Pagpasidungog sa Iya Ngalan
Bangod nga may pagkakilal-an kag pagkalakip sa kasugtanan, gintawag kita sa ngalan ni Jesucristo.
Samtang malipayon nga ginapaabot sang mga ginikanan ang pagkabun-ag sang ila bata, may yara sila sing responsibilidad sa pagpili sang ngalan para sa ila bag-o nga lapsag. Siguro sang natawo ka, ginhatagan ka sang ngalan nga ginpasa-pasa sang inyo pamilya sa pila na ka henerasyon. Ukon siguro ang ngalan nga ginhatag sa imo nangin popular sa tuig ukon lugar kon diin ka natawo.
Ang propetang si Helaman kag ang iya asawa naghatag sing makahuluganon nga mga ngalan sa ila mga lapsag nga sanday Nefi kag Lehi. Si Helaman sang ulihi nagsiling sa iya mga anak:
“Ginhatag ko sa inyo ang mga ngalan sang aton unang mga ginikanan … nga kon inyo ginadumdum ang inyo mga ngalan mahimo ninyo sila nga madumduman; kag kon inyo sila madumduman mahimo ninyo nga madumduman ang ila mga binuhatan … nga ini nasiling, kag nasulat man, nga ang mga ini maayo.
“Gani, mga anak ko, luyag ko nga inyo himuon inang maayo.”1
Ang mga ngalan nanday Nefi kag Lehi nakabulig sa ila nga madumduman ang maayong mga buhat sang ila mga katigulangan kag nagpadasig sa ila nga maghimo man sing maayo.
Mga sister, bisan diin man kita nagapuyo, ano man nga lengguahe ang aton ginahambal, ukon kita 8 katuig ang edad ukon 108, may yara kita tanan sing isa ka espesyal nga ngalan nga may amo man sining mga katuyoan.
“Kay tanan [kita] nga ginbawtismuhan sa Cristo nagsuklob sa Cristo… kay [kita] tanan isa kay Cristo Jesus.”2
Bilang mga miyembro sang Simbahan ni Jesucristo sang mga Santos sa Ulihing mga Adlaw, “[na]numpa kita una sang aton kahanda nga dal-on sa aton kaugalingon ang ngalan ni Cristo … paagi sa ordinansa sang bunyag.”3 Paagi sa sining kasugtanan, nagpromisa kita nga dumdumon Sia pirme, tumanon ang Iya mga kasugoan, kag alagaran ang iban. Ang aton kahanda nga tipigan ining kasugtanan ginabag-o kada adlaw sang Sabbath kon mag-ambit kita sang sakramento kag magkalipay liwat sa bugay sang “[pag]ginawi sa bag-ong pagkabuhi.”4
Ang ngalan nga ginhatag sa aton sang natawo kita nagarepresentar sang aton indibidwal nga pagkakilal-an kag nagahatag sa aton sang pagkalakip sa aton dutan-on nga mga pamilya. Apang, sang kita “nabun-ag liwat” sa bunyag, nagsangkad ang aton paghangop sa kon sin-o kita. “Tungod sang kasugtanan nga inyo ginhimo pagatawgon kamo nga mga anak ni Cristo, … kay yari karon, … gin-anak niya kamo sing espirituhanon; kay nagsiling kamo nga ang inyo mga tagipusuon ginbag-o paagi sa pagtuo sa iya ngalan; gani, ginbun-ag kamo niya.”5
Gani, nga may pagkakilal-an kag pagkalakip sa kasugtanan, gintawag kita sa ngalan ni Jesucristo. Kag “wala na [sing] iban nga ngalan nga ginhatag ukon bisan ano nga iban pa nga dalan ukon paagi nga sa amo ang kaluwasan mahimo nga makaabot sa mga anak sang tawo, lamang sa ngalan kag paagi ni Cristo, ang Ginuo nga Makaako.”6
Ang ngalan ni Jesus nabal-an na antes pa Sia natawo. Sa kay Haring Benjamin, isa ka anghel nagpropesiya, “Kag pagatawgon sia nga si Jesucristo, ang Anak sang Dios, … kag ang iya iloy pagatawgon nga si Maria.”7 Ang Iya buluhaton sang “nagatubos nga gugma,”8 ginpahibalo man sa mga anak sang Dios sang ang ebanghelyo yara sa duta, halin sa mga adlaw ni Adan kag Eva tubtob sa aton karon nga panahon, agud ila “mabal-an kon sa ano nga ginhalinan sila mahimo nga magpaabot para sa kapatawaran sang ila mga sala.”9
Sang nagligad nga tuig, si President Russell M. Nelson nagpalab-ot sang “pagpangabay bilang propeta” sa mga sister “sa pagporma sang palaabuton paagi sa pagbulig tipon sang nagalapta nga Israel.” Gin-agda niya kita nga basahon ang Libro ni Mormon kag “markahan ang tagsa ka bersikulo nga nagasambit ukon nagatumod sa Manluluwas.” Nagpangabay sia nga aton “[hungdon] nga maghambal parte kay Cristo, nga magkalipay kay Cristo, kag magwali parte kay Cristo sa [aton pamilya] kag kaabyanan.” Ayhan nagsugod na kamo sa pagbaton sang mga bugay sang iya promisa nga “kamo kag sila mas magalapit sa Manluluwas. … Kag ang mga pagbag-o, bisan ang mga milagro, amat-amat nga matabo.”10
Ang aton promisa nga pirme dumdumon ang Manluluwas nagahatag sa aton sang kusog sa pagtindog para sa kamatuoran kag pagkamatarong—bisan ara man kita sa dako nga kadam-an ukon sa aton masim-ong nga mga duog, sa diin wala sang may nakahibalo sang aton mga buhat luwas sa Dios. Kon ginadumdum naton Sia kag nga ginadala naton ang Iya ngalan, wala kita sing higayon para ipakanubo ang aton kaugalingon ukon sa hambog nga mga paghukom. Kon natuon ang aton mga mata sa Manluluwas, makita naton ang aton mga kaugalingon kon sin-o gid kita—hinigugma nga anak sang Dios.
