Pag-abli sa Kalangitan alang sa Tabang
Atong gamiton ang atong hugot nga pagtuo diha ni Ginoong Jesukristo ngadto sa paglihok!
Pagkatalagsaon ug pagkanindot niini nga sesyon! Salamat, minahal nga Laudy ug Enzo. Inyo gayung girepresentar pag-ayo ang halangdong mga kabatan-onan sa Simbahan.
Akong minahal nga kaigsoonan, daghan ang atong nadungog karon mahitungod sa Pagpahiuli sa Simbahan—ang mismong Simbahan nga giestablisar sa atong Manluluwas, si Jesukristo, atol sa Iyang pagpangalagad dinhi sa yuta. Kana nga Pagpahiuli nagsugod 200 ka tuig na ang milabay karong tingpamulak sa dihang ang Dios nga Amahan ug ang Iyang Anak, si Jesukristo, mipakita ngadto sa batan-ong Joseph Smith.
Napulo ka tuig human niining talagsaong panan-awon, si Propeta Joseph Smith ug laing lima pa gitawag isip nag-unang mga miyembro sa gipahiuli nga Simbahan sa Ginoo.
Gikan nianang gamay nga grupo nga nagpundok niadtong Abril 6, 1830, nahimo nang tibuok kalibutan nga organisasyon sa sobra sa 16 ka milyon nga mga miyembro. Ang maayong nahimo niining Simbahan sa tibuok kalibutan sa paghupay sa pag-antus ug pagdasig sa katawhan nahibaloan na sa kadaghanan. Apan ang pinakaimportanting katuyoan niini mao ang pagtabang sa kalalakin-an, kababayen-an, ug kabataan nga mosunod ni Ginoong Jesukristo, motuman sa Iyang mga sugo, ug mahimong sarang alang sa labing mahinungdanon sa tanang panalangin—kanang kinabuhing dayon uban sa Dios ug sa ilang mga minahal sa kinabuhi.1
Sa atong paghandum sa panghitabo nga gipasiugdahan niadtong 1820, importante nga hinumduman nga samtang gitahud nato si Joseph Smith isip propeta sa Dios, dili kini simbahan ni Joseph Smith, ni kini simbahan ni Mormon. Kini mao ang Simbahan ni Jesukristo. Iyang gimando kon unsa gayud ang itawag sa Iyang Simbahan: “Kay sa ingon ang akong simbahan pagatawgon sa katapusan nga mga adlaw, gani Ang Simbahan ni Jesukristo sa mga Santos sa Ulahing mga Adlaw.”2
Ako namulong na sa miagi mahitungod sa gikinahanglan nga pagkorihir sa paagi sa atong pagtawag sa ngalan sa Simbahan.3 Sukad nianang higayuna, daghan ang nabuhat aron mahimo kini nga pagkorihir. Mapasalamaton kaayo ko kang Presidente M. Russell Ballard ug sa tibuok Korum sa Napulog Duha ka mga Apostoles, kinsa daghan kaayo og nabuhat aron pangulohan kining mga paningkamot ingon man usab niadtong may kalabutan sa laing inisyatibo nga akong ipahibalo karong gabhiona.
Ang mga lider ug mga departamento sa Simbahan, may kalabutan nga mga organisasyon, ug minilyon nga mga miyembro—ug uban pa—naggamit na karon sa saktong ngalan sa Simbahan. Ang opisyal nga giya sa estilo sa Simbahan gi-adjust na. Ang nag-unang website sa Simbahan mao na karon ang ChurchofJesusChrist.org. Ang mga address alang sa email, mga ngalan sa website [domain], ug mga channel sa social media gi-update na. Ang atong minahal nga choir mao na karon ang The Tabernacle Choir at Temple Square.
