Malig-on nga Pangako kay Jesucristo
Ang Dios nagaagda sa aton nga kalimtan sing lubos ang aton daan nga mga kinabatasan kag magsugod sa isa ka bag-o nga kabuhi kay Cristo.
Sang nagligad nga Abril, akon gindidikar ang templo sa Kinshasa Democratic Republic sang Congo.1 Indi maesplikar sang mga tinaga ang kalipay ko kag sang mga matinuohon nga mga Congohanon nga makita ang templo nga ginpahanungod sa ila pungsod.
Ang mga nagasulod nga mga indibidwal sa Templo sang Kinshasa makakita sang orihinal nga painting nga gintig-ulohan nga Congo Falls.2 Nagapadumdum ini sa mga nagakadto sa templo sang ila malig-on nga pangako nga kinahanglan nga ma-angkla ang ila mga kaugalingon kay Jesucristo kag magsunod sa dalan sang kasugtanan sa plano sang aton Amay nga Langitnon. Ang mga busay nga ginapakita sa painting nagatawag sang igtalupangod sa gawi nga nangin kinaandan masobra isa ka siglo ang nagligad sa una nga mga hinaylo sa Pagka-Cristohanon sa Congo.
Antes sang ila pagkahaylo, nagasimba sila sa walay kabuhi nga mga bagay sa pagpati nga ang ini nga mga bagay nagaangkon sang di-kinaandan nga mga gahum.3 Pagkatapos sang ila pagkahaylo, madamo ang nagkaladto sa isa sang di-maisip nga mga busay nga gaubay sa Suba sang Congo,kasubong sang Nzongo Falls4 Ginpanghaboy sining bag-o nga mga hinaylo ang ila ginadios-dios nga mga bagay sa mga busay bilang simbolo sa Dios kag sa iban nga ila ginabuy-an ang ila dumaan nga mga tradisyon kag ginabaton ang ila bag-o nga pagtuo kay Jesucristo. Hungod nila nga wala ginahaboy ang ila mga bagay sa mga kalmado kag manabaw nga mga katubigan, ginahaboy nila ang mga ini sa nagabuyong nga mga tubig sa daku nga busay sa diin ang mga bagay indi na makuha balik. Ining mga akto nangin tanda sang isa ka panugod sang malig-on nga pangako kay Jesucristo.
Ang mga tawo sa nagkalainlain nga mga duog kag panahon nagpakita sang ila pangako kay Jesucristo sa magkaanggid nga mga pamaagi.5 Ang katawhan sa Libro ni Mormon nga ginkilala bilang mga Anti-Nefi-Lehi “nagbutang sang mga hinganiban sang ila pagribok,” ginpanglubong ang mga ini sing “madalom sa duta” bilang panaksihon sa Dios … nga indi na gid sila maggamit sang [ila] mga hinganiban sa liwat.7 Sa paghimo sini nagpanaad sila nga sundon ang mga pinanudlo sang Dios kag indi na magbawi sang ila pangako. Ining akto amo sadto ang panugod sang “pagkahaylo sa Ginuo” kag indi gid pagpalayo.7
Ang “pagkahaylo sa Ginuo” nagakahulugan sang pagbiya halin sa isa ka gawi, nga ginadirektahan sang dumaan nga sistema sang pagpati kag sundon ang bag-o nga gawi nga nasandig sa pagtuo sa plano sang Amay nga Langitnon kag kay Jesucristo kag sa Iya Pagpasag-uli. Ining pagbag-o masobra pa sangsa intelektwal nga pagbaton sang mga pinanudlo sa ebanghelyo. Nagaimpluwensya ini sang aton pagkatawo, nagabag-o sang aton paghangop sa kahulugan sang kabuhi,kag nagaresulta sa wala-nagabag-o nga pagkamainunungon sa Dios. Ang kinaugalingon nga mga handum nga nagakontra sinang magapaangkla sa Manluluwas kag pagsunod sa dalan sang kasugtanan nagakadula kag ginabuslan sang isa ka determinasyon nga sundon ang kagustuhan sang Amay nga Langitnon.
