E a Uti Kristo; A na Mwaing Maunga man te Onimaki Irouna

Iroun Beretitenti Russell M. Nelson

Beretitenti n ana Ekaretia Iesu Kristo ibukiia Aika Itiaki ni Boong aika Kaitira

Onimakin Iesu Kristo bon te kabanea n rietata ni mwaaka are e tauraoi ibukira n te maiu aei. A kona ni karaoaki bwaai nako nakoia ake a kakoaua.

Tariu ao mwaneu, I kakaitau ibukin tibwangau n taetae nakoimi n auan Tabatin te Itita aei.¹ Ana anganano ni kamaiu ao Mangautin Iesu Kristo e biti maiura n tatabemaniira. Ti tangiria ao ti neboia ma te kakaitau Ngaia ma Tamara are i Karawa.

I nanon onoua te namwakaina n nako, ti a tia n teimatoa n kekeiaki i nanon te butinaoraki ni kabuta te aonaba. I rotaki n ami nanomwaka ao korakoran tamneimi ni kaitarai aoraki, buan temanna, ao te kaokoroaki. I tataro n tainako bwa, inanon bwai aikai, kam na namakina ana tangira te Uea ae aki bwaka ibukimi. Ngkam kam tia ni kaitarai kataakimi ma te nanomwaaka, e aki banebuaka te ririki ae e tia n nako aei.

N te ingabong aei, ti a tia n ongora irouia taan kairiiri man mwakoron nako te aonaba. Eng, ana kakabwaia te euangkerio bon ibukiia ni kabane reeti, neewe, ao aomata. Ana Ekaretia Iesu Kristo bon te ekaretia ibukiia aomata nako . Iesu Kristo bon ara tia kairiiri.

E rabwa bwa, te aoraki ae butanako aei e a tia n aki kamemerea aron waakin Ana koaua. Ana euangkerio Iesu Kristo bon ngaia raoi ae kainnanoaki n te aonaba ae mangaongao, kiriwe, ao n rawaawata.

A riai natin nako te Atua n ongora ao ni butimwaea ana rongorongo ni kamaiu , ni kaboomwi Iesu Kristo. Akea riki te rongorongo ae kakaawaki riki ibukin kukureira—ngkai ao n aki toki.² Akea riki te rongorongo ae onrake n te rau. Akea riki te rongorongo ae kona ni kamaunaa te kauntaeka n ara kaawa nako.

Te onimaki iroun Iesu Kristo bon aan ni kabane koaua ao karekean te mwaaka ae rietata. E taku te Abotoro Bauro, “Ngkana akea te onimaki ao e kangaanga ae na kukurei te [Atua]: bwa ane e nakon te Atua ao e na kakoaua bwa bon iai, ao bon te tia kabo aia onimaki akana a kakorakoraia n ukoria .”³

Bwai aika tamaroa n te maiu aei—kakabwaia aika kakaawaki ake a kona n reke—a moanaki n te onimaki. Karikan te Atua bwa moan maiura e moanaki n te onimaki bwa E tauraoi ni kairiira. E moanaki te rairannano ni koaua n te onimaki bwa iai mwaakan Iesu Kristo ni katiaki, kamarurung, ao ni kakorakoraira.⁴

“Tai kakeaa mwaakan te Atua,” e taku te burabeti ae Moronaai, “bwa e mwamwakuri ma te mwaaka, ni kaeti nakon aia onimaki natia aomata.”⁵ Bon ara onimaki are karokoa mwaakan te Atua i nanon maiura .

Ma, e taraa ni matoa kammwakuran te onimaki. N tabetai ti titiraki bwa ti kona ni karekea te onimaki ae tau ni karekei kakabwaia ake ti rangi ni kainnanoi. Ma, e katoki maaku akanne te Uea rinanon ana taeka te burabeti n Ana Boki Moomon ae Aramwa.

