Duol ngadto kang Kristo—Magpakabuhi isip mga Santos sa Ulahing mga Adlaw
Kita makabuhat og lisud nga mga butang ug makatabang sa uban sa pagbuhat sa ingon, tungod kay nasayud kita kinsa ang atong masaligan.
Salamat, Elder Soares, sa imong lig-on ug propetikanhon nga pagpamatuod sa Basahon ni Mormon. Bag-ohay lang, ako adunay kahigayunan nga makagunit sa usa ka pahina sa orihinal nga manuskrito sa Basahon ni Mormon. Niining piho nga pahina, sa unang higayon niini nga dispensasyon, gitala kining maisugon nga mga pulong ni Nephi: “Ako moadto ug mobuhat sa mga butang nga ang Ginoo nagsugo, kay ako nasayud nga ang Ginoo dili mohatag og mga sugo ngadto sa mga katawhan, gawas kon siya moandam og paagi alang kanila nga sila unta makatuman sa butang diin siya misugo kanila.”1
Samtang naggunit ko niini nga pahina, napuno ko sa halawom nga pasalamat sa mga kahago sa 23 anyos nga si Joseph Smith, kinsa mihubad sa Basahon ni Mormon pinaagi sa “gasa ug gahum sa Dios.”2 Ako mapasalamaton usab sa mga pulong sa batan-on nga si Nephi, kinsa gihangyo sa pagbuhat sa lisud kaayo nga tahas sa pagkuha sa mga palid nga tumbaga gikan ni Laban.
Si Nephi nasayud nga kon magpadayon siya nga nakatutok sa Ginoo, molampus siya sa pagtuman sa gisugo sa Ginoo kaniya. Siya kanunay nga nakatutok sa Manluluwas sa tibuok niyang kinabuhi bisan kon nag-antus siya og mga tintasyon, pisikal nga mga pagsulay, ug gani pagluib sa ubang suod nga mga sakop sa iyang pamilya.
Si Nephi nasayud kinsa ang Iyang masaligan.3 Human niana siya mituaw, “O pagkaalaot ko nga tawo! Oo, ang akong kasingkasing nagmasulub-on tungod sa akong pagkahuyang,”4 Si Nephi miingon, “Ang akong Dios mao ang akong kaabag; siya nag-agak kanako sa akong mga kasakit sa kamingawan; ug siya nanalipod kanako diha sa ibabaw sa mga katubigan sa dakong lawod.”5
Isip mga sumusunod ni Kristo, dili kita luwas sa mga hagit ug mga pagsulay sa atong kinabuhi. Kita sa kasagaran pabuhaton og lisud nga mga butang nga, kon sulayan sa pagbuhat nga mag-inusara, mahimong bug-at ra kaayo ug tingali imposible. Samtang atong dawaton ang pagdapit sa Manluluwas nga “duol ngari kanako,”6 Siya mohatag sa suporta, kahupayan, ug kalinaw nga gikinahanglan, sama gayud sa Iyang gibuhat alang ni Nephi ug ni Joseph. Bisan sa atong pinakabug-at nga mga pagsulay, atong mabati ang mainiton nga paghangup sa Iyang gugma samtang kita mosalig Kaniya ug modawat sa Iyang kabubut-on. Kita makasinati sa hingpit nga kalipay nga giandam alang sa Iyang matinud-anon nga mga disipulo, kay si “Kristo mao ang hingpit nga kalipay.”7
Niadtong 2014, samtang nagserbisyo og usa ka full-time nga misyon, ang among pamilya nakasinati ug wala damha nga panghitabo. Samtang nagsakay sa taas nga skateboard sa dulhugon kaayo nga bungtod, ang among kamanghurang anak nga lalaki nahulog ug nakaangkon og halos makamatay nga kadaot sa iyang utok. Samtang ang iyang sitwasyon migrabe, ang mga kawaning medikal mipaubos niya sa danalian nga operasyon.
Ang among pamilya miluhod sa salog sa usa ka bakante nga lawak sa ospital, ug among gipahayag ang among mga gibati ngadto sa Dios. Sa taliwala nianang makalibog ug masakit nga gutlo, kami napuno sa gugma ug kalinaw sa atong Langitnong Amahan.
