Reirei n ana Kawai te Tia Kamaiu
Te tibwanga e toka ni kabane iaora n tatabemaniira bwa tina ira ana banna ni katoto te Mwatita ao n reirei n ai Arona.
Taan Reirei aika Rianako Aroia
Tabeua te namwakaina n nako, raorau ngkoa n reirei man au kaawa i Overton, Nevada, e tuangai bwa tina kaai ni ikoti ara bwaintangira ibukin ara tia reirei n te kinta ae tatangiraki, are e a tibwa bukamarua ana ka-98 n ririki. E reireiniira bwa tina bwaina te akoi, kakaawakin te matu, kakukurein te miriki ma te kuraam bitiketi, ao te itangitangiri imarenara. Ko rabwa, Titita Davis, ngkai koa tia n riki bwa te tia reirei ae moan te tamaroa.
Iai naba au tia reirei ae rianako arona ngke I reirei n te kaoreti ae Ricks n ririki aika bwakanako. I a katauraoai ni riki bwa te mitionare ao I iango bwa e na rang ibuobuoki ngkana I iriira te kiraati ibukin katauraoaia mitinare. Tera are I rinanona e bita maiu.
Man moan bongin au kiraati, I a ataia bwa I a roko irarikin te tia reirei ae rianako. Te tia reirei bon te Tari F. Melvin Hammond. I ataia bwa te Tari Hammond e tangira te Uea ao e tangirai. I kona n nooria ni moana ao n ongo ni bwanaana. Ngkana e angareirei, te Tamnei e kaota au iango. E reiakini reirei, ma e kaoai naba bwa N na reiakin ibon irou. Te kakao anne e buokai n noora raoi tibwangau n reiakina ana reirei te Uea bon ibukiu. Te taneiai anne e bita arou n aki toki. Ko rabwa, te Tari Hammond, ibukin am reirei n angareirei n ana Kawai te Tia Kamaiu.
Tariu ao mwaneu, ni kabane a riai ni karekea te aekaki n taneiai n reiakinaki n te mweenga ao n te ekaretia.
Te kabwarabwara n Nakomai, Iriirai e buokiira ni kaotaa bwa tera te angareirei ae ai aron Kristo ae e kona ni karekea. “Oin te kantaninga ni kabane n kamatebwaian ao te anga reirei te euangkerio,” e kangai, “bon kakorakoraan rairakira nakon Iesu Kristo ao n buokiira n riki n ai Arona. … Ma te aeka n reirei n te euangkerio are e kakorakora ara onimaki ao ni kairiira nakon te kakai n te rairaki aki riki n te tai ae tii teuana. E reitinako riki nakon [te] kiratiruum nako nanoia aomata n tatabemaniia ao mweengaia.”1
Koroboki aika a tabu e kaotia bwa ana mwakuri te Tia Kamaiu i Amerika n taai akekei e bon rangi ni korakora te bitaki iai ao e tabangaki n te aro are “a rairaki aomata nakon te Uea, iaon te aba, aika Nibwaite ao Reimwanaite, ao bon akea te itabaraaraa ma te ikakaiwi imarenaia, ao a bon eti raoi aroia imarenaia.”2
E na kanga ara mwakuri n ibuobuoki n iai mwiina ae ti tebo iaoia naake ti tangiriia? Ti na kanga n anga reirei n ai aron te Tia Kamaiu ao ni buokiia tabeman ni kona riki ni kakorakora rairakiia? Kariaia bwa N na anga tabeua iango.
Katotonga te Tia Kamaiu
Te moan ae rang kakaawaki, karaoia ibon iroum n reiakin ni kabane taekan te Mwatita n Tia Reirei. E kanga ni kaota ana tangira nakoia tabeman? Tera ae a namakinna ngkana E angareirei? Tera ae e angareirei iaona? Tera Ana kantaninga irouia naake E reireiniia? Imwiin iangoan titiraki n aron aikai, katinea ao kaboraoa am kawai n angareirei bwa e na riki n ai Aron ana angareirei.
Te Ekaretia e katauraoi booki n te Gospel app ao iaon ChurchofJesusChrist.org. Teuana te boki ae aron anne e atunaki Teaching in the Savior’s Way. I kaoko bwa kona wareware ao kamatebwai taekana ni kabane. Reireina a na buokiko n am kekeiaki ni kona n riki n ai aron Kristo n am angareirei.
