Ara Tia Kamaiu ae Onoti
Man Ana mwakuri ni kamaiu, iai mwaakan te Tia Kamaiu ni kaitiaki, n anga te rau, ao ni kakorakoraira temanna ma temanna.
I kakaitau n reiti ngkami n ingabongin te Itita ae tamaroa aei. Ngkana I iangoa te Itita, E mena n au iango taeka ake a taekinaki irouia anera nakoia naake a mena n Aia Tabo Maate: “Tera bukina ngkai kam ukora te aomata ae maiu ibuakoia maate? E aki mena ikai, ma e a uti.”1 I kakoaua bwa e a tia n uti Iesu te I-Natareta ao E maiu.
Antai Kristo Iroumi?
Tenibwi ma aua te ririki n nako, ngai ma toau ti reitaki ao n reireina te aomata ae wanawana ni kaawan Davao, Biribin, are bon te tia koro karaki n teuana te nuutibeba n te tabo. Ti kukurei n reireinna ngkai e bati ana titiraki ao e bon rangi ni karinerine nakon baike ti kakoauai. Ana titiraki ae tiku irou are e tabekia bon “Tera nanomi nakon te Kristo?”2 Ao e koaua bwa ti tibwauai ara namakin ao koaua iroun Iesu Kristo. Rimwi ao e boretia teuana te rongorongo iaon naba te atuu n rongorongo aei are a rarangaaki n taeka aika tamaroa iaon te Tia Kamaiu. I uringnga bwa e anaaki iai nanou ma kanga iai te bwai ae aki bwanin. E tamaroa te rongorongo ma e aki kakanoa ao akea korakorana.
Uarokoara nakon Kinaakina
“Antai Kristo Iroumi?” I noria bwa batira kinaakin te Tia Kamaiu irou e roota au kona n ongo Irouna ao ai aron naba au kaeka. Tabeua te ririki n nako, Unimwaane David A. Bednar e tabeki titiraki aikai bwa kanoan ana maroro: “Ti toki n ataakin rongorongon te Tia Kamaiu, ke e rikirake aron kinaakina Iroura? Tera arora ni karekea kinaakin te Uea”3
Ngkae I kamatebwai ao n iango, e roko irou te atabwai ae kangai bwa tera are I ataia iroun te Tia Kamaiu e roota aron kinaakina Irou. I motikia n te tai anne bwa N na kabane riki korakorau ni kinaa. I kakaitau ibukin koroboki aika tabu ao aia koaua taan kairiiri n te Ekaretia aika a kakaonimaki mwaane ao aine aika ana reirei Iesu Kristo. Maiu i nanon tabeua te ririki n nako e a tia n uotai nakon kawain te kamatebwai ao karekean te ataibwai. I tataro bwa te Tamnei ae Raoiroi e na uota nakoimi n te bong aei te rongorongo are aki tau au taeka ni kabwarabwarai.
Te moan, ti riai n ataia bwa kinaakin te Tia Kamaiu bon te waaki ae te kabanea ni kakaawaki i nanon maiura. E riai ni moanibwai iaon bwaai nako.
“Ao aio te maiu are aki toki, te ataiko ae te Atua ae ti temanna ae koaua, ao Iesu Kristo, ae ko kanakomaia.”4
“E taku Iesu,Boni Ngai te kawai, ao te koaua, ao te maiu: akea ane nako n te Tama, bwa ti i Rou.”5
“Otan te aba Ngai: ane irai ao e na bon aki nakonako n te ro, ma e na karekea te ota ni kamaiu.”6
Te kauoua, ngkai e tabe n rikirake kinaakin te Tia Kamaiu iroura, taeka inanon koroboki aika tabu ao aia taeka burabeti a onoti kakaawakia iroura n te aro are a riki bwa oin ara taeka. Tiaki taekan katotongan taeka, namakin, ao rongorongoia tabeman ma bon karokoara bwa ti na ataia ibon iroura, n arora ae onoti, man kamwakuran te taeka7 ao karekean te kakoaua mairoun te Tamnei ae Raoiroi. N aron are e taekinna te burabeti ae Aramwa:
“Kam aki taku bwa I atai bwaai aikai I bon irou? Nooria, I kaotiota te koaua nakoimi bwa I bon atai bwaai aikai are I taekini bwa a koaua. Ao kam kanga n taku bwa I atai koauaia?
“Nooria, I taku nakoimi bwa a kaotaki koauaia nakoiu iroun tamnein te Atua ae Tabu. Nooria, I a tia n aki mamatam ao n tataro i nanon boong aika a mwaiti bwa I aonga n atai bwaai aikai I bon irou. Ao ngkai I bon atai irou bwa a koaua; bwa te Uea ae te Atua e a tia ni kaoti nakoiu iroun Tamneina ae Tabu; ao aio tamnein te kaotioti are e mena inanou.”8
Te kateniua, rikiraken mataatara bwa Ana Mwakuri ni Kamaiu Iesu Kristo e kakaawaki ibukira n tatabemanira nako e na buokira ni kinaa. Angiin te tai e bebete iangoan ao taekinan Ana Mwakuri ni Kamaiu Kristo n ae tabangaki nakon kinaakin korakoran kakaawakina i nanon maiura. Ana Mwakuri ni Kamaiu Iesu Kristo akea tiana ao akea tokina ao e rooti bwaai nako ma aroia nako ma e riki aio nakoira n tatabemaniira. Man Ana mwakuri ni kamaiu, iai mwaakan te Tia Kamaiu ni kaitiaki, n anga te rau, ao ni kakorakora temanna ma temanna.
