Kita Mosulay Kanila Dinhi
Karon mao ang panahon nga mangandam ug mapamatud-an ang atong kaugalingon nga andam ug makahimo sa tanang butang bisan unsa nga isugo sa Dios kanato.
Nag-ampo ako alang sa tabang sa Espiritu Santo alang kanatong tanan samtang ako mopaambit og mga hunahuna ug mga pagbati nga miabut sa akong hunahuna ug kasingkasing agig pagpangandam alang niining kinatibuk-ang komperensya.
Ang Kaimportante sa mga Pasulit
Kapin sa duha ka dekada sa wala pa ang akong tawag sa full-time nga pagserbisyo sa Simbahan, nagtrabaho ko isip usa ka magtutudlo sa unibersidad ug administrador. Ang akong nag-unang responsibilidad isip magtutudlo mao ang pagtabang sa mga estudyante nga makat-on sa ilang kaugalingon. Ug usa ka importanting elemento sa akong trabaho mao ang paghimo, paggrado, ug paghatag og feedback bahin sa unsay nabuhat sa estudyante diha sa mga pasulit. Sa inyo nang nahibaloan gikan sa personal nga kasinatian, ang mga pasulit sagad dili kanang bahin sa proseso sa pagkat-on nga gusto kaayo sa mga estudyante!
Apan ang panagsang mga pasulit importante gayud sa pagkat-on. Ang epektibong pasulit makatabang nato sa pagtandi sa unsay atong kinahanglang masayran sa unsay aktwal natong nasayran bahin sa pihong hilisgutan; nakahatag usab kini og sumbanan diin kita makatimbang-timbang sa atong pagkat-on ug paglambo.
Sa samang paagi, ang mga pasulit sa pagtungha dinhi sa mortalidad usa ka importanting elemento sa atong mahangturon nga kauswagan. Hinoon, makapaikag, nga ang pulong pasulit dili makita bisan kausa sa mga teksto sa Sumbanan nga mga Basahon sa Iningles. Hinoon, ang mga pulong sama sa, usisaha, susiha ug sulayan maoy gigamit sa paghulagway sa lain-laing sumbanan sa tukmang pagpakita sa atong espirituhanong kahibalo, pagsabut, ug debosyon sa mahangturong plano sa kalipay sa atong Langitnong Amahan ug sa atong kapasidad sa pagtinguha sa mga panalangin sa Pag-ula sa Manluluwas.
Siya nga mipasiugda sa plano sa kaluwasan mihulagway sa tumong gayud sa atong mortal nga pagsulay gamit ang mga pulong sulayi, susiha, ug usisaha sa karaan ug bag-ong kasulatan. “Ug kita mosulay kanila dinhi, aron pagsuta kon sila mobuhat ba sa tanan nga mga butang bisan unsa ang isugo sa Ginoo nga ilang Dios ngadto kanila.” 1
Hunahunaa kining pangamuyo sa Salmista nga si David:
“Susiha ako, O Ginoo, ug sulayi ako; usisaha ang akong mga tinguha ug mga hunahuna.
“Ang gugma mong walay paglubad nag-uban kanako: ug nagmatinumanon gayud ako kanimo.” 2
Ug ang Ginoo mipahayag niadtong 1833, “Busa, ayaw kahadlok sa inyong mga kaaway, kay Ako mitakda sa akong kasingkasing, nag-ingon ang Ginoo, nga Ako mosulay kaninyo sa tanan nga mga butang, kon kamo motuman ba sa akong pakigsaad, bisan ngadto sa kamatayon, aron kamo makita nga takus.” 3
Pagsulay ug Pag-usisa sa Kasamtangang Panahon
Ang tuig 2020 nahimong namarkahan, sa usa ka bahin, tungod sa global nga pandemya nga misulay, misusi, ug miusisa kanato sa daghang paagi. Ako nag-ampo nga kita isip mga indibidwal ug mga pamilya nagkat-on og bililhong mga leksyon nga ang mahagitong mga kasinatian ra ang makatudlo kanato. Manghinaut usab ako nga kitang tanan mas hingpit nga moila sa “pagkagamhanan sa Dios” ug sa kamatuoran nga “siya nagpahinguod sa [atong] mga kasakit alang sa [atong] kaayohan.” 4
Ang duha ka nag-unang baruganan nga makagiya ug makapalig-on nato samtang kita mag-atubang og mga kahimtang nga mosulay ug mousisa sa atong kinabuhi, bisan unsa man kini: (1) ang baruganan sa pagpangandam, ug (2) ang baruganan sa pagpadayon sa unahan uban ang pagkamakanunayon kang Kristo.
