Mwanangan Natin te Atua
Ngkai natin te Atua n te berita ngaira, ti tangiriia, ti karineia, ti ribanaia, ti kamanoia ao ti butimwaaia tamnei aika a roko man te aonnaba imwain te aonaba aei.
Ngaira n tatabeman ti bane n rootaki n te buti n aoraki n te aonnaba, iai utu ao raao aika a tia ni motirawa man te maiu aio. N na katerei teniman aika ti rangi n uringiia, ake a tei naba ibukiia naake ti bati n tangiriia.
Aio bon Te tari Philippe ao Titita Germain Nsondi. E beku Philippe Ngondi bwa te tamanuea n te Brazzaviille Congo Titeiki ngke e mate. Bon te taokita ngaia ae e kabongana ana tarena ibukiia tabeman ma te baiati.1
Te kauoman bon Titita, Clara Ruano de Villareal mai Tulcan, Ecuador. E kaaina te aro ngke 34 ana ririki ao bon te tia kairiri ngaia ae taatangiraki. A anga aia kaboo ana utu n anenean kunana ae tatangiria, “I Ataia E Maiu Iesu.”2
Te kateniman bon te Tari Ray Tuneau mai Utah, ma ana utu ae tikiraoi. E taku Kaain abana ae Juliet, “I tangiria [natiu mwaane] bwa a na [uringa tamaia bwa] e kataia n tainako ni karimoa te Atua.”3
E taku te Uea, “Kam na uaia ni maeka i nanon te tangira n te aro are kam na tang ibukin buaia akana a mate.”4
Ngkai ti tang, ti na bon kukurei naba ni Mimitongin Utin ara Tia Kamaiu. Mai Irouna, naake ti tangiriia ao raoraora a waaki nako i nanon mwanangaia ae akea tokina. N aron are e kabwarabwaraa Beretitenti Joseph F. Smith: “Ti aki kona ni mwaninga taekaia; e aki toki tangiraia iroura. … A tia ni waaki; ao ngaira ti tabe ni waaki, ti tabe n rikirake n ai aroia ae a tia n rikirake .”5 E taku Beretitenti Russell M. Nelson, “Ranimatara n nanokawaki … a bitaki nakon ranimata nakon te kantaninga.”6
Ti ataia bwa tera aron te Maiu imwaain te Bungiaki
Ara taratara n tamnei e aki tii karababa ara atatai ibukia te koraki ake a reitanako mwanangaia nakon te maiu are aki maamate ma e kauka naba ara ataibwai ibukiia ake a moantaai n aia mwananga ao n tibwa rin nako n te maiu ae mamate.
Te aomata nako are roko nakon te aonnaba bon natin te Atua mwaane ao aine.7 Mwanangara n te maiu aei e aki moanaki ngke ti bungiaki. Imwain bungiakira, ti uaia ni mena n te aonnaba ni katauraoi ike ti “karekei [ara] moan reirei n te aonnaba n tamnei.”8 E taku Iehova nakon Ieremia, “Ngke I tuai ni karikiko inanon te biroto ao I ataiko, ao ngke ko tuai n otinako mai nanon te biroto ao I katabuko.”9
A titiraki tabeman bwa ningai ae moanaki iai te maiu, ni buatakin karikan te tetei, ke ngke e a bwam te buroo, ke ngke te ataei e a kona ni maeka i tinaniku te biroto, ma ibukira, akea te titiraki bwa taamnei aika natin te Atua mwaane ao aine a onoti mwanangaia nakon te aonaba ni karekei rabwataia ao n nora te maiu ae mamate.
Ngkai natin te Atua n te berita ngaira, ti tangiriia, ti karineia, ti ribanaia, ti kamanoia ao ti butimwaaia tamnei aika a roko man te aonnaba imwain te aonaba aei.
Kamiimiin Te Bwai ae Aanga Aine
Ibukin te aine, karekean natina e kona n riki bwa te korakai ae korakora n rabwata, n te iango ao ni kaubwaina. Ti tangiria ao ni karineia aine aika raraoi n te Ekaretia aio. Ma te rabakau ao te wanawana, ko uota rawawatan am utu. Ko tangiria. Ko beku. Ko anga nanom. Ko kakorakora te onimaki, ko buokiia aika kainnano, ao e bati ae ko anga nakon te kaawa.