Ang pagkahaylo sa Ginuo nagasugod sa malig-on nga pangako sa Dios nga ginasundan sang paghimo sinang pangako nga mangin kabahin sang aton kabuhi. Ang pag-establisar sang kasubong nga pangako isa ka bug-os kabuhi nga proseso nga nagakinahanglan sang pagpasensya kag padayon nga paghinulsol. Sang ulihi, ini nga pangako mangin kabahin na kon si sin-o kita, nakadulot sa aton kaugalingon nga sentido, kag mangin yara pirme sa aton mga kabuhi. Pareho bala nga wala kita nagakalipat sang aton kaugalingon nga ngalan bisan ano pa man ang aton nga ginapamensar, indi kita malipat sa pangako nga nasulat sa aton mga tagipusuon.8
Ang Dios nagaagda sa aton nga kalimtan sing lubos ang aton daan nga mga kinabatasan kag magsugod sa isa ka bag-o nga kabuhi kay Cristo. Nagakatabo ini samtang aton ginapalambo ang aton pagtuo sa Manluluwas nga nagasugod sa pagpamati sa testimonya sang sinang mga tawo nga may pagtuo.9 Sumugod dira, ang pagtuo nagadalom kon nagaakto kita sa mga pamaagi nga nagaangkla sa aton sing mas hugot sa Iya.10
Karon, seguru mangin manami kon ang dugang nga pagtuo aton mapalaton pareho sang trangkaso ukon sip-on. Niyan, ang simple nga “espirituhanon nga pangatsi” magapasad sang pagtuo sa iban. Apang indi ini amo sina. Ang paagi gid lang nga ang pagtuo magatubo amo nga ang indibidwal mag-akto sa pagtuo. Ining mga akto masami nga ginapabatyag paagi sa mga pagpangagda sang iban nga tawo apang indi kita “makapatubo” sang pagtuo sang iban ukon magsalig gid lamang sa iban sa pagpabakod sang aton kaugalingon, Agud nga ang aton pagtuo maglambo, kinahanglan naton nga magpili sang mga pag-akto nga nagapasad sang pagtuo,kasubong sang pagpangamuyo, pagtuon sang balaan nga mga kasulatan, pag-ambit sang sakramento, pagtuman sang mga kasuguan kag pag-alagad sa iban.
Sa pagtubo sang aton pagtuo kay Jesucristo, ang Dios nagaagda sa aton nga maghimo sang mga panaad sa Iya. Ining mga kasugtanan, sa diin yara ang mga promisa, mga pagpakita sang aton pagkahaylo. Ang mga kasugtanan nadihon man bilang may kasiguruhan nga para sa esritiruhanon nga pag-uswag. Kon magpili kita sa pagpabunyag, magasugod kita sa pagdala sa aton mga kaugalingon sang ngalan ni Jesucristo11 kag pilion ang ipakilala ang aton mga kaugalingon nga kaupod sa Iya. Nagapanumpa kita nga mangin kapareho Niya kag palambuon sa aton mga kaugalingon ang Iya mga ugali.
Ang mga kasugtanan nagaangkla sa aton sa Manluluwas kag nagaduso sa aton sa dalan nga nagapadulong sa aton langitnon nga puluy-an. Ang gahum sang mga kasugtanan nagabulig sa aton sa pagpabilin nga may dako nga pagbag-o sang tagipusuon, nagapadalom sang aton pagkahaylo sa Ginuo, kag lubos nga pagbaton sang imahen ni Cristo sa aton mga dagway.12 Apang ang hapaw nga pangako sa aton mga kasugtanan indi makagarantiya sa aton sing bisan ano.13 Ayhan mahimo kita matentar nga magpangduhaduha nga ipanghaboy ang inyo daan nga mga pamatasan sa madalom, nagabuyong nga busay; ilubong ang aton mga hinganib sang rebelyon nga wala sing pag-isol. Apang ang nagalainlain nga pangako sa aton mga kasugtanan indi makabukas sang nagatinlo nga gahum sang Amay nga Langitnon kag ni Jesucristo.
Ang aton pangako nga tipigan ang aton mga kasugtanan wala dapat sing kondisyon ukon indi magligwat tungod sa nagalainlain nga mga sirkumstansya sa aton mga kabuhi. Ang aton katayuyon sa Dios dapat nga kaangay sa Suba sang Congo nga nagailig malapit sa Kinshasa Temple. Ini nga suba, indi pareho sa kalabanan nga suba sa kalibutan, padayon nga nagailig sa bilog nga tuig14 kag nagabubu sing malapit sa 11 ka milyon ka galon (41.5 milyon ka Litro) sang tubig sa tagsa ka segundo pakadto sa Atlantic Ocean.
