Mga Pag-ampo uban sa Hugot nga Pagtuo
Kon mag-ampo kita uban sa hugot nga pagtuo, mahimo kitang mahinungdanong bahin sa buhat sa Ginoo samtang Siya nag-andam sa kalibutan sa Iyang ikaduhang Pag-anhi.
Ang pag-ampo ni Elder Maynes sa pagsugod sa sesyon niining una nga sesyon sa kinatibuk-ang komperensya natubag. Ang inspirasyon miabut kanato pinaagi sa maanindot nga mga mensahe ug matahum nga musika. Ang saad ni Presidente Russell M. Nelson nga kini nga komperensya halandumon nagsugod na sa pagkatuman.
Si Presidente Nelson mitakda niini nga tuig isip “ika-200 nga tuig nga kasaulugan [bicentennial] sukad ang Dios nga Amahan ug Iyang Hinigugmang Anak, si Jesukristo, mipakita kang Joseph Smith sa usa ka panan-awon.” Si Presidente Nelson midapit kanato sa paghimo og personal nga plano sa pag-andam sa atong kaugalingon alang niining makasaysayanong komperensya, diin nga pagsaulog miingon siya nga “usa ka impluwensyal nga kausaban sa kasaysayan sa Simbahan, ug ang inyong bahin mahinungdanon.”1
Sama nako, tingali nakadungog kamo sa iyang mensahe ug nakapangutana sa inyong kaugalingon, “Sa unsang paagi ang akong bahin mahinungdanon?” Tingali nagbasa kamo ug nag-ampo mahitungod sa mga hitabo sa Pagpahiuli. Tingali, labaw pa kay sa kaniadto, nabasa ninyo ang mga gisaysay niadto pipila na ka higayon dihang ang Dios nga Amahan mipaila sa Iyang Hinigugmang Anak. Tingali nabasa ninyo ang mga higayon dihang ang Manluluwas namulong sa mga anak sa atong Langitnong Amahan. Ako nasayud nga akong nabuhat kadtong tanang butanga ug dugang pa.
Nakakita ko og mga panimaan [reference] sa akong pagbasa sa pagkapari sa Dios ug sa pag-abli sa mga dispensasyon. Napaubos ko sa akong pagkaamgo ko nga ang akong pagpangandam niining komperensya usa ka impluwensyal nga kausaban sa kaugalingon nakong kasaysayan. Gibati nako ang mga kausaban sa akong kasingkasing. Akong gibati ang bag-ong pagpasalamat. Gibati nako ang kalipay nga ako gidapit nga makaapil niining selebrasyon sa padayon nga Pagpahiuli.
Akong mahunahuna ang pagbati sa uban, tungod sa mainampingon nga pagpangandam, mas malipayon, mas malaumon, ug mas determinado nga moserbisyo sa bisan unsang kapasidad nga gikinahanglan sa Ginoo.
Ang labaw pa sa ordinaryong mga kasinatian nga atong gitamud maoy mga sinugdanan sa gitagna nga katapusang dispensasyon, diin ang Ginoo nag-andam sa Iyang Simbahan ug sa Iyang katawhan, niadtong nanagdala sa Iyang ngalan, sa pagdawat Kaniya. Isip kabahin sa atong preparasyon sa Iyang pag-anhi, Siya motabang kanato atol sa espiritwal nga mga hagit ug mga oportunidad nga lahi sa unsay nakita sa kasaysayan niini nga kalibutan.
Niadtong Septyembre 1840, si Propeta Joseph Smith ug ang iyang mga magtatambag sa Unang Kapangulohan mipahayag sa mosunod: “Ang buluhaton sa Ginoo niining katapusan nga mga adlaw, usa ka lapad nga luna ug ingon og lapas pa kini sa panabut sa mga tawo. Ang mga himaya niini dili mahulagway, ug ang kaanindot walay makatupong. Kini ang tema nga mipalagsik sa dughan sa mga propeta ug sa matarung nga mga katawhan sugod sa pagmugna sa kalibutan paubos ngadto sa nagsunod nga mga henerasyon hangtud sa kasamtangang panahon; ug sa pagkatinuod mao kini ang dispensasyon sa kahingpitan sa panahon, kon ang tanan nga mga butang nga anaa ni Kristo Jesus, maanaa man sa langit o sa yuta, mapundok ang tanan diha Kaniya, ug kon ang tanang mga butang mapahiuli, sumala sa gipamulong sa mga balaang propeta sukad pa sa sinugdanan sa kalibutan; kay niini mahitabo ang mahimayaon nga katumanan sa mga panaad nga gihimo ngadto sa mga amahan, samtang ang mga pagpakita sa gahum sa Labing Halangdon mahimong talagsaon, mahimayaon, ug madasigon.”
