Tuma riba Nos Mes e Nòmber di JesuCristu

Dor di Elder Robert C. Gay

Di e Presidensia di e Setentanan

Laga nos fielmente tuma riba nos mes e nòmber di JesuCristu — dor di mira manera E ta mira, dor di sirbi manera E a sirbi, i dor di konfia ku Su grasia ta sufisiente.

Resientemente, sigun mi tabata deliberá tokante Presidente Nelson su enkargo pa yama e Iglesia na su nòmber revelá, mi a bai kaminda e Salbador ta instruí e Nefitanan over di e nòmber di Iglesia.¹Sigun mi tabata lesa e palabranan di e Salbador, mi atenshon a kai riba e manera kon tambe El a bisa e pueblo ku “boso mester tuma riba boso mes e nòmber di Cristu.”² Esaki a pone ku mi a wak i puntra mi mes, “ Mi ta tumando riba mi mes e Salbador su nòmber manera E lo ke pa mi hasi?”³Awe lo mi ke kompartí algun di e impreshonnan ku mi a risibí komo kontesta di mi pregunta.

Promé, pa tuma riba nos mes e nòmber di Cristu ta nifiká ku nos ta fielmente trata di mira manera Dios ta mira.⁴ Kon Dios ta mira? José Smith a bisa, “ Miéntras ku un parti di rasa humano ta husgando i kondenando e otro parti sin miserikòrdia, E Gran Mayor di e universo ta mira henter e famia humano ku un care di un tata i un konsiderashon paternal,” pasó “Su amor [ta] impenetrabel.”⁵

Un par di aña pasá mi ruman muhé mas grandi a fayesé. E tabatin un bida yen reto. El a lucha ku e evangelio i nunka tabata realmente aktivo. Su kasá a bandoná nan matrimonio i a laga e atras ku kuater mucha yòn pa kria. Riba e anochi di su morto, den un kamber ku su yunan presente, mi a duna e un bendishon pa e regresá kas na pas. Na e momentu ei mi a realisá mi mes ku demasiado biaha mi a definí e bida di mi ruman den kondishon di su tribulashon i inaktividat. Ora mi a pone mi man riba su kabes e anochi ei, mi a risibí un represhon severo di e Spiritu. Mi a wòrdu hasí konsiente di su bondat i a wòrdu konsedé pa mir’e komo Dios ta mir’e — no manera un hende ku a lucha ku e evangelio i bida, pero manera un hende ku tabatin ku lidia ku kuestionnan difísil ku ami no tin. Mi a mir’e komo un mama magnífiko ku, no opstante e gran opstákulonan, a kria kuater bunita i tremendo mucha. Mi a mir’e komo e amiga pa mi mama, ku a tuma tempu pa tene e na bista i ta un kompañero pa e despues ku mi tata a fayesé.

Durante e anochi final ku mi ruman, mi ta kere ku Dios tabata puntra mi, “Bo no por mira ku tur hende rònt di bo ta sernan sagrado?”

Brigham Young a siña:

“Mi ta deseá di urgi e Santunan … pa komprondé hòmber i muhé manera nan ta, i no komprondé nan manera abo ta.”⁶

“Kuantu biaha ta wòrdu bisá —‘Un persona asina a hasi robes, i e no por ta un Santu.’ … Nos ta tende algun hura i gaña … [òf] no ta mantené e Sabat. … No husga un hende asina, pasó abo no sa e diseño di Señor aserka di nan. … [Preferibel,] tin pasenshi ku nan.”⁷

Kualke di boso por imaginá nos Salbador lagando bo i bo karga pasa bai dor di Dje sin ripará? E Salbador a wak e Samaritano, e adúltero, e kolekshonadó di impuesto, e leproso, esun ku ta mentalmente malu, i e pekadó ku mes un bista. Tur tabata yunan di Su Tata, i tur por salba.

Bo por imaginá E bira bai for di un persona ku tin duda over di nan lugá den e reino di Dios òf for di kualké hende afektá di kualke otro manera?”⁸Ami no por. Den wowo di Cristu, kada alma ta di balor infinito. Niun hende no ta pre ordená pa frakasá. Bida eterno ta posibel pa tur.⁹

For di represhon di e Spiritu na kama di mi ruman, mi a siña un gran leshon: ku sigun nos ta mira manera E ta mira, nos viktoria lo ta unu dòbel — salbashon pa esnan ku ta toká nos i salbashon pa nos mes.

Di dos, pa tuma riba nos mes e nòmber di Cristu, nos mester no solamente mira manera Dios ta mira, pero nos mester hasi Su obra i sirbi manera E a sirbi. Nos ta biba e dos gran mandamentunan, someté na Dios su boluntat, reuní Israèl, i laga nos lus “bria dilanti hende.”¹⁰ Nos ta risibí i biba e kombenionan i e ordenansanan di Su Iglesia restourá.¹¹ Ora nos hasi esaki, Dios ta honra nos ku poder pa bendishoná nos mes, nos famia i bida di otro.¹² Puntra bo mes, “Mi konosé niun hende ku no mester di e poder di shelu den nan bida?”

