Padayon uban sa Hugot nga Pagtuo
Ako mopanalangin kaninyo og kalinaw ug nagkadako nga pagtuo diha sa Ginoo.
Akong minahal nga kaigsoonan, sa atong pagtapos niining makasaysayanong komperensya, magpasalamat kita sa Ginoo. Ang musika maanindot ug ang mga mensahe makapadasig.
Atol niining komperensya, nakasinati kita og daghang importante nga mga gutlo. Niining ikaduhang siglo [bicentennial] nga anibersaryo, mipaila kami og usa ka pamahayag ngadto sa kalibutan nga nagpahayag sa katinuod sa Pagpahiuli sa ebanghelyo ni Jesukristo sa kahingpitan niini.
Atong gihandum ang Pagpahiuli uban sa Singgit nga Hosanna.
Atong gipahibalo ang usa ka simbolo nga nagpakita sa atong hugot nga pagtuo kang Ginoong Jesukristo ug alang sa biswal nga pag-ila sa opisyal nga impormasyon ug mga materyal sa Simbahan.
Kami nanawagan alang sa global nga adlaw sa pagpuasa ug pag-ampo, nga ang kasamtangang pandemic unta makontrolar, ang mga tig-atiman mapanalipdan, ang ekonomiya mapalig-on, ug ang kinabuhi mahimong normal. Kini nga puasa ipahigayon sa Biyernes Santo, Abril 10. Unsa ka talagsaong Biyernes kana!
Sunod Dominggo mao ang Dominggo sa Pasko sa Pagkabanhaw, nga ato na usab nga handumon ang Pag-ula ug Pagkabanhaw sa atong Ginoong Jesukristo. Tungod sa Iyang Pag-ula, ang Iyang gasa sa pagkabanhaw moabut sa tanan nga nabuhi sukad. Ug ang Iyang gasa sa kinabuhing dayon moabut sa tanang angayan tungod sa pagkamatinud-anon sa mga ordinansa ug mga pakigsaad nga gihimo diha sa Iyang balaang mga templo.
Ang daghang makapadasig nga mga butang niining Abril 2020 nga kinatibuk-ang komperensya—ug ang sagradong semana nga ato karong gisugdan—ma-summarize sa duha ka balaanong gilitok nga mga pulong: “Paminaw Kaniya.”1 Kami nag-ampo nga ang inyong pagpokus sa Langitnong Amahan, kinsa militok niadtong mga pulong, ug sa Iyang Hinigugmang Anak, si Jesukristo, mao ang labing importante sa tanang nahitabo. Kami nag-ampo nga sugdan na usab ninyo ang tinud-anay nga maminaw, mamati, ug mopatalinghug sa mga pulong sa Manluluwas.2 Ako mosaad nga ang nagkaminos nga kahadlok ug nagkadako nga pagtuo mosunod.
Salamat sa inyong tinguha nga himoon ang inyong mga panimalay nga tinuod nga dangpanan sa hugot nga pagtuo, diin ang Espiritu sa Ginoo mahimong mopuyo. Ang atong kurikulum sa pagtuon sa ebanghelyo, Dali, Sunod Kanako, magpadayon nga mopanalangin sa inyong kinabuhi. Ang inyong makanunayong mga paningkamot niini nga tinguha—bisan sa mga gutlo nga tingali mibati kamo nga dili kaayo kamo malampuson—mousab sa inyong kinabuhi, sa inyong pamilya, ug sa kalibutan. Kita mapalig-on samtang mahimo kitang mas maisugong mga disipulo sa Ginoo, mobarug ug mamulong alang Kaniya, bisan asa kita.
Karon, maghisgot kita bahin sa mga templo. Kita adunay 168 ka gipahinungod nga mga templo sa tibuok kalibutan. Ang uban anaa sa nagkalain-laing mga hugna sa pagplano ug pagtukod. Kon ipahibalo na ang mga plano sa pagtukod og bag-ong templo, mahimo kining kabahin sa atong sagrado nga kasaysayan.
Morag lain paminawon nga mopahibalo og bag-ong mga templo nga ang tanan natong mga templo sirado sa makadiyot.
Sobra sa usa ka siglo ang milabay, si Presidente Wilford Woodruff nakakita og mga kahimtang sama sa ato karon, sigun sa narekord diha sa iyang pag-ampo sa pagpahinungod sa Templo sa Salt Lake, nga gihatag niadtong 1893. Ang uban ninyo tingali bag-ohay lang nakakita sa mga kinutlo gikan niining talagsaon nga pag-ampo diha sa social media.
Paminawa kining mga pangamuyo gikan sa usa ka bantugang propeta sa Dios: “Kon ang Imong katawhan walay kahigayunan sa pagsulod niining balaang balay … ug sila gidaug-daog ug nagkalisud, gilibutan sa kalisdanan … ug motan-aw niining Imong balaang balay ug mohangyo Kanimo alang sa kalingkawasan, alang sa tabang, aron mapadangat ang Imong gahum alang kanila, kami mohangyo Kanimo, nga molantaw gikan sa Imong balaang pinuy-anan diha sa kalooy … ug maminaw sa ilang mga pag-ampo. O kon ang mga anak sa Imong katawhan, sa katuigan nga mobaut, mapalayo, pinaagi sa bisan unsang hinungdan, gikan niining dapita, … ug sila mag-ampo diha Kanimo gikan sa kinahiladman sa ilang mga kasakit ug kasubo nga ipadangat ang kahupayan ug kalingkawasan ngadto kanila, mapaubsanon kaming mangamuyo Kanimo … paminawa ang ilang mga pag-ampo, ug hatagi sila sa mga panalangin nga ilang gipangayo.”3
Mga kaigsoonan, atol niining panahon sa atong kalisdanan nga ang mga templo sirado, makagamit gihapon kamo sa gahum sa inyong mga pakigsaad ug pagtuga sa templo samtang inyong gitahud ang inyong mga pakigsaad. Palihug gamita kining panahona nga ang mga templo sirado sa pagpadayon nga magpuyo og kinabuhi nga takus sa templo o mahimong takus sa templo.
