E Goso di Servisio Sin Egoismo
Nos a primintí nos Tata den Shelu ku nos lo sirbi E i otronan ku amor i lo hasi Su boluntat den tur kos.
Despues di delaster konferensia general, hopi hende a aserka mi ku e mes un pregunta: “ E stulnan ei ta konfortabel?” Mi kontesta tabata semper meskos: “ E stulnan ei ta hopi konfortabel si bo no tin ku papia.” Ta bèrdat, no? Mi stul no tabata asina konfortabel e konferensia aki, pero mi ta berdaderamente gradesí pa e bendishon i honor di papia ku boso e anochi aki.
Tin biaha ora nos ta sirbi, nos ta sinta den diferente stul. Algun ta bastante konfortabel i algun otro no ta, pero nos a primintí nos Tata na Shelu ku nos lo sirbi E i otronan ku amor i lo hasi Su boluntat den tur kos.
Algun aña pasá, hóbennan den Iglesia a siña ku “ora boso ta akudí den e servisio di Dios’ [Doctrina y Convenios 4:2], boso ta na e biahe di mas grandi ku nunka. Boso ta yudando Dios pura Su obra, i ta un eksperensia grandi, alegre, i maravioso.”1 Ta un biahe disponibel pa tur---di tur edat---i ta tambe un biahe ku ta hiba nos na lokual nos profeta stimá a bisa tokante “e kaminda di kombenio.”2
Sinembargo, desafortunadamente, nos ta biba den un mundu egoista kaminda hende konstantemente ta puntra, “Kiko tin pa mi?” enbes di puntra, “Kon mi por yuda bo awe?” òf “Kon mi por sirbi Señor den mi yamamentu?” òf “ Mi ta dunando Señor tur loke mi tin?”
Un gran ehèmpel den mi bida di servisio sin egoismo ta Hermana Vitoria Antonietti. Victoria tabata un di e maestranan di Primaria den mi rama tempu mi tabata kresiendo na Argentina. Kada djamars mèrdia, ora nos tabata reuní pa Primaria, e tabata trese un bolo di chukulati pa nos. Tur hende tabata gusta e bolo—wèl tur hende eksepto ami. Mi tabata odia bolo di chukulati! I maske ku e tabata purba di kompartié ku mi, semper mi tabata ninga su ofresementu.
Un dia despues ku el a parti e bolo ku e sobrá muchanan, mi a puntr’é, “Di kon bo no ta trese un sabor diferente---manera di apelsina òf vania?”
Despues di hari un tiki, el a puntra mi, “Di kon abo no ta purba un pida chikitu? E bolo aki ta trahá ku un ingrediente spesial, i mi ta primintí bo ku si bo purb’é, lo bo gust’é!”
Mi a wak rònt, i pa mi sorpresa, tabata parse ku tur hende tabata gosa di e bolo. Mi a bai di akuerdo pa dun’é un chèns. Boso por rei kiko a pasa? Mi a gust’é! Esei tabata e di promé biaha ku mi a disfrutá di un bolo di chukulati.
No tabata te despues di hopi aña ku mi a haña sa kua e ingrediente sekreto tabata den Hermana Antonietti su bolo di chukulati. Mi yunan i ami tabata bishitá mi mama kada siman. Na un di e bishitanan aki, Mama i ami tabata gosa di un pida bolo di chukulati, i mi a relatá na dje kon mi a yega na gusta bolo di chukulati pa promé biaha. Despues el a aklará mi ku e resto di e historia.
“Bo sa Cris,” mi mama a bisa, “Victoria i su famia no tabatin masha entrada, i kada siman e mester a skohe entre paga bus pa hiba e i su kuater yunan Primaria òf pa kumpra e ingredientenan pa traha un bolo di chukulati pa su klas di Primaria. Semper el a skohe pa e bolo i no bus, i e i su yunan a kana mas ku [3 kilometer] vise vèrsá, apesar di e wer.”
E dia ei mi a haña mas apresio pa su bolo di chukulati. Mas importante, mi a siña ku e ingrediente sekreto den Victoria su bolo tabata e amor ku e tabatin pa esnan ku el a sirbi i su sakrifisio sin egoismo na nos bienestar.
Pensa bèk riba e bolo di Victoria ta yuda mi kòrda un sakrifisio sin egoismo demostrá den e lès eterno siñá pa Señor na Su disípulonan ora El a kana bai na e kaha di tesoro di e tèmpel. Boso ta konosí ku e historia. Èlder James E. Talmage a siña ku tabatin 13[diestres] kaha, “i den esakinan e hendenan tabata pone nan kontribushonnan pa e [diferente] propósitonan indiká pa [e] inskripshonnan riba e kahanan.” Jesus a mira e reinan di e dunadónan, konsistí di diferente tipo di hende. Algun a duna nan regalo ku “sinseridat di propósito” miéntras otronan tabata tira aden “gran suma di plata i oro” sperando pa wòrdu mirá, notá, i elogiá pa nan donashonnan.
