Nakita paagi sa Gahum sang Libro ni Mormon
Ang tanan kinahanglan nga makaeksperiyensya kag makita paagi sa gahum sang mga kamatuoran nga ara sa Libro ni Mormon.
Samtang nagabisita ako sa mga hinaylo [converts] sa ila mga balay, isa sa pirme ko ipamangkot sa ila amo ang kon paano sila kag ang ila pamilya nakahibalo parte sa Simbahan kag kon ngaa nagpabunyag sila. Wala sapayan kon sa sina nga tion ang tawo aktibo nga miyembro ukon tinuig na nga wala nagasimba. Ang sabat pareho lang sa gihapon: upod ang yuhum kag nagasanag ang ila nawong, ginasugdan nila sa pag-istorya kon paano sila nakita. Ang matuod, daw ang istorya sang pagkahaylo amo ang istorya kon paano sila nakita.
Si Jesucristo Mismo ang Ginuo sang mga nagkaladula. Nagaulikid Sia sa mga nagkaladula. Amo ina kon ngaa ginpanudlo Niya ang tatlo ka paanggid nga makita naton sang ika-15 nga kapitulo sang Lucas: ang paanggid sang nadula nga carnero, ang nadula nga sinsilyo, kag sang ulihi, ang nadulang anak. Ining mga istorya may komon nga tema: wala sapayan kon ngaa nadula sila. Wala sapayan kon nakahibalo sila nga nadula sila. May nagapangibabaw nga balatyagon sang kalipay nga nagasinggit, “Kalipay kamo upod sa akon; kay nakita ko ang [ang inang] nadula.”1 Sa katapusan, wala matuod sang may madula sa Iya.2
Tugoti ako nga ipaambit sa inyo sini nga hapon ang isa sa pinakamalahalon nga mga butang para sa akon—ang istorya kon paano ako nakita.
Antes ako mag-15, gin-agda ako sang aton tiyo nga si Manuel Bustos nga magtiner upod sa iya kag sa iya pamilya diri sa Estados Unidos. Dako ini nga oportunidad para makatuon ako sang Ingles. Nagpamiyembro ang akon tiyo sa Simbahan madamo na nga tuig ang nagligad, kag nanamian sia magpaambit sang ebanghelyo. Amo siguro nga ang akon iloy, nga lipod sa akon, nakighambal sa iya kag nagsiling nga mapasugot sia sa pangagda sa isa ka kondisyon: nga indi niya ako pagkumbinsihon nga mangin miyembro sang iya Simbahan. Mga Katoliko kami, kag nangin amo sini sa sulod sang mga henerasyon, kag wala sang rason nga magsaylo. Nagpasugot ang akon tiyo kag gintindugan ang iya pangako sa punto nga indi sia gusto magsabat bisan sang simple lang nga mga pamangkot parte sa Simbahan.
Siyempre, ang indi malikawan sang akon tiyo kag sang iya mabuot nga asawa, nga si Marjorie, amo ang mangin kon sin-o sila.3
Ginhatag sa akon ang kwarto nga may dako nga bulutangan sang mga libro. Nakita ko sa sinang librarya ang halos 200 ka kopya sang Libro ni Mormon sa lainlain nga lenggwahe, nga ang 20 sini sa Espanyol.
Isa ka adlaw, tungod sang pagkamaosyoso, ginkuha ko ang isa ka kopya sang Libro ni Mormon sa Espanyol.
Isa ini sinang mga kopya nga malus-aw nga asul ang takop, nga may laragway ni anghel Moroni sa atubang. Sang ginbuksan ko ini, ara sa una nga pahina nasulat ang masunod nga promisa: “Kag kon inyo mabaton ining mga butang, ginalaygayan ko kamo nga mamangkot kamo sa Dios, ang Wala’y Katapusan nga Amay, sa ngalan ni Cristo, kon ining mga butang indi matuod; kag kon kamo mamangkot sa isa ka bunayag nga tagipusuon, sa matuod-tuod nga tinutuyo, nga may pagtuo kay Cristo, ipakita niya ang kamatuoran sini sa inyo, paagi sa gahum sang Balaan nga Espiritu.”