Tabu te Katabeaki n Tararua aron te Maiu
Ririki aika nako, ibukin korakoran tabeaiangan nanona ni mwaitin te mwakuri ni kabwakanati n te aonnaba, Ana maroro Beretitenti Gordon B. Hinckely nakoia ainen te Ekaretia e bon kaeineti ibukira ni bong aikai. E taku: “Ngkami buu aine ao tiina bon atinroon te utu. Kam karikiia ataei. Ai buburara ao n tabu te tabe anne. … Tera ae na riki nakon ara kantaninga ao kakawakin maiun te aomata? Kabwakaan te nati bon te makuri ae buakaka, te tiritiri ao ni koaua e bon aki kariaiakaki, e a taona te aonnaba. N na bubutiia ainen te Ekaretia aio bwa a na katokia, kararoa te katei anne, kararoai taian boraraoi akanne are a na kona n oti bwa tatangiraki. Tao e na iai tabetai are e na kona iai ni karaoaki, ma e bon rangi n tianaki.”10 … Ngkami tinaia natin te Atua mwaane ao aine, are e bon tabu maiuia. Kawakinaia bon te tabe ae tabu ae e na aki baakanrereaki ke n aki tarabwaiaki.”11
Unimwaane Marcus B. Nash e karakina nakoiu karakin te aine ae 84 ana ririki, are n ana tai ni maroro ibukin te bwabetito,“e karaoa kabwakakin te ataei [ririki aika mwaitii imwaaina].” Ma nanona ae korakora, e taku: I a tia ni uouota te rawawata ni kabwakaan te ataei i nanon toan bongini maiu inanon abwi ma onoua te ririki. … Akea te bwai ae I kona ni kanakoa te maraki ao te bure. E bwara nanou ni karokoa I reireinaki ana euangkerio Iesu Kristo ae koaua. I reiakina aron te rairanano…ao n te tai ae waetata I kaonaki n te unga nano. I a ataia n tokina bwa a kona ni kabwaraki au bure ngkana I raira nanou ni koaua man au bure.”12
Ai ka kukureira ngaira ibukin te bwaintagira ae te rairanano ao kabwaraakin bure.
Tera Ae Ti kona ni Karaoia?
Tera tabera ngkai ana reirei Iesu Kristo aika a rau? Ti na maiuakin ana tua te Atua, reiakin nakoia natira, ao n tibwauaia ma tabeman ake a kan ongo.13 Ti na tibwai ara namakin aika korakora ibukin kaitiakan te maiu ma te koraki ake a kariaia inanon te bootaki. A kona n aki rang butimwaea are ti onimakinna, ma ti tataro bwa a na oota rikii ni bukina, i bukira, motinano aikai a na nako raoi iaon are te aomata ibukin maaiun teuaei ao neiei.
Ngkana te aine ae aki kantningaia be na bikoukou, ti na butimwaia ma te tangira, te kaunganano, ao ngkana e kainanoaki te buoka te mwane, kakorakoran te tina ni kariaia natina be na bungia ao n rin n ana mwanaga neiei ke teuanne n te maiu ae mamate.14
Tamaroan te Tabetabe
N ara utu, ti a tia ni kakabwaiaki korakora bwaa n uabwi te ririki n nako, 16 ana ririki te ataeinaine e a ataia bwa e bikoukou. Neiei ao taman te ataei a aki mareaki, ao akea aia iango bwa a na tekateka bwa taanga. Te aine aei e kakoaua bwaa te ataei are uotia moan te kakawaki. E bungia te ataei ae te aine ao ni kariaia te utu ae raoiroi a na tabekia bwa natiia. Irouia Bryce ao Jolinne, te ataeinaine aio bon kaekakin aia tataro. A aranna bwa Emily ao a reireinna bwa e na onimaki iroun Tamana are i Karawa ao Natina, Iesu Kristo.
E a ikawai Emily. Ai kukureira ngaira bwa Emily ao tibura te mwaane, Christian, a tangira ao a mareaki n Ana auti te Uea. Emily ao Christian ngkai iai oin natiia te ataeinaine ae uarereke.
E korea aio Emily: “Rinanon namwakaina aika ruaiua ni bikoukou, Iai au tai n noora te bwai ae riki [n] au tai ni bung. I iangoa tinau are bungiai, are ai tibwa 16 au ririki. I iangoa tinau are bungiai, are ai tibwa tebwi ma onoua ana ririki, Ngke I namakina te maraki ao e roko i rou aron are uotia te bikoukou, I aki kona ni katoka aron iangoan a na kangaanga are ngke te ririki n ataei ae 16. … A bwaro ranimatau ngkai ngkana I iangoa tinau are bungiai, are ataia bwa e aki kona n anganai te maiu [are tangiria ibukiu ao n nanona n tituaraoi e anga] ngai bwa n te tabekaki. I aki kona n ataia bwa tao tera ae e rinanona inanon ruaiua namwakaina—ngkai iai maata ni momotikitaeka ngke e a bitaki rabwatana, waakin maiun te kairake ake e a katikui, ao e ataia bwa n tokin ana ariri te tina n tangira, e na anga natina nako nanon bain temanna. I rang kakaitau n ana rinerine irouna, bwa e rinea natina be na maiu ni kamanena inaomatana.” Emily e katokia, “I kakaitau ibukin ana baire ae mimitongin Tamau are i Karawa, ibukiia au karo aika raoiroi ake a [tangirai ao n tabe] ibukiu ao ibukin te tembora are ti kona ni kabaeaki ma ara utu n aki toki.”15
Te Tia Kamaiu “e anaa te teei, ao e kateia i buakoia: ao ngke e bwabwakoia, e taku nakoia, Ane mwanea te teei ae karako ae aiaron [te] teei aei n akoia inanon arau, ao e mwaneai n akoai naba“16
Ngkai a Tuai n Ataaki Naano aika Etieti
I kaota au tangira ao au nanoanga i bukiia taanga aika raoiroi ake a mare ao akea natiia a ingainga ni kantaninga ao aine ao mwaane are a tuai reke aia tai ni mare ni kaineti ma ana tua te Atua. Taian mii aika aki koro bukiia a kangaanga atakiia ngkana a rinanoaki man tarakin te maiu ae mamate. Ngkai ana toro te Uea ngai, I berita nakoimi bwa ngkana kam kakaonimaki nakon Iesu Kristo ao ami berita, kam na kareke kaboan mwiin kakabwaia n te maiu ao ami iango n te tai ae akea tokina iroun te Uea.17 A na kona ni iai te kukurei ni wakin te maiu ae mamate engae ngkana ara kantaninga aika raraoi aki ataaki.18
Imwin bungiakira, ataei a bon reitinako n tangira ara buoka. Tabeman a tangiria ni waetata. Ni katoa ririki rinanoia bitiobi aika mwamwannano ao ami anganano n akoi aika te angabwai n aki mamatam ao buokaia aomata, a kakabwaiaaki maiuia mirion ma mirion ataei. Te Moan Beretitentii e a tia ni katanoata 20 te mirion te taraa ni buoka UNICEF n aia mwakuri n te aonnaba ni karekea uoua te birion te bwainaoraki.19 A tangiraki ataei iroun te Atua.