Gipadayon nila sa pag-ingon: “Gibati namo nga andam sa pagpadayon ug sa paghiusa sa among mga kusog alang sa kalamboan sa Gingharian, ug pagestablisar sa Priesthood sa kahingpitan niini ug kahimayaan. Ang buluhaton nga kinahanglang humanon sa katapusan nga mga adlaw maoy usa ka mahinungdanon kaayo, ug nagkinahanglan sa kusog, kahanas, talento, ug abilidad sa mga Santos, aron kini mokaylap uban niana nga himaya ug kahalangdon nga gihulagway sa propeta [Daniel] [tan-awa sa Daniel 2:34–35, 44–45]; ug hinungdan kini nga gikinahanglan ang halawom nga paghunahuna sa mga Santos, aron matuman ang mga buluhaton nga ingon ka daghan ug hilabihan kaanindot.”2
Daghan sa mga detalye nga atong buhatunon ug kon kanus-a nato kini buhaton sa gibutyag nga Pagpahiuli wala pa ipadayag. Apan ang Unang Kapangulohan gani niadtong unang mga adlaw nasayud sa kalapdon ug kaladmon sa buhat sa Ginoo nga gipahimutang ngari kanato. Ania ang pipila ka mga ehemplo sa unsay atong nahibaloan nga manghitabo:
Pinaagi sa Iyang mga Santos, ang Ginoo motanyag sa gasa sa Iyang ebanghelyo “ngadto sa matag kanasuran, kaliwatan, pinulongan, ug katawhan.”3 Ang teknolohiya ug mga milagro magpadayon sa iyang bahin—isip tinagsa-tagsang “mangingisdag tawo”4 kinsa mangalagad uban sa gahum ug sa naglambo nga pagtuo.
Kita isip katawhan mas magkahiusa bisan sa nagkadaghang panagbangi. Kita pundukon diha sa espiritwal nga kalig-on sa mga pundok ug mga pamilya nga puno sa kahayag sa ebanghelyo.
Gani ang dili matuohon nga kalibutan moila sa Ang Simbahan ni Jesukristo sa mga Santos sa Ulahing mga Adlaw ug makahibalo sa gahum sa Dios nga anaa niini. Ang matinud-anon ug maisugon nga mga disipulo walay kahadlok, mapaubsanon, ug walay lipud-lipod nga modala diha kanila sa ngalan ni Kristo sa ilang inadlaw-adlaw nga kinabuhi.
Nan, sa unsang paagi ang matag usa nato makaapil niini nga buhat sa ingon nianang kalapdon ug kahalangdon? Si Presidente Nelson mitudlo kanato kon unsaon nato nga molambo sa espiritwal nga gahum. Kon kita modawat sa paghinulsol isip malipayong oportunidad tungod sa naglambo natong pagtuo kang Jesus nga mao ang Kristo, kon masabtan ug motuo kita nga ang Langitnong Amahan maminaw sa atong tanan nga pag-ampo, kon maningkamot kita sa pagtuman ug pagsunod sa mga sugo, motubo ang atong gahum sa pagdawat og padayon nga pagpadayag. Ang Espiritu Santo mahimo natong padayon nga kauban. Ang pagbati nga kahayag magpabilin kanato bisan og magkangitngit ang kalibutan sa atong palibut.
Si Joseph Smith usa ka ehemplo kon unsaon sa pagpalambo og ingon nianang espiritwal nga gahum. Iyang gipakita kanato nga ang pag-ampo uban sa pagtuo maoy yawe sa pagpadayag gikan sa Dios. Siya nag-ampo uban sa hugot nga pagtuo, nga ang Dios nga Amahan motubag sa iyang mga pag-ampo. Siya nag-ampo uban sa pagtuo, nga pinaagi lamang kang Jesukristo siya mahaw-as gikan sa gibati niyang kahasol tungod sa iyang mga sala. Ug nag-ampo siya uban sa pagtuo, nasayud nga nagkinahanglan siyang makakita sa tinuod nga Simbahan ni Jesukristo aron maangkon kana nga kapasayloan.
