Magsalig sa Ginuo
Ang aton gid lang segurado nga masandigan amo ang magsalig sa Ginuo kag sa Iya pagpalangga sa Iya mga anak.
Isa ka sulat nga nabaton ko sang nagligad ang magabukas sang akon topiko. Ang tagsulat nagabinagbinag sa pagpakasal sa templo sa tawo nga napatay ang iya walay katapusan nga kaupod. Mangin ika-duha sia nga asawa. Ini ang iya pamangkot: makaangkon man bala sia sang iya kaugalingon ng balay sa madason nga kabuhi, ukon magapuyo bala sia upod sa iya bana kag sa una sini nga asawa? Ginhambalan ko lang sia nga magsalig sa Ginuo.
Mapadayon ako sa eksperiyensia nga ginsugid sang ginasaligan ko nga kaupod sa buluhaton, nga ipaambit ko sa iya pagpahanugot. Pagkapatay sang pinalangga nga asawa kag iloy sang iya kabataan, ang isa ka amay nagpangasawa liwat. Pila ka hamtong na nga kabataan ang nagpamatok sa liwat nga pagpangasawa kag nagpangayo sang laygay sa malapit nga paryente nga respetado nga lider sang Simbahan. Pagkabati sang mga rason sang ila pagpamatok nga nasentro sa mga kahimtangan kag mga kaangtanan sa kalibutan sang espiritu ukon mga ginharian sang himaya nga maagom pagkatapos sang Katapusan nga Paghukom, ining lider nagsiling: “Nabalaka kamo sa indi husto nga mga butang. Dapat ninyo kabalakhan kon bala makakadto kamo sa sinang mga lugar. Magtutok sa sina. Kon makakadto kamo didto, mangin mas manami ini tanan sangsa sarang ninyo mahunahuna.”
Daw ano ka makapaumpaw nga panudlo! Magsalig sa Ginuo!
Sa mga sulat nga akon nabaton, nakahibalo ako nga may iban nga natublag sang mga pamangkot parte sa kalibutan sang espiritu nga aton pagapuy-an pagkatapos nga mapatay kita kag antes kita mabanhaw. Ang pila nagahunahuna nga sa kalibutan sang espiritu magapadayon ang madamo sang dutan-on nga mga kahimtangan kag mga problema sa sining mortal nga kabuhi. Ano gid bala ang aton nahibal-an sa mga kahimtangan sa kalibutan sang espiritu? Nagapati ako nga husto ang sinulatan sang isa ka propesor sang relihiyon sa BYU: “Kon pamangkuton naton ang aton mga kaugalingon kon anong nahibal-an naton parte sa kalibutan sang espiritu halin sa apat ka balaan nga mga kasulatan, ang sabat amo nga ‘indi pareho kadamo sangsa aton ginapamensar’”1
Siyempre, nakahibalo kita halin sa balaan nga mga kasulatan nga kon ang aton mga lawas mapatay, padayon kita nga magakabuhi bilang mga espiritu sa kalibutan sang espiritu. Ang balaan nga mga kasulatan nagapanudlo man nga ining kalibutan sang espiritu natunga sa mga nangin “matarong” ukon “maayo” sa kabuhi kag sa sinang mga nangin malain. Ginalaragway man sang mga ini kon paano ang pila ka tampad nga mga espiritu nagatudlo sang ebanghelyo sa mga nangin malain ukon rebelde (tan-awa sa 1 Pedro 3:19; Doctrine and Covenants 138:19–20, 29, 32, 37). Pinakaimportante, ang moderno nga rebelasyon nagapahayag nga ang buluhaton sang kaluwasan nagapadayon sa kalibutan sang espiritu (tan-awa sa Doctrine and Covenants 138:30–34, 58), kag bisan pa nga ginasugo kita nga indi pagpabuyanbuyanan ang aton paghinulsol sa sining kabuhi (tan-awa sa Alma 13:27), ginatudloan kita nga ang pila ka mga paghinulsol posible didto (tan-awa sa Doctrine and Covenants 138:58).
