Duha ka Dako nga Kasugoan
Dapat tinguhaan gid naton nga tumanon ang duha ka dako nga kasugoan. Sa paghimo sini, balansehon naton ang sa ulot sang layi kag gugma.
Mahal kong mga sister sa ebanghelyo ni Jesucristo, ginatamyaw ko kamo bilang gintangdo nga mga bantay sang Dios sang walay katapusan nga pamilya. Si President Russell M. Nelson nagtudlo sa aton, “Ginpanumbalik ining Simbahan agud nga ang mga pamilya mahuman, mahugpong, kag mapahitaas sing walay katapusan.”1 Ina nga panudlo may importante nga implikasyon sa mga tawo nga tomboy, agi, silahis, ukon transgender, nga kilala bilang LGBT.2 Si President Nelson nagpahanumdom man sa aton nga indi kita “kinahanglan nga mag-ugyonay [pirme] agud maghigugmaanay.”3 Ining mga panudlo sang propeta importante sa pang-panimalay nga mga paghambalanay agud masabat ang mga pamangkot sang mga kabataan kag mga pamatan-on. Mainampuon ako nga nagpangayo sing inspirasyon nga maghambal sa sining tumalambong bangod apektado kamo mismo sining mga pamangkot, nga direkta ukon di-direkta nga nagaapekto sang tagsa ka pamilya sa Simbahan.
I.
Sugdan ko sang gintudlo ni Jesus nga duha ka dako nga kasugoan.
“Higugmaa ang Ginuo nga imo Dios sa bug-os mong tagipusuon, kag sa bug-os mong kalag, kag sa bug-os mong hunahuna.
“Ini amo ang dako kag nahaunang sugo.
“Kag ang ikaduha kaangay sini, Higugmaa ang imo isigkatawo subong sa imo kaugalingon.”4
Nagakahulugan ini nga ginsugo kita nga palanggaon ang tagsa-tagsa, tungod ang paanggid ni Jesus sang maayong Samaritano nagatudlo nga ang tagsa-tagsa aton nga isigkatawo.5 Pero ang aton kaukod nga tumanon ining ika-duha nga kasugoan indi dapat magpalipat sa aton sang una, nga higugmaon ang Dios sa bug-os naton nga tagipusuon, kalag, kag hunahuna. Ginapakita naton ina nga gugma paagi sa “[pag]bantay sang [Iya] mga sugo.”6 Ginapangayo sa aton sang Dios nga tumanon naton ang Iya mga kasugoan bangod paagi lamang sa sina nga pagtuman, lakip ang paghinulsol, nga sarang kita magbalik sa pagpuyo sa Iya presensya kag mangin perpekto pareho sa Iya.
Sa iya pamulongpulong sa bataon nga mga hamtong sang Simbahan, si President Russell M. Nelson naghambal parte sa iya gintawag nga “mabakod nga koneksyon sa ulot sang gugma sang Dios kag sang Iya mga layi.”7 Ang mga layi nga nagaaplikar sing labing dako sa mga isyu nga angot sa sinang ginakilala bilang LGBT amo ang layi sang Dios sang pag-asawahay kag iya sini kaupod nga layi sang pagkaputli. Alangay sila nga importante sa plano sang kaluwasan sang aton Amay sa Langit para sa Iya mga anak. Subong sang gintudlo ni President Nelson, “Ang mga layi sang Dios lubos nga ginapahulag sang Iya walay dulonan nga gugma para sa aton kag Iya kaluyag para sa aton nga mangin tanan nga mahimo kita nga mangin.”8
Si President Nelson nagtudlo: “Madamo nga pungsod … ang naghimo nga legal sang pagpakasal sang pareho nga babayi ukon lalaki. Bilang mga miyembro sang Simbahan, ginarespeto naton ang mga layi sang duta … , lakip ang kasal sa sibil. Apang, ang kamatuoran, nga sa ginsuguran … ang pag-asawahay ginmando sang Dios! Kag tubtob sa karon ginalaragway ini Niya nga bilang sa tunga sang isa ka lalaki kag isa ka babayi. Wala ginliwat sang Dios ang Iya paglaragway sang pag-asawahay.”