Kaotinakoan Mwaakan te Utu
Au rinerine are imwiina e kona ni kabwarabwaraaki ma te bwai are I rinanona n namwakaina aika a nako ngke I kawara raraou ae I tatangiria. I kona n ongo bwanaan buuna mai buki n taetae nakon temanna ngaia are I waekoa ni kamwawaai, bwa e aonga ni kona n okiriia ana utu.
Teuana te aoa imwiina ke e nako riki I karekea ana tekiti kainabana ae kakateke: “Te tari Newman, ko rabwa ibukin rokom. Ti riai ni kaman kaoko bwa kona rin, ma I tangiria n tibwaia ma ngkoe te bwai are ti karaoia. N tain te butinaoraki ti a tia ni maroroakina Nakomai, Iriirai ma natira aika a ikawai ni katoa Tabati iaon te Zoom. E a tia ni bon karaoi kakai. I taku bwa n te moan tai ao natira te aine e a tibwa wareka ana Boki Moomon ibon irouna. N te bong aei ai bon te kabanea n reirei n Ana boki Moomon, ao ti nang bon bane ngke koa roko naba. … I taku bwa kona bon bae ni kan ongo bwa e kanga Nakomai, Iriirai, Zoom, ao te butinaoraki n tia ni karekea te tai ae riai ni bita te nano. … E karikai bwa N na iangoia bwa iraua kakai aika a uarereke ake a tia n riki inanona te tai ni kangaanga aei.”
Taraan aio irou ai aron kakoroan nanon te berita are e karaoia Beretitenti Russell M. Nelson n Okitobwa 2018. E taku bwa kamatebwaian te euangkerio ae boboto n te mweenga, ae boutokaki n te Ekaretia iai ana konaa ni kaotinakoa te korakora n te utu, ngkana utu nako a karaoia n reitinakoa ma te karaurau ni bita mweengaia bwa taabo aika mano ibukin te onimaki. I berita bwa ngkana kam mwakuri korakora ni manga karaoa raoi mweengami bwa e na boboto iai reiakinan te euangkerio, n tainako ami Tabati nako a na riki bwa boong ni kakukurei. Ami ataei a na rang ingainga n reirei ao ni maiuakin ana reirei te Tia Kamaiu. … Taian bitaki inanon ami utu e na rangin korakora man boutoka.”3 Ai tamaroara te berita aei!
Ni karikia bwa bitakin te maiu ni koaua, te rairaki nakon Iesu Kristo e riai n irekereke ma tamneira ni kabane ao n rinanon anuan maiura. Aio bukina ae e na riai ni boboto inanon maiura—ara utu ao mweengara.
Uringnga Bwa te Rairaki E bon Nakon Te Aomata
Au kabanea ni iango ae n a anga bon uringngan ae te rairaki anne e riai n nako mai inanom. N aron are e kabwarabwaraaki n te taetae ni kaikonaki iaoia kiibono ake tengaun, ti aki kona n angan temanna te oera n rairakira, e ngae ngke ti kan anga. N aron are e reirei Unimwaane David A. Bednar: “Te bwaa ae kakaawaki aei e karekeaki te timna n teuana te tai … ma te taotaonakinnano ao te teimatoa. Akea te kauarereke ae kona n reke, akea te katawe n te katauraoi ae e kona n reke.”4
Nakomai, Iriirai e aanaki n te koaua anne. I kabotaua ma te anera are e buoka Nibwaai n reiakina taekan Iesu Kristo ngke e kanga, “Taraia!”5 N aron te anera anne, Nakomai, Iriirai e kaoira bwa tina tarai koroboki aika tabu ao aia taeka burabeti ni boong aikai bwa ti aonga ni kunea te Tia Kamaiu ao n ongo Irouna. N aron Nibwaai, ti na bon reireinaki ibon iroura iroun te Tamnei ngkai ti wareware ao n iangoi ana taeka te Atua. Nakomai, Iriirai bon te bwai are e buokiira bwa ti na waaki ni karaoa kamatebwaian te bwai teuana n te ran ae maiu n ana reirei Kristo.
