Molahutay nga Gahum
Ang hugot nga pagtuo ug ang gahum sa Dios lamang nga mopuno sa kahiladman sa atong kalag ang igong makapatunhay kanato—ug makatugot kanato sa paggamit sa Iyang gahum.
Sa pagribyu sa mga pagtulun-an sa atong minahal nga propeta, si Presidente Russell M. Nelson, nakakaplag ko og usa ka pulong nga kanunay niyang nagamit sa daghang pakigpulong. Kini nga pulong mao ang gahum.
Sa unang kinatibuk-ang komperensya human siya gipaluyohan isip usa ka Apostol, si Presidente Nelson namulong mahitungod sa gahum.1 Nagpadayon siya sa pagtudlo mahitungod sa gahum sulod sa mga katuigan. Sukad nga kita mipaluyo kang Presidente Nelson isip atong propeta, siya mitudlo mahitungod sa baruganan sa gahum—ilabi na, sa gahum sa Dios—ug sa unsang paagi nga kita makagamit niini. Mitudlo siya kon unsaon nato aron makabaton sa gahum sa Dios samtang kita mangalagad sa uban,2 sa unsang paagi ang paghinulsol makadapit sa gahum ni Jesukristo ug sa Iyang Pag-ula diha sa atong mga kinabuhi,3 ug kon sa unsang paagi ang pagkapari—ang gahum ug awtoridad sa Dios—mopanalangin sa tanang mohimo ug motuman sa mga pagkigsaad uban Kaniya.4 Si Presidente Nelson mipamatuod nga ang gahum sa Dios padayong magamit sa tanan nga matugahan diha sa templo samtang sila motuman sa ilang mga pakigsaad.5
Ako partikular nga natandog sa usa ka hagit nga gihatag ni Presidente Nelson niadtong Abril 2020 nga kinatibuk-ang komperensya. Siya mitudlo kanato sa “pagtuon ug pag-ampo nga makakat-on pa og dugang mahitungod sa gahum ug kahibalo nga gituga kaninyo—o sa unsa pay ituga kaninyo.”6
Agig pagtubag niining hagit, akong gitun-an ug nag-ampo ug nakakat-on og pipila ka makaayong mga butang mahitungod sa gahum ug kahibalo nga gituga kanako—o sa unsa pay ituga ngari kanako.
Ang pagsabut sa unsay kinahanglan gayud natong buhaton aron makagamit sa gahum sa Dios diha sa atong kinabuhi dili sayon, apan akong nasuta nga kini mahimo pinaagi sa pagtuon niini diha sa atong mga hunahuna ug sa pag-ampo alang sa Espiritu Santo aron sa paglamdag kanato.7 Si Elder Richard G. Scott mitanyag og klaro nga paghulagway kon unsa ang gahum sa Dios: kini mao ang “gahum sa pagbuhat og mas daghan kay sa mabuhat nato sa atong kaugalingon.”8
Ang pagpuno sa atong kasingkasing ug bisan sa atong kalag sa pulong sa Dios ug sa pundasyon sa hugot nga pagtuo ni Jesukristo mahinungdanon sa pagbaton og gahum sa Dios aron sa pagtabang kanato niining mahagiton nga mga panahon. Sa walay pagbaton sa pulong sa Dios ug hugot nga pagtuo ni Jesukristo sa kahiladman sa atong kasingkasing, ang atong mga pagpamatuod ug hugot nga pagtuo mahimong mapakyas, ug kita mahimong dili na makagamit sa gahum nga gusto sa Dios nga ihatag kanato. Ang taphaw nga pagtuo dili paigo. Ang hugot nga pagtuo ug ang gahum sa Dios lamang nga mopuno sa kahiladman sa atong kalag ang igong makapatunhay kanato—ug makatugot kanato sa paggamit sa Iyang gahum.
Samtang si Sister Johnson ug ako mipadako sa among mga anak, kami midasig sa matag usa kanila sa pagkat-on sa paggamit og usa ka instrumento sa musika. Apan gitugutan lang namo ang among mga anak sa pagkuha og mga leksyon sa musika kon mobuhat sila sa ilang bahin ug magpraktis sa ilang instrumento matag adlaw. Usa ka Sabado, ang among ikatulo nga anak nga si Jalynn naghinamhinam sa paglakaw aron makigdula sa mga higala, apan wala pa siya nakapraktis sa piano. Nasayud nga siya misaad sa pagpraktis sulod sa 30 minutos, gituyo niya sa pag-set ang timer, tungod kay dili siya gusto nga magpraktis nga molapas og usa gani ka minuto kay sa gikinahanglan.
