Magmatinuohon, Indi Madinuhaduhaon
Dapat naton hungdon nga maghatag sing tion kada adlaw nga magdiskonekta sa kalibutan kag magkonekta sa langit.
Sang nagligad lang, nagbugtaw ako kag naghanda sa pagtuon sang balaan nga mga kasulatan. Ginkuha ko ang akon smartphone kag nagpungko sa isa ka siya sa tupad sang akon kama, nga nagtuyo sa pag-abri sang Gospel Library app. Ginbuksan ko ang akon telepono kag masugod na tani tuon sang nakita ko ang tunga sa dosena nga mga notisya sang mga text kag email nga nagsulod sang gab-i. Siling ko, “Lantawon ko ang mga mensahe sing makadali, kag dayon matuon na ako sang balaan nga mga kasulatan.” Ti, duha ka oras ang nagligad nagabasa ako gihapon sang mga text, email, balita kag mga post sa social media. Sang nakamarasmas ako sang oras, dali-dali na ako nga naghanda para sa sinang adlaw. Sadto nga aga nalaktawan ko ang pagtuon sang balaan nga kasulatan, kag ang resulta wala ko nakuha ang ginalauman ko nga espirituhanon nga sustansya.
Espirituhanon nga Sustansya
Sigurado nga madamo sa inyo ang makahangop. Ang moderno nga teknolohiya nagabugay sa aton sa madamo nga paagi. Makakonekta ini sa aton sa aton mga abyan kag pamilya, upod ang impormasyon kag mga balita parte sa mga hitabo sa bilog nga kalibutan. Pero, makapahilayo man ini sa aton sa pinakaimportante nga koneksyon: ang aton koneksyon sa langit.
Ginasulit ko ang ginhambal sang aton propeta nga si Pangulong Russel M. Nelson: “Nagakabuhi kita sa kalibutan nga komplikado kag nagadugang sa pagkamabinaison. Ang dalayon nga presensya sang social media kag 24-oras nga balita nagapaarak sa aton sang wala untat nga mga mensahe. Agud may kompiyansa kita nga maayag ang di-maisip nga mga tingug kag mga pilosopiya sang mga tawo nga nagaatake sang kamatuoran, dapat naton tun-an nga magbaton sang rebelasyon.”
Si Pangulong Nelson nagpadayon sa pagpaandam nga “sa maabot nga mga adlaw, indi posible nga makalampuwas kita sing espirituhanon kon wala ang nagagiya, nagatudlo, nagapasulhay kag dalayon nga impluwensya sang Balaan nga Espiritu.”1
Tinuig na ang nagligad, si Pangulong Boyd K. Packer nag-istorya parte sa panong sang mga usa nga, tungod sang madamol nga pagtupa sang nieve, nakibon sa gwa sang ila natural nga puluy-an kag nagpangatubang sang posible nga gutom. Ang pila ka mga tawo nga maayo ang katuyuan, sa pagtinguha nga masalbar ang mga usa, nagtampok sang pila ka trak sang dagami sa palibot sang lugar—indi ini ang kinaandan nga pagkaon sang usa pero naglaum sila nga makabulig ini nga makalampuwas ang mga usa sa tigtulugnaw. Sa masubo nga palad, kalabanan sang mga usa napatay sang ulihi. Ginkaon nila ang dagami pero wala ini naghatag sustansya sa ila, kag napatay sila sa gutom nga puno ang ila mga tiyan.2
Madamo sa mga mensahe nga ginapaarak sa aton sa edad sang impormasyon amo ang espirituhanon nga kaangay sang pagpakaon sang dagami sa usa—makakaon kita sini bilog nga adlaw, pero indi ini maghatag sustansya sa aton.
Diin naton makita ang matuod nga espirituhanon nga sustansya? Sa masami, indi ini trending sa social media. Makita naton ini kon “magdutdot [kita] pasulong” sa dalan sang kasugtanan, “nga dalayon nga magkapyot sa barandilya nga salsalon,” kag mag-ambit sang bunga sang kahoy sang kabuhi.3 Buot silingon nga dapat naton hungdon nga maghatag sing tion kada adlaw nga magdiskonekta sa kalibutan kag magkonekta sa langit.
Sa iya damgo, si Lehi nakakita sang mga tawo nga nag-ambit sang bunga pero dayon nagsikway sini bangod sang impluwensya sang dako kag maligwa nga dakbalay, ang bugal sang kalibutan.4 Posible para sa mga lamharon nga ginpadako sa puluy-an sang Santos sa Ulihing mga Adlaw, nga magtambong sa tanan nga nagakadapat nga mga miting kag klase sa Simbahan, kag bisan pa gani magpasakop sa mga ordinansa sa templo kag dayon magtalang “sa ginadilian nga mga banas kag [mag]kaladula. ”5 Ngaa bala nagakatabo ini? Sa kalabanan, tungod ini nga samtang nagahikot sila sang mga buluhaton sang pagkaesprituhanon, wala sila matuodtuod nga nabag-o. Ginapakaon sila pero wala nahatagan sustansya.