Gin-agda sang Manluluwas ang Iya mga disipulo nga mangin masaligan kag malig-on. Sia nagsiling sa Iya mga disipulo nga pat-uron ini nila sa ila mga tagipusuon agud ila himuon ang mga butang nga Iya itudlo kag imando sa ila.15 Ang “pat-od” nga determinasyon nga tipigan ang aton mga kasugtanan nagatugot sang lubos nga paghangop sang mga promisa sang Dios nga nagapabilin.16
Madamo sang matutom nga mga Santos sa Ulihing mga Adlaw ang nagpakita nga sila “pat-od” sa pagtipig sang ila mga kasugtanan sa Dios kag nagbag-o sa katubtuban. Pasugira ako sa inyo sang parte sa sining mga persona—sanday Brother Banza Mucioko, Sister Banza Régine, kag Brother Mbuyi Nkitabungi.
Sang tuig 1977, ang mga Banza nagapuyo sa Kinshasa sa pungsod sang Zaire, nga sa karon ginakilala nga Democratic Republic sang Congo. Respetado sila kaayo sa ila komunidad sa simbahan sang mga Protestante. Tungod sang ila mga talento, ang ila simbahan nagpatigayon sang ila pamilya sa pagkadto sa Switzerland para mag-ekswela kag hatagan sila sing scholarship sa unibersidad.
Samtang yara sa Geneva, nga nagasakay sa bus pakadto sa eskwelahan, pirme makita ni Brother Banza ang gamay nga meetinghouse nga may ngalan “Ang Simbahan ni Jesucristo sang mga Santos sa Ulihing mga Adlaw.” Nagapalibog sia, “May yara bala sang mga Santos si Jesucristo subong sa uling mga adlaw?” Sang ulihi namat-od sia nga kadtoan kag tan-awon.
Sanday Brother kag Sister Banza mainit nga gintamyaw sa branch. Ila ginpamangkot ang masami nila nga mga palamangkutanon parte sa kinaiya sang Dios, pareho sang, “Kon ang Dios espiritu pareho sang hangin, paano kita gintuga sa Iya kaangay? Paano Sia makapungko sa Iya trono?” Wala pa gid sila nakabaton sang maayo nga sabat tubtub sa tion nga ang mga misyonero nga ila nakilala nagpaathag parte sa ginpanumbalik nga doktrina sa isa ka malip-ot nga leksyon. Sang maglakat na ang mga misyonero, ang mga Banza nagtulokay kag nagsiling, “Indi bala amo ini ang kamatuoran ang bag-o ta lang nabatian?” Nagpadayon sila sa pagsimba kag pagpakigkita sa mga misyonero. Nahibaloan nila nga ang pagpabunyag sa Ang Simbahan ni Jesucristo sang mga Santos sa Ulihing mga Adlaw may yara sing mga kadangatan. Makakas sa ila ang ila nga mga scholarship, ang ila mga visa maribok, kag sila kag ang ila mga kabataan pagapahalinon sa Switzerland. Ginpili nila ang magpabunyag kag magpakumpirma sang Oktubre,1979.
Duha ka semana pagkatapos sang ila bunyag, Sanday Brother kag Sister Banza nagbalik sa Kinshasa bilang una kag ika-duha nga mga miyembro sang Simbahan sa ila pungsod. Ang mga miyembro sang Geneva Branch nagpadayon sa pagpakig-angot sa ila kag pagbulig sa ila sa pagpakig-angot sa mga lider sang Simabahan. Ang mga Banza ginpaisog nga mag-mangin matutom sa paghulat sang ginsaad nga tion nga ang Dios magapasad sang Iya Simabahan sa Zaire.
Samtang, isa pa ka exchange student halin sa Zaire, si Brother Mbuyi nagaeskwela sa Belgium. Ginbunyagan sia sang 1980 sa Brussels Ward. Wala madugay pagkatapos sadto, nagserbe sia sing full-time nga mission sa England. Kag ang Dios naghikot sang Iya mga milagro. Si Brother Mbuyi nagbalik sa Zaire bilang ika-tatlo nga miyembro sang Simbahan sa iya pungsod. Nga may pahanugot sang ginikanan, ang mga miting sa Simbahan ginhiwat sa puluy-an sang iya pamilya. Sang Pebrero 1986 isa ka petisyon ginhimo agud kilalahon sang gobyerno ang Simbahan. Ang mga pirma sang tatlo ka pumuluyo sang Zaire ginkinahanglan. Ang tatlo ka malipayon nga tag-pirma sang petisyon amo sanday Brother Banza, Sister Banza, kag Brother Mbuyi.
