Pangayo, Pangita, ug Panuktok
Usa ka importante nga bahin sa plano sa Langitnong Amahan mao ang kahigayonan nga makig-istorya Kaniya sa bisan unsang higayon nga gusto nato.
Upat ka bulan ang milabay, sa akong pagtuon sa mga kasulatan, nagbasa ko kabahin sa misyon ni Alma sa Ammonihah dihang nakasugat ko niini nga sugyot sa Dali, Sunod Kanako: “Samtang magbasa ka sa daghang mga panalangin nga gihatag sa Dios sa katawhan ni Nephi (tan-awa sa Alma 9:19–23), pamalandungi ang daghang mga panalangin nga Iyang gihatag kanimo.”1 Mihukom ko sa paghimo og lista sa mga panalangin sa Dios ngari kanako ug sa pagrekord niini diha sa akong digital nga bersyon sa manwal. Sulod lang sa pipila ka minuto, nakalista ko og 16 ka mga panalangin.
Ang labing importante niini mao ang dako nga mga panalangin sa kalooy ug maulaong sakripisyo sa Manluluwas alang kanako. Gisulat usab nako ang panalangin sa dihang mirepresentar ako sa Manluluwas isip usa ka batan-ong misyonaryo sa Portugal ug, sa kadugayan, uban sa akong mahigugmaon nga mahangturong kompanyon, si Patricia, diha sa Brazil Porto Alegre South Mission, diin miserbisyo kami uban sa 522 ka gamhanan ug talagsaon nga mga misyonaryo. Sa paghisgot bahin ni Patricia, daghan sa mga panalangin nga akong narekord nianang adlawa mga panalangin nga among magkaubang natagamtam sa among tibuok 40 ka tuig nga kaminyoon—lakip na sa among pagsilyo diha sa Templo sa São Paulo Brazil, sa among tulo ka talagsaon nga mga anak, ilang mga kapikas, ug sa among 13 ka apo.
Nakahunahuna usab ko sa akong matarong nga mga ginikanan, kinsa mitudlo kanako sa mga baruganan sa ebanghelyo samtang nagdako ko. Gipahinumdoman ko sa piho nga paagi sa usa ka higayon dihang ang akong mahigugmaon nga inahan miluhod uban kanako aron mag-ampo sa kilid sa akong higdaanan sa dihang mga 10 anyos ko. Nabati gayod tingali niya nga aron ang akong mga pag-ampo moabot sa akong Amahan sa Langit, kinahanglan nga molambo kini. Busa miingon siya, “Mag-ampo ko og una, ug human sa akong pag-ampo, mag-ampo ka.” Gipadayon niya kini nga sumbanan sulod sa daghang gabii, hangtud nga masaligon siya nga akong nakat-onan pinaagi sa baruganan ug pinaagi sa pagbansay unsaon sa pagpakig-istorya sa Langitnong Amahan. Mahangturon akong mapasalamaton kaniya sa pagtudlo kanako sa pag-ampo, kay nakat-onan nako nga ang akong Langitnong Amahan maminaw sa akong mga pag-ampo ug motubag niini.
Sa pagkatinuod, usa kana ka laing panalangin nga akong gilakip sa akong lista—ang gasa nga makadungog ug makakat-on sa kabubut-on sa Ginoo. Usa ka importante nga bahin sa plano sa Langitnong Amahan mao ang kahigayonan nga makig-istorya Kaniya sa bisan unsang higayon nga gusto nato.
Usa ka Imbitasyon gikan sa Ginoo
Sa dihang ang Manluluwas mibisita sa America human sa Iyang Pagkabanhaw, gibalik Niya ang usa ka imbitasyon nga Iyang gihatag ngadto sa Iyang mga disipulo sa Galilea. Miingon Siya:
“Pangayo, ug kini ihatag nganha kaninyo; pangita, ug kamo makakaplag; tuktok, ug kini pagaablihan nganha kaninyo.
Kay ang matag usa nga mangayo, makadawat; ug siya nga mangita, makakaplag; ug ngadto kaniya nga motuktok, pagaablihan” (3 Nephi 14:7–8; tan-awa usab sa Mateo 7:7–8).
