Pagkahimong sama Kaniya
Pinaagi lamang sa balaanong tabang sa Manluluwas nga kitang tanan mouswag ngadto sa pagkahimong sama Kaniya.
Bisan sa usa ka tawo nga nagtuon og maayo sa kinabuhi ug pangalagad ni Jesukristo, ang pahimangno sa Manluluwas nga mahimong “gani sama nga Ako mao” 1 lisud ug morag dili makab-ot. Tingali sama ra mo nako—nahibalo kaayo sa inyong mga sayop ug kapakyasan, mao nga siguro alang ninyo mas komportable ang paglakaw sa walay tungason ug patag ra. “Sigurado, kining pagtulun-an dili praktikal ug sobra ra kaayo,” mangatarungan kita samtang komportable nga mopili sa kinasayunan, sa ingon gamay ra og buhaton sa gikinahanglan nga kausaban.
Apan unsa kaha kon ang pagkahimo “gani sama nga [Siya mao]” dili pasumbingay, bisan sa atong mortal nga kahimtang? Unsa kaha kon kini, sa usa ka bahin, makab-ot niini nga kinabuhi ug, sa pagkatinuod, usa ka gikinahanglan aron makauban Siya pag-usab? Unsa kaha kon ang “gani sama nga Ako mao” tukma ug mao gayud ang gipasabut sa Manluluwas? Nan unsa man? Unsa nga matang sa paningkamot ang andam natong ihatag aron madapit ang Iyang milagrusong gahum sa atong kinabuhi aron atong mausab ang ato mismong kinaiya?
Si Elder Neal A. Maxwell nagtudlo: “Samtang mamalandong kita nga gisugo ni Jesus nga mahimong sama Kaniya, nakasabut kita nga ang atong kasamtangang kahimtang mao nga dili kita ingon nga dautan, apan, hinoon, ang atong kahimtang mao nga hilabihan kita ka dili sinsero ug kulang kaayo sa kadasig alang sa Iyang kawsa—nga mao usab ang atong kawsa! Kita nagdayeg Kaniya apan panagsa ra mosunod Kaniya.” 2 Usa ka batan-ong ministro, si Charles M. Sheldon, mipahayag og susamang mga sentimento niini nga paagi: “Ang atong pagka-Kristiyano ganahan kaayo og sayon ug komportable nga dili na gustong mobuhat og lisud ug mag-antus.” 3
Gani, ang tanan ubos sa mando nga mahimong sama Kaniya, ingon nga si Jesukristo nahimong sama sa Amahan. 4 Sa atong pag-uswag, mahimo kitang mas kompleto, hingpit, ug napalambo og maayo. 5 Ang maong pagtulun-an wala gibase sa bisan unsang mga doktrina sa usa ka sekta apan direktang nagagikan sa Agalon Mismo. Kini ang paagi sa pagpakabuhi, pagpakig-istorya sa uban, ug pagpalambo sa mga relasyon. Sa pagkatinuod, walay laing paagi sa pag-ayo sa mga samad sa naguba nga mga relasyon o nabahin-bahin nga katilingban kay sa ang matag usa kanato hingpit nga mosunod sa Prinsipe sa Kalinaw. 6
Atong ikonsiderar unsaon pagsugod ang usa ka mahunahunaon ug tinuyo nga paningkamot nga mahimong sama Kaniya pinaagi sa pag-angkon sa mismong mga hiyas ni Jesukristo.
Modesisyon ug Mopasalig
Pipila ka tuig nang milabay, ang akong asawa ug ako nagbarug sa sinugdanan sa agianan sa kinatas-ang bukid sa Japan, ang Mount Fuji. Sa pagsugod namo sa among pagtungas mitan-aw mi sa tumoy didto sa layo ug naghunahuna kon makaabut ba mi didto.
Sa among pagpadayon, ang kakapoy, sakit nga kaunuran, ug ang mga epekto sa kataas miresulta na. Sa among hunahuna, importante alang namo nga tutokan lamang ang sunod nga lakang. Moingon mi, “Siguro dili dayon ko makaabut sa ibabaw, apan mahimo nako kining sunod nga lakang karon dayon.” Paglabay sa panahon ang lisud nga buluhaton sa katapusan makab-ot ra—usa ka lakang human sa laing lakang.