Wala kami masayud kon unsay mahitabo sa umaabut o kon makita pa ba kaha namo pag-usab ang among anak nga buhi. Kami tataw gayud nga nasayud nga ang iyang kinabuhi anaa sa mga kamot sa Dios ug ang mga sangputanan, gikan sa mahangturong panglantaw, makahatag og kaayohan kaniya ug kanamo. Pinaagi sa gasa sa Espiritu, kami hingpit nga andam sa pagdawat sa bisan unsa nga resulta.
Dili kadto sayon! Ang aksidente miresulta sa duha ka bulan nga pagpuyo sa ospital samtang nagdumala mi sa sobra sa 400 ka full-time nga mga misyonaryo. Ang among anak nakasinati og dakong pagkawala sa iyang panumduman. Ang iyang pagkaayo naglakip sa dugay ug lisud nga mga sesyon alang sa pisikal, sa pagsulti, ug occupational therapy. Ang mga hagit nagpabilin, apan sa kadugayan nakasaksi kami og milagro.
Kita klaro nga nakasabut nga dili tanang pagsulay nga atong giatubang adunay resulta nga atong gipangandoy. Hinoon, samtang magpabilin kita nga nakatutok ni Kristo, kita mobati og kalinaw ug makakita sa mga milagro sa Dios, bisan unsa man kini, diha sa Iyang panahon ug sa Iyang paagi.
Adunay mga higayon nga dili nato makita sa bisan unsang paagi nga ang kasamtangang sitwasyon mamaayo ra ug kaha mopadayag pa gani, sama ni Nephi, “Ang akong kasingkasing nagmasulub-on tungod sa akong pagkahuyang.”8 Tingali adunay mga higayon nga ang ato rang bugtong paglaum anaa ra ni Jesukristo. Usa ka dakong panalangin nga makaangkon niana nga paglaum ug pagsalig diha Kaniya. Si Kristo mao ang tawo kinsa kanunay nga motuman sa Iyang mga saad. Ang Iyang kalinaw gipaniguro alang sa tanan nga moduol ngadto Kaniya.9
Ang atong mga lider hugot nga nagtinguha sa tanan nga mobati sa kalinaw ug kahupayan nga moabut pinaagi sa pagsalig ug pagtutok ngadto sa Manluluwas nga si Jesukristo.
Ang atong buhing propeta, si Presidente Russell M. Nelson, kanunay nga nagpahibalo sa panglantaw sa Ginoo alang sa kalibutan ug sa mga sakop sa Simbahan ni Kristo: “Ang among mensahe ngadto sa kalibutan yano ug sinsero: among gidapit ang tanang anak sa Dios sa duha ka habig sa tabil sa pagduol ngadto sa ilang Manluluwas, pagdawat sa mga panalangin sa balaan nga templo, pagbaton og molahutay nga kalipay, ug mahimong angayan sa kinabuhing dayon.”10
Kini nga pagdapit sa “pagduol ngadto kang Kristo” adunay piho nga mga kahulugan alang sa mga Santos sa Ulahing mga Adlaw.11 Isip mga miyembro sa Simbahan sa Manluluwas, kita mihimo og mga pakigsaad ngadto Kaniya ug nahimong Iyang mga anak nga lalaki ug babaye diha sa espiritu.12 Kita usab gihatagan og kahigayunan sa pag-alagad uban sa Ginoo sa pagdapit sa uban nga moduol ngadto Kaniya.
Samtang kita mag-alagad uban ni Kristo, ang atong labing dakong paningkamot kinahanglan nga anaa sulod sa atong mga panimalay. Adunay mga higayon nga ang mga sakop sa pamilya ug suod nga mga higala mag-atubang og mga hagit. Ang mga tingog sa kalibutan, ug tingali ang ilang kaugalingong mga tinguha, motulod nila sa pagduda sa kamatuoran. Buhaton gyud nato ang tanan aron matabangan sila nga mobati sa gugma sa Manluluwas ug sa atong gugma. Napahinumduman ko sa bersikulo sa kasulatan nga nahimo natong minahal nga himno nga “Maghigugmaay,” nga nagtudlo kanato nga, “Ang … [mga] tawo makaila … nga kamo mga tinun-an ko, kon kamo maghigugmaay ang usa sa usa.”13
Sa atong gugma niadtong kinsa nagduda sa kamatuoran, ang kaaway sa tanang kalipay mahimong mosulay sa pagpabati kanato nga atong giluiban kadtong atong gihigugma kon kita sa atong kaugalingon magpadayon sa pagsunod sa kahingpitan sa ebanghelyo ug magtudlo sa mga kamatuoran niini.