Ang atong propeta, si Presidente Russell M. Nelson, mihatag og sama nga imbitasyon sa atong panahon. Miingon siya: “Pag-ampo sa ngalan ni Jesukristo bahin sa inyong mga kabalaka, inyong mga kahadlok, inyong mga kahuyang—o, ang mga tinguha sa inyong kasingkasing. Ug dayon maminaw! Isulat ang mga ideya nga masulod sa inyong hunahuna. Isulat ang inyong mga gibati ug sundi kini sa paglihok sa unsay giaghat nga angay ninyong buhaton. Kon inyong balikbalikon kini nga proseso matag adlaw, matag bulan, matag tuig, kamo ‘molambo ngadto sa baruganan sa pagpadayag.’”2
Midugang si Presidente Nelson, “Sa umaabut nga mga adlaw, dili na posible ang espirituhanong pagsugakod kon wala ang giya, direksyon, makahupay, ug kanunay nga impluwensya sa Espiritu Santo.”3
Ngano nga ang pagpadayag mahinungdanon kaayo sa atong espirituhanong pagsugakod? Tungod kay ang kalibutan mahimong makapalibog ug banha, puno sa panglimbong ug mga makabalda. Ang pagpakig-istorya ngadto sa atong Amahan sa Langit makahimo kanato sa pagbahig sa unsay tinuod ug unsay sayop, unsay adunay kalabotan sa plano sa Ginoo alang kanato ug unsay walay labot. Ang kalibotan usab mahimong mapintas ug makaguol. Apan samtang buksan nato ang atong kasingkasing diha sa pag-ampo, mabati nato ang kahupayan nga nagagikan sa atong Amahan sa Langit ug ang kasiguroan nga Siya naghigugma ug naghatag kanato og bili.
Pangayo
Ang Ginoo miingon nga “ang mangayo, makadawat.” Ang pagpangayo daw yano, ug bisan pa man niana kini gamhanan tungod kay kini nagpakita sa atong mga tinguha ug sa atong hugot nga pagtuo. Hinoon, nagkinahanglan kini og panahon ug pailob sa pagkat-on sa pagsabot sa tingog sa Ginoo. Maminaw kita sa mga hunahuna ug mga pagbati nga moabot sa atong mga pangisip ug mga kasingkasing, ug isulat nato kini, sama sa gitambag sa atong propeta nga buhaton nato. Ang pagsulat sa atong mga impresyon usa ka importante nga bahin sa pagdawat. Makatabang kini kanato sa paghinumdom, pagsubli og basa, ug pagbati pag-usab sa unsay gitudlo sa Ginoo kanato.
Bag-ohay lang usa ka minahal miingon kanako, “Nagtuo ko nga ang personal nga pagpadayag tinuod. Nagtuo ko nga ang Espiritu Santo mopakita kanako sa tanang butang nga kinahanglan nakong buhaton.4 Sayon motuo kon mabati nako nga mainiton ang akong dughan uban sa walay pagduhaduha nga pagtuo.5 Apan unsaon nako aron ang Espiritu Santo kanunay nga mamulong kanako niini nga paagi?”
Ngadto sa akong minahal ug nganha kaninyong tanan, moingon ko nga ako usab ganahan nga kanunay nga mobati niadtong kusog nga mga impresyon gikan sa Espiritu ug kanunay nga klarong makakita sa dalan nga sundon. Apan dili ko kini mabati kanunay. Hinoon, tingali unsay mas kanunay nato nga mabati mao ang hinay, hinagawhaw nga tingog sa Ginoo nga naghunghong sa atong hunahuna ug kasingkasing: “Ania ako. Gimahal ko ikaw. Padayon; buhata ang imong labing maayo. Mosuporta ko kanimo.” Dili nato kinahanglan sa kanunay nga mahibalo sa tanan o makakita sa tanan.
Ang hinay, hinagawhaw nga tingog nagsiguro pag-usab, nagdasig, ug naghupay—ug sa daghang higayon mao lang kana ang atong gikinihanglan alang niana nga adlaw. Ang Espiritu Santo tinuod, ug ang Iyang mga impresyon tinuod—madagko ug magagmay.
Pangita
Ang Ginoo mipadayon sa pagsaad, “Ang mangita, makakaplag.” Ang pagpangita nagpasabot og pangisip ug espirituhanon nga pagkugi—pagpamalandong, pagsulay, pagpaningkamot, ug pagtuon. Mangita kita kay misalig kita sa mga saad sa Ginoo. “Kay ang moduol sa Dios kinahanglan gayod motuo nga adunay Dios ug gantihan niya ang nangita kaniya” (Mga Hebreo 11:6). Kon mangita kita, mapainubsanon kitang nag-ila nga kita daghan pa kaayo og kat-onon, ug ang Ginoo mopalapad sa atong pagsabot, nga mag-andam kanato nga makadawat og dugang pa. “Kay tan-awa, sa ingon miingon ang Ginoong Dios: Ako mopadayag ngadto sa mga katawhan og pagtulun-an human sa usa ka pagtulun-an, lagda human sa usa ka lagda, diyutay dinhi ug diyutay didto; … kay ngadto kaniya nga modawat Ako mohatag og dugang pa” (2 Nephi 28:30).