Pagsulay ug Pagpangandam
Isip mga disipulo sa Manluluwas, kita gisugo nga “andama ang matag butang nga kinahanglanon; ug pagtukod og usa ka balay, gani usa ka balay sa pag-ampo, usa ka balay sa pagpuasa, usa ka balay sa hugot nga pagtuo, usa ka balay sa pagtulun-an, usa ka balay sa himaya, usa ka balay sa kahusay, usa ka balay sa Dios.” 5
Kita gisaaran usab nga, “Kon kamo andam dili kamo mahadlok.
“Ug nga kamo unta makalingkawas sa gahum sa kaaway, ug pagapundukon ngari kanako ang matarung nga mga katawhan, nga walay mansa ug walay sala.” 6
Kining mga kasulatan naghatag og hingpit nga suporta alang sa pag-organisar ug pag-andam sa atong kinabuhi ug mga panimalay sa temporal ug sa espirituhanong paagi. Ang atong mga paningkamot sa pagpangandam alang sa mga kasinatian nga mosulay sa mortalidad kinahanglang magsunod sa ehemplo sa Manluluwas nga sa inanay nga paagi “mitubo sa lawas ug sa kinaadman ug gikahimut-an siya sa Dios ug sa mga tawo” 7 —usa ka hiniusang pagbalanse sa intelektwal, pisikal, espiritwal, ug sosyal nga kaandam.
Sa usa ka hapon pipila ka bulan ang milabay, si Susan ug ako miimbentaryo sa among tinipigang pagkaon ug sa mga kasangkapan sa emerhensiya. Nianang panahona, ang COVID-19 paspas kaayong mikatap, ug ang sunod-sunod nga linog mitay-og sa among balay sa Utah. Gipaningkamutan namo sa labing sayo pa sa among kaminyoon ang pagsunod sa propetikanhong tambag bahin sa pagpangandam sa wala malantawing mga hagit, mao nga ang “pagsusi” sa among kahimtang sa pagkaandam taliwala sa virus ug mga linog ingon og maayo ug tukmang butang nga buhaton. Gusto namong mahibaloan kon unsa kami kaandam niining wala gipahibalo nga mga pagsulay.
Daghan ang among nakat-unan. Sa daghang aspeto, ang among buhat sa pagpangandam igo lang. Sa ubang mga aspeto, hinoon, nagkinahanglan nga palambuon tungod kay wala namo mabantayi ug matubag ang partikular nga mga panginahanglan sa tukma nga panahon.
Nangatawa usab kami og maayo. Nadiskubrihan namo, pananglitan, nga may butang sulod sa aparador nga anaa sa among tipiganan sa pagkaon sa pipila na ka mga dekada. Sa pagkatinuod, nahadlok kaming moabli ug mohiling sa pipila sa mga sudlanan sa kahadlok nga makabuhi ang laing global nga pandemya! Apan ikalipay ninyong masayran nga among nalabay sa tukmang paagi ang nangahupas nga mga butang, ug kanang makadaut sa panglawas sa kalibutan natangtang.
Pipila sa mga miyembro sa Simbahan mipahayag nga ang mga plano ug mga suplay nga pang-emerhensiya, pagtipig og pagkaon, ug mga 72-hour kit dili na tingali importante tungod kay ang mga Kaigsoonan wala na maghisgot kaayo karong bag-ohay ug sa may kalabutang hilisgutan diha sa kinatibuk-ang komperensya. Apan ang gibalik-balik nga mga pahimangno sa pagpangandam gipahayag sa mga lider sa Simbahan sulod sa mga dekada. Ang kamakanunayon sa propetikanhong tambag paglabay sa panahon makamugna og usa ka mas lanog nga pasidaan kay sa kausa lang nga pagpahibalo.
Ingon usab ang mahagiton nga mga panahon makapadayag sa kakulang sa temporal nga pagkaandam, busa, mao usab, ang sakit sa kawalay pagpakabana ug kaikag sa espiritwal nga butang makapahamtang sa labing makadaut nga mga epekto atol sa lisud nga mga pagsulay. Kita nakat-on, pananglitan, diha sa sambingay sa napulo ka birhen nga naglangay-langay sa pagpangandam nga misangpot sa dili malampuson nga pagsulay. Hinumdumi kon sa unsang paagi ang lima ka danghag nga birhen napakyas sa tukmang pagpangandam alang sa pasulit nga gihatag ngadto nila sa adlaw sa pag-abut sa Pamanhonon.