Ang aton pagdumdum sang aton mga kasugtanan nagapahipos sang kalibutanon nga mga kabalaka, nagabaylo sang pagduda sa kaugalingon sa kaisog, kag nagahatag sang paglaum sa tinion sang pagtilaw.
Kag kon masandad kag matumba kita sa aton pag-uswag sa banas sang kasugtanan, kinahanglan lang naton dumdumon ang Iya ngalan kag Iya mahigugmaon nga kaluoy sa aton. “Kay nagaangkon sia sang tanan nga gahum, tanan nga kaalam, kag tanan nga paghangop; nahangpan niya ang tanan nga mga butang, kag isa sia ka maluluy-on nga Tinuga … sa sadtong mga magahinulsol kag magapati sa iya ngalan.”11 Siyempre wala na sing mas matam-is pa nga tunog sangsa ngalan ni Jesus sa tanan nga, may masinulub-on nga tagipusuon kag mahinulsulon nga espiritu, nagatinguha sa “paghimo sing mas maayo kag mangin mas maayo.”12
Si President Nelson nagtudlo: “Wala na ina karon nga puwede ka mangin mahipos lang kag kampante nga Kristiyano. Ang imo relihiyon indi lamang parte sa pagkadto sa simbahan kon Domingo. Parte ini sa pagkamatuod nga disipulo halin Domingo sang aga tubtob Sabado sang gab-i. … Wala sing ginatawag nga ‘part-time’ nga disipulo sang Ginuong Jesucristo.”13
Ang aton kahanda sa pagdala sa aton kaugalingon sang ngalan ni Cristo labaw pa sangsa pormal nga paghinambalanay. Indi ini isa ka pasapayan nga promisa ukon ginhimo-himo lang. Indi ini isa ka seremonya ukon name tag nga ginasuksok naton. Indi ini isa ka hulubaton nga aton itungtong sa estante ukon ipakabit sa dingding. Ang Iya amo ang isa ka ngalan nga “ginasuklob,”14 nasulat sa aton mga tagipusuon, kag “nakurit sa [aton] mga nawong.”15
Ang nagabayad-sala nga sakripisyo sang Manluluwas dapat dumdumon, pirme, paagi sa aton mga hunahuna, mga buhat, kag pagkomunikar sa iban. Indi lamang Niya ginadumdom ang aton mga ngalan, kundi ginadumdom Niya kita pirme. Ang Manluluwas nagsiling:
“Kay malimtan bala sang isa ka babayi ang iya bata nga nagasuso, nga indi sia magkaluoy sa anak sang iya taguangkan? Huo, mahimo nga malimot sila, apang ako indi magkalimot sa imo, O panimalay sang Israel.
“Yari karon, gintigib ko ikaw sa mga palad sang akon mga kamot.”16
Si President George Albert Smith nagtudlo, “Padunggi ang mga ngalan nga imo ginadala, bangod pila ka adlaw may pribilihiyo ka kag obligasyon sa pagreport … sa imo Amay sa langit … sang kon ano ang imo nahimo sa [sinang mga ngalan].”17
Pareho sang mga ngalan ni Nefi kag Lehi nga ginpili sing maayo, puwede man bala ini masiling kag masulat parte sa aton nga matuod kita nga mga disipulo sang Ginuong Jesucristo? Ginapadunggan bala naton ang ngalan ni Jesucristo nga handa naton nga gindala sa aton mga kaugalingon? Alangay bala kita nga “manug-alagad kag manugsaksi”18 sang Iya mahigugmaon nga kaluoy kag Iya nagatubos nga gahum?
Sang sini lang, nagapamati ako sa Libro ni Mormon. Sa katapusan nga kapitulo sang 2 Nefi, ako nakabati kay Nefi nga naghambal sang butang nga wala ko pa gid nabasa nga amo sina sang una. Sa bug-os sang iya ginsulat, nagatudlo kag nagasaksi sia parte sa “Manunubos,” sa “Balaan sang Israel,” sa “Kordero sang Dios,” kag sa “Mesias.” Pero sang natapos niya ang iya ginsulat, nabatian ko sia nga naghambal sining mga pulong: “Nagakasadya ako sa kaathagan; nagakasadya ako sa kamatuoran; nagakasadya ako sa akon Jesus, kay gintubos niya ang akon kalag.”19 Sang nabatian ko ining mga pulong, nagkalipay ang akon tagipusuon kag ginpamatian ko sing madamo nga beses. Nabal-an ko kag nabaton ang ina nga bersikulo subong nga nabal-an ko kag nabaton ang akon kaugalingon nga ngalan.
Ang Ginuo nagsiling, “Huo, bulahan ining katawhan nga nagapasugot sa pagdala sang akon ngalan; kay sa akon ngalan sila pagatawgon; kag akon sila.”20
Bilang mga miyembro sang Simbahan ni Jesucristo sang mga Santos sa Ulihing mga Adlaw, kabay nga aton “malipayon nga [pagadal-on sa aton kaugalingon] ang ngalan ni Cristo”21 paagi sa pagpasidungog sang Iya ngalan sa gugma, debosyon, kag maayong mga buhat. Nagasaksi ako nga Sia “ang Cordero sang Dios, huo, bisan ang Anak sang Walay Katapusan nga Amay.”22 Sa ngalan sang Iya balaan nga anak nga si Jesucristo, amen.