E Tata

Dor di Brian K. Ashton

Di Dos Konsehero den Presidensia General di Escuela Dominical

Kada un di nos tin e potensial di bira manera e Tata. Pa hasi esaki, nos mester alabá e Tata den nòmber di e Yu.

Durante henter su bida, mi kasá, Melinda, a purba ku henter su kurason pa ta un disípulo fiel di Jesucristu. Sinembargo, na kuminsamentu di su hubentut, el a sintié indigno di Tata Selestial su amor i bendishonnan pasobra el a komprondé Su naturalesa robes. Afortunadamente, Melinda a sigui warda e mandamentunan apesar di e tristesa ku e tabata sinti. Algun aña pasá, e tabatin un serie di eksperensia ku a yud’é komprondé Dios su naturalesa mihó, inkluso Su amor pa Su yunan i Su gratitut pa hasta nos esfuersonan imperfekto pa hasi Su obra.

E ta splika kon esaki a influensi’é: “Awor mi ta sinti sigur ku e Tata su plan ta funshoná, ku E ta envestí den nos éksito, i ku E ta duna nos e lèsnan i eksperensianan ku nos mester pa regresá na Su presensia. Mi ta mira mi mes i otronan mas manera Dios ta mira nos. Mi ta kapas di ta mayor, siña, i sirbi ku mas amor i ménos miedu. Mi ta sinti pas i konfiansa mas ku ansiedat i inseguridat. Enbes di sinti mi huzgá, mi ta sinti mi sostené. Mi fe ta mas sigur. Mi ta sinti Tata su amor mas biaha i mas profundo.”¹

Tin “un idea korekto di [Tata Selestial su] karakter, perfekshonnan, i atributonan” ta esensial pa ehersé fe sufisiente pa optené eksaltashon.² Un komprondementu korekto di Tata Selestial su karakter por kambia kon nos ta mira nos mes i otronan i ta yuda nos komprondé Dios su tremendo amor pa Su yunan i Su gran deseo pa yuda nos bira manera E. Un bista inkorekto di Su naturalesa por laga nos sinti manera ku nos ta inkapas pa yega un dia na Su presensia.

Mi meta awe ta pa siña e puntonan importante di doktrina tokante e Tata ku lo permití kada un di nos, pero espesialmente esnan ku ta puntra nan mes si Dios ta stima nan, pa komprondé Su karakter berdadero mihó i pa ehersé mas fe den E, Su Yu, i Su plan pa nos.

E Bida Premortal

Den e mundu premortal, nos a nase komo spiritunan na Mayornan Selestial i a biba ku Nan komo un famia.³ Nan tabata konosé i stima nos.⁴ Nos tabata ke pa ta meskos ku nos Tata Selestial masha hopi. Sinembargo, pa hasi asina, nos a rekonosé ku nos mester a:

Haña kurpa físiko, glorifiká, inmortal;⁵
Kasa i forma famia dor di e poder di saserdosio pa seya;⁶ i
Atkerí tur konosementu, poder, i atributonan dibino.⁷

Konsekuentemente, e Tata a krea un plan ku lo pèrmití nos bou di algun kondishon⁸ pa haña kurpa físiko ku lo bira inmortal i glorifiká den e Resurekshon; kasa i forma famia den mortalidat òf, pa esnan fiel ku no a haña e oportunidat, despues di mortalidat;⁹ progresá te na perfekshon; i finalmente regresá na nos Mayornan Selestial i biba ku Nan i nos famianan den un estado di eksaltashon i felisidat eterno.¹⁰

E skrituranan ta yama esaki e plan di salbashon.¹¹ Nos tabata asina gradesí pa e plan aki ku ora el a wòrdu presentá na nos, nos a grita di goso.¹² Kada un di nos a aseptá e kondishonnan di e plan, inkluso e eksperensianan i desafionan di mortalidat ku lo yuda nos desaroyá atributonan dibino.¹³

Bida Mortal

Den mortalidat, Tata Selestial a proveé nos ku e kondishonnan ku nos tin mester pa progresá den Su plan. E tata a engendra Jesucristo den e karni¹⁴ i a provee E ku e yudansa divino pa kumpli ku Su mishon morta. Igual E Tata ke yuda nos kada un si nos ke esforsá nos mes pa warda Su mandamentunan.¹⁵ E ta duna nos albedrio.¹⁶ Nos bida ta den Su man, i nos “dianan ta konosí” i “nos dianan lo no wòrdu kòrta.¹⁷ I E ta sigurá ku finalmente tur kos lo sali bon pa esnan ku ta stim’É.¹⁸

Ta Tata Selestial ta esun ku ta duna nos nos pan diario,¹⁹ ku ta inkluí e kuminda ku nos ta kome i e forsa ku nos mester pa warda Su mandamentunan.²⁰ E ta duna nos bon donnan.²¹ E ta skucha i ta kontestá nos orashonnan.²² Tata Selestial ta libra nos for di malu ora nos lag’é.²³ E ta yora pa nos ora nos ta sufri.²⁴ Finalmente, tur nos bendishonnan ta bini for di E Tata.²⁵

Tata Selestial ta guia i ta duna nos e eksperensianan ku nos tin mester basá riba nos forsa,debilidatnan, i skohensianan p’asina nos por karga bon fruta.²⁶ E Tata ta skual nos ora ta nesesario pasobra E ta stima nos. ²⁷ E ta e Hòmber di Konseho, ²⁸ ku lo konsehá nos si nos puntra.²⁹

Ta Tata Selestial ta esun ku ta manda e influensia i e don di e Spiritu Santu den nos bida.³⁰ Pa medio di e don di e Spiritu Santu, e gloria — òf inteligensia, lus, i poder — di e Tata por biba den nos.³¹ Si nos ke hasi esfuerso pa oumentá e lus i bèrdat te ora nos bista bira solamente na Dios su gloria, Tata Selestial lo manda e Spiritu Santu di Promesa pa seya nos te na bida eterno i revelá Su kara na nos---sea den e bida aki òf den e siguiente.³²