Sa tibuok niyang mapanagnaong pagpangalagad, si Joseph Smith migamit sa mga pag-ampo uban sa hugot nga pagtuo sa pag-angkon sa padayong pagpadayag. Samtang mag-atubang kita sa mga hagit karon ug sa mga umaabutt, kita usab nagkinahanglan sa sama nga sundanan. Si Presidente Brigham Young miingon, “Wala akoy nahibaloang lahi nga paagi para sa mga Santos sa Ulahing mga Adlaw kay sa kinasingkasing nga pag-ampo sa tanang higayon alang sa Dios aron mogiya ug motudlo sa iyang katawhan.”5
Kining mga pulong nga gikan sa mga pag-ampo sa sakramento kinahanglan nga maghulagway sa atong inadlaw nga kinabuhi: “Kanunay mohinumdom kaniya.” Ang “Kaniya” nagpasabut kang Jesukristo. Ang sunod nga mga pulong, “ug mohupot sa iyang mga sugo,” nagsugyot unsay ipasabut sa paghinumdom Kaniya.6 Kon kanunay kitang mohinumdom ni Jesukristo kanunay, tingali mangutana kita sa hilum nga pag-ampo, “Unsa ang gusto Niya nga akong buhaton?”
Ang mao nga pag-ampo, gihalad uban sa hugot nga pagtuo kang Jesukristo, nga gisugdan niining katapusang dispensasyon. Ug mahinungdanon kining buluhaton sa matag usa kanato sa padayon nga pagpadayag. Ako nakakita, sama ninyo, sa talagsaong mga ehemplo sa ingon niana nga pag-ampo.
Una si Joseph Smith. Nangutana siya sama sa pagtuo sa usa ka bata unsay ipabuhat kaniya sa Ginoo. Ang Iyang tubag miusab sa kasaysayan sa kalibutan.
Para nako, usa ka pinakaimportanting leksyon naggikan sa pagtubag ni Joseph sa pag-atake ni Satanas samtang miluhod si Joseph sa pag-ampo.
Akong nahibaloan gikan sa kasinatian nga si Satanas ug ang iyang mga sulugoon naningkamot aron mobati kita nga dili kinahanglang mag-ampo. Dihang si Joseph Smith nanglimbasug gayud sa pagtawag sa Dios aron siya luwason gikan sa gahum nga misulay sa paggapos kaniya, ang iyang pag-ampo alang sa kahupayan natubag ug ang Langitnong Amahan ug si Jesukristo mipakita.
Ang paningkamot ni Satanas nga mapugngan ang pagsugod sa Pagpahiuli hilabihan gayud kay ang pag-ampo ni Joseph importante kaayo. Ikaw ug ako adunay gagmayng bahin nga ikatampo sa padayon nga Pagpahiuli. Sa gihapon ang kaaway sa Pagpahiuli mosulay sa pagpugong kanato sa pag-ampo. Ang ehemplo sa hugot nga pagtuo ni Joseph ug ang iyang determinasyon makalig-on sa atong pagdesisyon. Usa kini sa daghang rason nganong ang akong mga pag-ampo naglakip og mga pagpasalamat sa Langitnong Amahan alang ni Propeta Joseph.
Si Enos sa Basahon ni Mormon usa ka laing modelo sa akong pag-ampo diha sa hugot nga pagtuo samtang maningkamot ko sa paghimo sa akong bahin sa padayon nga Pagpahiuli. Bisan unsa ang inyong bahin, pwede usab ninyo siyang gamiton isip personal nga tigmatuto.
Sama ni Joseph, si Enos nag-ampo uban sa hugot nga pagtuo. Gihulagway niya ang iyang kasinatian sa ingon niini nga paagi:
“Ug ang akong kalag gigutom; ug ako miluhod sa atubangan sa akong Magbubuhat, ug ako nangamuyo ngadto kaniya sa hilabihan nga pag-ampo ug nangaliya alang sa akong kaugalingon nga kalag; ug sa tibuok adlaw ako nangamuyo ngadto kaniya; oo, ug sa diha nga midangat ang kagabhion ako sa gihapon mipataas sa akong tingog pag-ayo nga kini miabut sa mga kalangitan.