“Ang mga danghag nagdala sa ilang mga suga, apan wala magtagana og lana nga igdudugang:
“Samtang ang mga maalamon nagdala’g mga sudlanan nga puno sa lana uban sa ilang mga suga. …
“Tungang gabii na kadto sa dihang milanog ang usa ka singgit, ‘Ania na ang pamanhunon! Dali kamo ug sugata siya.
“Nangmata ang tanang birhen ug giandam nila ang ilang mga suga.
“Unya ang mga danghag miingon sa mga maalamon, ‘Hatagi kamig diyutay sa inyong lana, kay hapit na mangapalong ang among mga suga.
“Apan ang mga maalamon mitubag, ‘Ayaw! Dili na paigo ang lana kon manghatag pa kami kaninyo. Lakaw hinuon kamo sa tindahan ug pagpalit kamog inyo.
“Ug samtang nangadto sila sa pagpamalit, miabut ang pamanhonon; ug silang mga andam misulod uban kaniya ngadto sa kombira sa kasal: ug gisirhan ang pultahan.
“Unya miabut ang ubang mga birhen ug misangpit sila, Senyor, Senyor, pasudla kami” 8
“Apan ang pamanhonon mitubag, ‘Wala ako makaila kaninyo.” 9
Niini hinoon nga pagsulay, ang lima ka danghag nga birhen nasusi ang ilang kaugalingon nga namati lamang ug wala motuman sa pulong. 10
Ako adunay higala nga usa ka kugihan kaayo nga estudyante sa abogasiya. Panahon sa tingklase sa usa ka semester, si Sam migahin og oras kada adlaw sa pagribyu, pag-summarize, ug pagkat-on gikan sa iyang mga sinulat alang sa matag kurso nga siya na-enrol. Misunod siya sa samang sumbanan alang sa tanan niyang mga klase sa katapusan sa kada semana ug kada bulan. Ang iyang pamaagi nakapahimo niya nga makat-on sa balaod ug dili lang basta magmemorya sa mga detalye. Ug samtang nagsingabut ang katapusang mga pasulit, andam na si Sam. Gani, iyang nakita nga ang katapusang pasulit nahimong dili kaayo makapaugtas nga bahin sa iyang legal nga pagbansay. Epektibo ug tukma sa panahon nga pagpangandam ang mag-una sa malampuson nga pagsulay.
Ang pamaagi ni Sam sa iyang legal nga edukasyon naghatag og gibug-aton sa usa sa nag-unang sumbanan sa Ginoo alang sa kalamboan ug pag-uswag. “Sa ingon miingon ang Ginoong Dios: Ako mopadayag ngadto sa mga katawhan og pagtulun-an human sa usa ka pagtulun-an, lagda human sa usa ka lagda, diyutay dinhi ug diyutay didto; ug bulahan kadto kinsa mopatalinghug ngari sa akong mga lagda, ug maminaw ngari sa akong mga tambag, kay sila makakat-on og kaalam; kay ngadto kaniya nga modawat Ako mohatag og dugang pa.” 11
Akong dapiton ang matag usa kanato nga “hunahunaa ang [atong] mga kahimtang” 12 ug susihon ang [atong] kaugalingon sa pagsuta kon [kita] nagapadayon ba sa [atong] pagtuo; [ug] sulayan ang [atong] kaugalingon.” 13 Unsa ang atong nakat-unan atol niing bag-ohay nga mga bulan sa mga kausaban sa kinabuhi ug mga restriksyon? Unsa ang atong kinahanglan palamboon sa atong mga kinabuhi sa espiritwal, pisikal, sosyal, emosyonal, ug intelektwal? Karon mao ang panahon nga mangandam ug mapamatud-an ang atong kaugalingon nga andam ug makahimo sa tanang butang bisan unsa nga isugo sa Dios kanato.
Pagsulay ug Pagpadayon sa Unahan
Usa ka higayon mitambong ko og lubong sa usa ka batan-ong misyonaryo nga namatay sa usa ka aksidente. Ang amahan sa misyonayo namulong diha sa lubong ug mihulagway sa kasubo sa wala damha nga mortal nga panagbulag sa minahal nga anak. Dayag niyang gipahayag nga siya mismo wala makasabut sa mga rason o sa tayming sa ingon nga panghitabo. Apan ako kanunayng mahinumdom niining buotan nga tawo nga namahayag usab nga siya nasayud nga ang Dios nasayud sa mga rason ug sa tayming sa pagtaliwan sa iyang anak—ug kana igo na alang kaniya. Misuti siya sa kongregasyon nga siya ug ang iyang pamilya, bisan og magul-anon, mamaayo ra; ang ilang mga pagpamatuod nagpabilin nga lig-on ug makanunayon. Gitapos niya ang iyang pakigpulong niini nga pamahayag, “Gusto kong masayud kamo nga kon kabahin na sa ebanghelyo ni Jesukristo, ang tanan sa among pamilya masaligon. Kaming tanan masaligon.”
