Pagtindog sa Aton mga Promisa kag mga Kasugtanan
Ginaagda ko kamo nga binagbinagon ang mga promisa kag mga kasugtanan nga inyo ginhimo upod ang Ginuo, kag sa iban, sing may dako nga integridad, nga nakahibalo nga ang imo tinaga masaligan.
Pinalangga kong mga kauturan, sa aton pagtakop sining sesyon, kabay nga dumdumon sang tagsa sa aton ang mga panaksihon nga aton karon mabatian parte sa mga kamatuoran sang ebanghelyo ni Jesucristo. Ginpakamaayo kita nga magtililipon sa sining sagrado nga tion agud mapabakod ang aton promisa sa Ginuong Jesucristo nga kita Iya mga alagad kag Sia ang aton Manluluwas.
Ang importansya sang paghimo kag pagtipig sang mga promisa amo ang isa ka bagay nga pirme ko ginapamensar. Ano bala kaimportante sa imo ang tumanon ang imo mga hinambal? ang masaligan? ang himuon ang imo ginhambal nga imo himuon? ang magtinguha nga tipigan ang imo sagrado nga mga kasugtanan? Ang mag-agom sang integridad? Paagi sa pagpangabuhi nga nagatuman sang aton mga promisa sa Ginuo kag sa iban, nagalakat kita sa dalan sang kasugtanan pabalik sa aton Amay nga Langitnon kag aton mabatyagan ang Iya pagpalangga sa aton mga kabuhi.
Ang aton Manluluwas nga si Ginuong Jesucristo amo ang aton pinakamaayo nga Ehemplo kon parte sa paghimo kag pagtipig sang mga promisa kag mga kasugtanan. Nagkari Sia sa duta nga nagapromisa nga Iya himuon ang pagbuot sang Amay. Nagpanudlo Sia sang mga prinsipyo sa pulong kag sa buhat. Ginpasag-ulian Niya ang aton mga sala agud nga mabuhi kita sa liwat. Gintuman Niya ang tagsa sang Iya mga promisa.
Ang amo bala mahimo man ihambal sa tagsa sa aton? Ano ang mga peligro, kon maglisa kita diutay, matentar diutay, ukon wala masyado ginatipigan ang aton mga pangako? Paano kon magtalikod kita sa aton mga kasugtanan? Ang iban bala magakari kay Cristo tungod sa aton halimbawa? Ang imo bala nga tinaga masaligan? Ang pagtipig sang mga promisa indi isa ka binatasan; isa ini ka kinaiya sang pagka-disipulo ni Jesucristo.
Tungod pirme ginapamensar ang aton mga kahuyang sa dutan-on nga kabuhi, ang Ginuo nagpromisa, “Magkalipay kamo kag indi magkahadlok kay ako, nga Ginuo, kaupod ninyo kag magapabilin sa tupad ninyo.”1 Akon nabatyagan ang Iya presensya sang nagkinahanglan sang pagpasalig, pagpaumpaw, ukon mas dako nga espirituhanon nga panan-aw ukon kusog, kag nangin labi nga mapainubosn kag mapinasalamaton sa diosnon nga pagpakig-upod.
Ang Ginuo nagsiling nga ang tagsa ka kalag nga magtalikod sa iya mga sala kag magakari sa akon kag magtawag sa akon ngalan, kag magpati sa akon tingug, kag magtuman sang akon mga kasugoan, makakita sang akon nawong kag makahibalo nga buhi ako.2 Ayhan amo ina ang Iya pinakadako nga promisa.
Akon natun-an ang kaimportante sang pagtipig sang akon tinaga sa akon pagkalamharon. Isa ka halimbawa nga kasubong sina amo ang sang nagtindog ako sing tiso kag naghambal sang Panumpa sang Scout . Ang aton kaangtanan sa Boy Scouts sang America, sa iya subong nga paghingapos magapabilin nga importante nga pinanubli sa akon kag sa sining Simbahan. Sa organisasyon sang Scouting, sa madamo nga mga kalalakin-an kag mga kababayin-an nga matutom nga nag-alagad bilang mga lider sang Scout, sa mga iloy—matuodtuod nga pagdayaw para gid sa ila—kag sa mga young men nga nakapartisipar sa Scouting, nagasiiling ako, “Salamat.”