Kita mihimo niining talagsaong mga paningkamot tungod kay kon atong tangtangon ang ngalan sa Ginoo gikan sa ngalan sa Iyang Simbahan, wala nato tuyoa nga tangtangon Siya isip ang sentro nga tutokan sa atong pagsimba ug sa atong kinabuhi. Sa dihang atong gidala ang ngalan sa Manluluwas ngari kanato atol sa bunyag, mipasalig kita nga mosaksi, pinaagi sa atong mga pulong, mga hunahuna ug mga lihok, nga si Jesus mao ang Kristo.4
Sa miagi, misaad ko nga kon kita “mobuhat sa atong labing maayo sa pagpahiuli sa saktong ngalan sa Simbahan sa Ginoo,” Siya “mobu-bu sa Iyang gahum ug mga panalangin diha sa mga ulo sa mga Santos sa Ulahing mga Adlaw, sa mga paagi nga wala nato makita sukad.”5 Akong usbon kana nga saad karon.
Aron matabangan kita nga makahinumdom Kaniya ug mailhan Ang Simbahan ni Jesukristo sa mga Santos sa Ulahing mga Adlaw isip Simbahan sa Ginoo malipayon kaming mopaila sa usa ka simbolo nga mopakita sa mahinungdanong dapit ni Jesukristo diha sa Iyang Simbahan.
Kini nga simbolo naglakip sa ngalan sa Simbahan nga nasulod sa usa ka bato sa pamag-ang [cornerstone]. Si Jesukristo mao ang ulohang bato sa pamag-ang.6
Anaa sa sentro sa simbolo ang usa ka representasyon sa marmol nga estatuwa nga hinimo ni Thorvaldsen nga mao ang Christus. Nagpakita kini sa nabanhaw, buhi nga Ginoo nga mituyhad sa Iyang mga bukton aron hangupon ang tanan nga moduol Kaniya.
Sa simbolikanhong paagi, si Jesukristo nagbarug ubos sa usa ka arko. Ang arko nagpahinumdom kanato bahin sa nabanhaw nga Manluluwas nga migawas gikan sa lubnganan sa ikatulong adlaw human sa Paglansang Kaniya sa Krus .
Kini nga simbolo mamahimong pamilyar sa kadaghanan, kay dugay na man natong giisip ang gipahiuli nga ebanghelyo nga adunay kalabutan sa buhi, nabanhaw nga Kristo.
Ang simbolo gamiton na karon isip usa ka tigpailang biswal alang sa opisyal nga literatura, mga balita, ug mga panghitabo sa Simbahan.7 Kini mopahinumdom sa tanan nga mao kini ang Simbahan sa Manluluwas ug nga ang tanan natong gibuhat isip mga miyembro sa Iyang Simbahan nakasentro kang Jesukristo ug sa Iyang ebanghelyo.
Karon, akong minahal nga kaigsoonan, ugma mao ang Dominggo sa Lukay, sama sa maayo kaayong pagkatudlo ni Elder Gong. Dayon mosulod kita sa espesyal nga semana nga matapos sa Pasko sa Pagkabanhaw. Isip mga sumusunod ni Jesukristo, nga nagpuyo sa panahon nga ang COVID-19 nga pandemic mipagubot sa tibuok kalibutan, dili lamang kita maghisgot bahin ni Kristo o magsangyaw bahin ni Kristo o mogamit og simbolo nga nagrepresentar ni Kristo.
Atong gamiton ang atong hugot nga pagtuo diha ni Ginoong Jesukristo ngadto sa paglihok!
Sama sa inyo nang nahibaloan, ang mga miyembro sa Simbahan nagsunod sa balaod sa puasa kausa sa usa ka bulan.