Ang atong abilidad sa pagtabang sa uban sa pagduol ngadto kang Kristo matino gayud sa ehemplo nga atong gipakita pinaagi sa atong personal nga pasalig nga magpabilin diha sa dalan sa pakigsaad.
Kon ang atong tinuod nga tinguha mao ang pagluwas niadtong atong gihigugma, kita mismo kinahanglan gayud nga magpabiling lig-on uban ni Kristo pinaagi sa paghangup sa Iyang Simbahan ug sa kahingpitan sa Iyang ebanghelyo.
Balik ngadto sa sugilanon ni Nephi, kita nasayud nga ang inklinasyon ni Nephi nga mosalig sa Ginoo naimpluwensyahan sa kahilig sa iyang mga ginikanan nga mosalig sa Ginoo ug sa ilang ehemplo sa pagtuman sa mga pakigsaad. Kini nindot kaayo nga gipakita diha sa panan-awon ni Lehi bahin sa kahoy sa kinabuhi. Human makakaon sa tam-is ug makalipay nga bunga sa kahoy, si Lehi “milibut sa [iyang] panan-aw, nga basin pa unta [siya] makakaplag usab sa [iyang] banay.”14 Iyang nakita si Sariah, Sam, ug Nephi nga nagbarug “ingon og sila wala masayud asa sila paingon.”15 Dayon si Lehi miingon, “ako mitawag kanila; ug ako usab miingon ngadto kanila uban sa makusog nga tingog nga sila kinahanglan nga moduol ngari kanako, ug mokaon sa bunga.”16 Palihug timan-i nga si Lehi wala mobiya sa kahoy sa kinabuhi. Siya nagpabilin sa espirituhanong paagi uban sa Ginoo ug midapit sa iyang banay sa pagduol diin siya mikaon sa bunga.
Ang kaaway moagni sa uban sa pagbiya sa kalipay sa ebanghelyo pinaagi sa pagpahimulag sa mga pagtulun-an ni Kristo gikan sa Iyang Simbahan. Iya kitang patuohon nga mahimo kitang magpabilin nga lig-on diha sa dalan sa pakigsaad nga kita lang, pinaagi sa atong kaugalingong pagka-espirituhanon, nga dili magkinahanglan sa Iyang Simbahan.
Niining ulahing mga adlaw, ang Simbahan ni Kristo gipahiuli aron matabangan ang mga anak ni Kristo sa pakigsaad nga magpabilin diha sa Iyang dalan sa pakigsaad.
Diha sa Doktrina ug mga Pakigsaad atong mabasa: “Tan-awa, mao kini ang akong doktrina—kinsa kadto nga maghinulsol ug moduol ngari kanako, ang ingon mao ang akong simbahan.”17
Pinaagi sa Simbahan ni Kristo, kita malig-on pinaagi sa atong mga kasinatian isip usa ka katilingban sa mga Santos. Kita makadungog sa Iyang tingog pinaagi sa Iyang mga propeta, mga manalagna, ug mga tigpadayag. Labaw sa tanan, pinaagi sa Iyang Simbahan kita gihatagan sa tanang gikinahanglan nga mga panalangin sa Pag-ula ni Kristo nga matuman lamang pinaagi sa pag-apil sa sagrado nga mga ordinansa.
Ang Simbahan ni Jesukristo sa mga Santos sa Ulahing mga Adlaw mao ang Simbahan ni Kristo dinhi sa kalibutan, gipahiuli niining ulahing mga adlaw alang sa kaayohan sa tanang mga anak sa Dios.
Ako mopamatuod nga samtang kita moduol ngadto kang Kristo ug magpuyo isip mga Santos sa Ulahing mga Adlaw, kita mapanalanginan og dugang sa Iyang gugma, sa Iyang hingpit nga kalipay, ug sa Iyang kalinaw. Sama ni Nephi, kita makabuhat og lisud nga mga butang ug makatabang sa uban sa pagbuhat sa ingon, tungod kay nasayud kita kon kang kinsa kita makasalig.18 Si Kristo ang atong kahayag, ang atong kinabuhi, ug ang atong kaluwasan.19 Sa ngalan ni Jesukristo, amen.