Espirituhanon nga Kapasidad
Bilang Iya matutom nga mga disipulo, makabaton kamo sang personal nga inspirasyon kag rebelasyon nga nagasanto sa mga kasugoan nga husto gid sa inyo.
Sang nagapagwa ako sa isa ka Young Women camp sini nga tig-ilinit, isa ka matahum nga young woman ang naghatag sa akon sang gamay nga papel. Diri nagapamangkot sia, “Paano ko mahibal-an kon ang Dios may luyag ihambal sa akon?” Nanamian ako sang iya pamangkot. Ang aton mga kalag nagahandum nga magkonekta sa aton langitnon nga puluy-an. Luyag naton mabatyagan nga kinahanglanon kag mapuslanon kita. Pero may tinion nga nabudlayan kita magpain sang aton kaugalingon nga mga panghunahuna sa inanay nga mga pagpabatyag sang Espiritu. Ang mga propeta, dumaan kag sa karon, nagpanudlo nga “ang tagsa ka butang nga nagapangagda sa paghimo sang maayo, nagahalin ini kay Cristo.”1
Si Pangulong Russel M. Nelson nagtanyag sang simple, gamhanan nga pangagda: “Pinalangga ko nga mga kauturan nga babayi, nagapangabay ako sa inyo nga dugangan ang inyo espirituhanon nga kapasidad sa pagbaton sang rebelasyon. … Pilia nga himuon ang espirituhanon nga buluhaton nga kinahanglanon agud maagom ang dulot sang Balaan nga Espiritu kag mabatian ang tingug sang Espiritu sing mas masami kag mas klaro.”2
Luyag ko maghambal sa inyo sini nga aga halin sa akon tagipusuon parte sa apat ka mga pamaagi nga madugangan ang inyo espirituhanon nga kapasidad nga magbaton sang rebelasyon.
1. Hungod nga Maghatag Tion kag Lugar nga Mabatian ang Tingug sang Dios
Sa inyo pagpili nga maghatag kag magdedikar sang tion adlaw-adlaw agud magpalapit sa tingug sang Dios, labi na gid sa Libro ni Mormon, sa indi madugay ang Iya tingug mangin mas klaro kag mas makilala ninyo.
Sa kabaliskaran, ang mga isturbo kag gahod nga nagapuno sang kalibutan kag aton mga puluy-an makapabudlay nga mabatian ang Iya tingug. Ang mga kinahanglanon sang adlaw-adlaw nga pagpangabuhi makapuno sang aton mga hunahuna kag tagipusuon nga kon indi kita maghalong, wala na kita sing lugar para sa inanay nga mga pagpabatyag sang Balaan nga Espiritu.
Ang Propetang si Joseph Smith nagpanudlo nga sa masami ang Dios nagapahayag sang Iya kaugalingon “sa mga tawo sing sekreto, sa ila hulot; sa kamingawan ukon kapatagan, kag sa pangkabilogan, nga wala sing gahod ukon kinagamo.”3
Luyag ni Satanas nga ihamulag kita sa tingug sang Dios paagi sa paglikaw sa aton sa sinang malinong nga mga luglar. Kon ang Dios nagahambal sa malinong, mahinay nga tingug, kinahanglan naton magpalapit agud mabatian Sia. Panumduma lang ang matabo kon matutom kita magkonekta sa langit pareho sa aton katutom nga dalayon magkonekta sa Wi-Fi! Magpili sang tion kag lugar nga magpamati sang tingug sang Dios adlaw-adlaw! Kag tipigi ining sagrado nga tion sing istrikto, kay madamo kaayo ang nagasandig diri.
2. Mag-akto sa Gilayon
Kon makabaton kamo sang mga pagpabatyag kag dayon desidido nga mag-akto, ang Ginuo makagamit sa inyo. Mas pirme kamo nagaakto, mas makilala ninyo ang tingug sang Espritu. Mas dugang ninyo nga makit-an ang paggiya sang Dios kag nga “handa Sia … sa pagpahayag sang Iya hunahuna kag pagbuot.”4 Kon magpabuyan-buyan kamo, basi malipatan ninyo ang pagpabatyag ukon madula ang tsansa nga magbulig sa isa ka tawo para sa Dios.