Panuktok
Sa katapusan, ang Ginoo miingon, “Ug ngadto kaniya nga motuktok, pagaablihan.” Ang pagpanuktok mao ang paglihok uban sa hugot nga pagtuo. Kon aktibo kitang mosunod Kaniya, ang Ginoo moabli sa dalan alang kanato. Adunay maanindot nga himno nga nagtudlo kanato sa “pagmata, dayon lihok na kay sa magadamgo ka ra. Maayong binuhatan kalipayng di tupngan, nga makatabang sa uban.”6 Si Elder Gerrit W. Gong sa Korum sa Napulog Duha bag-ohay lang mipasabot nga ang pagpadayag kasagaran moabot samtang nagbuhat kita og maayo. Miingon siya: “Samtang mosulay kita sa pagtabang pinaagi sa pagserbisyo niadtong naglibot kanato, nagtuo ko nga ang Ginoo maghatag kanato og dugang nga sukod sa Iyang gugma alang kanila ug busa alang kanato. Nagtuo ko nga makadungog kita sa Iyang tingog—mabati nato Siya sa lahi nga paagi—samtang mag-ampo kita aron sa pagtabang niadtong anaa sa atong palibut tungod kay mao kana ang usa sa mga pag-ampo nga gusto kaayo Niyang tubagon.”7
Ang Ehemplo ni Alma
Kana nga yano nga sugyot sa Dali, Sunod Kanako sa paghunahuna mahitungod sa akong mga panalangin midala og maayo nga espiritu ug pipila ka wala damha nga espirituhanon nga mga panabot. Samtang nagpadayon ko og basa mahitungod ni Alma ug sa iyang pangalagad sa Ammonihah, nadiskobrehan nako nga si Alma naghatag og maayo nga ehemplo sa unsay gipasabot sa pagpangayo, pagpangita, ug pagpanuktok. Mabasa nato nga “si Alma naningkamot pag-ayo diha sa espiritu, nakigbisog uban sa Dios sa mainiton nga pag-ampo, nga siya makabu-bu sa iyang Espiritu diha sa mga katawhan.” Kana nga pag-ampo, hinoon, wala matubag sa paagi nga iyang gilaoman, ug si Alma gisalikway gikan sa dakbayan. “Nabug-atan sa kasubo,” si Alma hapit na unta moundang, sa dihang usa ka anghel mipadala niini nga mensahe: “Bulahan ikaw, Alma; busa, ihangad ang imong ulo ug pagmaya, kay ikaw adunay dako nga hinungdan sa pagmaya.” Ang anghel dayon misulti kaniya sa pagbalik sa Ammonihah ug mosulay pag-usab, ug si Alma “mibalik pagdali.”8
Unsay atong makat-unan gikan ni Alma mahitungod sa pagpangayo, pagpangita, ug pagpanuktok? Makat-onan nato nga ang pag-ampo nagkinahanglan og espirituhanon nga paghago, ug kini dili kanunay nga mosangpot sa unsay atong gilaoman. Apan kon mobati kita nga nawad-an og kadasig o nabug-atan sa kasubo, ang Ginoo naghatag kanato og kahupayan ug kusog sa nagkalain-laing mga paagi. Mahimong dili Niya tubagon ang tanan natong pangutana o sulbaron ang tanan natong problema dihadiha dayon; hinuon, nag-awhag Siya kanato nga magpadayon sa pagpaningkamot. Kon ipahiuyon nato dihadiha dayon ang atong plano sa Iyang plano, ablihan Niya ang dalan alang kanato, sama sa Iyang gibuhat alang kang Alma.
Kini ang akong pagpamatuod nga kini mao ang dispensasyon sa kahingpitan sa ebanghelyo. Mahimo kitang makatagamtam sa mga panalangin sa Pag-ula ni Jesukristo sa atong mga kinabuhi. Anaa kanato ang mga kasulatan nga magamit dayon nato. Gigiyahan kita pinaagi sa mga propeta kinsa nagtudlo kanato sa kabubut-on sa Ginoo alang sa malisod nga mga panahon diin kita nagpuyo. Agi og dugang, kita adunay direkta nga koneksyon [access] sa atong kaugalingon nga pagpadayag aron ang Ginoo personal nga makahupay ug makagiya kanato. Sama sa giingon sa anghel ngadto kang Alma, kita adunay “dako nga hinungdan sa pagmaya” (Alma 8:15). Sa ngalan ni Jesukristo, amen.