Ang Mensahe, ang Kahulugan, kag ang Kadam-an
Sa wala untat nga kagahod kag mga awat sang aton panahon, kabay nga magtinguha kita nga makita si Cristo sa sentro sang aton mga kabuhi, sang aton pagtuo, kag sang aton pagserbisyo.
Mga kauturan, ini si Sammy Ho Ching, pito ka bulan ang edad, nga nagatan-aw sang pangkabilugan nga komperensya sa telebisyon sa iya balay sang nagligad nga Abril.
Sang nag-abot ang tion sang pagtib-ong kay Pangulong Russell M. Nelson kag sang iban pa nga Pangkabilugan nga mga Awtoridad, masako ang mga kamot ni Sammy sa pagkapyot sang iya beberon. Gani ginhimo niya ang pinakamaayo nga buhaton.
Ginhatagan ni Sammy sang bag-o nga kahulugan ang konsepto sang pagboto gamit ang tiil.
Ginaabiabi ko kamo sa sining katung-an sa tuig nga komperensya sang Ang Simbahan ni Jesucristo sang mga Santos sa Ulihing mga Adlaw. Agud mangin mas maathag ang akon topiko parte sa kahulugan sining kaduha-kada-tuig nga pagtililipon, gusto ko nga panumdumon ninyo ining eksena sa panaysayon ni Lucas sa Bag-ong Katipan:1
“Sang naghinampot [si Jesus] sa Jerico, isa ka bulag nagalingkod sa higad sang dalan nga nagapakilimos:
“… Sang nakabati [ang] kadam-an nga nagaligad, nagpamangkot sia kon ano ang kahulugan sini.
“… Nagsugid sila sa iya, si Jesus nga Nazaretnon ang nagaligad.
“Kag nagsinggit sia, Jesus, anak ni David, kaluoyi ako.”
Nakibot sa iya kaisog, gintinguhaan sang kadam-an nga pahipuson ang tawo, pero “nagsinggit sia sing dugang pa gid,” ginsiling diri. Bilang resulta sang iya pagpamilit, gindala sia kay Jesus, nga nakabati sang iya puno-sing-pagtuo nga pangabay agud ibalik ang iya panulukan kag ginpaayo sia.2
Nagakatandog ako sining malip-ot nga kasaysayan tagsa nga basahon ko ini. Mabatyagan naton ang kadesperado sang tawo. Halos mabatian pa naton sia nga nagasinggit agud makuha ang atensyon sang Manluluwas. Nagayuhum kita sa iya pagpamalibad nga maghipos—matuod gid, ang iya determinasyon nga todohan pa gid sang ang tanan nagasiling sa iya nga maghipos. Ang ina, nga indi na kinahanglan ipaathag, isa ka istorya sang determinado nga pagtuo. Apang pareho sa tanan nga balaan nga kasulatan, kon mas ginabasa naton ini. mas madamo ang aton makita diri.
Ang isa nga nagpabilin sa akon sang sini lang amo ang kaalam sining tawo nga magpili sang mga tawo nga sensitibo sa espirituhanon sa iya palibot. Ang bug-os nga importansya sining istorya nasandig sa pila ka indi kilala nga babayi kag lalaki nga, sang ginpamangkot sang ila kaupod, “Anong kahulugan sining ginahod?” may panan-awon, kon hambalon mo gid man, nga mitlangon si Cristo bilang rason sang pagginahod; Sia ang Kahulugan nga Nagpakatawo. May leksyon sa sining malip-ot nga paghinambalanay para sa aton tanan. Kon parte sa pagtuo kag mabaskog nga pagsalig, makabulig ang magpamangkot sa ila nga may ila sini! “Makatuytoy bala ang bulag sa bulag?” Ginpamangkot kis-a ni Jesus. “[Indi bala,] mahulog sila nga duha sa buho?”3
Ang amo nga pagpangita sang pagtuo kag mabaskog nga pagsalig amo ang aton katuyuan sa sining mga komperensya, kag sa inyo pag-upod sa amon karon, marealisar ninyo nga ang ining pagpangita katuyuan naton tanan. Tuloka sa inyo palibot. Sa lugar nga ini makita ninyo ang mga pamilya sa lainlain nga kadakuon nga naghalin sa tagsa ka direksyon. Ang dugay na nga mag-abyanay malipayon nga nagahaksanay, ang matahum nga koro nagahanda sa pagkanta, kag ang mga nagaprotesta nagasinggitan halin sa ila ginatindugan sang ila paborito nga topiko. Ang mga misyonero sadto nagapangita sang ila mga kaupod sadto, samtang ang bag-o lang nagpinuli nga mga misyonero nagapangita sang bag-o gid nga mga makaupod (kon naintiendihan ninyo ang buot ko silingon!). Kag mga litrato? Kalangitan buligi kami! Bitbit ang mga celfone sa tagsa ka kamot, nagbag-o na kita halin sa “tagsa ka miyembro misyonero” pakadto sa “tagsa ka miyembro litratista.” Sa tunga sining masadya nga pagkinagula, ang isa natural nga makapamangkot, “Ano bala ang kahulugan sini tanan?”