Kag dayon gindugang pa sini: “Kag paagi sa gahum sang Balaan nga Espiritu mahimo ninyo nga mahibal-an ang kamatuoran sang tanan nga mga butang.”4
Mabudlay ipaathag ang epekto sining balaan nga mga kasulatan sa akon kaisipan kag tagipusuon. Sa prangka nga istorya, wala ako nagapangita sang “kamatuoran.” Isa lamang ako ka tin-edyer, nga malipayon sa iya kabuhi, nga nagapaayaw sa sining bag-o nga kultura.
Pero, nga ginapanumdom inang pangako, sekreto ko nga ginsugdan sa pagbasa ang libro. Sang nagasige ako basa, naintiendihan ko nga kon gusto ko nga may makuha sa pagbasa, kinahanglan ko nga magpangamuyo. Kag nakahibalo kita tanan kon ano ang nagakatabo kon magdesisyon ka nga indi lang basahon kundi ipangamuyo ang Libro ni Mormon. Ti, amo gid ina ang natabo sa akon. Espesyal kag pinasahi ini kaayo para sa akon—huo, pareho sa nagkatabo sa minilyon nga iban pa sa bilog nga kalibutan. Nahibal-an ko paagi sa gahum sang Balaan nga Espiritu nga ang Libro ni Mormon matuod.
Dayon nagkadto ako sa akon tiyo para ipaathag kon ano ang natabo kag nga handa na ako magpabunyag. Indi matago sang akon tiyo ang iya kakibot. Nagsakay sia sa iya awto, nagkadto sa airport, kag nagbalik dala ang akon tiket sa eroplano papuli, nga may sulat para sa akon iloy nga nagasiling, “Wala ako ’ya sang labot sini!”
Sa isa ka bahin husto sia. Direkta ako nga nakita paagi sa gahum sang Libro ni Mormon.
Mahimo nga madamo ang nakita paagi sa aton mapisan nga mga misyonero sa bilog nga kalibutan, ang kada isa sa milagroso nga paagi. Ukon mahimo nga nakita sila paagi sa mga abyan nga hungod nga ginbutang sang Dios sa ila mga alagyan. Mahimo nga nakita sila sang isa ka tawo sa sining henerasyon ukon paagi sa ila mga katigulangan.5 Bisan ano man ang paagi, agud mag-uswag sa matuodtuod nga personal nga pagbag-o, sa mas madali imbes nga sa madugay, kinahanglan nila tanan nga makaeksperiyensya kag makita paagi sa gahum sang mga kamatuoran nga ara sa Libro ni Mormon. Sa amo man, kinahanglan nga sila mismo ang magdesisyon nga magpangako sa Dios nga tinguhaan nila nga tumanon ang Iya mga kasuguan.
Pagbalik ko sa Buenos Aires, narealisar sang akon iloy nga gusto ko gid magpabunyag. Tungod nga may pagkarebelde na ako nga daan, imbes nga kontrahon ako, maalam niya nga ginsuportahan ang akon desisyon. Kag wala niya mahibal-i, sia mismo ang nag-interbyu sa akon para sa bunyag. Sa pagkamatuod, nagapati ako nga ang iya interbyu mas madalom pa sangsa iya sang aton mga misyonero. Siling niya sa akon: “Kon gusto mo magpabunyag, suportahan ta ka. Pero mamangkot ako anay sa imo kag gusto ko nga pamensaron mo sing maayo kag sabton mo ako sing tampad. Nagapangako ka bala nga magsimba tagsa gid ka Domingo?”
Siling ko sa iya, “Huo, siyempre himuon ko ina.”
“Kabalo ka bala kon ano kalawig ang simba?”
“Huo, nakahibalo ako,” siling ko.