“Ug dihay miabut nga usa ka tingog ngari kanako, nag-ingon: Enos, ang imong mga sala gipasaylo na, ug ikaw panalanginan.
“Ug ako, si Enos, nasayud nga ang Dios dili magbakak; busa, ang akong kasaypanan nakuha sa hingpit.
“Ug ako miingon: Ginoo, giunsa kini pagbuhat?
“Ug siya miingon ngari kanako: Tungod sa imong hugot nga pagtuo ni Kristo, si kinsa ikaw wala pa gayud sukad makadungog ni makakita. Ug daghan nga mga katuigan ang molabay unà siya mopakita sa iyang kaugalingon diha sa lawas; busa, makalakaw ka na, ang imong hugot nga pagtuo nakahimo kanimo nga hinlo.”7
Ang leksyon nga mipanalangin kanako ania niini nga mga pulong: “Tungod sa imong hugot nga pagtuo ni Kristo, kinsa wala pa gayud nimo madungog o makita.”
Si Joseph adunay hugot nga pagtuo diha kang Kristo sa pag-adto sa kakahoyan ug sa pag-ampo usab aron makabuhi gikan sa mga gahum sa kaaway. Wala pa siya makakita sa Amahan ug sa Anak, apan nag-ampo siya diha sa hugot nga pagtuo sa tanang kusog sa iyang kasingkasing.
Ang kasinatian ni Enos nagtudlo kanako sa mao gihapong bililhon nga leksyon. Kon mag-ampo ko uban sa hugot nga pagtuo, anaa ang Manluluwas nga akong maglalaban ngadto sa Amahan ug mobati ko nga mosangko sa langit ang akong mga pag-ampo. Mga tubag moabut. Mga panalangin madawat. Adunay kalinaw ug kalipay bisan sa lisud nga mga panahon.
Akong nahinumduman nga, isip kinabag-ohang sakop sa Korum sa Napulog Duha ka mga Apostoles, miluhod ko sa pag-ampo uban ni Elder David B. Haight. Susama ang iyang edad kanako karon, ug sa mga hagit nga karon akong gisinati. Nahinumdom ko sa Iyang tingog dihang nag-ampo siya. Wala ko mobuka sa akong mga mata aron motan-aw, apan ingon kini og nagpahiyom siya. Nakigsulti siya sa Langitnong Amahan uban sa kamaya sa iyang tingog.
Akong mabati sa akong hunahuna ang kalipay dihang miingon siya, “Sa ngalan ni Jesukristo.” Para nako daw si Elder Haight mibati sa pagmatuod sa Manluluwas nianang higayona ang mensahe nga iyang giampo ngadto sa Amahan. Ug sigurado ko nga gidawat kini uban sa pahiyom.
Ang atong katakus sa paghimo sa atong mahinungdanong kontribusyon sa talagsaon nga nagpadayong Pagpahiuli molambo samtang magtubo ang atong pagtuo diha kang Jesukristo isip atong Manluluwas ug atong Langitnong Amahan isip atong Amahan nga mahigugmaon. Kon mag-ampo kita uban sa hugot nga pagtuo, mahimo kitang mahinungdanong bahin sa buhat sa Ginoo samtang Siya nag-andam sa kalibutan sa Iyang ikaduhang Pag-anhi. Nag-ampo ako nga kitang tanan makakaplag og kalipay sa paghimo sa buhat nga Siya nagdapit sa matag usa kanato nga buhaton.
Mopamatuod ko nga si Jesukristo buhi. Kini Iyang Simbahan ug gingharian dinhi sa yuta. Si Joseph Smith ang propeta sa Pagpahiuli. Si Presidente Russell M. Nelson ang propeta sa Ginoo sa kalibutan karon. Siya ang naggunit sa tanang yawe sa pagkapari sa Ang Simbahan ni Jesukristo sa mga Santos sa Ulahing mga Adlaw. Sa ngalan ni Jesukristo, amen.