Dios lo hasi milager entre nos ora nos ta santifiká nos men.¹³ Nos ta santifiká nos mes dor di purifiká nos kurason.¹⁴Nos ta purifiká nos kurason ora nos ta skucha E,¹⁵ arepentí di nos pikánan,¹⁶ kombertí nos mes,¹⁷ i stima manera E a stima.¹⁸ E Salbador a puntra nos, “Pasó si bo stima esnan ku stimá bo, ki rekompensa bo tin?”¹⁹

Resientemente mi a tende di un eksperensia den e bida di Elder James E. Talmage ku a poné mi pousa i konsiderá kon ami ta stima i sirbi esnan rondó di mi. Komo un profesor yòn , promé ku e la bira un apòstel i mei — mei di e epidemia mortal di difteria di 1892, Elder Talmage a diskubrí un famia di estranhero, no miembro di Iglesia, ku tabata biba hopi serka di nan, ku tabata afektá dor di e malesa. Niun hende no tabata ke riska nan mes dor di bai den e kas infektá. Elder Talmage, no opstante, inmediatamente a bai na e kas. El a haña kuater yu: unu di dos aña i mei morto na suela, unu di sinku i unu di djes den gran doló, i unu di diestres ku tabata hopi debil. E mayornan tabata sufri di pena i fastidiá.

Elder Talmage a kuida esnan morto i bibu, a limpia kambernan, bai pafó ku e pañanan shushi, i kima nan pasó nan tabata aplastá ku e malesa. El a traha henter dia i despues a bini bèk e siguiente mainta. E yu di djes aña a muri den mardugá. El a hisa i karga esun di sinku. E la tosa sanger riba henter su kara i paña. El a skibi, “ mi no ta por a but’e abou,” i el a karg’e te ora ku el a muri den su brasa. El a yuda dera tur tres e yunan i a sòru pa kuminda i paña limpi pa e famia ku tabata di luto. Ora ku el a yega su kas bèk, Hermano Talmage a deshasí di su pañanan, a baña den un solushon di zink, a sigurá su mes for di su famia, i a sufri dor di un atake leve di e malesa.²⁰

Asina tantu bida rondó di nos ta den peliger. Santunan ta tuma e nòmber di e Salbador riba nan mes dor di bira santu i sirbi tur, sin importá di unda òf kon nan ta pará — bidanan lo wòrdu salbá si nos hasi esaki.²¹

Finalmente,mi ta kere ku pa tuma riba nos mes Su nòmber, nos mester Konfi’e. Na un reunion ku mi a bai un djadumingu, un mucha muhé hóben a puntra algu asina aki: “Ami ku mi frei a kibra for di otro, i el a skohé pa bai for di Iglesia. E ta konta mi ku nunka e no tabata mas felis. Kon esaki por ta?”

E Salbador a kontesta e pregunta aki ora ku E a bisa e Nefitanan, “Pero si [bo bida no ta] edifiká riba mi evangelio, i e ta edifiká riba e obra di hende, òf riba e obra di diabel, asina aki mi ta bisa bo [lo bo tin] goso den [bo] obra pa un ratu, i poko poko e final ta yega.”²² Simplemente no tin goso duradero pafó di e evangelio di JesuCristu.

Na e reunion mi a pensa over di e diferente bon hendenan ku mi konosé ku ta lucha kontra gran peso i mandamentunan ku ta deskurashá pa nan bon. Mi a puntra mi mes, “Kiko otro e Salbador por a bisa nan?”²³Mi ta kere ku E lo puntra, “ Bo ta konfia mi?”²⁴ Na e muhé ku e problema di sanger, El a bisa, “ Bo fe a hasi bo kompletu; bai na pas.”²⁵

Un di mi skrituranan faborito taJuan 4:4, ku ta bisa, “I e mester bai dor di Samaria.”

Dikon mi ta stima e skritura ei? Pasó Jesus no mester di bai Samaria. E Hudiunan di Su tempu tabata detestá e Samaritanonan i tabata biaha un kaminda ku ta keda pafó di Samaria. Pero Jesus a skohe pa bai einan i deklará dilanti tur hende pa promé biaha ku E tabata e Mesias primintí. Pasó e mensahe aki, no solamente El a skohe un grupo proletario, pero tambe un muhé — no djis un muhé pero un muhé ku tabata biba den piká — un hende ku den e tempu ei tabata konsiderá esun di mas ménos. Mi ta kere Jesus a hasi esaki, asina ku kada unu di nos semper lo komprondé ku Su amor ta mas grandi ku nos temor, nos adikshon, nos duda, nos tentashonnan, nos pikánan, nos famianan kibrá, nos depreshon i angustia, nos malesanan króniko, nos pobresa, nos abuso, nos desesperashon, i nos soledat.²⁶ E ke pa tur sa ku no tin nada i niun hende ku E no ta kapabel pa kura i entregá nan un goso duradero.²⁷

Su grasia ta sufisiente.²⁸ Solamente E a baha mas abou ku tur kos. E poder di Su Ekspíashon ta e poder pa superá kualke karga den nos bida.²⁹ E mensahe di e muhé na e pos ta ku E sá nos situashon di bida³⁰ i ku semper nos por kana huntu ku n’E no opstante unda nos ta pará. Pa e i nos tur, E ta bisa, “Kualke unu ku bebe di e awa ku Ami lo duna e, nunka lo tin set; pero [lo tin] un pos di awa ku ta fasilitá bida eterno.”³¹

Den kualke biahenan di bida, dikon lo bo kita bai for di e úniko Salbador ku tin tur e poder pa kura i salba bo? No opstante ki preis bo tin ku paga pa Konfi’e, ta bale la pena. Mi rumannan, laga nos skohe pa ekspandé nos fe den Tata Selestial i nos Salbador, JesuCristu.

Den e profundidat di mi alma, mi testifiká ku E Iglesia di JesuCristu di e Santunan di Delaster Dianan ta e Salbador su Iglesia, dirigí dor di Cristu bibiente pa medio di un profeta berdadero. Mi deseo ta ku nos lo fielmente tuma riba nos mes e nòmber di JesuCristu — dor di mira manera E ta mira, dor di sirbi manera E a sirbi, i dor di konfia ku Su grasia ta sufisiente pa trese nos kas i pa goso duradero. Den e nòmber di JesuCristu, amèn.