Ang doktrina sa pagpuasa karaan na. Gihimo na kini sa biblikanhong mga bayani gikan sa nag-unang mga adlaw. Sila si Moises, David, Esdras, Nehemias, Ester, Isaias, Daniel, Joel, ug daghan pa nagpuasa ug nagsangyaw bahin sa pagpuasa.8 Pinaagi sa mga sinulat ni Isaias, ang Ginoo miingon: “Dili ba mao kini ang pagpuasa nga akong napili? ang paghubad sa mga higut sa kadautan, pagtangtang sa mga bugkos sa yugo, ug ang pagpagawas sa mga dinaugdaug?”9
Si Apostol Pablo mitambag sa mga Santos sa Corinto nga “managsulod kamo diha sa kahigayunan sa pagpuasa ug pag-ampo.”10 Ang Manluluwas Mismo namahayag nga ang pihong mga butang “dili mahimo sa pagpagula gawas sa paagi sa pag-ampo ug pagpuasa.”11
Ako miingon bag-o lang sa usa ka video sa social media nga “isip usa ka doktor ug tig-opera, ako adunay dako nga pagdayeg alang sa medikal nga mga propesyonal, mga scientist, ug sa uban kinsa nagtrabaho sa tanang oras aron masanta ang pagkatap sa COVID-19.”12
Karon, isip Presidente sa Ang Simbahan ni Jesukristo sa mga Santos sa Ulahing mga Adlaw ug usa ka Apostol ni Jesukristo, ako nasayud nga ang Dios “aduna sa tanan nga gahum, tanan nga kaalam, ug tanan nga salabutan; siya nakatugkad sa tanan nga mga butang, ug siya usa ka maloloy-on nga Binuhat, gani ngadto sa kaluwasan, ngadto kinsa mohinulsol ug motuo diha sa iyang ngalan.”13
Busa, atol sa mga panahon sa hilabihan nga kalisud, kon ang sakit moabut na sa pandemic, ang labing natural nga butang nga atong buhaton mao ang pagtawag sa atong Langitnong Amahan ug sa Iyang Anak—ang Bantugang Tig-ayo—sa pagpakita sa Ilang talagsaong gahum nga mopanalangin sa mga tawo dinhi sa yuta.
Sa akong mensahe sa video, akong gidapit ang tanan nga moapil sa pagpuasa sa Dominggo, Marso 29, 2020. Daghan kaninyo ang tingali nakakita sa video ug miapil sa pagpuasa. Ang uban siguro wala. Karon nagkinahanglan gihapon kita og tabang gikan sa langit.
Busa karong gabhiona, akong minahal nga kaigsoonan, sama sa gibuhat sa mga anak ni Mosiah, kinsa mihatag sa ilang kaugalingon ngadto sa tuman nga pagpuasa ug pag-ampo,14 ug isip kabahin sa atong Abril 2020 nga kinatibuk-ang komperensya, nanawagan ko og laing tibuok kalibutan nga pagpuasa. Alang sa tanan kansang panglawas makatugot, magpuasa kita, mag-ampo, ug mohiusa pag-usab sa atong pagtuo. Mainampuon kitang mangamuyo alang sa kahupayan gikan niining tibuok kalibutan nga pandemic.
Akong gidapit ang tanan, lakip na niadtong dili miyembro sa atong Simbahan, nga magpuasa ug mag-ampo sa Biyernes Santo, Abril 10, nga ang kasamtangang pandemic unta makontrolar, ang mga tig-atiman mapanalipdan, ang ekonomiya mapalig-on, ug ang kinabuhi mahimong normal.
Unsaon nato sa pagpuasa? Ang duha ka kan-anan o 24 oras maoy naandan. Apan kinahanglan kamong modesisyon kon unsay maglangkob og sakripisyo alang kaninyo, samtang maghinumdom kamo sa labing dako nga sakripisyo nga gihimo sa Manluluwas alang kaninyo. Maghiusa kita sa pagpangamuyo alang sa pagkaayo sa tibuok kalibutan.
Ang Biyernes Santo mamahimong mao ang perpektong adlaw nga ang atong Langitnong Amahan ug ang Iyang Anak modungog kanato!
Minahal nga kaigsoonan, akong ipahayag ang akong dakong gugma alang kaninyo, uban sa akong pagpamatuod bahin sa kabalaan sa buhat diin kita nalambigit. Kini mao Ang Simbahan ni Jesukristo sa mga Santos sa Ulahing mga Adlaw. Siya nagbarug sa ulohan niini ug naggiya sa tanan natong gibuhat. Ako nasayud nga Siya motubag sa mga pangamuyo sa Iyang katawhan. Ako mopamatuod pinaagi sa sagradong ngalan ni Jesukristo, amen.