Te Babaire ae Tabu bwa e na Reke te Natina
E katabetabe iangoana bwa n tabeua aaba aika moan te kakabwaia n te aonnaba, a karako ataei ni bungiaki.20 “Ana tua te Atua ibukiia Natina bwa a na kamwaitiia ao ni unika te aonnaba e bon tiku ni kamanenaaki.”21 Ningai are e na reke natim ao iraman mwaitia bon te baire ae karabaaki ni karaoaki i marenaia te buu te mwane, ao te aine ao te Uea. Ma te onimaki ao te tataro, babaire aika tabu aikai a kona n riki bwa waaki aika tamaroa, aika reke mai iai taian kaotioti.22
N na tibwaa karakinan te utu ae te Laing mai California Maiaki. E koroboki Titita Rebecca Laing:
N tain te kabuebue ni 2011, maiun araa utu e bon nakoraoi. Ti raang kukurei ni ieinra ma aman natira aia ririki 9, 7, 5, ao 3. …
“N au tai ni bikoukou ao ni bung [a tia] n rang kaanganga…[ao] ti namakina [ti rang] kakabwaiaaki ma natira aika aman [iangoia] bwa ara utu e bwanin. Inanon Okitobwa ngke ti kakauongo nakon te maungatabu ni kabuta, I namakina te namakin ae aki kairua bwa e na manga reke natira riki temanna. LeGrand aran te buu te mwane ao ngai ti iangoia ao ti tataro, …ti ataia bwa te Atua iai ana baire ae kaokoro ibukira nakon are ti iangoia.
“Imwiin kangaangan te bikoukou riki teuana ao te bung, ti kakabwaiaaki ma te ataei ae te aine. Ti aranna bwaa Brielle. Bon te kakai neiei. Tabeua miniti imwiin bungiakina, ngke bon mena inanon [te ruu ni kabung], I ongo bwanaan te Tamnei ae Raoiroi ae bon te koaua: ‘Iai riki temanna.‘
“Teniua riki te ririki imwiina, teuana riki te kakai, Mia aio te aine. Brielle ao Mia a kakorakora te kukurei ibukin ara utu.” E taku neiei, “Kaukan nanom nakon ana kairi te Uea ao ni ira nanon Ana babaire ibukira e na aki toki ni karokoi kukurei aika mwaiti…ae bon onimakinan am ataibwai.”23
Tia Kamaiu e tangiriia ataei n tatabeman.
”Ao E anaia aia ataei aika uarereke, temanna imwiin temanna, ao E kakabwaiaia. …
“Ao … a tabekarake mataia nako karawa, … ao a noora karawa bwa e uki ao a nooria anera bwaa ruo mai karawa … i nukan te ai; ao a nooria [anera] … bwa a otabwaninia ataei ake a uarereke, … ao anera a karaoi aia mwakuri n ibuobuoki nakoia.”24
I kakoaua bwa mwanangamj ae onoti bwa Natin te Atua e aki moanaki ngke e moan rin te eea i nanon mamaam, ao e na aki toki n te tai are ko anaa iai kabanean ikeikem n te maiu aio.
Ti na ururinga n taainako bwa tamnei aika ataei n tatabeman mairoun te Atua a bon roko nako aonteaba ni bon oin aia mwananga neienne ke teuanne.25 Ti bia butimwaiia, kamanoia, ao n tangiriia n taainako. Ngkana ko mwaneia ataei aika kakawaki aikai n aran te Tia Kamaiu ao ni buokiia n aia mwananga ae akea tokina, I berita nakoimi bwa E na kakabwaiai ngkami te Uea. N aran Iesu Kristo, amen.