Ang Makaayo nga Gahum ni Jesukristo
Samtang kita moduol ngadto ni Jesukristo pinaagi sa paggamit sa atong hugot nga pagtuo diha Kaniya, maghinulsol, ug maghimo ug maghupot sa atong mga pakigsaad, ang atong pagkanaguba––bisan unsa ang nakaingon niini––mamaayo.
Sukad sa sinugdanan niini nga tuig, kita nag-atubang og daghang wala damha nga mga panghitabo. Ang pagkawala sa kinabuhi ug kinitaan tungod sa tibuok kalibutan nga pandemya grabeng nakaamong sa tibuok kalibutan nga komunidad ug ekonomiya.
Mga linog, mga sunog, ug mga baha sa lain-laing mga dapit sa kalibutan, ingon man ang kalabut sa kahimtang sa panahon nga mga katalagman, mibilin sa mga katawhan og pagbati nga walay mahimo, walay paglaum, ug puno sa kaguol, naghunahuna kon ang ilang mga kinabuhi sama ba kaha gihapon.
Paistoryaha ko kaninyo og usa ka personal nga sugilanon mahitungod sa pagkaguba.
Sa batan-on pa ang among mga anak, mihukom sila nga gusto nilang magtuon og piano. Ang akong bana, si Rudy, ug ako gustong mohatag sa among anak niini nga oportunidad, apan kami walay piano. Kami walay ikapalit og bag-ong piano, busa si Rudy misugod sa pagpangita og ginamit nga piano.
Niana nga tuig sa Pasko, gisorpresa niya kaming tanan og usa ka piano, ug sa nagdagang mga katuigan, ang among mga anak nakakat-on sa pagtugtog.
Sa dihang nanagko na ang among anak nga mga lalaki ug mibiya sa panimalay, ang karaang piano giabug na lang, busa among gibaligya. Pipila ka tuig ang milabay, kami nakatigum og gamay nga salapi. Usa ka adlaw miingon si Rudy, “Naghunahuna ko nga panahon na nga kita mupalit og bag-ong piano.”
Ako nangutana, “Nganong mopalit man kita og bag-ong piano, nga ni usa kanato dili motugtog?”
Miingon siya, “O, apan kita makapalit og piano nga motugtog sa iyang kaugalingon! Pinaagi sa paggamit og iPad, maprogram nimo ang piano sa pagtugtog og labaw sa 4,000 ka mga awit, lakip ang mga himno, mga awit sa Tabernacle Choir, sa tanang mga awit sa Primary, ug daghan pa.”
Si Rudy maayo kaayong mamaligya, sa dili lang pagpanghambug.
Mipalit kami og usa ka nindot nga bag-ong piano, ug pila ka adlaw wala madugay, duha ka dagko, kusgan nga mga lalaki mihatod niini sa among panimalay.
Gipakita ko sila asa nako gustong ibutang kini ug mipadaplin dayon ko.
Kadto usa ka bug-at nga pang propesyonal nga piano, ug aron maarang sa pultahan, ilang gitangtang ang mga tiil ug gipaninguha nga matakilid ang piano ibabaw sa karetilya nga ilang gidala.
Ang among balay nagtungtong sa usa ka gamay nga bakilid, ug sa kaalaot sayo niana nga buntag miulan og yelo, mao nga basa ug dangog. Nahibalo ba mo asa kini padulong?
Samtang nagduot sa piano tungas sa gamay nga bakilid, kini naligas, ug akong nadungog ang lanog kaayo nga pagkahagsa. Nahulog ang piano gikan sa karetilya ug nahagsa sa yuta og kusog kaayo nga nagbilin og dako nga hulpa sa among nataran.
Miingon ako, “Ay, pastilan. OK ra mo?”
Salamat kay ang duha ka lalaki OK ra.
Midako ang ilang mga mata samtang sila nagtinan-away, dayon mitan-aw kanako ug miingon, “Gikasubo gyud namo. Ibalik ni namo ngadto sa tindahan ug patawgon namo ang among manedyer kaninyo.”