Si President Nelson nagpadayon: “Wala man ginliwat sang Dios ang Iya layi sang pagkaputli. Ang mga rekisito sa pagsulod sa templo wala man ginliwat.”9
Nagpahanumdom si President Nelson sa aton tanan nga “ang aton obligasyon bilang mga Apostoles amo nga magtudlo gid lang sang kamatuoran. Ina nga obligasyon wala nagahatag sa [mga Apostoles] sing awtoridad nga liwaton ang diosnon nga layi”10 Gani, akon mga sister, ang mga lider sang Simbahan dapat magtudlo pirme sang pinasahi nga importansya sang pag-asawahay sa tunga sang isa ka lalaki kag isa ka babayi kag sang angot nga layi sang pagkaputli.
II.
Ang buluhaton sang Simbahan ni Jesucristo sang mga Santos sa Ulihing mga Adlaw parte gid sa paghanda sang mga anak sang Dios para sa selestiyal nga ginharian, kag ilabi na para sa iya sini pinakamataas nga himaya, pangkahitaasan ukon kabuhi nga walay katapusan. Ang ina nga pinakamataas nga mapadulungan posible lamang paagi sa pag-asawahay sa walay katapusan.11 Ang kabuhi nga walay katapusan nagalakip sang matugahon nga mga gahum nga importante nga bahin sa pag-isa sang lalaki kag babayi12—ang ginalaragway sang moderno nga rebelasyon bilang ang “pagpadayon sang mga kaliwatan tubtob sa walay katapusan.”13
Sa iya pamulongpulong sa bataon nga mga hamtong, si President Nelson nagtudlo, “Ang pagsunod sa mga layi sang Dios magaamlig sa inyo samtang nagauswag kamo padulong sa pangkahitaasan”14—nga mangin kaangay sang Dios nga may napahitaas nga kabuhi kag diosnon nga potensyal sang aton Langitnon nga mga Ginikanan. Ina amo ang padulungan nga luyag naton para sa tanan nga aton ginahigugma. Bangod sa sinang paghigugma, indi naton puwede palabawon ang aton gugma sa mga kasugoan kag sa plano kag buluhaton sang Dios, nga nabal-an naton nga magadala sa sinang aton ginahigugma sang ila pinakadako nga kalipay.
Pero madamo sinang aton ginahigugma, lakip ang pila nga may yara sang napanumbalik nga ebanghelyo, nga wala nagapati sa ukon indi magsunod sang mga kasugoan sang Dios parte sa pag-asawahay kag sa layi sang pagkaputli. Paano na sila?
Ang doktrina sang Dios nagapakita nga kita tanan Iya mga anak kag nga gintuga Niya kita agud magkalipay.15 Ang moderno nga rebelasyon nagatudlo nga ang Dios naghatag sang plano para sa mortal nga eksperiyensya nga sa diin ang tanan makapili sa pagkamatinumanon agud maangkon ang Iya pinakamataas nga mga bugay ukon makahimo sang mga pagpili nga nagapadulong sa isa sang mas manubo sing himaya nga mga ginharian.16 Bangod sang dako nga gugma sang Dios para sa tanan sang Iya mga anak, inang mas manubo nga mga ginharian mas labaw gihapon kanami sangsa mahunahuna sang tawo.17 Ang Pagbayad-sala ni Jesucristo nagahimo sini tanan nga posible, sa Iya “paghimaya sang Amay, kag pagluwas sang tanan nga gintuga sang iya mga kamot.”18
III.
Naghambal na ako parte sa una nga kasugoan, ano naman ang parte sa ika-duha? Paano kita magtuman sang kasugoan nga higugmaon ang aton mga isigkatawo? Ginatinguhaan naton nga kumbinsihon ang aton mga miyembro nga inang nagasunod sa mga panudlo kag mga hulag sang mga tomboy, agi, silahis, ukon transgender dapat tratuhon sing mahigugmaon nga ginasugo sang aton Manluluwas nga ipakita sa tanan naton nga isigkatawo. Gani, sang gindeklarar ang pagpakasal sang pareho nga babayi ukon lalaki nga legal sa Estados Unidos, ang Unang Pangulohan kag Korum sang Dose nagpahayag: “Ang ebanghelyo ni Jesucristo nagatudlo sa aton nga higugmaon kag tratuhon ang tanan nga tawo nga may kaluoy kag kaayo—bisan pa nga wala kita nagaugyon. Ginapahayag namon nga inang nagagamit sang mga layi ukon mga desisyon sang korte nga nagaawtorisar sang pagpakasal sang pareho nga babayi ukon lalaki dapat nga tahuron.”19
Dugang pa, indi naton dapat paghingabuton inang indi pareho sa aton mga ginapatihan kag mga pangako.20 Masubo nga ang pila ka mga tawo nga nagapangatubang sining mga isyu padayon nga nagabatyag nga indi sila importante kag ginasikway sing pila ka miyembro kag mga lider sa aton mga pamilya, mga ward, kag mga stake. Tanan kita dapat magtinguha nga mangin mas maayo kag mas matinahuron.
