Tera Ae E a Tia Ni Karaoia te Uea Ibukira?
Iesu Kristo e a tia ni karaoi bwaai ni kabane ae kakawaki ibukin mwanangara rinanon te maiu aei nakon te tabo are e taekinaki n ana babaire Tamara are i Karawa.
N tairikin te Kaonobong n ana maungatabu te titeiki n ririki aika nako, I kaitibo ma te aine are e taku bwa a tia raoraona n tuangnga bwa e na oki nakon te ekaretia imwiin ririki aika mwaiti n aki kakaonimaki, ma e aki ata bukina ngkai e riai ni karaoia. Ni kaunga neienne, I taku, “Ngkana ko iangoi bwaai aika e a tia te Tia Kamaiu ni karaoi ibukim, a mwaiti bukina ngkai ko na oki n taromauri ao ni beku Ibukina.” I rangi ni mimi n ana kaeka, “Tera ae E a tia ni karaoia ibukiu?”
Tera ae e a tia ni karaoia Iesu Kristo ibukira? E a tia ni karaoi bwaai ni kabane ae kakawaki ibukin mwanangara rinanon te maiu aei nakon te tabo are e taekinaki n ana babaire Tamara are i Karawa. N na taetae iaon reirein te babaire anne aika aua. Ni bwaai aikai ni kabane, Natina ae te Rikitemanna, Iesu Kristo, ngaia boton te babaire anne. Kaungakin bwaai aikai bon “ana tangira te Atua, are tibwatibwaia nako nanoia natiia aomata n taabo nako; mangaia, bon te bwai ae moamoa tangirana nakon tangiran bwaai ni kabane” (1 Nibwaai 11:22).
I.
Imwain Tabatin te Itita, bon te tai ae nakoraoi n taetae moa iaon Mangautin Iesu Kristo. Te mangauti man te mate bon te bwai ae kakawaki n ara onimaki. E karaka nanona nakon ara reirei, karaoiroa kateira, ao te kantaninga nakon ara tai ae na roko.
Bukina bwa ti kakoaua te Baibara ao ana Boki Moomon ni kabwarabwaraan rongorongon Mangautin Iesu Kristo, ti kakoauai naba reirei ni koroboki aika tabu bwa te, mangauti anne e na roko nakoia aomata ni kabane ake a maeka iaon te aba.1 N aron are e reirei Iesu, “Bukina ngkai I maiu, ao kam na maiu naba” (Ioane 14:19). Ao Ana Abotoro a reirei bwa “ana kautaki maate n aki kona nmka ” ao “ngkana e a tia ni karina te aki mka te mate aei” (1 I-Korinto 15:52, 54).
Ma te Mmangauti e anganiira ae mwaiti riki nakon koauan te maiu aei. E bita te kawai n iangoan te maiu aei.
E anganiira te Mangauti te taratara ao te korakora ni kaitarai kakaewenako n te maiu aei ngaira ma naake ti tangiriia. E anganiira te kawai ae boou n tarai kangaanga n te rabwata, te iango, ke te namakin ngke ti bungiaki ke ni kakaea n te maiu aei. E anganiira te korakora ni kaitarai nanokawaki, kabwakara, ao unra. Bukina iai ara koaua ae ti na manga bane n uti, ti ataia bwa kabwaka ao kakaitara n te maiu aei aki teimaan.
E anganiira naba te Mangauti te nano ae korakora ni kawakin ana tua te Atua ni maiura aei. Ngkana ti uti man te mate ao n nakon kabanean Motikan Taekara, ti tangiria n tau nakon kakabwaia ake a tia ni katauaki ibukiia aomata aika mangauti.2
Irarikin anne, te berita are e na kona te Mangauti ni karekea te tai n ikotaki ma kaain ara utu—bumwaane, buaine, ara ataei, ara karo, ao ara utu—bon te kaunganano nakon te utu bwa tina kakoroa nanon tabera n utu n te maiu aei. E buokiira bwa ti na maeka i nanon te tangira n te maiu aei, ao e karau nanora ni mateia ara koraki aika ti tangiriia. Ti ataia ae te maenako n te maiu ae mamate aei aki maan, ao ti kantaningai kaitibo ao reitaki aika kakukurei nakon taai aika a na roko. Te Mangauti e anganiira te kaantaninga ao te korakora n taoni nanora. E anganiira naba te ninikoria ao te karinerine ni kaitarai matera—riki te mate are e moantaai.
