Awor Ta E Tempu
Si tin kualke kos den boso bida ku boso mester konsiderá, awor ta e tempu.
Vários aña pasá, durante preparashon pa un biahe di negoshi, mi a kuminsá haña doló den mi pechu. Ku prekupashon, mi kasá a disidí pa kompañá mi. Durante e promé buelo pa nos destinashon, e doló a intensifiká na un punto ku a bira difísil pa mi hala rosea. Ora nos a baha, nos a sali for di aeropuerto i a bai un hòspital lokal, kaminda, despues di hopi tèst, e dòkter na warda a deklará mi bon pa sigui nos biahe.
Nos a regresá na e aeropuerto i a subi un buelo pa nos destinashon final. Durante e bahamentu e pilot a papia den e intercom i a puntra mi pa identifiká mi mes. E steward a aserká mi, i a bisa ku nan a kaba di risibí un yamada di emergensia, i a bisa mi ku tabatin un ambulans wardando mi na aeropuerto pa hiba nos hòspital.
Nos a subi e ambulans i ku purá a hiba nos na e sala di emergensia lokal. Aya, nos a topa ku dos dòkter angustiá ku a splika ku mi a haña un diagnóstiko robes i ku enbèrdat mi tabatin un embolismo pulmonar, òf klòmpi di sanger, den mi pulmon, ku tabatin di atenshon médiko inmediatamente. E dòkternan a informá nos ku hopi pashènt no ta biba ku e kondishon aki. Sabiendo ku nos tabata leu for di kas i sin ta sigur ku nos tabata prepará pa un evento ku lo kambia nos bida, e dòkternan a bisa ku si tabatin kualke kos den nos bida ku nos mester a resolvé, awor tabata e tempu.
Mi ta kòrda bon kon kasi instantáneamente den e momentu di angustia aki henter mi perspektiva a kambia. Lokual tabata parse asina importante momentunan promé awor tabata ménos importante. Mi pensamentunan a kambia for di prekupashonnan di mundu pa un perspektiva eterno — pensamentu di famia, yunan, mi kasá, i finalmente un evaluashon di mi mes bida.
Kon nos ta hasiendo komo famia i individualmente? Nos tabata biba nos bida di akuerdo ku e kombenionan ku nos a hasi i e espektativanan di Señor, òf kisas sin intenshon nos a pèrmití e prekupashonnan di e mundu distraí nos for e kosnan ku ta mas importante?
Lo mi ke invitá boso pa konsiderá un lès importante siñá pa eksperensia: pa hala patras for e mundu i evaluá boso bida. Òf den otro palabra di e dòkter, si tin kualke kos den boso bida ku boso mester konsiderá, awor ta e momentu.
Evaluá Nos Bida
Nos ta biba den un mundu ku masha hopi informashon, dominá pa distraishonnan ku ta sigui krese, i ku ta hasi mas difísil pa selekshoná den e konmoshon di e bida aki i enfoká riba kosnan di balor eterno. Nos bida diario ta bombardiá ku titularnan ku ta diseñá pa atraé nos atenshon, mustrá na nos dor di teknologianan ku ta kambia rápidamente.
A no ser ku nos tuma tempu pa pensa, nos lo no realisá e impakto di e ambiente ku ritmo rápido tin riba nos bida diario i di e skohensianan ku nos ta hasi. Nos lo haña nos bida konsumí ku kantidatnan chikitu di informashon den memes, video, i titularnan pa hala nos atenshon. Ounke interesante i entretenido, mayoria di esakinan tin poko di hasi ku nos progreso eterno, i tòg nan ta forma e manera ku nos ta mira nos eksperensia mortal.
E distraishonnan mundano aki por wòrdu kompará ku esnan den e soño di Lehi. Segun nos ta progresá riba e kaminda di kombenio ku nos man firme tene na e bara di heru, nos ta tende i mira esnan ku ta hasi bofon i mustra ku nan dede for di e edifisio grandi i espasioso (1 Nefi 8:27). Por ku nos inkonsientemente tin intenshon pa hasi asina, pero tin bia nos ta pousa i ta kambia nos atenshon pa mira kiko tur e konmoshon ta. Algun di nos por hasta laga e bara di heru lòs i move bai mas serka pa tin un mihó bista. Otronan por kai afó kompletamente pa motibu di esnan ku tabata hasi bofon di nan. (1 Nefi 8:28).
Señor a atvertí nos pa “tene kuidou ... pa kualke dia boso kurason no ta kargá ku … preokupashonnan di e bida aki” (Lukas 21:34). Revelashon moderno ta rekòrdá nos ku hopi ta yamá, pero poko ta eskohí. Nan no ta eskohí pasobra nan kurason ta poné … riba e kosnan di e mundu aki, i ta aspirá pa e honor di hòmber (Doktrina i Konvenio 121:35; wak tambe versikulo 34). Evaluá nos bida ta duna nos un oportunidat pa hala patras for di e mundu, reflehá riba unda nos ta pará riba e kaminda di kombenio, i, si ta nesesario, hasi adaptashon pa sigurá un garamentu firme i mirada padilanti.