Wala madugay ang manedyer nakigsulti ngadto ni Rudy sa paghan-ay sa paghatud og usa ka bag-o nga piano. Maloloy-on ug mapasayloon si Rudy ug misulti sa manedyer nga OK lang kon ila lamang ayuhon ang guba ug ibalik ang mao gihapon nga piano, apan ang manedyer namugos nga kami hatagan og bag-o.
Mitubag si Rudy nga nag-ingon, “Dili tingali ingon niana ka grabe. Ayoha lang kana ug dad-a ngari.”
Miingon ang manedyer, “Nabuak ang kahoy, ug kon mabuak na ang kahoy, dili na gyud kini motingog og sama sa una. Hatagan mo og bag-o nga piano.”
Mga kaigsoonan, dili ba kitang tanan sama niini nga piano, naguba og gamay, naliki, ug nadaot, mibati nga kita dili na gayud mabalik sa kaniadto? Hinoon, samtang kita moduol ngadto ni Jesukristo pinaagi sa paggamit sa atong hugot nga pagtuo diha Kaniya, maghinulsol, ug maghimo ug maghupot sa atong mga pakigsaad, ang atong pagkanaguba––bisan unsa ang nakaingon niini––mamaayo. Kini nga proseso, nga nagdapit sa makaayo nga gahum sa Manluluwas nganhi sa atong mga kinabuhi, dili lamang nagpahiuli kanato ngadto sa unsa kita kaniadto apan naghimo kanato nga mas maayo pa kay sa kita sukad nahimo. Nahibalo ako nga pinaagi sa Pag-ula sa Manluluwas, kitang tanan matarung, mahimong hingpit, ug matuman ang atong katuyoan, sama lamang gayud sa bag-ong piano.
Si Presidente Russell M. Nelson mitudlo: “Kon mapait nga pagsulay moabut kanato, mao kini ang panahon nga padak-on nato ang atong pagtuo sa Dios, paningkamot pag-ayo, ug moserbisyo sa uban. Dayon Iyang ayohon ang nasakitan natong mga kasingkasing. Iyang ihatag kanato ang personal nga kalinaw ug kahupayan. Kadtong importanting mga gasa dili maunsa, bisan sa kamatayon.” 1
Si Jesus miingon:
“Duol kamo kanako, kamong tanan nga gikapuyan ug gibug-atan sa inyong gipas-an ug papahulayon ko kamo.
“Isangon ang akong yugo ug sunda ninyo ako kay malumo ako ug mapaubsanon sa espiritu ug makapahulay kamo.
“Sayon ang yugo nga akong isangon kaninyo, ug gaan ang ipapas-an ko kaninyo” (Mateo 11:28–30).
Aron mamaayo ang pagkaguba pinaagi sa pagduol ngadto Kaniya, kita nagkinahanglan sa pagbaton og hugot nga pagtuo diha ni Jesukristo. Ang pagbaton og hugot nga pagtuo diha ni Jesukristo nagpasabut og pagsalig sa hingpit diha Kaniya—pagsalig sa Iyang walay kinutubang gahum … ug gugma. Naglakip kini sa pagtuo sa Iyang mga pagtulun-an. Nangahulugan kini sa pagtuo nga bisan og kita wala makasabut sa tanang mga butang, Siya nakasabut. Tungod kay Iyang nasinati ang tanan natong mga sakit, mga kasakit, ug mga kahuyang, Siya nahibalo kon unsaon sa pagtabang kanato sa pagbarug labaw sa atong inadlaw nga mga kalisud.” 2
Samtang kita moduol ngadto Kaniya, mapuno kita sa kalipay, kalinaw ug kahupayan. Ang tanang [dili makiangayon] kabahin sa kinabuhi mahimong mapahusto pinaagi sa Pag-ula ni Jesukristo.” 3 Siya nagtambag kanato sa “Paghunahuna ngari Kanako sa matag hunahuna; ayaw pagduha-duha, ayaw kahadlok” (Doktrina ug mga Pakigsaad 6:36).
