I aki Anganingkami n Ai Aron te Aba
Te bwai ni mwakuri ake ti kainnanoi ni karekea te bong ae tamaroa ao ni karikirakea te kaubwai ae te tamaroa a reke n ana euangkerio Iesu Kristo.
Imwain te moan Itita are e karaoa te otenanti ae te toa Iesu are E anga nakoia naake Tengaun ma Uoman, E waakina ana kabanea ni mwakuri ae mimitong ao e nako Ketetemwane, e kamwaneaki, ao e tauraki. Ma, noran tabeaiangaia ao tao te maaku are e oti irouia tabeman mwaane, E taekina aei Iesu nakoia (ao nakoira naba):
“A na tai karawawatai nanomi:” kam na onimakina te Atua, ao kam na onimakinai naba. …
“I bon aki kitaningkami ni motiki romi: I a okiringkami. …
“I katuka te rau i roumi, I anganingkami au rau: I aki anganingkami n ai aron te aba, ngkana e anga. A na tai rawawata nanomi, ao a na tai maku.”1
A roroko kangaanga n te maiu aei, nakoia naba aika a kakaonimaki, ma ana rongorongo Kristo ae karaunano bwa Ngaia, bon te tiibu te teei, e na waakinako “n ai aron te tibutetei ae kairaki nakoia [taan] korea buraeraena”2 ao imwina e teiraki, n riki, bwa temanna are e taekinna te tia nebo “boni nnera ni kamaiu, te tia [buokiira] iai iroura ngkana e [kai] nanora.”3
Noran te aua ae matoa are imwain Kristo ngkae E waaki nakon te kaibangaki ao Ana reirei ngkai a na uota Ana euangkerio nakon te aonaba n te nuuka n tai, reitaki ma ngai n te rongorongo ibukiia membwa n ana Ekaretia te Tia Kamaiu n bong aika kaitira. E mena aei i nanon kiibu aika mwaiti n Ana Boki Moomon are e kaineti nakon te itabarara n arona nako, n ai aron Reimwan ma Remuera nakon te kabanea ni buaka are a boo iai ngaa n tautia. Teuana oin kabotoan te rongorongo aio bwa ngkai e koreaki Ana Boki Moomon ibukiia aomata aika itiaki, a kauringiira taan korokaraki aikai (aomata aika a nori buaka aika mwaiti) bwa te mwakuri n iowaawa ao te itabaraara bon aron tein te reitaki ni boong aika kaitira.
Eng, au koroboki iaon te itabaraara I aki karioa. Uoua te ngaa te ririki n nako, E kauring te Tia Kamaiu bwa ni bong aika kaitira e na iai “te buaka, ao taekan te buaka,”4 ao e taekinna naba bwa e [na] “anaaki te rau man te aonaba.”5 Eng Uean te Rau aei, are e reirei ni katuruturua bwa te kakauntaeka bon mairoun teuare e buakaka,6 e kaai n tang, ma Tamana ae Tabu ibukiia kaain te aonaba ake “akea aia tangira” e taku koroboki aika a tabu, ao a aki kona karekea te nano ni kan maeka ma te tangira.7
Tariu ao mwaaneu, ti nora te itabarara, te un ao te aki rau ae bati n ara tabo. Ma, te roro ae ngkai a tuai nora te Kateniua ni Buaka, ke tao n nora aron keerikakin kaubwain te aba n aron are e riki n 1929 are e a uota te Karawawata ae Korakora. Ma ti kaitara ma aekan te Kateniua ni buaka, tiaki te un ni kamateia ara kairiribai, ma bootakia natin te Atua bwa a na karekea te tangira, te mwamwannano imarenaia ao te ibuobuoki ni kamaoa ikoaki n te aonaba ae aki rau. Bwakan Kaubwain te aonaba ae ti kaitara ma ngaia tiaki banen ara mwane ma te keerikaki n taraan ara konabwai, ao memeren te onimaki ao te kantaninga ao te tangira ae kororaoi n ara tabo. Ma bwai ni mwakuri ake ti kainnanoi ni karekea te bong ae tamaroa ao ni karikirakea te kaubwai ae te tamaroa n ara kaawa a reke n ana euangkerio Iesu Kristo. Ti riai n aki kariaia—ao te aonaba aio e riai n aki kariaia—kabwakara bwa e na totokoa maiuakinan reirein te euangkerio ma berita aika tabu iroura.