Atin te kai ae te mwakeke

E tuangira Aramwa bwa ti na kakatai iaon te taeka ao ni “kamwakura teutana te onimaki, e ngae ngke ai bon [tii] te nano ni kan kakoaua ae mena iroura .”⁶ Taeka aika “taribin te onimaki” e kauringai te berita n te Baibara are ngkai iai ara “onimaki n ai aron uan te mwakeke,” ti na kona ni “kangai nakon te maunga anne, Mae ngkoe nako ikekei; ao e na oni mae; ao akea te bwai teuana ae [kam] aki kona⁷

Mannikiba ibuakon uaan te kai ae te mwakeke

E atai mamaarara te Uea n te maiu aei. Ti bwaka n taai tabetai. Ma E ataa naba ara konabwai ae abwabwaki. Atin te mwakeke e uarereke ma e bwebwerake bwa te aroka ae bubura are a katei ngao iai manikiba ni mwaangana. Atin te mwakeke ae uarereke e tei ibukin te onimaki ae rikirake.⁸

E aki kainnanoa te onimaki ae kororaoi te Uea bwa ti aonga ni karekea mwaakana ae kororaoi . Ma E tua nakoira bwa ti na kakoaua.

Tariu ao mwaaneu aika tangiraki, au mwioko nakoimi n ingabongin te Itita aei bon waaki ngkai ni karikirakea ami onimaki. Rinanon ami onimaki, E na kakorakora ami konabwai Iesu Kristo ni kona ni kamwaing maunga ake ni maiumi,⁹ e ngae ngke buburan ami kangaanga e botau ma te Maunga ae Everest.

Ami kangaanga tao te maroa, nanokokoraki, aoraki, ke tabeua riki. E kakaokoro ami kangaanga, ma kaekan aikai ni bane bon karikirakean ami onimaki. E reke aei ma te mwakuri. E kangaanga irouia aomata aika taningaroti bwa a na karekea taribin te onimaki.

E reke te mwakuri ae tamaroa man te mwakuri. Ti riki bwa ana reirei Iesu Kristo man ara mwakuri naba. Karikirakean ami onimaki ao kantaninga irouna e reke n te mwakuri. N na anga nimaua kawai ni buoki ngkami ni karikirakea te onimaki ma kantaninga.

Te moan, kamatebwai. Riki bwa te tia kamatebwai ae nanomwaka. Kabanea am tai ni koroboki aika tabu ni karekea te oota iaon taben ma ana mwakuri Kristo. Kanoaiko n ana reirei Kristo bwa ko aonga n nora korakorana ni maiumi. Karika koauan Ana Mwakuri ni Kamaiu Kristo bwa e na uaana nakoim. E katoka iaona ami rawawata, ami kairua, ami mamaara, ao ami bure. E anga te boo are kainnanoaki ao e anga te korakora nakoim bwa ko na kamwaingi maunga nako ake ko kaitarai. E reke te korakora aei man ami onimaki, kantaninga, ao tauraoi n Iriiria.

E kainnanoa te kakai kamwaingan maunga. Reirei taekan te onimaki. A roko taian kakai ni kaeineti ma am onimaki iroun te Uea. Boton te onimaki anne bon onimakinan Nanona ma ana tai—nningai ao aron Ana kakabwaia nakoim n te kakai are ko kainnanoia. Tii am akikakoaua are e na tuka te Atua ma anganakim kakabwaia ni kamwaing maunga inanon maium.¹⁰

Kabatian riki am atatai iroun te Tia Kamaiu, bebeten riki aron onimakin ana nanoanga, Ana tangira ae akea tiana, mwaakan ana kamaiu ni, kakorakora ao ni kamaiu. E kaan te Uea ma ngkoe ngkana ko kaitara ke ko ararakea te maunga ma te onimaki.

Te kauoua, rineia bwa ko na kakoaua Iesu Kristo. Ngkana iai am nanokokoraki iroun te Atua te Tama ma Natina ae Tangiraki, ke koauan Kaokakin Bwai ke koauan nakoan Iotebwai Timiti bwa te burabeti, rineia bwa ko na kakoaua¹¹ ao ni kateimatoa te kakaonimaki. Tabeki ami titiraki nakon te Uea ao boki aika tabu. Kamatebwai ma te nano ni kakoaua ao tiaki te kantaninga bwa ko na kunei kabwaka n aron maiun te burabeti ke kabwakan koroboki aika tabu. Katoka kabuburan am nakokoraki n arom n reitaki ma aomata aika taan kakaniko. Kariaia te Uea bwa e na kairiko iaon kawaim ni kamaiua tamneim.