Ang buluhaton sang kaluwasan sa kalibutan sang espiritu nagalakip sang paghilway sang mga espiritu halin sa masami ginalaragway sang balaan nga mga kasulatan bilang “pagkagapos.” Ang tanan sa kalibutan sang espiritu napaidalom sa pila ka sahi sang pagkagapos. Ang importante nga rebelasyon ni Pangulong Joseph F. Smith nga makita sa seksyon 138 sang Doctrine and Covenants, nagasiling nga ang matarong nga mga minatay, nga yara sa kahimtangan sang “katawhay” (Doctrine and Covenants 138:22) sa ila pagpaabot sang Pagkabanhaw (tan-awa sa Doctrine and Covenants 138:16), “nagkabig sang malawig nga pagkahilayo sang ila mga espiritu sa ila mga lawas nga pagkagapos” (Tan-awa saDoctrine and Covenants 138:50).
Ang malain nagaantos man sang lain naman nga pagkagapos. Bangod sang wala nahinulsolan nga mga sala, yara sila sa gintawag ni Apostol Pedro nga “bilanggoan” sang espiritu (1 Pedro 3:19; tan-awa man sa Doctrine and Covenants 138:42). Ining mga espiritu ginlaragway nga “nagapos” ukon “mga bihag” (Doctrine and Covenants 138:31, 42) ukon bilang “gintiklod sa gwa nga kadudulman” nga may “hinibi, kag halayaon kag pagbagrot sang mga ngipon” samtang nagahulat sila sang pagkabanhaw kag paghukom (Alma 40:13–14).
Ang pagkabanhaw sang tanan nga yara sa kalibutan sang espiritu ginapasalig paagi sa Pagkabanhaw ni Jesucristo (tan-awa sa 1 Mga Taga-Corinto 15:22), bisan pa matabo ini sa lainlain nga tinion sa lainlain nga mga grupo. Tubtob sinang pinili nga tion, ang balaan nga mga kasulatan nagasugid sa aton parte sa mga hilikton sa kalibutan sang espiritu nga halos tanan buluhaton sang kaluwasan. Luwas sina, diutay lang ang iban nga ginpahayag. Ang ebanghelyo ginawali sa mga wala hinalung-ong, sa di-mahinulsulon, kag sa mga rebelde agud nga mahilway sila sa ila pagkagapos kag makasulong pakadto sa mga bugay nga ginatigana sa ila sang mapinalanggaon nga Amay nga Langitnon.
Ang pagkagapos sa kalibutan sang espiritu sang matarong nga nahaylo nga mga kalag amo nga kinahanglan nila maghulat—kag basi pa gani matugotan sa pagtulod (sang mga buhi)—sa paghimo sang tal-os nga mga ordinansa sa duta agud mabunyagan sila kag maagom ang mga bugay sang Balaan nga Espiritu (tan-awa sa Doctrine and Covenants 138:30–37, 57–58).2 Ining tal-os nga mga ordinansa sa duta nagatugot man sa ila nga magpadayon sa idalom sang awtoridad sang priesthood sa pagpadaku sang kadam-an sang mga matarong nga makawali sang ebanghelyo sa mga espiritu sa bilanggoan.