Sa sini mismo nga sesyon, ang aton pinalangga nga propeta nga si Pangulong Russell M. Nelson, kag Elder Quentin L. Cook nag-anunsyo sang mga pagbag-o nga magatutok sa liwat sang aton atensyon sa mga lamharon kag e-base ang aton mga organisasyon sa mga ginpahayag nga kamatuoran. Dugang pa, sang nagligad lang gid nga Dominggo, sanday Pangulong Nelson kag Pangulong M. Russell Ballard nagpaathag sang bag-o nga programa para sa mga Kabataan kag mga Lamharon sang Ang SImbahan ni Jesucristo sang mga Santos sa Ulhing mga Adlaw para sa bug-os nga Simbahan. Isa ini ka pangkalibutanon nga tikang nga nasentro sa aton Ginuo kag Manluluwas, nga si Jesucristo. Ang Unang Panguluhan kag Korum sang Napulo’g Duha ka mga Apostoles nagaisa sa sini nga direksyon, kag personal nga nagasaksi nga ang Ginuo naggiya sa aton sa tagsa ka tikang nga aton ginhimo. Nalangkag ako para sa mga kabataan kag mga lamharon sang Simbahan nga maeksperiyensyahan ining gintingob nga pagtutok sa ila alangay sa panimalay kag sa simbahan—paagi sa pagtuon sa ebanghelyo, pag-alagad kag mga kahiwatan, kag personal nga paglambo.
Ang tema sang mga Lamharon para sa magaabot nga tuig, 2020 nagahambal parte sa bantog nga promisa ni Nefi nga “maglakat kag himuon.” Sia nagsulat, “Kag natabo ini, nga ako, si Nefi, nagsiling sa akon amay: Malakat ako kag himuon ang mga butang nga ginasugo sang Ginuo, kay nahibal-an ko nga ang Ginuo wala nagahatag sing mga kasuguan sa mga anak sang tawo, luwas nga magahanda sia sang paagi para sa ila agud mahimo nila ang butang nga iya ginasugo sa ila.”3 Bisan nga madugay na yadto ginhambal, kita sa Simbahan aton ginatindogan inang promisa sa karon.
Ang “maglakat kag himuon” nagakahulugan sang paghimo sang mga butang sa pamaagi sang Ginuo, indi kay sang iya sang kalibutan, pagbaton kag pag-akto sa personal nga bugna, pagpangabuhi sing matarong nga may pag-asa kag pagtuo sa bwas damlag, paghimo kag pagtipig sang mga kasugtanan nga sundon si Jesucristo, kag sa sina magadugang ang aton pagpalangga para sa Iya, ang Manluluwas sang kalibutan.
Ang kasugtanan isa ka nagabaslanay nga promisa sa tunga naton kag sang Ginuo. Bilang mga miyembro sang Simbahan, kita nagapakighisugot sa bunyag nga dalhon ang ngalan ni Jesucristo, sa pagpangabuhi pareho nga Sia nagkabuhi. Pareho sadtong ginbunyagan sa mga Tubig sang Mormon, nagpakighisugot kita nga mangin Iya katawhan, “magpas-an sang palas-anon sang isa-kag-isa, agud nga mangin mamag-an ang mga ini; …magpangasubo upod sadtong mga nagapangasubo, … magpaumpaw sadtong mga nagakinahanglan sang kaumpawan kag magtindog bilang mga saksi sang Dios sa tanan nga mga tinion kag sa tanan nga duog.”4 Ang aton pag-minister sa tagsatagsa sa Simabahan nagapakita sang aton pangako nga tumanon yadto mismong mga promisa.