Ngaia are, n te aonaba ae “onrake n te angibuaka, ao tiaki te rau,” n aron are e taekinna Iehova, ti na kanga ni karekea are E aranna bwa “te berita ae tabu … n ibukin te rau”? Ti kona ni karekea man rairakira nakon Teuare e taekinna bwa E na nanoangaira ao “n ana akoi ae akea tokina” e na anga te rau nakoia natira.8 E ngae ngke iai taetae ni burabeti aika kakamaku ao kibu aika katabeaianga ake a katerea bwa e na anaaki te rau mai iaon te aba, a tia n reirei, burabeti, ao ara burabeti ae tangiraki Russell M. Nelson bwa tiaki nanona bwa e na anaaki aei mairoun temanna ma temanna!9 N te Itita aei ti a kataia ni karekea te rau i nanora, ni karekea ana kakorakora ao kamaiu Ana Mwakuri ni Kamaiu Iesu Kristo nakoira ao ara utu ao nakoia ake ti kona ni buokiia aika kaain rarikira. E kakukurei, ao e kamiimi, bwa te kamaiu aei e tauraoi nakoira “n aki kainnanoan te mwane ao akea boona.”10
Te ibuobuoki ma te kantaninga aei a rangi ni kainnanoaki irouia aomata ni kabuta te aonaba ake a kaitarai kakaewenako aikai—kangaanga ni kaeti ma te rabwata, iango, reitaki ke te mwane, ke tabeua riki. Ma e mwaiti ibuakon aikai ae e aki tau korakorara n tobwai i bon iroura, bwa te rau ae ti kainnanoia bon tiaki te aeka n rau are e “anga te aonaba.”11 Ma, ibukin kangaanga aika matoa ti kainanoa te bwai ae aranaki ni koroboki aika a tabu bwa “mwaakan karawa,”ao aron karekean te mwaaka aei bon kaboraoan maiura ma te bwai ae aranaki bwa “waakin te raoiroi.”12 Ngkai, te mataata n reitakin te koaua aei ma te mwaaka bon teuana te reirei ae a tuai n reiakinna aomata, aio ana taeka Atuan karawa ma aonaba!13
Ao tera reirei akanne? Eng, e bati i nanon ara boki aika tabu, a taekinaki n ae okioki n taian maungatabu n aron aei, ao ni bong aikai, e reirei iaona te Burabeti Iotebwa Timiti bwa kaekan ana rongorongo are e kangai “Atuau, Atuau, e aera ko kitanai?”14 N te matawariki ae Liberty are kaimwaitoro man kamwengabuaka, e reireiaki bwa reirein te raoiroi bon anua aika tamaroa n aron te taotaonannano, te aamarau, ao te tangira ae aki bwaka.15 Ngkana akea tuua akanne, e koaua bwa ti na bon kaitarai itabaraara ao te kai riribai.