Sabat niya, “Ti, kon mabunyagan ka, sigurohon ko nga magsimba ka.” Dayon ginpamangkot niya ako kon matuod gid nga handa ako nga indi mag-inom sang makahulubog ukon magpanigarilyo.
Nagsabat ako, “Huo, siyempre, sundon ko man ina.”
Nga iya ginsugpunan, “Kon mabunyagan ka, siguruhon ko nga himuon mo man ina.” Kag nagapadayon sia nga amo sina sa halos tanan nga kasuguan.
Gintawgan sang akon tiyo ang akon iloy agud hambalon sia nga indi magkabalaka, nga maumpawan lang ako sini. Apat ka tuig ang nagligad, sang nabaton ko ang akon tawag nga mag-alagad sa Uruguay Montevideo Mission, gintawgan ni nanay ang akon tiyo para mamangkot kon san-o pa bala ako maumpawan sini tanan. Ang matuod amo nga sugod sang ginbunyagan ako, ang akon iloy nangin mas malipayon nga nanay.
Natun-an ko nga ang Libro ni Mormon importante sa proseso sang pagbag-o paagi sa pag-eksperiyensya mismo sang pangako nga “ang isa ka tawo magmangin mas malapit sa Dios paagi sa pagsunod sang mga pagsulundan sini.”6
Ginpaathag ni Nefi ang mayor nga katuyuan sang Libro ni Mormon sa sining paagi:
“Kay nagapangabudlay kami sing maukod sa pagsulat, sa paglugpay sang amon mga kaanakan, kag sang amon man mga kauturan, sa pagpati kay Cristo, kag sa pagpakig-uli sa Dios. …
“Kag [gani] nagahambal kita nahanungod kay Cristo, nagakasadya kita kay Cristo, nagawali kita nahanungod kay Cristo, nagapanagna kita nahanungod kay Cristo, … agud nga mahibal-an sang aton mga kaanakan kon sa ano nga ginhalinan sila mahimo nga magpaabot para sa kapatawaran sang ila mga sala.”7
Ang bilog nga Libro ni Mormon napun-an sang amo man kasagrado nga katuyuan.
Sa sini nga rason, ang bisan sin-o nga manugbasa nga nagapangako sang sinsero nga pagtuon sini, upod ang espiritu sang pagpangamuyo, indi lamang magatuon parte kay Cristo kundi magatuon halin kay Cristo—labi na kon nagdesisyon sila nga “tilawan ang epektibo nga gahum sang pulong”8 kag indi ini pagsikwayon dayon bangud sang lain nga pagpati9 sa kon ano nga ginhambal sang iban sa mga butang nga wala nila mabasa.
Si Pangulong Russell M. Nelson nagsiling: “Kon akon panumdumon ang Libro ni Mormon, madumduman ko ang tinaga nga gahum. Ang mga kamatuoran sa Libro ni Mormon may gahum sa pagpaayo, pagpasulhay, pagpanumbalik, pagbulig, pagpabakod, pagpaumpaw, kag pagpasadya sang aton mga kalag.”10
Ang akon imbitasyon sining hapon sa kada isa sa aton, bisan ano na kita kadugay nga miyembro sang Simbahan, amo nga tugoti ang gahum sang mga kamatuoran sang Libro ni Mormon nga makita kag sapupuhon kita liwat kag sa adlaw-adlaw samtang matutom kita nga nagapangita sang personal nga rebelasyon. Matabo ini kon tugotan naton.
Maligdong ako nga nagapamatuod nga ang Libro ni Mormon nagaunod sang kabug-osan sang ebanghelyo ni Jesucristo kag nga ang Balaan nga Espiritu magapamatuod sang kamatuoran sini sa tagsa ka tion sa tawo nga, upod ang sinsero nga tagipusuon, nagapangita sang kaalam para sa kaluwasan sang ila kalag.11 Sa ngalan ni Jesucristo, amen.