beira, Mozambique; Cape Town, South Africa; Singapore, Republic of Singapore; Belo Horizonte, Brazil; Cali, Colombia; Querétaro, Mexico; Torreón, Mexico; Helena, Montana; Casper, Wyoming; Grand Junction, Colorado; Farmington, New Mexico; Burley, Idaho; Eugene, Oregon; Elko, Nevada; Yorba Linda, California; ao Smithfield, Utah.
Taian tembora bon mwakoron Kaokan ana euangkerio Iesu Kristo ni bwanina ae kakawaki. Otenanti n te tembora a kaonii maiura n te mwaaka ao te korakora ae aki reke n te kawai riki teuana. Ti karabwa te Atua ibukin kakabwaia akanne.
Ngkai ti a kaina te maungatabu aei, ti a manga kaota riki ara tangira ibukimii. Ti tataro bwa te Atua e na kabwaroa Ana kakabwaia ao ana tararua iaomi n tatabemani ngkami nako. Ngaira ni kabane ti irekereke n Ana mwakuri ae tabu. Ma te ninikoria, ti na waaki nako n ana mwakuri ae mimitong te Uea! Aikai I a taekin n aran Iesu Kristo ae tabu, amen.