Sa kabaliskaran, nakilala ko ang madamo sa inyo nga lamharon nga mga Santos sa Ulihing mga Adlaw nga maalam, mabakod, kag matutom. Nakahibalo kamo nga mga anak kamo sang Dios kag may buluhaton Sia nga ipahimo sa inyo. Ginapalangga kag ginaalagaran ninyo ang Dios sa bug-os ninyo nga “tagipusuon, ikasarang, panghunahuna, kag kusog.”6 Ginatipigan ninyo ang inyo mga kasugtanan kag nagaalagad sa iban, nga nagasugod sa puluy-an. Nagapakita kamo sang pagtuo, nagahinulsol kag nagauswag kada adlaw, kag nagadala ini sa inyo sing nagapadayon nga kalipay. Nagahanda kamo para sa mga bugay sang templo kag iban pa nga mga oportunidad nga inyo maangkon bilang matuod nga mga sumulunod sang Manluluwas. Nagabulig kamo handa sa kalibutan para sa Ika-duha nga Pagkari, nga nagaagda sa iban nga magkari kay Cristo kag mabatyagan ang Iya nagabayad-sala nga gahum. Nakakonekta kamo sa langit.
Huo, nagapangatubang kamo sang mga hangkat. Pero amo man ang tagsa ka henerasyon. Ini ang aton panahon, kag kinahanglan naton nga magmatinuohon, indi madinuhaduhaon. Nagasaksi ako nga ang Ginuo nakahibalo sang aton mga hangkat, kag paagi sa pagpanguna ni Pangulong Nelson, ginahanda Niya kita nga atubangon ang mga ini. Nagapati ako nga ang panawagan sang propeta sang sini lang para sa nasentro sa-puluy-an nga simbahan, nga ginasuportahan sang mga ginahimo naton sa aton mga bilding,7 gindesinyo agud magbulig sa aton nga makalampuwas—bisan pa gani mag-uswag—sa sining panahon sang espirituhanon nga malnutrisyon.
Nasentro sa Puluy-an
Ano ang kahulugan sang nasentro-sa-puluy-an nga simbahan? Lainlain ang mga puluy-an sa bilog nga kalibutan. Basi nalakip ka sa pamilya nga yara na sa Simbahan sa madamo nga mga henerasyon. Ukon basi ikaw lang isa ang miyembro sang Simbahan sa imo pamilya. Mahimo nga kasado ka ukon solo, may ara ukon wala sang kabataan sa puluy-an.
Bisan ano man ang inyo sirkumstansya, mahimo ninyo ang inyo puluy-an nga sentro sang pagtuon kag pagkabuhi sang ebanghelyo. Nagakahulugan lang ini nga mangin responsable kamo sa inyo pagbag-o kag espirituhanon nga pagtubo. Nagakahulugan ini sang pagsunod sang laygay ni Pangulong Nelson “nga kay-uhon ang inyo puluy-an nga mangin palasilungan sang pagtuo.”8
Ang kaaway matinguha nga kumbinsihon kamo nga ang espirituhanon nga sustansya indi kinahanglanon ukon. para indi hilmunon, nga makahulat ini. Agalon sia sang pagpatalang kag amay sang pagpabuyanbuyan. Tinguhaan niya nga kuhaon ang inyo atensyon sa mga butang nga dawsa hilingagawon pero sa matuod-tuod, indi gid man importante. Luyag niya nga kamo “malisang nahanungod sa madamong mga butang” nga mapabayaan ninyo ang “isa ka butang [nga] kinahanglanon.”9
Daw ano ang akon pagpasalamat sa akon “maayo nga mga ginikanan,”10 nga nagpadako sang ila pamilya sa puluy-an nga may dalayon nga espirituhanon nga sustansya, mapinalanggaon nga mga kaangtanan, kag maayo nga mga kahiwatan sa kalingawan. Ang ila mga panudlo sang bata pa ako nagpahamtang sa akon sa maayo. Mga ginikanan, palihog maghimo sang mabakod nga relasyon sa inyo mga anak. Kinahanglan nila sing mas daku sang inyo tiyempo, indi mas diutay.