Pareho sa aton istorya sa Bag-ong Katipan, ang mga ginbugayan sang panulukan makakita nga, wala sapayan sang tanan nga matanyag sining tradisyon sang komperensya sa aton, mangin diutay ukon wala ini sing kahulugan kon indi naton makita si Jesus sa tunga sini tanan. Agud maintiendihan ang palanan-awon nga aton ginapangita, ang pagpang-ayo nga Iya ginapromisa, ang kaimportante nga sa isa ka bahin nahibal-an naton nga ari diri, kinahanglan naton managil-ot sa kinagula—sa tunga sang kasadya sini—kag itutok ang aton atensyon sa Iya. Ang pangamuyo sang tagsa ka manughambal, ang ginalauman sang tanan nga nagakanta, ang kaligdong sang tagsa ka bisita—tanan ginadedikar sa pag-imbitar sang Espiritu Niya nga tag-iya sining Simbahan—ang buhi nga Cristo, ang Cordero sang Dios, ang Prinsipe sang Paghidaet.
Apang indi naton kinahanglan nga mangin yara sa conference center agud makita Sia. Kon ang bata nagabasa sang Libro ni Mormon sa una nga beses kag nanamian sang kaisog ni Abinadi ukon sang pagmartsa sang 2,000 ka lamharon nga mga hangaway, malagday naton nga madugang nga si Jesus amo ang yara pirme sa sentro sining matahum nga libro, nga nagatindog bilang inspirasyon sang tagsa ka pahina sini kag nagaangot sang tanan nga mga nagapatubo-sang-pagtuo nga mga karakter sa sulod sini.
Sa amo man, kon ang isa ka abyan nagatuon parte sa aton pagtuluohan, mahimo nga mahalawhaw sia sa pila ka pinasahi nga mga elemento kag indi kilala nga mga tinaga sa aton relihiyoso nga pangginawi—limitasyon sa pagkaon, mga kasangkapan sa pagsandig-sa-kaugalingon, mga pagbiyahe sang pionero, digital nga mga family tree, upod ang indi maisip nga mga stake center kon sa diin ang pila sa wala sing duda nagapaabot nga serbehan sang manamit nga sirloin steak, nga medyo malasado. Gani, samtang madamo sang makita kag mabatian ang aton bag-o nga mga abyan, kinahanglan buligan naton sila nga maintiendihan ang katuyuan kag kahulugan sini tanan, ang sentro sang wala katapusan nga ebanghelyo—ang pagpalangga sang Ginikanan nga Langitnon, ang nagabayad-sala nga regalo sang diosnon nga Anak, ang nagapaumhaw nga giya sang Balaan nga Espiritu, ang pagpanumbalik sining tanan nga kamatuoran sa ulihing adlaw kag madamo pa.
Kon ang isa magakadto sa balaan nga templo sa una nga kahigayunan, mahimo nga mahalawhaw sia sa sinang eksperiyensya. Ang aton buluhaton amo nga siguruhon nga ang sagrado nga mga simbolo kag ginpahayag nga mga ritwal, ang suluksukon sa seremonya kag mga talan-awon, wala nagaliw-as kundi nagatudlo sa Manluluwas, nga amo ang aton ginasimba didto. Ang templo Iya puluy-an, kag Sia dapat ang tig-una sa aton mga hunahuna kag tagipusuon—ang mahimayaon nga doktrina ni Cristo nga nagalikop sang aton bug-os nga pagkatawo pareho sang paglikop sini sa mga ordinansa sang templo—sumugod sang ginbasa naton ang sinulat sa atubang nga pwertahan tubtob sa ulihi nga tion nga yara kita sa sulod sang bilding. Sa tunga sang katingalahan nga aton masugata, kinahanglan naton makita, labi sa tanan, ang kahulugan ni Jesus sa templo.