Ang matutom nga mga miyembro nakahibalo sang kamatuoran sang ila ini mabatian; naghimo sila sang kasugtanan sa bunyag nga nag-higot sa ila sa Manluluwas. Ila ginpanghaboy ang ila daan nga mga pamatasan sa nagabuyong nga busay nga wala sing plano nga kuhaon liwat ang mga ini. Ang dalan sang kasugtanan indi nangin mahapos. Ang mga kinagamo sa politika, malaka nga pagpakig-angot sa mga lider sang Simbahan, kag mga hangkat nga kinaandan sa pagpasad sang kumunidad sang mga Santos mahimo magpatalaw sa mga indibidwal nga di-masyado hugot nga nagpangako. Apang sanday Brother kag Sister Banza kag Brother Mbuyi nagpabilin sa ila pagtuo. Nagtambong sila sa pagpahanungod sang Kinshasa Temple, 33 ka tuig pagkaligad nga nagpirma sila sa petisyon nga nagpatigayon sang opisyal nga pagkilala sang Simbahan sa Zaire.
Ang mga Banza yari dire karon sa Conference Center. Gin-updan sila sang ila duha ka bata nga lalaki, sanday Junior kag Phil, kag mga umagad nga sanday Annie kag Youyou. Sang 1986, sanday Junior kag Phil ang una nga duha ka indibidwal nga nabunyagan sa Zaire. Si Brother Mbuyi nagatan-aw sining proseso gikan sa Kinshasa upod ang iya asawa nga si Maguy kag ang ila lima ka kabataan.
Ining mga pionero nakahangop sang kahulugan sang mga konsikwensya sang kasugtanan sa diin gindala sila “sa ihibalo nahanungod sa Ginuo nga ila Dios, kag sa pagkasadya kay Jesucristo nga ila Manunubos.”17
Paano naton maangkla ang aton mga kaygalingon sa Manluluwas kag magpabilin nga matutom pareho sa mga ini kag madamo nga pulo-kalibo nga mga Santos nga Congohanon nga nagsunod sa ila kag sa minilyon pa nga iban sa bug-os nga kalibutan? Ang Manluluwas nagtudlo sa aton kon paano. Tagsa ka semana nagaambit kita sang sakramento kag nagahimo sang kasugtanan upod ang aton Amay nga Langitnon. Nagapromisa kita nga itabid ang aton pagkakilal-an sa Manluluwas paagi sa pagpangako sang aton pagsugot sa pagdala sang Iya ngalan, sa pagdumdom pirme sa Iya, kag sa pagtuman sang Iya mga kasuguan.18 Nga ginpamensaran kag sa pagkaangay nga maghimo sining mga kasugtanan sa tagsa ka semana, ginaangkla kita sa Manluluwas, kag ginabuligan kita nga mahangpan ang aton mga pangako,19 kag mabakod nga nagduso sa aton padulong sa dalan sang kasugtanan.
Ginaagda ko kamo nga mangako sa isa ka bug-os-kabuhi nga proseso sang pagka-disipulo. Maghimo kag magtuman sang mga kasugtanan. Ihaboy ang inyo daan nga mga pamatasan sa madalom, nagabuyong nga busay. Ilubong sing lubos ang inyo mga hinganib sang rebelyon nga wala sing pag-isol. Tungod sang pagpasag-uli ni Jesucristo, ang paghimo sang mga kasugtanan nga may tunay nga tinutuyo nga masaligan nga ginatahod ang mga ini makapabag-o sang imo kabuhi sa katubtuban. Magmangin mas kapareho ka sa Manluluwas kon imo Sia pirme ginadumdum, ginasunod kag ginahigugma. Ginapamatud-an ko nga Sia isa ka mabakod nga pundasyon. Masaligan Sia, kag pat-od ang Iya mga promisa. Sa ngalan ni Jesucristo, amen.