Te kateniua, mwakuri i nanon te onimaki. Tera ae ko na karaoia ngke arona bwa e bati am onimaki? Bon iangoia. Korea taekana. Ngkanne kakorakora riki am onimaki man karaoani bwaai ake a kainnanoa riki te onimaki ae abwabwaki.

Te kaaua, karaoai otenanti aika tabu ma te tauraoi. A karokoa mwaakan te Atua i nanon maium taian otenanti.¹²

Ao te kanimaua, butiia Tamam are i Karawa, n aran Iesu Kristo, bwa e na buokiko.

E reke te onimaki man te mwakuri. E reke te kaotioti man te mwakuri. Bwa “ane e bubuti ao e na anganaki; ao ane e ukeuke, ao e na reke irouna; ao ane e karebwerebwe, ao e na bon kaukaki nakoina.”¹³ E atai bwaai ake a na karikirakea am onimaki te Atua. Butiia, ao butiia riki.

E kona n taku te aomata ae tuai kakoaua bwa te onimaki aia bwai aika mamaara. Ma te iango aei e tarariaoa korakoran te onimaki. A kona ana Abotoro te Tia Kamaiu n waakinako n reirei Ana reirei imwin matena, n anga maiuia, ngke arona bwa a aki kakoaua?¹⁴ A na butimwaea te kamateki Iotebwa ma Hyrum Timiti ni kamanoa Kaokakin ana Ekaretia te Atua ngke arona bwa a tuai karekea koauana? A na anga maiuia 2,000 Aomata aika Itiaki n tain te mwanganga ae abwabwaki¹⁵ ngke arona bwa a nanokokoraki n ana euangkerio Iesu Kristo are e a tia ni kaokaki? Eng, te onimaki bon te mwaaka are e anga te kona ni bita te bwai ae aki kona ni karaoaki bwa e na kona ni karaoaki.

Tai kamemerea te onimaki are iroum. E kainnanoa te onimaki kaainakin te Ekaretia ao te teimatoa ni kakaonimaki. E kainnanoa te onimaki iriiraia burabeti ao tiaki waaki aika bwainaki. E kainnanoa te onimaki karaoan te mwakuri ni mitinare n tain te buti n aoraki. E kainnanoa te onimaki maiuakinan te maiu ae itiaki n te tai are e takarua ia te aonaba bwa e aki bwainaki tuan te itiaki. E kainnanoa te onimaki reireian te euangkerio nakoia natira n te aonaba aei. E kainnanoa te onimaki kamaiuan temanna ae ti tangiria ao te onimaki ae abwabwaki butimwaean te kaeka ae kananokawaki.

Uoua te ririki n nako, Ngai ao Titita Nelson, ti kawara Tonga, Fiji, ao Tahiti. E korakora te karau n aaba aikai. A aki mamatam man tataro membwa aia bootaki are a booaki i tinaniku a na kamanoaki man te karau.

I Samoa, Biiti, ao Tahiti, ngke e a waaki te bootaki, e toki te karau. Ma e aki toki te karau, i Tonga. Ma a moantaai n roko 13,000 Aomata aika Itiaki ni karekei tekatekaia, a tataninga ma te tataonannano ngke e bwaka te karau, ao imwina a tekateka n ongora i nanon uoua te aoa i nanon te karau.

Kaain te Aro i Tonga iaan te karau

Ti nora bannan te onimaki ae abwabwaki irouia kaain aaba aikai—te onimaki ae tau ni katoka te karau ao te onimaki n nanomwaka n aki tokin te karau.

Tiaki n tainako ae a mwaing maunga nakon taia ma aroia are ti tangiria. Ma n tainako ti waaki nako man ara onimaki. N tainako e kakorakora ara konabwai ni karekea te mwaaka n atua.