Paghisgot bahin sa templo uban sa inyong pamilya ug mga higala. Tungod kay si Jesukristo anaa sa sentro sa tanan natong gibuhat sa templo, samtang mas maghunahuna kamo sa templo mas maghunahuna kamo Kaniya. Pagtuon ug pag-ampo nga makakat-on pa og dugang mahitungod sa gahum ug kahibalo nga gituga kaninyo—o sa unsa pay ituga kaninyo.
Karon malipayon kaming mopahibalo sa mga plano sa pagtukod og walo ka bag-ong mga templo sa mosunod nga mga dapit: Bahía Blanca, Argentina; Tallahassee, Florida; Lubumbashi, Democratic Republic of the Congo; Pittsburgh, Pennsylvania; Siyudad sa Benin, Nigeria; Syracuse, Utah; Dubai, United Arab Emirates; ug Shanghai, People’s Republic of China.
Sa walo ka dapit, ang mga arkitekto sa Simbahan makigtambayayong sa lokal nga mga opisyal aron ang templo mahiangay ug makadugang sa kaanindot sa matag komunidad.
Ang plano alang sa usa ka templo sa Dubai miabut agig tubag sa ilang maanindot nga pagdapit, nga mapasalamton natong giila.
Ang konteksto sa plano alang sa Shanghai importante kaayo. Sobra na sa duha ka dekada, ang takus sa templo nga mga miyembro sa People’s Republic of China mitambong sa Templo sa Hong Kong China. Apan pagka-Hulyo 2019, kana nga templo gisirad-an alang sa dugay na nga giplano ug gikinahanglan kaayo nga pagbag-o.
Sa Shanghai, usa ka kasarangan nga dapit nga katiguman nga magamit sa daghang katuyoan maghatag og paagi sa mga miyembro nga Chinese nga magpadayon sa pag-apil sa mga ordinansa sa templo—sa People’s Republic of China—alang kanila ug sa ilang mga katigulangan.4
Sa matag nasud, kini nga Simbahan nagtudlo sa mga miyembro niini sa pagtahud, pagtuman, ug pagsunod sa balaod.5 Atong gitudlo ang kaimportante sa pamilya, sa pagkahimong maayo nga mga ginikanan ug sulundon nga mga lumulupyo. Tungod kay atong gitahud ang mga balaod ug mga regulasyon sa People’s Republic of China, ang Simbahan wala magpadala og tig-proselyte nga mga misyonaryo didto; ni kita mobuhat niini karon.
Ang mga dili taga-China ug ang Chinese nga mga kongregasyon magpadayon nga magtigum nga managlahi. Ang legal nga estado sa Simbahan didto nagpabilin nga walay kausaban. Sa sugod nga hugna sa paggamit sa pasilidad, ang pagsulod pinaagi sa appointment lamang. Ang balay sa Ginoo sa Shanghai dili destinasyon nga dapit alang sa mga turista gikan sa ubang mga nasud.
Kining walo ka bag-ong mga templo mopanalangin sa kinabuhi sa daghang tawo sa duha ka habig sa tabil sa kamatayon. Ang mga templo mao ang kinatas-ang bahin sa Pagpahiuli sa kahingpitan sa ebanghelyo ni Jesukristo. Sa kaayo ug kamanggihatagon sa Dios, mas gipaduol Niya ang mga panalangin sa templo ngadto sa Iyang mga anak bisan asa.
Samtang nagpadayon ang Pagpahiuli, ako nasayud nga ang Dios magpadayon sa pagpadayag og daghang dagko ug mahinungdanong mga butang kalabut sa Iyang gingharian dinhi sa yuta.6 Kana nga gingharian mao Ang Simbahan ni Jesukristo sa mga Santos sa Ulahing mga Adlaw.
Minahal nga kaigsoonan, akong ipahayag ang akong gugma alang kaninyo. Atol niining panahon sa kagubot ug kawalay kasiguroan, ug naggamit sa awtoridad nga gihatag kanako, gusto kong motugyan diha kaninyo og apostolikanhong panalangin.
Ako mopanalangin kaninyo og kalinaw ug nagkadako nga pagtuo diha sa Ginoo.7
Ako mopanalangin kaninyo og tinguha nga maghinulsol ug mas mahisama Kaniya kada adlaw.8
Ako mopanalangin kaninyo nga masayud nga si Propeta Joseph Smith mao ang propeta sa Pagpahiuli sa ebanghelyo ni Jesukristo sa kahingpitan niini.
Kon aduna may sakit diha kaninyo o sa inyong mga minahal sa kinabuhi, mobilin ko kaninyo og panalangin sa pagkaayo, pinasubay sa kabubut-on sa Ginoo.
Ako mopanalangin kaninyo, magdugang pag-usab sa akong pagpahayag sa gugma alang sa matag usa kaninyo, sa sagradong ngalan ni Jesukristo, amen.