Samtang miagi siya sa microwave oven padulong sa piano, mihunong siya ug mituplok ug pipila ka button. Apan imbis i-set ang timer, iyang gi-set ang microwave aron magluto sulod sa 30 minutos ug gituplok ang start. Human sa mga 20 minutos sa pagpraktis, mibalik siya sa kusina aron susihon kon pila nay nahabilin nga oras ug nakita nga ang microwave nagkayo.
Midagan dayon siya didto sa luyo diin nagtrabaho ko sa luyo nga nataran, nagsiyagit nga ang balay nasunog. Dali kong midagan sa balay, ug tinuod, nakita nako nga ang microwave nagkayo.
Sa paningkamot nga masalbar ang among balay sa pagkasunog, akong gikab-ot ang luyo sa microwave, giibut kini, ug migamit sa kordon sa kuryente sa pag-alsa sa nagkayo nga microwave gikan sa banggera. Nanghinaut nga mahimong bayani ug sa pagsalbar sa adlaw ingon man sa among balay, akong gilambuyog ang nagkayo nga microwave gamit ang kordon sa kuryente aron malayo kini sa akong lawas, ngadto sa nataran, ug sa lain na usab nga paglambuyog gisalibay ang microwave ngadto sa tugkaran. Didto among napalong ang nagdilaab nga kalayo gamit ang hose.
Unsa ang problema? Ang microwave oven nagkinahanglan og butang nga motuhop sa enerhiya niini, ug sa dihang walay gisulod niini nga makatuhop sa enerhiya, ang oven mismo ang mituhop sa enerhiya, miinit, ug misilaob, miguba sa kaugalingon niini ngadto sa pagsilaub ug naabo.9 Ang among tibuok microwave nasunog ug naugdaw tungod kay wala kini sulod.
Sa samang paagi, kadtong nakabaton og hugot nga pagtuo ug pulong sa Dios sa kahiladman sa ilang kasingkasing makapatuhop ug makabuntog sa nagdilaab nga mga pana nga siguradong ipadala sa kaaway aron sa paglaglag kanato.10 Kondili, ang atong hugot nga pagtuo, paglaum, ug kombiksyon mahimong dili kalahutay, ug sama sa walay sulod nga microwave, kita mahimong maangol.
Nakat-on ko nga ang pagbaton sa pulong sa Dios sa kahiladman sa akong kalag, inubanan sa hugot nga pagtuo diha ni Ginoong Jesukristo ug sa Iyang Pag-ula, nagtugot kanako nga makagamit sa gahum sa Dios aron mabuntog ang kaaway ug bisan unsang butang nga iyang ibato ngari nako. Samtang kita nag-atubang og mga hagit, makasalig kita sa saad sa Ginoo nga gitudlo ni Pablo: “Kay kita wala sa Dios hatagig espiritu sa katalaw kondili sa espiritu sa gahum, ug sa gugma, ug sa pagpugong sa kaugalingon.”11
Kita nasayud nga isip usa ka bata ang Manluluwas “midako, ug nahimong kusgan, puno sa kaalam: ug ang grasya sa Dios diha kaniya.”12 Kita nasayud nga samtang Siya midako, “si Jesus mitubo sa kaalam ug sa gidak-on, ug sa kahimuot kaniya sa Dios ug sa tawo.”13 Ug kita nasayud nga sa panahon nga misugod na ang Iyang pagpangalagad, kadtong nakadungog Kaniya “nahibulong sila sa iyang pagpanudlo: kay ang iyang pagpamulong inubanan man sa kagahum.”14
Pinaagi sa pagpangandam, ang Manluluwas mitubo diha sa gahum ug nakahimo sa pagbatok sa tanang tintasyon ni Satanas.15 Kon kita mosunod sa ehemplo sa Manluluwas ug mangandam pinaagi sa pagtuon sa pulong sa Dios ug palambuon ang atong pagtuo, kita makagamit usab sa gahum sa Dios sa pagbatok sa mga tintasyon.