Ni kaeineti ma aei, N na taetae tabeua te tai iaon buan tabeua mwakoron reirei iaon te etieti n ara tai. Ni bon kairau, Ngai te aomata ae I boibuako, rangi ni kukurei, ao a bati bwaai aika a tamaroa n ara aonaba. E koaua a mwaiti riki kakabwaiara n te aonaaba aei ni kabotauaki ma roro nako, ma ni katein te ka 21 n tienture ao angiin te tai n te Ekaretia, ti nori maiu aika mena inanon te kangaanga, are e a kariki urun berita aika tau ao e bati naano aika uruaki. Iangoi taeka aika bubuaka ake titebo ma urun tuan te itiaki, aika a rangi n tabangaki n taian tamnei ke te terewition, ke nori mwakuri n iowaawa n tangako ao waaki aika akea riaia ake ti noria bwa e bati n taabo ni mwakuri ake ti aki toki ni wareki n taai aikai. Ngkana ti taetae iaon kawakinan berita, e kamangoraki te bwai ae tabu ao e aki karieaki bwaai aika tabu. Nakoia ake a kaririaki bwa a na nakonako, taetae, ke n waaki ni karaoi aekakin waaki aikai— “ae ai aron are e anga te aonaba,” kanga n taekana teuana—tai kantaningaia bwa e reke te rau man aei; I berita nakoimi n aran te Uea bwa e na aki. “Akea te kukurei n te buakaka,”16 e taku temanna te burabeti ngkoa. Ngkana e bwara te mwaie, e riai te tia katangitang ni kabooaki, ao angiin te tai boona bon te tang ma te uringaba.17
Ke tao ti nori waaki riki tabeua n akiako ke ni kakeea aron temanna. Ti na kanga ni kataboroa ma te karaurau arora ngkai ngaira taan iriira te Uea Iesu Kristo bwa ti na aki bwaka nakon aekakin anua aikai. Ti riai n aki reke n te bure ni karaoan aekaki ni waaki ni ioawa ke n tautaekana temanna n ae aki eti ke te kairoro nakon baika tangako—n tiaki te rabwata, ke te iango, ke n te kairiiri n te aro ke aekana nako. I uringa aron ongorau n ana taeka aika matoa Beretitenti Gordon B. Hinckley ngke e taetae nakoia mwaane n te Ekaretia ni kaeti man naake “taan iowaawa n oin mwengaia”:18
E taku “e kananokawaki ao e bati kamairan te mwakuri n iowaawa nakoia kainnabami.” “Te mwaane n te Ekaretia are e iowaawa nakon kainnabana, e aki karinea, e taetae n aki akaka nakoina, e aki raoiroi ana kairi nakoina, e bon riai n aki taua te nakoanibonga. … [E] aki tau ni karekea te beba ni kariaia nakon te tembora.”19 Ao ae kamaira riki, e reitia n taku, bon aekan nako te iowaawa nakoia ataei—ke aekaki ni iowaawa nako.20
Ni bwaai aika riki aika a mwaiti, a kona mwaane, aine ao ataei aika kakaonimaki n te Ekaretia n taetae n ae aki riai, ao n aki ako, nakoia naake a kabaeaki ma ngaiia n te otenanti ae tabu n ana tembora te Uea. Iai inaomataia aomata n namakina ae a tangiraki, namakina te rau, ao ni karekea te kamanoaki n te mwenga. Taioaka, ti a kateimatoa te aekaki aei ni mwengara. Te berita nakon are e karekea te rau bwa e na reke irouna te Tamnei ae Raoiroi bwa te tia raoniko n tainako ao e na bwaro kakabwaia nakoim “n akea te kairoro” ngkai ao n aki toki.21 Akea temanna ae e riai ni wi kakang ke taekinii taeka n iowawa bwa e na “anenea kunan te kamaiuaki n te tangira.”22
N na kaina au maroro. Ningabong bon te Itita, te tai are reirei aika raoiroi n ana euangkerio Iesu Kristo ao Ana Mwakuri ni Kamaiu e na “tokanikai iaon” —n tokanikai iaon te bobuaka ao te itabaraara, akean te kantaninga ao riaon tuua, ao n tokanikai iaon te mate. Bon te tai ni kaota te kakaonimaki n te taetae ao te mwakuri nakon Ana tibuteteei te Atua, are e “[uoti] iaona korakaira, man kabebetei rawaawatara,”23 ao e nanomwaaka ni kabanea te mwakuri ibukin kamaiuara.
E boni ngae ngke e kamwaneaki ao e maraki, aki karauaki ao a karaoaki mwakuri n aki ako nakoina, ao n uoti iaona buren ao kairuan te aonaba, Natin te Atua ae Maiu e taraa aron maiura, ao e kangai: “I anganingkami au rau: I aki anganingkami n ai aron te aba, ngkai I anganingkami. A na tai rawawata nanomi, ao a na tai maku.”24 Kam na kakabwaiaki, kukurei, ao n rau n te Itita aei. Mwiina aika aki taekinaki a tia ni kabooaki iroun Uean te Rau, are I tangiria ma nanou ni kabanea ao I kakoaua, are aio Ana Ekaretia, ao are I kakoaua, Iesu Kristo te Uea, amen.