Bisan ang pagkawala sa usa ka minahal sakit kaayo ug lisud, ang mga sakop niining maisugon nga pamilya sa espirituhanong paagi andam na sa pagsulay nga sila makakat-on sa mga leksyon nga adunay mahangturong kamahinungdanon pinaagi sa mga butang nga ilang giantus. 14
Kamatinud-anon dili kabuang o panatisismo. Hinoon, kini mao ang pagbutang sa atong pagsalig diha ni Jesukristo isip atong Manluluwas, sa Iyang ngalan, ug sa Iyang mga saad. Kon kita “mopadayon sa unahan uban ang pagkamakanunayon kang Kristo, magbaton sa usa ka hingpit nga kahayag sa paglaum, ug usa ka gugma sa Dios ug sa tanan nga mga tawo,” 15 kita mapanalanginan uban sa usa ka mahangturon nga panglantaw nga molungtad lapas sa atong limitado nga mortal nga kapasidad. Makahimo kita nga “magpundok, ug mobarug diha sa balaan nga mga dapit” 16 ug “ayaw pagbalhin, hangtud ang adlaw sa Ginoo moabut.” 17
Samtang nagserbisyo ko isip presidente sa Brigham Young University–Idaho, si Elder Jeffrey R. Holland miadto sa eskwelahan niadtong Disyembre 1998 aron mamulong sa usa sa among sinemanang debosyonal. Si Susan ug ako midapit sa usa ka grupo sa mga estudyante sa pagpakigkita ug pakig-istorya uban ni Elder Holland sa dili pa siya mohatag sa iyang mensahe. Sa naghinapus na ang among panag-uban, nangutana ko ni Elder Holland, “Kon makatudlo ka og usa ka butang niining mga estudyante, unsa man kini?”
Siya mitubag:
“Kita nakasaksi og mas dakong kalihokan sa pagpili sa usa sa duha ka nagsumpaking mga butang. Ang mga opsyon sa pagpili nga magpataliwala wagtangon na gikan kanato isip mga Santos sa Ulahing mga Adlaw. Ang pagpili sa taliwala walaon na.
“Kon ikaw mopaundayon sa sulog sa sapa, moabut gyud ka sa laing dapit. Simple lang nga madala ka kon asa ka dalhon sa sulog. Ang pagnunot, pagpaundayon, pagpadala sa uban dili magsilbi.
“Kinahanglan gayud nga mohimo og pagpili. Ang dili pagpili usa na ka pagpili. Pagkat-on sa pagpili karon.”
Ang pamahayag ni Elder Holland mahitungod sa nagkataas nga pagpili sa usa sa duha ka nagsumpaking mga butang napamatud-an nga propetikanhon pinaagi sa katilingbanong mga uso ug mga panghitabo sa 22 ka tuig sukad sa iyang pagtubag sa akong pangutana. Nanagna sa nagkalapad nga kasungian tali sa mga pamaagi sa Ginoo ug sa kalibutan, si Elder Holland mipasidaan nga ang pagkakomportable sa gipahiuli nga Simbahan samtang nalambigit sa kalibutanong butang paspas na mahanaw. Kining sulugoon sa Ginoo nag-awhag sa batan-ong katawhan sa pagpili, pag-andam, ug mahimong mahalaron nga mga disipulo sa Manluluwas. Nagtabang siya kanila sa pag-andam ug pagpadayon sa unahan ug pinaagi sa mga kasinatian nga mosulay, mosusi, ug mousisa sa ilang kinabuhi.
Saad ug Pagpamatuod
Ang proseso sa pagsulay sa atong kaugalingon usa ka sukaranang bahin sa mahinungdanong plano sa kalipay sa Langitnong Amahan. Ako mosaad nga samtang kita mangandam ug mopadayon sa unahan uban sa hugot nga pagtuo diha sa Manluluwas, kitang tanan makadawat sa samang grado sa katapusang pasulit sa mortalidad: “Maayong pagkabuhat, maayo ug kasaligan nga ulipon: sa diyutay kasaligan ka diay, sa daghan pagapiyalan ko ikaw: dumuyog ka sa kalipay sa imong agalon.” 18
Ako mosaksi nga ang Dios ang Amahan sa Kahangturan mao ang atong Amahan. Si Jesukristo mao ang Iyang Bugtong Anak ug buhi nga Anak, atong Manluluwas ug Manunubos. Niining mga kamatuoran malipayon akong mopamatuod sa sagradong ngalan ni Ginoong Jesukristo, amen.