Atol niining higayuna nga gidid-an ang panagpundok nga nakapahimong imposible sa kanunay nga pagtambong sa templo, ako sa pagkatinuod misiguro nga makapadayon sa pagtuon ug pagkat-on og dugang mahitungod sa gahum sa Dios nga moabut kanato samtang kita mohimo ug motuman sa mga pakigsaad sa templo. Sumala sa gisaad diha sa pahinungod nga pag-ampo sa Templo sa Kirtland, kita mobiya sa templo nga may gahum sa Dios.16 Walay gitakda nga petsa nga gilakip uban sa gahum nga gitugyan sa Dios diha niadtong kinsa mohimo ug motuman sa mga pakigsaad sa templo, ni adunay usa ka pagdili gikan sa paggamit niana nga gahum atol sa usa ka pandemya. Ang Iyang gahum mokunhod diha sa atong kinabuhi lamang kon kita mapakyas sa pagtuman sa atong mga pakigsaad ug dili mosunod sa paagi nga motugot kanato sa pagpadayon nga mosarang sa pagdawat sa Iyang gahum.
Samtang ang akong minahal nga asawa ug ako nagserbisyo isip mga lider sa misyon didto sa Thailand, Laos, ug Myanmar, kami nakasaksi mismo sa gahum sa Dios nga moabut niadtong mohimo ug motuman sa sagradong mga pakigsaad diha sa templo. Ang Temple Patron Assistance Fund nakapahimong posible alang sa daghang Santos niining tulo ka mga nasud sa pagtambong sa templo human nabuhat ang tanan nilang mahimo pinaagi sa personal nga pagsakripisyo ug pagpangandam. Nakahinumdom ko nga nakigkita sa usa ka grupo sa 20 ka matinud-anong mga Santos gikan sa Laos sa usa ka airport sa Bangkok, Thailand, sa pagtabang kanila sa pagbalhin ngadto sa laing airport sa Bangkok aron makaabut sa ilang flight sa Hong Kong. Kini nga mga miyembro naghingapin ang paghinamhinam nga sa katapusan makabiyahe ngadto sa balay sa Ginoo.
Sa dihang nagkita na kami niining buotan nga mga Santos sa ilang pagbalik, ang nadugang nga kahingkod sa ebanghelyo ug lakipan sa gahum nga miresulta gikan sa pagdawat sa ilang pagtuga didto sa templo ug pagsulod ngadto sa mga pakigsaad sa Dios makita gayud. Kini nga mga Santos klaro nga migawas gikan sa templo nga “gisangkapan uban sa [Iyang] gahum.”17 Kini nga gahum sa pagbuhat og dugang pa kay sa unsay ilang mahimo sa ilang kaugalingon mihatag kanila og kalig-on sa paglahutay sa mga hagit sa pagkamiyembro sa Simbahan diha sa ilang nasud ug mopadayon sa pagdala sa “mahinungdanon kaayo ug mahimayaon nga maayong balita, diha sa kamatuoran,”18 samtang sila mopadayon sa pagtukod sa gingharian sa Ginoo didto sa Laos.
Sa panahon nga kita wala makatambong sa templo, ang matag usa ba kanato misalig sa mga pakigsaad nga atong gihimo sa templo aron sa pagtakda og klaro, dili mausab nga dalan sa direksyon sa atong kinabuhi? Kini nga mga pakigsaad, kon gituman, maghatag kanato og panglantaw ug mga malauman kalabut sa kaugmaon ug usa ka klaro nga determinasyon aron mahimong angayan sa pagdawat sa tanang gisaad sa Ginoo pinaagi sa atong kamatinud-anon.
Ako modapit kaninyo sa pagtinguha sa gahum nga gustong ihatag sa Dios diha kaninyo. Ako mopamatuod nga kon kita magtinguha niining gahum, kita mapanalanginan og mas dakong pagsabut sa gugma nga anaa sa atong Langitnong Amahan alang kanato.
Ako mopamatuod nga tungod kay ang Langitnong Amahan naghigugma kaninyo ug kanako, Siya mipadala sa Iyang Pinalangga nga Anak, si Jesukristo, aron mahimo natong Manluluwas ug Manunubos. Ako mopamatuod ni Jesukristo, Siya kinsa anaa ang tanang gahum,19 ug mohimo sa ingon diha sa ngalan ni Jesukristo, amen.