Ang unang lakang diha niini nga dalan aron mahimong sama ni Jesukristo mao ang pagbaton og tinguha sa pagbuhat sa ingon. Ang pagsabut sa pahimangno nga mahimong sama Kaniya maayo, apan kana nga pagsabut kinahanglang ubanan sa lig-ong tinguha nga mousab sa atong kaugalingon, usa ka lakang matag higayon, lapas sa kinaiyanhon nga tawo. 7 Aron mapalambo ang tinguha, kinahanglan gayud kitang masayud kon kinsa si Jesukristo. Kinahanglan gayud kitang masayud bahin sa Iyang kinaiya, 8 ug kinahanglan gayud kitang motan-aw sa Iyang mga hiyas diha sa kasulatan, mga tulumanon sa pagsimba, ug ubang balaang mga dapit. Kon magsugod kita sa pagkasayud og dugang bahin Kaniya, atong makita ang Iyang mga hiyas diha sa uban. Makadasig kini kanato sa atong kaugalingong paningkamot, kay kon ang uban makakab-ot sa pipila ka paagi sa Iyang mga hiyas, mao usab kita.
Kon matinuoron kita sa atong kaugalingon, ang Kahayag ni Kristo 9 sa sulod kanato nag-aghat nato nga layo pa kita kon itandi sa atong gitinguha nga kinaiya sa Manluluwas. 10 Ang maong kamatinuoron mahinungdanon kon gusto kitang mouswag sa pagkahimong sama Kaniya. Sa pagkatinuod, ang pagkamatinuoron mao ang usa sa Iyang mga hiyas.
Karon, kanato kinsa maisugon mahimong mokonsiderar sa pagpangutana sa usa ka kasaligan nga sakop sa pamilya, kapikas, higala, o espirituhanong lider kon unsa nga hiyas ni Jesukristo ang atong gikinahanglan—ug kinahanglang andamon nato ang atong kaugalingon alang sa tubag! Usahay makita nato sa kataw-anan nga mga salamin nga mas modako o mas moniwang kita tan-awon kay sa kon unsa gayud kita.
Ang kasaligan nga mga higala ug pamilya makatabang kanato nga makita ang atong kaugalingon sa tukmang paagi, apan bisan sila, gusto man nila nga magmahigugmaon ug magmatinabangon, makakita sa mga butang sa dili perpekto nga paagi. Isip resulta, mahinungdanon nga mangayo usab kita sa atong mahigugmaong Langitnong Amahan kon unsay atong gikinahanglan ug kon asa nato angayang itutok ang atong mga paningkamot. Siya adunay hingpit nga pagsabut kanato ug mahigugmaong mopakita kanato sa atong kahuyang. 11 Tingali inyong mahibaloan nga magkinahanglan kamo og mas dako nga pailub, kamapainubsanon, gugmang putli, gugma, paglaum, kakugi, o kamasulundon, sa paghingalan og pipila. 12
Dili pa kaayo dugay, ako adunay kasinatian nga makapadasig sa kalag sa dihang usa ka mahigugmaong lider sa Simbahan mihimo og direkta kaayo nga sugyot nga akong mapalambo ang usa ka piho nga hiyas. Gibuhat niya kana sa mahigugmaong paagi. Niana nga gabii, gipaambit nako kini nga kasinatian ngadto sa akong asawa. Mahigugmaon siyang miuyon sa sugyot sa lider. Ang Espiritu Santo mikumpirmar ngari nako nga ang ilang tambag gikan sa usa ka mahigugmaong Langitnong Amahan.
Makatabang usab nga matinuorong mokompleto sa kalihokan kabahin sa hiyas diha sa kapitulo 6 sa Isangyaw ang Akong Ebanghelyo. 13
Sa higayon nga makahimo na kamo og matinuorong pagsuta ug makahukom nga magsugod sa pagtungas sa bukid, kinahanglan kamong maghinulsol. Si Presidente Russell M. Nelson mahigugmaong nagtudlo: “Kon kita mopili nga maghinulsol, kita mopili nga mag-usab! Atong gitugutan ang Manluluwas nga mousab kanato ngadto sa labing maayo nga bersyon sa atong mga kaugalingon. Kita mopili nga molambo sa espirituhanon nga paagi ug makadawat sa hingpit nga kalipay––ang hingpit nga kalipay sa katubsanan diha Kaniya. Kon kita mopili nga maghinulsol, kita mopili nga mas mahisama ni Jesukristo.” 14
Ang pagkahimong sama ni Jesukristo magkinahanglan og pag-usab sa atong mga kasingkasing ug mga hunahuna, sa pagkatinuod, sa atong kinaiya mismo, ug ang pagbuhat sa ingon posible lamang pinaagi sa makaluwas nga grasya ni Jesukristo. 15
Hibaloi ug Lihuka
Karon nga nakahukom na kamo nga mag-usab ug maghinulsol ug nagtinguha og giya pinaagi sa pag-ampo, matinud-anong mamalandong, ug posible nga makigtambag sa uban, kinahanglan kamong mopili og usa ka hiyas nga piho gayud ninyong tutokan. Kinahanglan kamong mopasalig sa pagpakita og makahuluganong paningkamot. Kining mga hiyas dili moabut sa sayon ug dali nga paagi, apan pinaagi sa Iyang grasya anam-anam kining moabut samtang naningkamot og maayo aron makab-ot kini.