“Entre hopi di nan tabatin un biuda pober, ku ... a tira den un di e kahanan di tesoro dos moneda chikitu di bròns konosí komo plaka; su kontribushon a suma ménos ku mitar sèn amerikano. Señor a yama Su disípulonan rònt di Dje, a hala nan atenshon na e biuda pober i su hecho, i a bisa: ‘Mi ta sigurá boso, ku e biuda pober aki a tira mas tantu sèn den e kaha di ofrenda, ku tur e otronan: Pasobra tur a tira di nan rikesa; pero e ku tabata den nesesidat a tira tur loke e tabatin pa biba di dje’[Marko 12:43–44].”3
E biuda no ta parse di tabatin un posishon prominente den e sosiedat di su tempu. En realidat e tabatin algu mas importante: su intenshonnan tabata puru, i el a duna tur loke e tabatin pa duna. Kisas el a duna ménos, mas ketu i diferente ku otronan. Den bista di algun, lokual el a duna tabata insignifikante, pero den bista di e Salbador, esun ku ta diserní e pensamentunan i intenshonnan di e kurason,4 el a duna tur lokual e tabatin.
Hermananan, nos ta dunando tur lokual nos tin na Señor sin reserva? Nos ta sakrifikando nos tempu i talentonan p’asina e generashon ku ta lanta por siña pa stima Señor i warda Su mandamentunan? Nos ta ministrando na esnan rònt di nos i na esnan ku a wòrdu asigná na nos ku kuido i diligensia----sakrifikando tempu i energia ku por wòrdu uzá di otro manera? Nos ta bibando e dos mandamentunan grandi---pa stima Dios i pa stima Su yunan?5 Hopi biaha e amor aki ta manifestá den servisio.
Presidente Dallin H. Oaks a siña: “Nos Salbador a duna Su mes den servisio sin egoismo. El a siña ku kada un di nos mester siguié dor di ninga nos mes di interesnan egoista pa asina nos por sirbi otronan.”
El a sigui:
“Un ehèmpel konosí di pèrdè nos mes den servisio pa otronan ... ta e sakrifisio ku mayornan ta hasi pa nan yunan. Mamanan ta sufri doló i ta pèrdè prioridatnan importante i komodidat pa karga i kria kada mucha. Tatanan ta adaptá nan bida i nan prioridatnan pa mantené un famia. ....
“... Nos ta gosa tambe den esnan ku ta kuida un miembro di famia ku desabilidat i mayornan ansiano. Niun di e servisio aki ta puntra, kiko tin pa mi? Nan tur ta eksigí pone kombenensia personal un banda pa servisio sin egoismo. ...
“[I] tur esaki ta ilustrá e prinsipio eterno ku nos ta mas felis i mas satisfecho ora nos aktua i sirbi pa lokual nos ta duna, no pa lokual nos ta haña.
“Nos Salbador a siña nos pa siguié dor di hasi sakrifisionan nesesario pa pèrdè nos mes den servisio sin egoismo na otronan.”6
Presidente Thomas S. Monson tambe a siña ku “kisas ora nos hasi kontakto kara ku kara ku nos Kreador, lo no puntra nos, ‘Kuantu posishon bo tabatin?’ pero mas bien, ‘Kuantu hende bo a yuda?’ En realidat, nunka bo no por stima Señor te ora bo sirbié dor di sirbi Su pueblo.7
Ku otro palabra, hermananan, no ta importá si nos a sinta den un stul konfortabel, òf si nos a sinta inkonfortabel durante e reunion riba un stul frusá ku ta dobla den rei patras. Tampoko si nos pa nesesidat a bai den gang pa konsolá un beibi ku ta yora. Lokual ta importá ta ku nos a bini ku e deseo pa sirbi, ku nos a nota esnan ku nos ta ministrá i saludá nan ku alegria, i pa nos introdusí nos mes na esnan ku ta sinta huntu ku nos ---sali na alkanse ku amistat ounke nos no ta asigná pa ministrá na nan. I sigur ta importá ku nos lo hasi tur lokual no por ku e ingrediente spesial di servisio kombiná ku amor i sakrifisio.
Mi a haña konosementu ku no ta nesesario pa nos traha un bolo di chukulati pa tin éksito òf ta un maestra di Primaria dediká, pasobra no tabata tokante di e bolo. Tabata e amor tras di e akshon.
Mi ta testifiká ku amor ta bira sagrado pa medio di sakrifisio--- e sakrifisio di un maestra i hasta mas ainda mediante e sakrifisio final i eterno di e Yu di Dios. Mi ta duna testimonio ku e ta biba! Mi ta stim’É i ta deseá pa pone deseonan egoista un banda pa por stima i ministrá meskos ku E ta hasi. Den e nòmber di Jesucristu,amèn.