Suportado sang Simbahan
Sa inyo paghimo sini, ang Simbahan yara sa pagsuporta sa inyo. Ang aton mga eksperiyensya sa simbahan makapabakod sang espirituhanon nga sustansya nga nagakatabo sa puluy-an. Sa sini nga tuig, nakita naton ining sahi sang suporta sang Simbahan sa Sunday School kag Primary. Makita naton ang dugang pa sini sa mga miting man sang Aaronic Priesthood kag Young Women. Sugod sini nga Enero, ang kurikulum para sining mga miting, pagabag-uhon sing diutay. Magatutok ini gihapon sa mapuslanon nga mga topiko sa ebanghelyo pero ang mga topiko ipabagay sa Come , Follow Me—Para sa mga Indibidwal kag mga Pamilya. Magamay ini nga pagbag-o, pero makahimo ini sang daku nga epekto sa espirituhanon nga sustansya sang young men kag young women.
Ano pa ang iban nga sahi sang suporta nga ginahatag sang Simbahan? Sa simbahan nagaambit kita sang sakramento, nga nagabulig sa aton sa pagpalig-on liwat sang aton promisa sa Manluluwas kada semana. Kag sa simbahan nagatipon kita upod sa iban nga mga tumuluo nga naghimo sang amo man nga pangako. Ang mapinalanggaon nga mga relasyon nga ginapatubo naton sa kapareho nga mga disipulo ni Jesucristo sarang mangin gamhanan nga suporta sa aton nasentro-sa-puluy-an nga pagkadisipulo.
Sang 14 ako, ang akon pamilya nagsaylo sa bag-o nga kasilingan. Subong daw indi gid man ini terible nga trahedya para sa inyo, pero sa akon hunahuna sadto, sobra ini kabudlay. Nagakahulugan ini nga mapalibutan sang mga tawo nga indi ko kilala. Nagakahulugan ini nga tanan nga iban nga young men sa akon ward magatambong sa lain nga eskwelahan. Kag sa akon 14-anyos nga hunahuna, nanumdum ako: “Paano ini mahimo sa akon sang akon mga ginikanan?” Pamatyagan ko daw naguba ang akon kabuhi.
Pero, paagi sa amon mga kahiwatan sa Young Men, nakapasad ako sang kaangtanan sa iban nga mga miyembro sang akon korum, kag nangin mga abyan ko sila. Dugang pa, ang mga miyembro sang bishopric kag mga adviser sa Aaronic Priesthood nagsugod sa paghatag sang pinasahi nga interes sa akon kabuhi. Nagtambong sila sa akon mga hampang bilang atleta. Ginhatagan nila ako sang nagpaisog nga mga sulat nga ginatago ko hasta subong. Nagpadayon sila sa pagpakig-angot sa akon bisan pa sang pagsulod ko sa kolehiyo kag paglakat ko sa misyon. Ang isa sa ila ara pa gani sa airport pagpauli ko. Tubtob sa katubtuban nga mangin mapinasalamaton ako para sining maayo nga mga utod kag sa kombinasyon sang ila pagpalangga kag mataas nga pagpaabot. Gintudlo nila ako palangit, kag ang kabuhi nangin masanag, masadya kag malipayon.
Paano kita, bilang mga lider kag mga ginikanan, makabulig sa mga lamharon nga makahibalo nga wala sila nagaisahon sa ila paglakat sa dalan sang kasugtanan? Dugang pa sa pagpauswag sang personal nga mga relasyon, agdahon naton sila sa mga pagtilipon, dalagku kag magagmay—halin sa mga komperensya sang FSY kag mga youth camp hasta sa semanal nga mga kahiwatan sa korum kag klase. Indi pagpakanuboa ang kusog nga nagahalin sa pagtindog sing ululupod sa iban nga nagatinguha man nga mangin mabakod. Mga bishop kag iban pa nga mga lider, palihog tutoki ang paghatag sustansya sa kabataan kag mga lamharon sa inyo ward. Kinahanglan nila sing mas daku sang inyo tiyempo, indi mas diutay.
Bisan lider ka man, kaingod, miyembro sang korum, ukon simple lang nga Santo, kon may oportunidad ka sa pagtandog sang kabuhi sang isa ka lamharon, buligi sia nga magkonekta sa langit. Ang imo impluwensya mahimo nga amo gid ang “suporta sang Simbahan” nga ginakinahanglan sinang lamharon.
Mga kauturan, nagasaksi ako nga si Jesucristo ang nagapamuno sining Simbahan. Ginainspirar Niya ang aton mga lider kag ginagiyahan kita sa espirituhanon nga sustansya nga kinahanglanon naton sa paglampuwas kag pag-uswag sa ulihing mga adlaw. Inang espirituhanon nga sustansya magabulig sa aton nga magmatinuohon kag indi madinuhaduhaon. Sa ngalan ni Jesucristo, amen.