3. Magkuha sang Inyo Sugo halin sa Ginuo
Ang pangamuyo nga ginakalangkagan nga sabton sang Amay nga Langitnon amo ang aton pagpangayo nga tuytuyan sa isa nga nagakinahanglan sang aton bulig. Si Pangulong Eyring nagpanudlo sa aton nga magpangita sang rebelasyon paagi sa pagpamangkot sa Dios kon sin-o ang aton mabuligan para sa Iya. “Kon mamangkot kamo sang mga amo sina, ang Balaan nga Espiritu magaabot kag makabatyag kamo sang mga pagduso parte sa mga butang nga mahimo ninyo para sa iban nga tawo. Kon maglakat kamo kag maghimo sinang mga butang, yara kamo sa buluhaton sang Ginuo, kag kon yara kamo sa buluhaton sang Ginuo, nagakabagay kamo sa dulot sang Balaan nga Espiritu.”5
Makapangamuyo kamo kag makapangayo sa Ginuo sang sugo. Sa paghimo ninyo, sarang Niya gamiton ang inyo ordinaryo nga ikasarang sa pagpahanabo sang Iya pinasahi nga buluhaton.
Ang akon lolo [sa iloy] nga si Fritz Hjalmar Lundgren, imigrante halin sa Sweden sang nagaedad sia 19 katuig. Nag-abot sia sa Amerika nga isahanon, nga may maleta kag anum lang katuig sang pormal nga edukasyon. Nga indi makahambal sang Ingles, nagkadto sia sa Oregon kag nag-obra didto bilang manugtroso, kag upod sa lola ko [sa iloy] kag akon iloy, nagbuylog sa Simbahan. Wala gid sia nakapanguna sa ward, pero bilang matutom nga home teacher, nagdala sia sing masobra 50 ka lainlain nga mga pamilya pabalik sa Simbahan. Paano niya nahimo ina?
Pagkatapos nga napatay si Lolo, nagapangukay ako sa kahon sang iya mga papeles kag nakakita sang sulat halin sa tawo nga nagbalik sa simbahan tungod sang pagpalangga ni Lolo. Ang sulat nagasiling, ”nagapati ako nga ang sekreto ni Brother Fritz amo nga yara sia pirme sa buluhaton para sa Amay nga Langitnon.”
Ato nga sulat halin kay Brother Wayne Simonis. Ginbisitahan sia ni Lolo kag ginkilala ang tagsa ka miyembro sang iya pamilya. Wala madugayi, ginhambalan sila ni Lolo nga kinahanglanon sila kag gin-agda sila nga magsimba. Pero sadto nga Dominggo, si Brother Simonis nagbugtaw nga ginaligban—wala pa niya natapos ang atop sang iya balay kag ginapaabot ang ulan sina nga semana. Nagdesisyon sia nga makadto sa simbahan, mangamusta kay Lolo, kag dayon malakat kag magpauli agud tapuson ang atop. Ang iya pamilya pwede makatambong sa sacrament miting nga wala sia.
Maayo ang lakat sang iya plano tubtob nga sa atop, nakabati sia nga may nagasaka sa hagdan. Sa iya mga pulong: “Pagtangla ko … nagatindog sa ibabaw sang hagdan si Brother Fritz. Ginhatagan niya lang ako sinang daku nga yuhum. Sang primero, nahuy-an ako kag pamatyag ko daw bata ako nga diutay nga nadakpan nga nagaligoy. Dayon … nainit ako. [Pero si Brother Fritz] nag-uba sang iya amerikana kag ginpakabit ini sa hagdan. Sang ginkalukos niya ang mga pako sang iya puti nga kamisedentro, nagbalikid sia sa akon kag nagsiling, ‘Brother Simonis, may isa ka pa ka martilyo? Importante gid siguro ining obra, indi gani, indi mo pag-ibilin ang imo pamilya, kag kon amo ini kaimportante, luyag ko nga buligan ka. Pagtulok ko sa iya mga mata, ang nakita ko gid lang kaayo kag Cristohanon nga gugma. Nadula ang akon kainit. … Ginhimos ko ang akon galamiton sadto nga Dominggo kag nagsunod sa suod ko nga abyan panaog sa hagdan kag pabalik sa simbahan.”
Si Lolo nagbaton sang iya buluhaton halin sa Ginuo, kag nakahibalo sia nga dapat niya pangitaon ang nadula nga karnero. Pareho nga ang apat ka tawo nagdala sang ila abyan nga paralitiko sa atop kag gintunton sia paidalom agud maayo ni Jesucristo,6 sa amo man ang buluhaton ni Lolo nagdala sa iya sa ibabaw sang atop. Ang Ginuo nagapadala sang rebelasyon sa mga nagatinguha nga magbulig sa iban.