Bwaai ni kabane ake a riki n te Mangauti bon kaeka nakon te moan titiraki “Tera ae e a tia ni karaoia Iesu ibukiu?”
II.
Angiia mai ibuakora, reken te tai ni kabwaraakin ara bure bon nanon Ana Mwakuri ni Kamaiu Iesu Kristo. N tain te taromauri, ti anene ma te karinerine:
E anga raoi Maiuna;
E anga raoi Nanona,
Te Tia Kamaiu bon te karea ae itiaki are e mate ibukin ara bure,
Te mate n rabwata ao n tamnei ae na kamaiuakii3
Ara Tia Kamaiu ao Te Tia Kabooimaiura e rinanon te karawawataaki ae akea kabotauana ibukin aia bure aomata aika a na rairinanoia. Te angakarea ni kamaiu aei e anga ae tamaroa e na moa n raoiroi ami tibutetei ibukin korakoran mwaitin te buakaka—bureia kaain te aonaaba. E karekea ara tai n tatabemaniira ni kaitiakaki man ara bure bwa ti aonga ni manga karokoaki imatan te Atua, Tamara ae Akea Tokina. Tain kaitiakan ara bure e tauraoi nakoia natin te Atua ni kabane. N tain te taromauri, ti anene:
I mimi bwa e na ruo man ana kaintokanuea mai i karawa
Ni kamaiua te tamnei ae kakaitara ao ni kainikatonga,
Bwa e na karababa ana tangira nakon te aomata n I.4
Nakoraoin ao kangaangan te ota n Ana Mwakuri ni Kamaiu Iesu Kristo e boboto iaon ana tangira te Atua ibukira. E kamatoa Ana katanoata ae “kakawakin te aomata”—aomata ni kabane aika mamate—“e korakora riki imatan te Atua” (Reirei ao Berita aika Tabu 18:10). Inanon te Baibara, Iesu Kristo E kabwarabwara ana tangira te Atua, “Ba E tangiriia aomata te Atua n te aro are E anga Natina ae te riki temanna iai, ba e aonga n aki mate ane onimakinna, ma e na reke irouna te maiu are aki toki” (Ioane 3:16). Kaotioti n taai aikai te Tia Kabooi maiura, Iesu Kristo e katanoata bwa E “rangi n tangira te aonaba n te aro are E anga oin maiuna, bwa aonga ni kabane ake a kakoaua n riki bwa natin te Atua” (Reirei ao Berita aika Tabu 34:3).
Ti aki te bwai ae kamimi, bwa, ana Boki Moomon, “Kakoauan Taekan Iesu Kristo,” e motikia ma te reirei ae te riki ni “kororaoi” ao ni “kabuaki inanon Kristo” ti riai n “tangira te Atua ma [kora] korara, ara iango ao marurungira”? (Moronaai 10:32–33). Ana babaire e kaungaaki n te tangira ao e riai ni karekeaki ma te tangira.
III.
Tera riki ae a tia ni karaoia ibukira te Tia Kamaiu, Iesu Kristo? Rinanon aia reirei Ana burabeti ao rinanon Ana mwakuri, Iesu e reireiniira te babaire ni kamaiu. Te babaire aei e raonaki ma te karikibwai, bukin te maiu, riain te kakaitara, ao te bwaintangira n te rinerine. E reireiniira naba taian tua ao berita aika tabu aika ti riai ni karinei ao otenanti aika ti riai n atai bwa e na uotiira rikaaki nakoia Ara karo i Karawa.
Inanon te Baibara ti wareka Ana reirei: “Otan te aba Ngai: ane irai ao e na bon aki nakonako n te roo, ma e na karekea te oota ni kamaiu.” (Ioane 8:12). Ao inanon kaotioti n taai aikai ti warekia, “Nooria, Ngai Iesu Kristo, … te ota are e aki kona ni karabaaki n te roo” (Reirei ao Berita aika Tabu 14:9). Ngkana ti irii Ana reirei, E kaota kawaira n te maiu aei ao ni kakoaua te tabo are ti na nako iai n te maiu are imwiina.