Kon mag-ambit kita sang sakramento, ginabag-o naton ina nga kasugtanan nga dalhon sa aton kaugalingon ang Iya ngalan kag nagahimo sing dugang nga mga promisa nga mag-uswag. Ang aton adlaw-adlaw nga mga pamensaron kag mga akto alangay dalagko kag magagmay, nagapakita sang aton pangako sa Iya. Ang Iya sagrado nga promisa sa baylo amo nga, “Kon inyo ako dalayon nga ginadumdom inyo maangkon ang akon Espiritu sa pag-upod sa inyo.”5
Ang akon pamangkot sa karon amo ang kon bala aton ginatindugan ang aton mga promisa kag mga kasugtanan ukon ang mga ini kon kaisa mga hapaw nga mga pangako, nga basta lang nga ginhimo kag madali mabali? Kon maghambal kita sa isa ka tawo, “Pangamuyuan ta ka,”ginahimo bala naton? Kon mangako kita, “Makadto ako didto sa pagbulig,” himuon bala naton? Kon nagpangako kita sa aton kaugalingon nga mabayad sang utang, ginahimo bala naton? Kon ginabayaw naton ang aton mga kamot sa pagtib-ong sang kapareho nga miyembro sa isa ka calling nga kon sayuron magsuporta, ginahimo bala naton?
Isa ka gab-i, sang lamharon ako, ang akon iloy nagpungko upod sa akon sa tiilan sang akon kama kag seryusu nga naghambal sa kaimportante sang pagkabuhi sang Pulong sang Kaalam. “Nakahibalo ako gikan sa mga eskperiyensya sang iban sang nagligad nga mga tinuig,” siling niya, “sang pagkadula sang pagkaespirituhanon kag pagkasensitibo tungod sang indi pagtuman sang Pulong sang Kaalam.” Nagtulok sia deretso sa akon mga mata, kag akon nabatyagan ang iya mga tinaga nga nagapanalupsop sa akon tagipusuon. “Mangako ka sa akon karon Ronnie, [Ronnie ang tawag niya sa akon], nga permi mo nga ipangabuhi ang Pulong sang Kaalam.” Sinsero ako nga nangako sa iya, kag gintipigan ko ini sa tanan sining mga tinuig.
Ina nga pangako nakabulig gid sa akon kon kaupod ako sang akon mga kaabyanan sang lamharon pa ako, kag sang ulihi nga yara ako sa diin ang akon mga kaupod nagailinom. Naghimo ako sang desisyon sang temprano pa nga sundon ang mga kasuguan sang Dios, kag indi na kinahanglan maghimo pa liwat sang desisyon. Ang Ginuo nagsiling, “Ako, nga Ginuo, obligado kon ginahimo ninyo ang akon ginasiling; apang kon wala ninyo ginahimo ang akon ginasiling, wala kamo sang promisa.”6 Ano ang Iya ginsiling sa ila nga nagatuman sang Pulong sang Kaalam? Nga maangkon naton ang promisa sang ikaayong-lawas, kusog, kaalam,ihibalo, kag mga anghel nga magaprotekta sa aton.7
Mga pila ka tuig ang nagligad, si Sister Rasband kag ako yara sa Salt Lake Temple para sa paghugpong sang isa namon ka anak nga babayi. Samtang nagatindog kami sa gwa sang templo upod ang mas manghod nga anak nga babayi nga indi pa hamtong para magtambong sa seremonya, naghambal kami parte sa kaimportante sang pagpahugpong sa balaan nga templo sang Dios. Kasubong sang gintudlo sa akon sang akon iloy pila ka tuig ang nagligad, ginsingganan namon ang amon anak nga babayi, “Luyag namon nga mahugpong ka sa templo, kag luyag namon nga magpromisa ka nga kon makakita ka sang kapares, magpahamtang ka sang petsa upod sa iya agud mahugpong sa templo.” Nagpangako sia sa amon.
Nagsiliing sia nga sumugod sadto ang amon paghambalanay kag ang iya promisa nag-protekta sa iya kag nagpahanumdom sa iya “kon ano ang pinakaimportante.” Sia sang ulihi naghimo sang sagrado nga mga kasugtanan sang sia ginhugpong sa iya bana sa templo.