4. Magpati kag Magsalig
Sang sini lang, nakabasa ako parte sa isa pa gid ka dungganon nga misyonero nga nagbaton sang iya buluhaton halin sa Ginuo. Si Aaron nagtudlo sa hari sang mga Lamanhon nga natingala kon ngaa ang utod ni Aaron nga si Ammon wala nag-upod agud magtudlo sa iya. “Kag si Aaron nagsiling sa hari: Yari karon, ang Espiritu sang Ginuo nagtawag sa iya sa iban nga duog.7
Sang ginbasa ko inang mga pulong, ang Espiritu naghambal sa akon tagipusuon: ang tagsa sa aton may lainlain nga misyon nga himuon, kag kon kis-a ang Espritu mahimo magtawag sa aton sa “iban nga duog”. May madamo nga mga paagi sa pagpauswag sang ginharian sang Dios bilang nagahimo-kasugtanan, nagatipig-kasugtanan nga mga disipulo ni Jesucristo. Bilang Iya matutom nga mga disipulo, makabaton kamo sang personal nga inspirasyon kag rebelasyon nga nagasanto sa mga kasugoan nga husto gid sa inyo. May pinasahi kamo nga mga misyon kag mga papel nga buluhaton sa kabuhi kag pagahatagan sang pinasahi nga paggiya agud matuman ang mga ini.
Si Nefi, ang utod ni Jared, kag bisan si Moises tanan may daku nga tubig nga gintabok—kag ang kada isa naghimo sini sa nagkalain-lain nga paagi. Si Nefi namanday sang “mga tablon nga pulido ang pagkahimo.”8 Ang utod ni Jared nagpasad sang mga barkasa nga “pikit subong sang isa ka pinggan,”9 Kag si Moises kag iya katawhan “naglakat sa mamalang duta sa tunga sang dagat.”10
Ang kada isa nagbaton sang ginpasigo nga direksyon, nga husto gid sa ila, kag ang kada isa nagsalig kag nag-akto. Ang Ginuo matinatapon sinang mga nagatuman kag, sa pulong ni Nefi, “magahanda sang paagi para sa [aton] agud mahimo ang butang nga iya ginasugo.”11 Tandai nga si Nefi nagasiling, “sang paagi”— indi “ang paagi.”
Ginakalipatan bala naton ukon ginabale-wala ang personal nga mga ginasugo sang Ginuo bangod naghanda Sia “sang paagi” nga lain sangsa aton ginapaabot?
Ang akon lolo gintuytoyan sa di-kinaandan nga lugar—suksok ang amerikana, sa ibabaw sang atop, isa ka Dominggo. Magsalig sa Dios nga tuytoyan kamo, bisan pa inang paagi lain sangsa inyo ginapaabot ukon lain sangsa iban.
Ang mga Santos sa Ulihing mga Adlaw may madamo nga korte kag kadakuon, pero “ang tanan palareho sa Dios”—“itom kag puti, ulipon kag hilway, lalaki kag babayi,” may bana kag wala, manggaranon kag imol, bata kag tigulang, bug-os kabuhi nga miyembro kag bag-o nga hinaylo.12 Bisan sin-o ka man ukon ano man ang imo ginaagyan, ginaagda ka sa lamesa sang Ginuo.13
Kon ang pagtinguha kag paghimo sang pabuot sang Amay mangin tikang sang imo adlaw-adlaw nga kabuhi, sigurado nga tuytoyan ka sa pagbag-o kag paghinulsol.
Ang bag-o nga programa sang simbahan para sa kabataan kag mga lamharon ginpasad sa pundasyon sang pagtuon sa pagpangita sang rebelasyon, sa pagdiskubre kon ano ang luyag sang Ginuo nga aton himuon, kag dayon pag-akto sa sina nga direksyon. Ang tagsa sa aton, bisan ano man ang edad ukon kahimtangan makatinguha sa pagpangita, pagbaton, kag pag-akto. Sa inyo pagsunod sining walay katapusan nga sulundan nga ginhatag para sa aton panahon, mas magapalapit kamo kay Jesucristo—sa Iya gugma, Iya kasanag, Iya paggiya, Iya paghidaet, kag Iya nagapang-ayo kag nagabulig nga gahum. Kag magadugang ang inyo espirituhanon nga kapasidad nga mangin adlaw-adlaw nga instrumento sa Iya mga kamot sa pagpahanabo sang Iya dakung buluhaton. Sa ngalan ni Jesucristo, amen.