Bukina bwa E tangiriira, E kaewenakoira bwa ti na Iangoia irarikin are iangoan bwain te aonaaba aei. N Ana kabwarabwara iaon te berena ni kamaiu, e reirei Iesu bwa ti na aki mena ibuakoia naake a katikaki nanoia ni bwain te aonaaba—bwaai aika a kamatoa te maiu iaon te aba ma akea te bwai ae e na kateimatoa n te maiu are akea tokina taraa.5 N te kawai are e aki toki ni kaoira iai Iesu, “Iriirai.”6
IV.
Kabaneana, ana Boki Moomon e reirei bwa ngkai mwakoron Ana Mwakuri ni Kamaiu Iesu Kristo “e [ri]nanon te maraki ma te karawawataaki ao te kaririaki n aekaia nako; ao aio are e na kakoroaki bukin te taeka are e taku bwa e na uota iaona marakiia ao aorakiia ana aomata” (Aramwa 7:11).
Bukin tera ara Tia Kamaiu e karawawataaki ma kakaewenako n te maiu aei “n aekaia nako”? E kabwarabwara Aramwa, “Ao e na uota i aona mamaaraia, bwa e na on nanoia n te nanoanga ni kaineti ma te maiu n rabwata, bwa e na ataia ni kaineti ma te maiu n rabwata bwa e na e na kanga ni buokiia [nanona bwa ko na anga te ibuobuoki ke te buoka nakoia] ana aomata ni kaineti ma mamaraia” (Aramwa 7:12).
Ara Tia Kamaiu e namakinna ao e atai katakiira, ara kangaanga, marakin nanora, ao rawawatara, bukina bwa E anga nanona n rinanoi ngkai bon mwakoron Ana Mwakuri ni Kamaiu. Booki Ake Tabeua a kamatoa aei. Te Nu Tetemanti e taekinna, “Ba ngkae e a tia Ngaia ngke E kaririaki, ao E boni kona ni buoka akana kaririaki” (Ebera 2:18). Itaia e reirei, “Ko na tai maku; ba I memena i roum: … N na kakorakorako; eng, n na buokiko” (Itaia 41:10). Naake a rootaki n aekan nako kangaanga n te maiu aei a riai n uringnga bwa e a tia ara Tia Kamaiu n rinanon te aeka ni maraki anne naba, ao rinanon Ana Mwakuri ni Kamaiu, E anganiira te korakora bwa ti na kariaia.
Te Burabeti Iotebwa Timiti e koroia ni kakimototoi bwaai ni kabane aikai n ara kateniua n Taekan te Onimaki: “Ti kakoaua bwa man Ana Mwakuri ni Kamaiu Kristo, a kona iai aomata nako ni kamaiuaki, n te ongeaba nakon tuua ao otenanti n te Euangkerio.”
“Tera ae e a tia ni karaoia Iesu Kristo ibukiu?” E titraki te titita. N ana babaire Tamara are i Karawa, E “karaoa karawa ma aonaba” (Reirei ao Berita aika Tabu 14:9) bwa ti aonga ni karekea te taneiai n te maiu aei are ti na kona iai ni ukoukora ara tabo mai ieta. Ngkai mwakoron ana babaire te Tama, mangautin Iesu Kristo e tokanikai iaon te mate ni kakoaua nakoira te maiu ae aki mamatei. Ana angakarea ni kamaiu Iesu Kristo e anganiira ara tai n rairananora man ara bure bwa ti aonga n oki n itiaki man n ara bure nakon mwengara i karawa. Ana tua ao ana berita aika tabu a kaota nakoira te kawai, ao Ana nakoanibonga e anga te kariaiakaki ni karaoi otenanti aika kakawaki ni karokoira n ara tabo. Ao Ara Tia Kamaiu e a tia n rinanon maraki n rabwata ao mamaara aika E na ataia bwa e na kanga ni kakorakoraira n rawawatara.
Iesu Kristo e karaoi bwaai aikai ni kabane bukina bwa E tangiriia natin te Atua ni kabane. Te tangira bon ngaia bukin bwaai aikai ni kabane, ao e riki bon mai moana. E a tia te Atua n tuangiira n te kaotioti n taai aikai ae “e karikia … mwaane ao aine, n ai arona ao ni katotongana … ao e anganiia tua bwa a na tangiria ao ni beku irouna” (Reirei ao Berita aika Tabu 20:18–19).
I kakouai bwaai aikai ni kabane ao n tataro bwa ti na ururing bwaai ae e a tia ni karaoi Ara Tia Kamaiu ibukira ao ti na bane n tangiria ao ni beku Ibukina, n aran Iesu Kristo, amen.