Luwas sining panguna nga mga kamatuoran, diutay lang gid ang makita sa aton balaan nga mga kasulatan parte sa kalibutan sang espiritu pagkatapos sang kamatayon kag antes sang Katapusan nga Paghukom.3 Gani ano pa gid ang aton nahibal-an parte sa kalibutan sang espiritu? Madamo nga mga miyembro sang Simbahan ang nakakita sang mga panan-awon ukon iban pa nga mga inspirasyon nga nagapahibalo sa ila kon paano ang paghikot ukon pagdumala sa kalibutan sang espiritu, pero ining personal nga espirituhanon nga mga eksperiyensa indi dapat hangpon ukon itudlo bilang opisyal nga doktrina sang Simbahan. Kag, siyempre, may madamo nga mga haumhaum sang mga miyembro kag sang iban nga tawo sa ginbalhag nga mga balasahon pareho sang mga libro parte sa bibi-kamatayon nga mga eksperiyensa.4
Parte sini tanan, ang maalam nga paandam nanday Elder D. Todd Christofferson kag Neil L. Andersen sa mga mensahe sang nagliligad nga mga komperensya importante nga dumdumon. Si Elder Christofferson nagpanudlo: “Dapat dumdumon nga indi tanan nga ginahambal sang isa ka lider sang Simbahan, subong man ukon sang una, doktrina na gid dayon. Sa kabilogan, ginahangop sa Simbahan nga ang ginahambal sang isa ka lider sa isa ka okasyon sa masami nagarepresentar sang iya personal, bisan nabinagbinag sing maayo nga opinyon, nga wala ginatuyo nga mangin opisyal ukon dapat sundon sa bilog nga Simbahan.5
Sa nagdason nga komperensya, si Elder Andersen nagpanudlo sining salandigan nga prinsipyo: “Ang doktrina ginatudlo sang tanan nga 15 ka miyembro sang Unang Panguluhan kag Korum sang Dose. Wala ini natago sa di-maathag nga parapo sang isa ka pamulong-pulong,”6 Ang proklamasyon parte sa pamilya, nga ginpirmahan sang tanan nga 15 ka mga propeta, mga manugtulok, kag mga manugpanan-aw isa ka manami nga paanggid sinang prinsipyo.
Luwas sa isa ka pormal nga butang pareho sa proklamasyon parte sa pamilya, ang matagnaon nga mga panudlo sang mga Pangulo sang Simbahan, nga ginpamatud-an sang iban nga mga propeta kag mga apostoles, mga halimbawa man sini. Parte sa kahimtangan sa kalibutan sang espiritu, ang Propetang si Joseph Smith sang nagahilapit sia sa pagtakop sang iya pag-alagad, naghatag sang duha ka panudlo nga masami ginpanudlo sang mga nagbulos sa iya. Isa sini amo ang iya pinanudlo sa King Follett sermon nga ang mga miyembro sang pamilya nga nangin matarong magaululupod sa kalibutan sang mga espiritu.7 Ang isa pa gid amo ang iya pinamulong sa isa ka lubong sa katapusan nga tuig sang iya kabuhi: “Ang mga espiritu sang matarong ginapataas sa mas daku kag mas mahimayaon nga buluhaton … [sa] kalibutan sang mga Espiritu. … Indi [S]ila malayo sa aton, kag nakahibalo kag nakahangop sang aton mga hunahuna, mga balatyagon, kag mga hulag, kag sa masami nagakasubo sa sina.”8
Gani, ano na ang parte sa pamangkot ko kagina kon diin ang mga espiritu nagapuyo? Kon inang pamangkot dawsa di-kinaandan ukon witi-witi sa inyo, hunahunaa ang madamo sang inyo mga pamangkot, ukon bisan atong natentar kamo sa pagsabat base sa isa ka butang nga inyo nabatian halin sa isa ka tawo sang una? Sa tanan sinang mga pamangkot parte sa kalibutan sang espiritu, nagapanugyan ako sang duha sa sabat. Una, dumduma nga ang Dios nagapalangga sa Iya kabataan kag sigurado nga magahimo sang kon ano nga pinakamaayo para sa tagsa sa aton. Ikaduha, dumduma ining kilala nga panudlo sa Biblia, nga tuman nga nakabulig sa akon parte sa madamo nga wala masabat nga mga pamangkot:
‘[Magsalig sa Ginuo sa bug-os mo nga tagipusuon; kag dili magsandig sa imo kaugalingon nga paghangop.
“Sa tanan mo nga dalanon kilalaha sia, kag magatuytoy sia sa imo mga banas” (Mga Hulubaton 3:5–6).
Sing kaanggid, si Nefi nagahingapos sang iya dalayawon nga salmo sa sining mga pulong: “O Ginuo, nagasalig ako sa imo, kag magasalig ako sa imo sa wala’y katubtuban. Indi ako magbutang sang akon pagsalig sa butkon nga unod” (2 Nefi 4:34).
