Taeka ni Kaukuki
I butimwaai ngkami nakon te maungatabu ni kabuta ao te tai ae onoti n ongora bwanaan te Uea.
Tariu ao mwaaneu aika tangiraki ao raora ni mwakoron nako te aonaba, I anga bwaanau ni butimwaai nakoimi nakon te maungatabu ni kabuta aei. Ti bootaki bwa te utu ae ti teuana n tangiria n neboa ara Uea ao ara Tia Kamaiu, Iesu Kristo. Kam rabwa ngkai kam reitira.
Te ririki ae nako e a tia n riki bwa kanoan te rongorongo. Akea te nanokokoraki bwa tia tia ni bane n reiakin baike ti aki atai mai imwaaina. Tabeua reirei ake I atai mai mwaina a tia ni korobokiaki i nanou ni kawai aika boou.
N aron te katooto, I ataia n akea te nakokoraki bwa bon te Uea ae kaira waakin Ana Ekaretia. E taku, “N na kaotia [nakoimi] bwa I kona ni karaoa oin au mwakuri.”1
N angiin te tai, ngai ma au kauntira a baro ranimatara ngkana ti noria ngke E aki toki ni buokiira inanon taai ni kakaewenako imwiin karaoan ara kabwanea n tamaroa ao a toki ara kona. Ao e koaua bwa ti miimi.
E mataata riki irou ngkai nanon Ana taeka ae kangai, “Noria, N na kawaekoa au mwakuri n oin au tai.”2 I aki toki ni kimwareirei ngkae E kaira ao ni mwakuria kawaekoan Ana mwakuri—i nanon naba te butinaoraki aei.
Tariu ao mwaaneu aika tangiraki, korakoran te Ekaretia e roko man aia kekeiaki ao aia koaua kaaina. A ribanaki raoi taian koaua i nanon te mweenga. I nanon te ririki ae nako, e bati iroumi ae e a korakora riki aron kamatebwaian te euangkerio ni mwengami. I karabwai ngkami, ao a na karabwai ngkami natimi.
E teimatoa ni waaki te onobwai nakon te Tembora ae te Salt Lake. Man au aobiti ao I kona n nora raoi te mwakuri are e karaoaki n ana tabo te tembora.
Ngke I mataku irouia taan mwakuri ni kouti aroka ni kawai, taian bwaibu, mwiin te iti, ao te koburake n ran ae uruaki, I uringa ae ngaira ti kainanoa kamwawaan baika a bareka ni maiura, man ana ibuobuoki te tia Kamaiu.
Ana euangkerio Iesu Kristo bon te euangkerio n rairannano.3 Ibukin Ana Mwakuri ni Kamaiu te Tia Kamaiu, e kaoira Ana euangkerio bwa ti na bitaki ni katoa tai, n rikirake ao n itiaki. Bon te euangkerio ni kantaninga, ni kamaiu, ao n rikirake. Ngaia are, te euangkerio bon te rongorongo ae kakukurei! E kukurei tamneira ni mwaneka aika uarereke ake ti toui.
Mwakoron ikotakia Iteraera, ao ae e rangi ni kakaawaki, bon te mwioko nakoira ngaira aomata bwa ti na tau ao n tauraoi ni buoka katauraoan te aonaba imwain Manga Okin te Uea.
Ngkai ti ongora nakon marooro ake a tia ni katauraoaki irouia ara taan kairiiri iaan ana kairi te Tamnei ae Raoiroi, I kaoi ngkami bwa kam na tataro n atai bwaai aika bareka ake kam riai ni kamwawai man maiumi bwa kam aonga n tau.
I tangiri ngkami, tariu ao mwaaneu, ao I kaota au koaua bwa Tamara are i Karawa ao Natina ae Tangiraki a kinaira ao n tangiriira. A tauraoi n tainako ni buokiko n mwaneka nako ake ko toui. I butimwaai ngkami nakon te maungatabu ni kabuta ao te tai ae onoti n ongora bwanaan te Uea. N aran Iesu Kristo, amen.