Nanon te Tia Kamaiu n tii ngaia, Ana kantaninga n tii ngaia man te moan tai, bon karaoan nanon Tamana. Nanon te Tama bwa E na ibuobuoki n “[uota] te aki mamate ao te maiu ae akea tokina nakoia aomata”9 man rikina bwa “te tia tei ibukira are e mena iroun te Tama.”10 Ngaia are, “bon te Nati, ma E reireiaki naba te ongeaba ni baike E maraki iai; ao ngke E riki ni kororaoi, ao e riki iai bwa te tia Karika te maiu are aki toki nakoia akan ira nanona ni kabaneia.”11
“Ao e na waaki, n rinanon te kainnano ni maraki ma te karawawataaki ao te kaririaki n aekaia nako. …
“Ao e na uota i aona te mate, bwa e aonga ni kabwara ana kabaebae te mate … ao e na uota i aona mamaaraia, bwa e na on nanona n te nanoanga, … bwa e na ataia ni kaineti ma te maiu n rabwata bwa e na kanga ni buokiia ana aomata ni kaineti ma mamaaraia.
“… Natin te Atua e rinanon te maraki n aron te maiu n rabwata bwa e na katokaa i aona aia bure ana aomata, bwa e aonga ni kamaunai riaoan tua irouia n aron mwaakan ana kamaiu.”12
I tangiria n tibwaa teuana karakinau are e na katerea te korakai are iai iroura i nanon mwanean nanon Ana Mwakuri ni Kamaiu te Uea.
Ngke I kaoaki iroun au tia kairiiri, I wareka Ana Boki Moomon mai moana nakon tokina ao n mwaaken kiibu ake a kaineti ma Ana Mwakuri ni Kamaiu te Uea. E kaoai naba au tia kairiiri bwa N na katauraoa au reirei teuana te iteraniba ae kakimototoan baike I a tia n reiakin. I taku ibon irou, “Teuana te iteraniba? Eang, e bebete anne.” I miimi, bwa, I kunea ae rangi ni matoatoa karaona, ao E aki tia.
I noria rimwi bwa oin bukina ae aki tia bwa E a tiku te mwaake irou ao a bure au katautau. Te moan, I tangira au koroboki bwa e na kaungaia aomata ni bane. Au koroboki bon ibukiu ao tiaki ibukiia tabeman aomata. E riai ni kakanoa n au namakin ao iango iroun te Tia Kamaiu ao baike E a tia ni karaoi ibukiu n te aro are ngkana I warekia, e na uoti nakoiu rongorongo aika tamaroa, kakaawaki, ao n onoti.
Te kauoua, I tangiria bwa au koroboki e na rianako ao ni bwarabwara ao e na kakanoa n taeka aika nano. A bon aki kakaawaki taeka aika nano. E riai ni kakanoa n te koaua ae nene ae mataata mani bebete koreana. “Bwa e kimwareirei tamneiu n te oota; bwa bon aio aron te Uea ae te Atua ni mwammwakuri i buakoia natiia aomata. Bwa e anga te oota te Uea ae te Atua nakon te kaantaninga”13
Te kateniua, I tangiria bwa e na kororaoi, ae bura ibuakoia koroboki—te koroboki ae akea ae kona ao n riai n reitia—ma e riai n riki bwa te koroboki are I kona n reitii tabeua taeka ikai ao ikekei n aron rikiraken ootau n Ana Mwakuri ni Kamaiu Kristo.
Au Koaua ao Kakao
Ngke I kairake, E bati reireiau man maroroou ma au bitiobi. Inanon ririki akanne, E reke tangiran taeka aikai man te kuna n taromauri:
I mimi n ana tangira Iesu ibukiu,
I mwaninga ngke anganai ana tangira.
I maaku ngke I ataia bwa e mate ibukiu,
E mate ibukiu ae bon te tia bure.
E kaoira te burabeti Moronaai: “Ao ngkai, I tuangkami bwa kam na ukoukora Iesu aio ake a korea rongorongona burabeti ma abotoro.”15
E berita nakoira Beretitenti Russell M. Nelson bwa “ngkana [ti] waaki n reirei n rongorongon ni kabane Iesu Kristo are [ti] kona, … e na rikirake [ara] kona n kararoa te bure . E na rikirake [Nanora] ni kawakin tuua.”16
N Tabatin te Itita aei, n aron ae bon rierake te Tia Kamiu man ruanimatena, ke ti teirake man baike a tinei tamneira ao n riaon nangin te nanokokoraki, ana kabaebae te maaku, te kainikatonga ae kamamate, ao ana katikitiki te aki rauaki. A maiu Iesu Kristo ao Tamara are i Karawa. I kakoaua Aia tangira ae moan te kororaoi ibukira. N aran Iesu Kristo, amen.