Ang Kristohanong mga hiyas mga gasa gikan sa mahigugmaong Langitnong Amahan sa pagpanalangin kanato ug niadtong anaa sa atong palibut. Busa, ang atong mga paningkamot nga maangkon kining mga hiyas magkinahanglan og kinasingkasing nga mga pangamuyo alang sa Iyang balaanong tabang. Kon magtinguha kita niining mga gasa aron mas makaserbisyo sa uban, Siya mopanalangin kanato sa atong mga paningkamot. Ang hinakog nga pagtinguha sa usa ka gasa gikan sa Dios mosangput sa kasagmuyo ug pagkapakyas.
Pinaagi sa pagtutok og maayo sa usa ka gikinahanglan nga hiyas, sa inyong pag-uswag sa pag-angkon niana nga hiyas, magsugod usab kamo sa pag-angkon sa ubang mga hiyas. Ang tawo nga nagtutok og maayo sa gugmang putli dili ba molambo diha sa gugma ug pagkamapainubsanon? Ang tawo nga nagtutok sa pagkamasulundon dili ba madugangan ang kakugi ug paglaum? Ang inyong talagsaong mga paningkamot nga makaangkon og usa ka hiyas makapalambo og daghan pang butang.
Irekord ug Ipadayon
Importante alang nako samtang naningkamot ko nga mahimong sama Kaniya sa pagrekord sa akong mga kasinatian ug unsay akong nakat-unan. Samtang nagtuon ko sa usa sa Iyang mga hiyas sa akong hunahuna, ang mga kasulatan mahimong bag-o samtang nagtan-aw ko og mga ehemplo niining hiyas diha sa Iyang mga pagtulun-an, sa Iyang pagpangalagad, ug sa Iyang mga disipulo. Ang akong mata mas nakatutok usab sa pag-ila sa hiyas diha sa uban. Nakaobserbar ko og talagsaong mga indibidwal sa sulod ug sa gawas sa Simbahan nga adunay mga hiyas nga nagsunod Kaniya. Lig-on kini nga mga ehemplo kon sa unsang paagi kadto nga mga hiyas mapakita sa yano nga mga tawo pinaagi sa Iyang mahigugmaong grasya.
Aron makita ang tinuod nga pag-uswag, kinahanglan kamong padayon nga maningkamot. Sama sa pagsaka sa usa ka bukid nga nagkinahanglan og pagpangandam daan ug paglahutay ug pagpadayon atol sa pagtungas, mao usab kini nga biyahe nga nagkinahanglan og tinuod nga paningkamot ug sakripisyo. Ang tinuod nga Kristiyanismo, diin naningkamot kita nga mahimong sama sa atong Agalon, kanunay nga nagkinahanglan sa atong pinakamaayong mga paningkamot. 16
Karon usa ka mubo nga pulong sa pasidaan. Ang sugo nga mahimong sama Kaniya wala gitumong aron mobati kamo nga sad-an, dili takus, o wala higugmaa. Ang atong tibuok mortal nga kasinatian may kalabutan sa pag-uswag, pagpaninguha, pagkapakyas, ug paglampus. Bisan kon gusto sa akong asawa ug nako nga among ipiyong ang among mga mata ug sa kalit lang moabut kami ngadto sa tumoy, dili ingon niana ang kinabuhi.
Maayo gayud ang inyong gibuhat, gihigugma kamo, apan wala kana magpasabut nga kompleto na kamo. Adunay buhat nga gikinahanglang himoon niini nga kinabuhi ug sa sunod. Pinaagi lamang sa Iyang balaanong tabang nga kitang tanan mouswag ngadto sa pagkahimong sama Kaniya.
Niining mga panahon diin, “ang tanan nga mga butang [daw] magkaguliyang; ug … ang kahadlok [morag] diha sa tanan nga mga katawhan,” 17 ang bugtong pangontra, ang bugtong tambal, mao ang maningkamot nga mahimong sama sa Manluluwas, 18 ang Manunubos 19 sa tanang katawhan, ang Kahayag sa Kalibutan, 20 ug mangita Kaniya kinsa namahayag, “Ako ang dalan.” 21
Nasayud ko nga ang pagkahimong sama Kaniya pinaagi sa Iyang balaanong tabang ug kalig-on mahimong makab-ot pinaagi sa usa ka lakang human sa laing lakang. Kay kon dili, wala unta Niya ihatag kanato kini nga sugo. 22 Ako nasayud niini—sa usa ka bahin tungod kay nakakita ko sa Iyang mga hiyas diha sa kadaghanan kaninyo. Niini nga mga butang ako magpamatuod sa ngalan ni Jesukristo, amen.