Si Pangulong Nelson nagtudlo, “Aton ginapabaskog ang gahum sang Manluluwas sa aton mga kabuhi kon nagahimo kita sang sagrado nga mga kasugtanan kag nagatipig sinang mga kasugtanan sing eksakto. Ang aton mga kasugtanan nagahigot sa aton sa Iya kag nagahatag sa aton sang diosnon nga ikasarang.”8
Kon ginatipigan naton ang aton mga promisa sa tagsa-tagsa mas may kasiguraduhan nga tipigan naton ang aton nga mga promisa sa Ginuo. Dumduma ang mga pulong sang Ginuo: “Sa bagay nga ginhimo niyo ini sa isa sang labing kubus sining akon mga utud, ginhimo ini ninyo isa akon.”9
Panumdumon naton ang mga halimabwa sang mga promisa sa balaan nga mga kasulatan. Si Amon kag ang mga anak ni Mosias sa Libro ni Mormon nagpromisa sa “pagwali sang pulong sang Dios.”10 Sang madakpan si Ammon sang mga soldado nga mga Lamanhon, gindala sia sa atubang sang Hari sang mga Lamanhon nga si Lamoni. Nagpangako sia sa hari, “Mangin imo ako alagad.”11 Sang ang mga kawatan nag abot agud mangawat sang mga karnero sang hari, gin-utod ni Amon ang ila mga butkon. Nakibot gid kaayo ang hari, nagpamati sia sa mensahe ni Amon sa ebanghelyo kag nahaylo.
Si Rut, sa Daan nga katipan, nagpromisa sa iya ugangan, “Bisan diin ka makadto, magakadto ako.”12 Nagkabuhi sia nga gintuman ang iya mga promisa. Ang maayong Samariahanon, sa paanggid sa bag-o nga katipan, nagpromisa sa tagbalay kon iya tatapon ang pilason nga dumuluong, “Bisan ano nga magamit mo nga dugang, ako sa akon pagbalik magabayad sa imo.”13 Si Zoram, sa Libro ni Mormon, nagpromisa nga magkadto sa kakahuyan upod si Nephi kag iya nga mga kauturan. Si Nefi nagsiling, “Sang makapanumpa sa amon si Zoram, nadula ang amon kahadlok nahanungod sa iya.”14
Ano ang yara sa dumaan nga promisa “ginhimo sa mga amay” subong sa nalaragway sa balaan nga mga kasulatan nga “ang mga tagipusuon sang mga kabataan magaliso sa ila mga amay”?15 Sa kabuli antes sa duta sang aton ginpili ang plano sang Dios, naghimo kita sang promisa nga magbulig sa pagtipon sang Israel sang alangay nga mga bahin sang belo. “Nagpakigbulig kita sa Ginuo,” si Elder John A. Widstoe nagpaathag pila katuig ang nagligad. “Ang pag-implementar sang plano nangin indi lamang buluhaton sang amay, kag buluhaton sang Manluluwas, apang aton man buluhaton.”16
“[Ang] pagtipon amo ang pinakaimporante nga butang nga nagakatabo sa kalibutan karon,” Si Pangulong Nelson nagsiling sa iya paglibot sa kalibutan. “Kon ginatumod naton ang pagtipon, simple naton ginasiling nga ang ining importante nga kamatuoran: ang tagsa ka anak sang aton Amay nga Langitonon, sa mga buhi kag minatay, nagakadapat makabati sang mensahe sang ginpanumbalik nga ebanghelyo ni Jesucristo.”17
Bilang isa ka Apostoles sang Ginuong Jesucristo, Ako nagahingapos sa isa ka pangagda kag promisa. Una, ang imbitasyon: Ginaagda ko kamo nga binagbinagon ang mga promisa kag mga kasugtanan nga ginhimo ninyo sa Ginuo, kag sa iban, sing may dako nga integridad, nga nakahibalo nga ang imo tinaga masaligan. Ikaduha, ginapromisa ko sa inyo, kon ginahimo ninyo ini, ang Ginuo magapalig-on sang inyo tinaga kag magapakamaayo sang inyo ginaubra samtang inyo ginatinguhaan sing walay kakapoy nga kaukod nga ipasad ang inyo mga kabuhi, inyo mga pamilya, kag Ang Simbahan sang mga Santos sa ulihing mga Adlaw. Mangin kaupod Sia ninyo pinalangga kong mga kauturan kag mahimo ninyo nga may kaisog, magpaabot nga “batonon sa langit, agud nga paagi sa sini [kamo] mag-puyo upod sa Dios sa isa ka kahimtangan sang di-matapos nga kalipayan … kay ang Ginuong Dios nagsiling sini.”18
Sa sini ako nagapamatuod kag nagapromisa sa ngalan ni Jesucristo, amen.