IV.
Tungod sa mga rason nga indi naton maintiendihan, lainlain ang aton mga hangkat sa aton mortal nga mga eksperiyensya. Pero nakahibalo kita nga ang Dios magabulig sa tagsa sa aton nga malampuwasan ining mga hangkat kon sinsero kita nga mangayo sang Iya bulig. Pagkatapos sang pag-antos kag paghinulsol tungod sa mga paglapas sang mga layi nga gintudlo sa aton, tanan kita may padulungan nga isa ka ginharian sang himaya. Ang pinakaimportante kag katapusan nga paghukom mangin iya sang Ginuo, nga sia lamang ang may nagakadapat nga ihibalo, kaalam, kag grasya sa paghukom sa tagsa sa aton.
Sa karon, kinahanglan kita magtinguha sa pagtuman sang duha ka dako nga kasugoan. Sa paghimo sini, balansehon naton ang sa ulot sang layi kag gugma—pagtipig sang mga kasugoan kag paglakat sa banas sang kasugtanan, samtang nagahigugma sang aton mga isigkatawo. Ini nga paglakat nagakinahanglan sang aton pagpangayo sang diosnon nga inspirasyon sa kon ano ang suportahon kag kon ano ang pamatukan kag kon paano maghigugma kag magpamati sing matinahuron kag magtudlo samtang ginahimo ini. Ang aton paglakat nagakinahanglan nga indi naton pag-ikompromiso ang mga kasugoan kundi ipakita naton ang bug-os nga paghangop kag gugma. Ang aton paglakat dapat mangin mahinangpanon sa mga kabataan nga indi sigurado sang ila sekswal nga panan-aw, pero ginapunggan sini ang temprano nga pagbansag sa ila bangod, sa kalabanan sang kabataan, ang amo nga pagduhaduha nagabuhin sing dako pagkalipas sang panahon.21 Ang aton paglakat nagapamatok sa pagbuyok papalayo sa banas sang kasugtanan kag ginapanghiwala sini ang pagsuporta sang bisan sin-o nga nagapahilayo sang mga tawo sa Ginuo. Sa sini tanan madumduman naton nga nagapromisa ang Dios sang paglaum kag labing kalipay kag mga bugay para sa tanan nga nagatuman sang Iya mga kasugoan.
V.
Ang mga iloy kag mga amay kag tanan kita responsable sa pagtudlo alangay sang duha ka dako nga kasugoan. Para sa mga kababayin-an sang Simbahan, si President Spencer W. Kimball naglaragway sinang katungdanan sa sining dako nga propesiya: “Kalabanan sang mayor nga pagtubo nga maabot sa Simbahan sa ulihing mga adlaw matabo bangod madamo sang maayo nga kababayin-an sang kalibutan … magabuylog sa Simbahan sa daku nga kadamuon. Matabo ini sa bagay nga ang mga kababayin-an sang Simbahan magpakita sang pagkamatarong kag kaathag sa paghambal sa ila kabuhi kag sa bagay nga ang mga kababayin-an sang Simbahan makabig nga pinasahi kag lain… sa mga kababayin-an sang kalibutan. … Gani ang matabo amo nga ang huwaran nga mga kababayin-an sang Simbahan mangin importante nga puwersa alangay sa kadamuon kag sa espirituwal nga pagtubo sang Simbahan sa ulihing mga adlaw.”22
Parte sa sina nga propesiya, si President Russell M. Nelson nagpahayag nga “ang adlaw nga napanan-aw ni President Kimball amo ang subong nga panahon. Kamo ang mga kababayin-an nga iya napanan-aw!”23 Kita nga nakabati sinang propesiya 40 ka tuig na ang nagligad, wala nakarealisar nga kalakip sinang mahimo maluwas sang mga kababayin-an sining Simbahan amo ang ila mismo mahal nga mga abyan kag pamilya nga sa karon naimpluwensiyahan sang kalibutanon nga mga prioridad kag yawan-on nga mga paglimbong. Ang akon pangamuyo kag pagpakamaayo amo nga magtudlo kamo kag maghikot sa pagtuman sang ina nga propesiya, sa ngalan ni Jesucristo, amen.