Diha sa Basahon ni Mormon sa dihang si Alma ug ang iyang mga katawhan hapit mapiit sa mga palas-anon nga gipapas-an diha kanila, ang mga katawhan mihangyo og kahupayan. Wala kuhaa sa Ginoo ang ilang mga palas-anon; hinoon misaad Siya kanila:
“Ug Ako usab mopagaan sa mga alantuson diin anaa gitungtong diha sa inyong mga abaga, gani kamo dili makabati kanila diha sa inyong mga buko-buko, bisan anaa kamo sa pagkaulipon; ug kini Ako mobuhat nga kamo mobarug ingon nga mga saksi alang kanako human niini, ug nga kamo mahimo nga masayud sa pagkatinuod nga Ako, ang Ginoong Dios, moduaw sa akong mga katawhan diha sa ilang kasakit.
“Ug karon nahinabo nga ang mga alantuson diin gibutang diha kang Alma ug sa iyang mga kaigsoonan gihimo nga magaan; oo, ang Ginoo mipalig-on kanila nga sila makadaug sa ilang mga alantuson uban sa kasayon, ug sila motugyan sa maayo nga buot ug uban sa pailub ngadto sa tanan nga kabubut-on sa Ginoo” (Mosiah 24:14-15).
Kabahin sa abilidad sa Manluluwas sa pag-ayo ug pagpagaan sa mga palas-anon, si Elder Tad Callister nagtudlo:
“Usa sa mga panalangin sa Pag-ula mao nga kita makadawat sa makatabang nga mga gahum sa Manluluwas. Gibalik-balik pagsulti ni Isaias ang makapaayo, makapahupay nga impluwensya sa Ginoo. Mipamatuod siya nga ang Manluluwas usa ka ‘Dalangpanan sa mga kabos panahon sa kalisod,ug panalipod batok sa mga bagyo ug sa init’ (Isaias 25:4). Alang niadtong kinsa nagbangutan, si Isaias mipahayag nga ang Manluluwas nagbaton og gahum sa ‘paghupay niadtong nagsubo’ (Isaias 61:2), ug ‘pahiran ang mga luha’ (Isaias 25:8; tan-awa usab sa Gipadayag 7:17); ‘sa pagdasig sa mapaubsanon’ (Isaias 57:15); ug ‘paglipay sa mga nagmagul-anon’ (Isaias 61:1; tan-awa usab Lucas 4:18; Salmo 147:3). Hilabihan ka lapad sa iyang makatabang nga gahum nga makahimo siya sa pagdala og ‘kalipay inay kagul-anan, awit sa pagdayeg inay kasubo’ (Isaias 61:3).
“O, unsa nga paglaum ang gidala niadto nga mga saad! … Ang Iyang espiritu nag-ayo; kini naglimpyo; kini naghupay; kini naghuyop og bag-ong kinabuhi ngadto sa walay paglaum nga mga kasingkasing. Kini adunay gahum sa pag-usab sa tanang ngil-ad ug bangis ug walay kapuslanan sa kinabuhi ngadto sa usa ka butang nga labing gamhanan ug mahimayaong katahum. Siya adunay gahum sa pag-ilis sa mga abo sa mortalidad ngadto sa mga matahum sa kahangturan.” 4
Ako nagpamatuod nga si Jesukristo mao ang atong mahigugmaong Manluluwas, atong Manunubos, ang Gamhanang Tig-ayo, ug atong matinud-anong higala. Kon kita moduol ngadto Kaniya, ayuhon kita Niya ug himoong hingpit pag-usab. Ako nagpamatuod nga kini mao ang Iyang Simbahan ug Siya nag-andam sa pagbalik sa makausa na usab sa paghari uban ang gahum ug himaya dinhi niini nga yuta. Sa ngalan ni Jesukristo, amen.