Tabeia kaaro bon aekakin aei n aro aika a mwaiti. Ataei a karekei bwaai aika a mwaiti mairouia aia karo, ma te koaua bon akea mai ibuakona. Ti aki kona n anganiia natira te koaua ae raka riki n aron are ti aki kona ni kairoroa te kora bwa e na rikirake. Ma ti kona ni karekea te anga are e na buoka temanna ni karekea ana koaua, n te euangkerio are a na totokoa “karibwa te taeka.” Ti kona ni kataia ni karekea te aro ae tamaroa bwa aonga natira—ao tabeman ake ti tangiriia—ni kona ni karekea nnen te koraa, “[ongo] te taeka, ao [ota] iai”6 ao ni kunea ibon irouia “bwa e raoiroi te koraa.”7
Tabeua te ririki n nako, natiu te mwane Jack ao ngai e reke ara tai n takakaro n te Old Course i St. Andrews i Scotland, are e waaki iai te takakaro n te golf. E bon rang kamimi! Ngke I oki I kataia n uotia nakoia tabeman aron tamaroan ao kakaawakin te taneiai anne. Ma I bon aki kona. Tamnei, witeo, ao au kabanea n tamaroa ni kabwarabwara a bon aki tau. N tokina ao I ataia bwa ti te kawai ibukin temanna bwa e na ata tamaroan St. Andrews e na bon rinanona—n noora te kawai ae booraoi man bubura, n ikeikena te eea, n namakina te ang iaon ubuia, ao n orei booro nako nanon kamwanono ao aroka aika matenten ake ti karaoi ma tenano ae korakora.
Ngaia are ai aron naba ana taeka te Atua. Ti kona n reirei iaona, ti kona ni kabwarabwara iaona, ti kona ni kamataata. Ti kona ni maroroakinna, ti kona ni kabwarabwara, ti kona naba ni bon kakoaua iai. Ni karokoa ae te aomata anne e na namakina ana taeka te Atua ae tabu n rin n ana iango teuanne ke neienne n ai aron te aoi mai karawa rinanon mwakan te Tamnei,8 e na riki kanga bon ti ai aron taraan te boutikaati ke tamnein ana motirawa temanna. Ko riai n nako ikekei ibon iroum. Te rairaki bon kawaim bon iroum—te kawai n ikoikotaki.
Ni kabane ake a reirei n te mweenga ao n te ekaretia e kona n anganiia tabeman te tibwanga bwa a na karekea n oin aia taneiai n te maiu n tamnei. Rinanon taneiai aikai, a na kona n “atai koauan bwaai ni kabane” ibon irouia.9 E reirei Beretitenti Nelson, “Ngkana iai am titiraki aika ko bon nanonii ibukin te euangkerio ke te Ekaretia, ngkai ko rineia ni kariaia te Atua bwa botom am iango inanon maium, ko na kairaki ni kunea ao ni mataata ni koaua aika akea tokiia, are a na kaira maium ao ni buokiko n tei n nene iaon kawain te berita.”10
Kakorakora Tamaroan te Angareirei
I kaoia taan kairiiri ao taan reirei ni bootaki nako n te Ekaretia bwa a kaai n reireiniia n ikotaki ma kaaro ao te roronrikirake bwa aonga ni kona ni kakorakora ni katamaroai aia angareirei n aia karinan nako —n titeiki, n uoote, ao inanon mweenga. Aio e na korobukina man reiakinan te reirei ao kaoakin te marooro ae onrake n te Tamnei iaon koaua ake e reiakiniira iai te Tamnei ae Raoiroi inanon taai aika a mabu n ara kamatebwai ibon iroura.
Raou aika a tangiraki iroun Kristo, te tibwanga e toka ni kabane iaora n tatabemaniira bwa tina ira ana banna ni katoto te Mwatita ao n reirei n ai Arona. Ana kawai bon te kawai ae koaua! Ngkai ti iriiria “ngkana e kaoti ao ti na riki n arona, bwa ti na nooria n arona ngkai; bwa ti aonga ni karekea te kantaninga aio; bwa ti aonga ni kaitiakaki n arona ae e itiaki.”11 N aran Ngaia are e uti, ara Mwatita n Tia Reirei, Iesu Kristo, amen.