Mahimo kita tanan maghaumhaum sing sekreto parte sa mga kahimtangan sa kalibutan sang espiritu, ukon hambalan ini ukon ang iban pa nga wala masabat nga mga pamangkot sa pamilya ukon iban pa nga suod nga pagtililipon. Pero indi naton pag-ipanudlo ukon paggamiton bilang opisyal nga doktrina ang wala nakalab-ot sa talaksan sang opisyal nga doktrina. Ang paghimo sini wala nagapauswag sang buluhaton sang Ginuo kag ayhan magapaluya sang mga tawo nga nagapangita sang ila kaugalingon nga kaumpawan ukon pagpalig-on paagi sa personal nga rebelasyon nga ginatigana sa aton sang plano sang Dios. Ang sobra nga pagsalig sa personal nga mga panudlo ukon mga haumhaum makapalayo sa aton sa pagtutok sa aton pagtuon kag mga pagpaninguha nga maga padugang sang aton panghangop kag magabulig sa aton sa pagpadayon sa dalan sang kasugtanan.
Ang magsalig sa Ginuo isa ka pamilyar kag matuod nga panudlo sa Ang Simbahan ni Jesucristo sang mga Santos sa Ulihing mga Adlaw. Amo ina ang panudlo ni Joseph Smith sang ang mga Santos sang una nag-agi sa sobra nga paghingabot kag dawsa indi malampuwasan nga mga kabudlayan.9 Amo ina sa gihapon ang pinakamaayo nga prinsipyo nga magamit naton sa aton mga pagpanikasog nga magtuon ukon sa aton mga pagpaninguha nga maumpawan sa mga kabudlayan nga aton masugata sa mga butang nga wala pa napahayag ukon nabaton nga opisyal nga doktrina sang Simbahan.
Inang amo man nga prinsipyo nagakaigo sa wala masabat nga mga pamangkot parte sa mga paghugpong sa madason nga kabuhi ukon mga luyag nga mga pagbag-o bangod sang mga hitabo ukon mga kalapasan sa mortalidad. Madamo gid ang wala pa naton nahibaloan nga ang aton lang gid nga sigurado nga salandigan amo ang magsalig sa Ginuo kag sa Iya pagpalangga sa Iya kabataan.
Sa paghingapos, ang aton nahibaloan parte sa kalibutan sa espiritu amo nga ang buluhaton sang kaluwasan sang Amay kag sang Anak nagapadayon didto. Ang aton Manluluwas nagsugod sang buluhaton sa pagpahayag sang kahilwayan sa mga bilanggo (tan-awa sa 1 Pedro 3:18–19; 4:6; Doctrine and Covenants 138:6–11, 18–21, 28–37), kag inang buluhaton nagapadayon samtang ang mga takos kag kalipikado nga mga mensahero nagapadayon sa pagwali sang ebanghelyo, lakip na ang paghinulsol, sa ila nga nagakinahanglan pa sang iya sini nagatinlo nga epekto (tan-awa sa Doctrine and Covenants 138:57). Ang tuyo sang tanan nga ginapakita sa opisyal nga doktrina sang Simbahan, ginhatag sa moderno nga rebelasyon.
“Ang mga minatay nga nagahinulsol pagatubuson, paagi sa pagkamatinumanon sa mga ordinansa sang balay sang Dios,
“Kag pagkatapos nga nabayaran nila ang silot sang ila mga kalapasan, kag natinloan, magabaton sang padya suno sa ila mga binuhatan, kay mga manunubli sila sang kaluwasan” (Doctrine and Covenants 138:58–59).
Ang tulumanon sang tagsa sa aton amo ang magtudlo sang doktrina sang ginpanumbalik nga ebanghelyo, magtuman sang mga kasugoan, magpalangga kag magbulig sa isa kag isa, kag maghimo sang buluhaton sang kaluwasan sa balaan nga mga templo.
Nagasaksi ako sang kamatuoran sang akon mga ginpanghambal diri kag sa mga kamatuoran nga gintudlo kag igatudlo pa sa sining komperensya. Nangin posible ini tanan bangod sang Pagpasag-uli ni Jesucristo. Sa aton nahibaloan halin sa moderno nga rebelasyon, Iya “ginahimaya ang Amay, kag ginaluwas ang tanan nga binuhatan sang iya mga kamot” (Doktrina kag mga Kasugtanan 76:43; pagdagmit gindugang). Sa ngalan ni Jesucristo, amen.