Binagbinaga ang kadamuon sang maisog nga mga inisyatibo kag bag-o nga mga anunsyo sa Simbahan sining nagliligad lang nga binulan. Sa aton pagminister sa kada isa, ukon sa pagpanami sang aton eksperiyensya sa Adlaw nga Inugpahuway, ukon sa pagbaton sang bag-o nga programa para sa kabataan kag lamharon madula kita sa tunay nga rason sining ginpanagna nga mga pagbag-o kon kabigon naton ini nga separado, wala nagainangot nga mga elemento imbes nga nagailinangot nga lihok agud buligan kita nga mapasad sing mas mabakod sa Bato sang aton Kaluwasan.4 Sigurado gid, amo ini ang tuyo ni Pangulong Russell M. Nelson sa pagpagamit sa aton sang ginpahayag nga ngalan sang Simbahan.5 Kon si Jesus—ang Iya ngalan, ang Iya doktrina, ang Iya ehemplo, ang Iya pagkadiosnon—ang mangin sentro sang aton pagsimba, pagapabakuron naton ang dako nga kamatuoran nga kis-a ginpanudlo ni Alma: “May madamo nga mga butang nga magaabot; [apang] yari karon, may isa ka butang nga mas may importansya sangsa mga ini tanan— … ang Manunubos [nga] magakabuhi kag magakari sa tunga sang iya katawhan.”6
Bilang panghingapos: Ang kapalibutan ni Joseph Smith sa uma sang ika-19 nga siglo napuno sang nagapaindisanay nga mga grupo sang Kristiyano nga mga saksi.7 Pero sa tunga sang kagamo nga ila gintuga, ining masinadyahon nga mga manugwali, sa kabaliskaran, nagalipod sang mismong Manluluwas nga matutom nga ginapangita sang lamharon nga si Joseph. Nga nagapakigbato sa iya gintawag nga “kadulom kag kagamo,”8 nagpadulong sia sa kalinong sang kakahuyan kon sa diin iya nakita kag nabatian ang mas mahimayaon nga saksi sang pagkasentro sang Manluluwas sa ebanghelyo sangsa bisan ano nga aton namitlang diri sini nga aga. Upod ang regalo sang panan-awon nga wala ginhunahuna kag ginpaabot, nakita ni Joseph sa palanan-awon ang iya Amay nga Langitnon, ang dakong Dios sang uniberso, kag si Jesucristo, ang Iya perpekto nga Bugtong nga Inanak. Dayon ginpahamtang sang Amay ang halimbawa nga aton ginahambalan sining aga: gintudlo Niya si Jesus, nga nagasiling, “Ini ang Akon Hinigugmang Anak. Pamatii Sia!”9 Wala na sang may mas dako pa nga pahayag sang pagkadiosnon ni Jesus, sang Iya labi nga importansya sa plano sang kaluwasan, kag sang Iya lugar sa panulok sang Dios sangsa sinang pito-ka-tinaga nga deklarasyon.
Komosyon kag kagamo? Mga grupo kag pagbinaisay? May madamo sina sa aton kalibutan. Sa matuod, ang mga nagaduhaduha kag mga nagatuo sa gihapon nagabaisay parte sa sining palanan-awon kag kon pamensaron ang tanan nga ginpanghambal ko karon. Inkaso nga nagatinguha kamo nga makakita sing mas maathag kag makita ang kahulugan sa tunga sang pagkadamo-damo nga mga opinyon, ginatudlo ko kamo sa pareho nga Jesus kag nagahatag sang pamatuod sang isa ka apostoles sa eksperiyensya ni Joseph Smith, nga nag-abot pareho sing halos 1,800 ka tuig pagkatapos nga mabaton sang aton bulag nga abyan ang iya panulukan sa dumaan nga Dalan sang Jerico. Nagapamatuod ako kaupod ining duha kag upod ang madamo pa nga iban sa kalawigon sang panahon nga ang pinakamakalilipay nga talan-awon kag palamatin-an sa kabuhi amo inang si Jesus indi lamang magalabay10 kundi nga Sia magaabot sa aton, magadulog sa tupad naton, kag magahimo sang Iya puluy-an upod sa aton.11
Mga kauturan, sa tunga sang wala untat nga kagahod kag mga awat sang aton panahon, kabay nga magtinguha kita nga makita si Cristo sa sentro sang aton mga kabuhi, sang aton pagtuo, kag sang aton pagserbisyo. Yara dira ang matuod nga kahulugan. Kag kon sa pila ka adlaw ang aton panulukan mangin limitado ukon ang aton pagsalig maganubo ukon ang aton pagpati pagatilawan kag takson—kag pat-od gid ini—kabay nga mas tudohon pa gid naton ang pagsinggit, “Jesus, anak ni David, kaluoyi ako.”11 Ginapangako ko upod ang balatyagon sang isa ka apostoles kag mabaskog nga pagpati sang isa ka propeta nga Iya kamo pamatian kag magasiling, sa madali ukon sa madugay, “Batuna ang imo [panulukan]: ang imo pagtuo nag-ayo sa imo.”13 Ginaabi-abi ko kamo sa pangkabilugan nga komperensya. Sa ngalan ni Jesucristo, amen.