Taiaoka kam riai n ataa aei: Ngkana a kaki baia bwaai ni kabane ke aomata ake ko onimakinia, Iesu Kristo ao Ana Ekaretia a na aki kaki baia mai iroum. E aki taninganinga, ke ni mamatu te Uea.¹⁶ Te Atua “titebo ngkoananoa, ngkai ao [ni ingabong],”¹⁷ E aki kona ni mwaninga Ana berita ae tabu,¹⁸ Ana berita, ke Ana tangira ibukiia Ana aomata. E karaoi kakai ngkai ao E na karaoi kakai n bong aika imwaira.¹⁹

Onimakin Iesu Kristo bon te kabanea n rietata ni mwaaka are tauraoi ibukira n te maiu aei. A kona ni karaoaki bwaai nako nakoia ake a kakoaua.²⁰

Ami onimaki ae rikirake irouna e na kamwaingi maunga—tiaki maunga ake a katamaroa te aonaba—ma maunga aika karawawata maiumi. Ami onimaki ae marurung e na buokiko n rairi kakaewenako nakon waaki n rikirake.

N tabatin te Itita aei, ma au tangira ao kaitau ae bati, I kaota au koaua bwa E a bon tia n uti Iesu Kristo. E uti bwa e na kaira Ana Ekaretia. E a uti bwa e na kakabwaiaia natin te Atua ni kabane, n tabo nako ake a maeka iai. N ara onimaki irouna, ti kona ni kamwaingi maunga ake i nanon maiura. I kakoaua n aran Iesu Kristo ae tabu, amen.

Bwaai aika a na taraaki

1. N tabo tabeua n te aonaba, e kaokoro aron te kamauri irouia aomata ni ingabongin te Itita. N oin aia taetae, e taku te tia kamauri, “E a uti Iesu!” E kaeka are e kamauraki ni kangai, “Eti anne! E a uti!” N aron te katooto, te kamauri irouia kaain Russia e moanaki n aron aei “Христос воскрес” (E a [uti] Kristo!), ao kaekaana “Воистину! воскрес!” (Eti anne! E a uti!).

2. Taraa Motiaea 2:41.

3. Ebera 11:6. Lectures on Faith e katerea bwa te onimaki “bon te moan aro n tautaeka are iai mwaakana, tautaeka, ao korakorana iaon bwaai ni kabane” ([1985], 5).

4. Tara Mataio 11:28–30; Aramwa 7:12–13; Ita 12:27.

5. Moronaai 10:7; iai taeka aika kaairaki.

6. Aramwa 32:27; iai taeka aika kaairaki.

7. Mataio 17:20, iai taeka aika kaairaki; tara naba Ereman 12:9, 13.

8. Tara Reirei ao Berita aika Tabu 78:17–18. Te kanuwanga ni kanakoan te aro n aomata ao n riki bwa te “aomata ae itiaki rinanon ana mwakuri ni kamaiu Kristo te Uea” (Motiaea 3:19).

9. Tara 1 Nibwaai 7:12.

10. Taraa Moomon 9:19–21; Ita 12:30.

11. Tara 2 Nibwaai 33:10–11.

12. Tara Reirei ao Berita aika Tabu 84:20.

13. Mataio 7:8.

14. N akean te onimaki, e na rinanon te mate n te ai Abinataai ibukin rawana ni kakeaa te bwai ae ataia bwai ae ataia bwa e koaua? (tara Motiaea 17:7–20). N akean te mwaaka aei, e na karabaa Ita n te nanganga ni bwaa (tara Ita 13:13–14) ao e na rinanon te maroa Moronaai inanon ririki aika bati (tara Moronaai 1:1–3) ngkai e na rangi ni bebete riki maiuia ngke a kakeaa te bwai are a kakoaua?

15. Tara Melvin L. Bashore, H. Dennis Tolley, and the BYU Pioneer Mortality Team, “Mortality on the Mormon Trail, 1847–1868,” BYU Studiesvol. 53, no. 4 (2014), 115.

16. Tara Taian Areru 121:4.

17. Moomon 9:9.

18. Tara Itaia 54:10; 3 Nibwaai 22:10.

19. Tara Moomon 9:10–11, 15.

20. Tara Mareko 9:23.