Bida Despues di Morto

Den e mundu spiritual despues di morto, Tata Selestial ta sigui drama e Spiritu Santu i ta manda mishoneronan na esnan ku mester di e evangelio. E ta kontestá orashonnan i ta yuda esnan ku falta nan pa risibí ordenansanan vikario di salbashon.³³

E Tata a lanta Jesucristu i a dun’É poder pa laga e Resurekshon sosedé,³⁴ ku ta e medio pa kua nos ta optené kurpa inmortal. E Salbador su Redenshon i Resurekshon ta trese nos bèk den presensia di e Tata, kaminda nos lo wòrdu huzgá pa JesuCristu.³⁵

Esunnan ku ta konfia riba “e méritonan, i miserikòrdia, i grasia di e Santu Mesias”³⁶ lo risibí kurpa glorifiká meskos ku e Tata³⁷ i lo biba ku n’e “den un estado di felisidat sin fin.”³⁸ Aya, e Tata lo kita tur nos lágrimanan³⁹ i lo yuda nos sigui riba e biahe pa bira meskos ku E.

Manera boso por mira, Tata Selestial ta semper ei pa nos.⁴⁰

E Karakter di e Tata

Pa bira meskos ku e Tata, nos mester desaroyá e kualidatnan di Su karakter. Tata Selestial su perfekshonnan i atributonan ta inkluí lo siguiente:

E Tata ta “Sin fin i Eterno.”⁴¹
E ta perfektamente hustu, miserikordioso, amabel, yen di pasenshi, i ke solamente lokual ta bon pa nos.⁴²
Tata Selestial ta amor ⁴³
E ta kumpli ku Su kombenionan.⁴⁴
E no ta kambia.⁴⁵
E no por gaña.⁴⁶
E Tata no ta hasi asepshon di persona.⁴⁷
E sa tur kos---pasado, presente, i futuro — for di e kuminsamentu.⁴⁸
Tata Selestial ta mas inteligente ⁴⁹ ku nos tur.⁵⁰
E Tata tin tur poder⁵¹ i ta hasi tur lokual E tin den Su kurason pa hasi.⁵²

Rumannan, nos por konfia den i riba e Tata. Pasobra E tin un perspektiva eterno, Tata Selestial por mira kosnan ku nos no por mira. Su goso, obra, i gloria ta pa logra nos inmortalidat i eksaltashon.⁵³ Tur kos ku E ta hasi ta pa nos benefisio. E “ke [nos] felisidat eterno mas ku [nos] ke.”⁵⁴ I E “lo no pidi [nos] pa eksperensiá un momentu mas di difikultat ku ta apsolutamente nesesario pa [nos] benefisio òf pa esun di esnan ku [nos]ta stima.”⁵⁵ Komo resultado, e ta enfoka riba yuda nos progresa, no riba husga nos i kondena nos.⁵⁶

Bira Manera Nos Tata

Komo yunan spiritual di Dios, nos kada un tin e potensial pa bira manera e Tata. Pa hasi asina, nos mester adorá e Tata den e nòmber di e Yu.⁵⁷ Nos ta hasi esaki dor di hasi esfuerso pa ta obediente na e boluntat di e Tata, meskos ku e Salbador tabata,⁵⁸ i dor di arepentí kontinuamente.⁵⁹ Segun nos hasi e kosnan aki, nos lo risibí grasia riba grasia te ora nos risibí di e plenitut⁶⁰ di e Tata i ta envestí ku su karakter, perfekshonnan i atributonan.⁶¹

Konsiderando e diferensia entre lokual nos ta komo mortalnan i lokual Tata Selestial a bira, no ta sorprendente ku algun ta sinti ku bira meskos ku e Tata ta inalkansabel. Sinembargo, e skrituranan ta kla. Si nos ke pega den fe na Cristu, arepentí, i buska Dios su grasia dor di obedensia, eventualmente nos lo bira meskos ku e Tata. Mi ta haña hopi konsuelo den e hecho ku esnan ku esforsá pa ta obediente lo “risibí grasia riba grasia” i finalmente “risibí di su plenitut.”⁶² Den otro palabra, nos lo no bira meskos ku e Tata riba nos mes.⁶³ Mas bien, e lo yega mediante donnan di grasia, algun grandi pero mayoria chikitu, lo edifiká riba otro te ora nos tin un plenitut. Pero e lo yega!

Mi ta invitá boso pa konfia ku Tata Selestial sa kon pa eksaltá boso; buska Su yudansa sostenedó diariamente; i pusha padilanti ku fe den Cristu hasta ora boso no por sinti Dios su amor.

Tin hopi ku nos no ta komprondé tokante bira meskos ku e Tata.⁶⁴ Pero mi por testifiká ku siguridat ku esforsá pa bira meskos ku e Tata ta bal tur sakrifisio.⁶⁵ E sakrifisionan ku nos ta hasi aki den mortalidat, no ta importá kon grandi, ta simplemente inkomparabel ku e goso, felisidat, i amor sin midí ku nos lo sinti den Dios su presensia.⁶⁶ Si boso ta luchando pa kere ku ta bal la pena sakrifisio ku boso ta wòrdu pidí pa hasi, e Salbador ta yama boso, bisando; … boso no por karga tur kos awor; tòg, tin animo, pasobra ami lo guia boso riba kaminda.⁶⁷

Mi ta testifiká ku boso Tata Selestial ta stima boso i ke pa boso biba ku n’É atrobe. Den e nòmber di Jesucristu, amèn.