Resientemente, den un devoshonal mundial pa hóbennan, Presidente Russell M. Nelson a invitá e hubentut pa hala patras for di e mundu, kita for di media sosial dor di apstené durante shete dia. Despues el a pidi nan pa nota kualke diferensia den kon nan a sinti, kiko nan a pensa, òf hasta kon nan a pensa. Despues el a invitá nan “pa hasi un evaluashon di bida profundo ku Señor … pa sigurá ku boso pianan ta firme poné riba e kaminda di kombenio.” El a kurashá nan pa si tin kosnan den nan bida ku mester di kambio, “awe ta e dia perfekto pa kambia.”1
Den evaluá kosnan den nos bida ku mester kambia, nos por hasi nos mes un pregunta práktiko: kon nos ta superá e distraishonnan di e mundu aki i keda enfoká riba e vishon di eternidat nos dilanti?
Den un diskurso di konferensia 2007 ku e titulo “Bon, Mihó, Mas Mihó” Presidente Dallin H. Oaks a siña kon pa hasi prioridat den skohensia den e hopi demandanan kontradiktorio mundano ku nos tin. El a konsehá, “nos tin ku keda sin algun kos bon pa por skohe otronan ku ta mihó òf mas mihó pasobra nan ta desaroyá fe den Señor Jesucristu i ta fortalesé nos famianan.”2
Mi ta sugerí ku e mihó kosnan den e bida aki ta sentrá riba Jesucristu i komprondé e bèrdatnan eterno di ken E ta i ken nos ta den nos relashon ku n’E.
Buska Bèrdat
Miéntras nos ta buska pa konosé e Salbador, nos no mester lubidá e bèrdat fundamental di ken nos ta i di kon nos ta aki. Amulek ta rekòrdá nos “e bida aki ta e tempu … pa prepará pa bai serka Dios,” e tempu “kua ta wòrdu duná na nos pa prepará pa eternidat” (Alma 34:32–33). Meskos ku e dicho bon konosí ta kòrda nos, “Nos no ta sernan humano hañando un eksperensia spiritual. Nos ta sernan spiritual hañando un eksperensia humano.”3
Komprondé nos orígennan dibino ta esensial pa nos progreso eterno i por liberá nos for di e distraishonnan di e bida aki. E Salbador a siña:
“Si boso keda fiel na mi palabranan, boso ta mi disípulonan di bèrdat;
“I boso lo konosé e bèrdat, i e bèrdat lo hasi boso liber” (Juan 8:31–32).
Presidente Joseph F. Smith a proklamá, “E logro di mas grandi ku humanidat por hasi den e mundu aki ta pa familiarisá nan mes ku e bèrdat dibino, asina profundo, asina perfekto, ku e ehèmpel òf kondukta ku ningun kriatura ku ta biba den e mundu nunka por laga nan duda di e konosementu ku nan a optené.”4
Awendia den e mundu, e debate tokante bèrdat a yega nivel haltu di intensidat, ku tur e bandanan reklamando bèrdat komo si fuera e tabata un konsepto relativo habrí pa interpretashon individual. E hóben José Smith a haña ku tabatin asina gran konfushon i lucha den su bida ku tabata imposibel pa yega na kualke konklushon tokante ken tabata korekto i ken tabata robes (Joseph Smith—History 1:10). Tabata durante di e guera di palabranan i tumulto di opinion aki ku el a buska guia dibino dor di buska bèrdat (Joseph Smith—History 1:10).
Den konferensia di aprel, Presidente Nelson a siña, “Si nos ke tin algun speransa di filtra e hopi opinionnan i e filosofianan di hòmber ku ta ataká e bèrdat, nos mester siña pa risibí revelashon.”5 Nos mester siña pa konfia riba e Spiritu di Bèrdat, kua “e mundu no por risibí, pasobra e no ta mir’é, tampoko konosé.” (Juan 14:17).
Miéntras e mundu aki ta move lihé na alternativanan falsu, nos mester kòrda e palabranan di Jakob ku e Spiritu ta papia e bèrdat i no ta gaña. E ta papia tokante kosnan na e manera ku nan ta realmente, i tokante kosnan manera ku nan lo bira, i e kosnan aki ta wòrdu manifestá kla na nos, pa e salbashon di nos alma. (Jakob 4:13).
Ora nos hala patras for di e mundu i evaluá nos bida, awor ta e tempu pa konsiderá kua kambionan nos mester hasi. Nos por tin gran speransa den sa ku nos Ehèmpel, Jesucristu, un biaha mas a guia e kaminda. Promé ku Su morto i Resurekshon, ora e tabata traha pa yuda esnan rònt di Dje pa komprondé Su ròl dibino, El a kòrda nan “pa boso tin pas den mi. Na mundu boso lo pasa tribulashon: pero tuma kurashi; ami a derotá e mundu” (Juan 16:33). Di Dje mi ta duna testimonio, den e nòmber di Jesucristu,amèn.